መዝሙረ ዳዊት Psalm

እስመ ናሁ ዘአንተ ሠራዕከ እሙንቱ ነሠቱ፤
ወጻድቅሰ ምንተ ገብረ፤
እግዚአብሔር ውስተ ጽርሐ መቅደሱ።

ወንጌል Gospel

፵፪. ወቦቱ ባሕቱ ብዙኃን እመላእክተ ሕዝብ እለ አምኑ ቦቱ። ወባሕቱ ኢያግሀዱ በእንተ ፈሪሳውያን ከመ ኢይስድድዎሙ እምነ ምኵራብ። ፵፫. እስመ አብደሩ ያድልዉ ለሰብእ እምያድልዉ ለእግዚአብሔር። ፵፬. ወጸርኀ እግዚእ ኢየሱስ ወይቤ፦ ዘየአምን ብየ አኮ ብየ ዘየአምን ዘእንበለ በዘፈነወኒ። ፵፭. ወዘርእየ ኪያየ ርእዮ ለዘፈነወኒ። ፵፮. ወአንሰ ብርሃን መጻእኩ ውስተ ዓለም ከመ ኵሉ ዘየአምን ብየ ኢይነብር ውስተ ጽልመት። ፵፯. ወዘኒ ሰምዐ ቃልየ ወኢዐቀቦ አኮ አነ ዘእኴንኖ። እስመ ኢመጻእኩ ከመ እኰንኖ ለዓለም ዘእንበለ ከመ አድኅኖ ለዓለም። ፵፰. ወዘሰ ክሕደኒ ወኢተወክፈ ቃልየ ሀሎ ዘይኴነኖ። ቃል ዘአነ ነበብኩ ውእቱ ይኴንኖ በደኃሪት ዕለት። ፵፱. እስመ አኮ ዘእምኀቤየ ዘነበብኩ አላ አብ ዘፈነወኒ ውእቱ ትእዛዘ ወሀበኒ ዘከመ እነብብ ወዘከመ እብል። ፶. ወአአምር ከመ ትእዛዙ ሕይወት ውእቱ ዘለዓለም። ወዘሂ እነግር አነ በከመ ይቤለኒ አብ ከማሁ እነግር። ዘየአምን በወልድ ቦ ሕይወት ዘለዓለም።

መልእክተ ጳውሎስ Pauline Epistle

፳፩. በተአምኖ አመ ይመውት ያዕቆብ ባረኮሙ ለደቂቀ ዮሴፍ ለለአሐድ ወሰገደ ውስተ ከተማ በትሩ። ፳፪. በተአምኖ አመ ይመወት ዮሴፍ ተዘከረ በእንተ ፀአቶሙ ለደቂቀ እስራኤል እምድረ ግብፅ ወአዘዘ በእንተ አዕጽምቲሁ። ፳፫. በተአምኖ ተወሊዶ ሙሴ ኀብእዎ ሠለስተ አውራኀ በቤተ አበዊሁ እስመ ርእይዎ ከመ ሠናይ ውእቱ ሕፃኑ ወኢፈርሁ ትእዛዘ ንጉሥ። ፳፬. በተአምኖ ልሂቆ ሙሴ ክሕደ ኢይበልዎ ወልደ ወለተ ፈርዖን። ፳፭. ወአብደረ ይሕምም ምስለ ሕዝበ እግዚአብሔር እምይደለው ለሰዓት ወይከውኖ ኃጢአት። ፳፮. እስመ አእመረ ከመ ያዐቢ ትዕይርቶ ለክርስቶስ እምኵሉ መዛግብቲሆሙ ለግብፅ። ፳፯. በተአምኖ ኀደረ ብሔረ ግብፅ ኢፈሪሆ መዓተ ንጉሥ እስመ አብደረ ይፍርሆ ለዘኢያስተርኢ እምዘ ይሬኢ ጸኒሖ ዕሤቶ። ፳፰. በተአምኖ ገብረ ፍሥሐ ወነዝኀ ደመ ከመ ኢያጥፍኦ ሎሙ በኵሮሙ ብድብድ። ፳፱. በተአምኖ ዐደውዋ ለባሕረ ኤርትራ ከመ ዘውስተ ምድር ይቡስ ወኮነቶሙ መከራ ለግብፅ ተሠጢሞሙ። ፴. በተአምኖ ወድቀ አረሩቲሃ ለኢያሪኮ አመ የዓውድዋ ሰቡዐ ዕለተ። ፴፩. በተአምኖ ረአብ ዘማ ኢትሐጕለት ምስለ ዐላውያን እስመ ተወክፈቶሙ ለሰብአ ዐይን ወኀብአቶሙ በሰላም።

ዘካልእ መልእክት Universal Epistle

፯. እስመ ቀርበ ማኅለቅቱ ለኵሉ አንጽሑ ልበክሙ ወጸሐዉ ለጸሎት። ፰. ወእምኵሉሰ ዘይቀድም ተሩቀሩ በበይናቲክሙ በምልአ ልብክሙ እስመ ተፋቅሮ ይደመስሶን ለኵሎን ኃጣውእ። ፱. ወአፍቅሩ ነግደ እንዘ ኢታስተዓፅቡ። ፲. ወኵልክሙ በከመ ነሣእክሙ ፍቶ ለእግዚአብሔር በበይናታክሙ ተለአኩ ከመ ኄር ላእክ። እስመ ለለአሐዱ ዘዘዚአሁ ዕሤቱ እምኀበ እግዚአብሔር። ፲፩. ወለእለሂ ትሜህሩ መሀሩ ቃሎ ለእግዚአብሔር ወዘኒ ይትለአክ ለይትለአክ በኀይለ እግዚአብሔር ዘወሀቦ ከመ በኵሉ ይሰባሕ እግዚአብሔር በኢየሱስ ክርስቶሰ ዘሎቱ ስብሐት ለዓለመ ዓለም አሜን።

ግብረ ሃዋርያት Acts

፱. ወአበዊነሂ ቀደምት ቀኒኦሙ ላዕለ ዮሴፍ ሤጥዎ ለብሔረ ግብፅ። ወሀሎ እግዚአብሔር ምስሌሁ። ፲. ወአድኀኖ እምኵሉ ምንዳቤሁ ወወሀቦ ሞገሰ ወጥበበ በቅድመ ፈርዖን ንጉሠ ግብፅ። ወሤሞ ላዕለ ኵሉ ግብፅ። ወአመገቦ ላዕለ ኵሉ ቤቱ። ፲፩. ወመጽአ ረኃብ ለብሔረ ግብፅ ወከነዓን ወዓቢይ ሕማም ወኃጥኡ ዘይሴሰዩ አበዊነ። ፲፪. ወሰምዐ ያዕቆብ ከመቦ እክል በብሔረ ግብፅ ወፈነዎሙ ለአበዊነ ቅድመ። ፲፫. ወሶበ ገብኡ ዳግመ ለግብፅ አእመርዎ ለዮሴፍ አኃዊሁ ወአእመሮሙ ፈርዖንሂ ለአዝማደ ዮሴፍ። ፲፬. ወለአከ ዮሴፍ ወጸውዖሙ ለአቡሁ ወለኵሎሙ አዝማዲሁ ወኮነ ፍቅዶሙ ሰብዓ ወኀምስቱ ነፍስ። ፲፭. ወወረደ ያዕቆበ ብሔረ ግብፅ ወሞተ ውእቱ ወአበዊነሂ። ፲፮. ወአፍለስዎሙ ኀበ ሴኬም ወተቀብሩ ውስተ መቃብር ዘተሣየጦ አብርሃም በወርቁ በኀበ ደቂቀ ኤሞር ወልደ ሴኬም። ፲፯. ወአመ በጽሐ ዕድሜሁ ዘአሰፈዎ እግዚአብሔር ለአብርሃም በመሐላ በዝኁ ሕዝብ ወመልኡ ብሔረ ግብፅ። ፲፰. እስከ አመ ነግሠ ከልእ ንጉሥ ለብሔረ ግብፅ ዘኢያአምሮ ለዮሴፍ። ፲፱. ወውእቱ ተጠቢቦ አሕመሞሙ ለአበዊነ ወአዘዘ ይቅትሉ ኵሎ እጓለ ተባዕተ። ፳. ወውእተ አሚረ ተወልደ ሙሴ ወኮነ ሠናየ በቅድመ እግዚአብሔር ወሐፀንዎ ሠለስተ አውራኀ በቤተ አቡሁ። ፳፩. ወእምዝ ገደፍዎ ወአንሥአቶ ወለተ ፈርዖን ወሐፀነቶ ወረሰየቶ ወልዳ። ፳፪. ወተምህረ ሙሴ ኵሎ ጥበበ ግብፅ ወኮነ ጽኑዐ በቃሉ ወበምግባሩ።

ስንክሳር Synaxarium

ቅዳሴ ቤቱ ለለውንትዮስ
ወቶማስ
ወቆዝሞስ
ወዮሴፍ
ወቶማስ፡ ወቆዝሞስ፡ ወዮሴፍ፡ ወቢራሞን

መዝሙር Psalm

ወሤሞ መልአከ አሕዛብ፤
ወረሰዮ እግዚአ ለቤቱ፤
ወአኰነኖ ላዕለ ኵሉ ጥሪቱ።

ወንጌል Gospel

፵፭. መኑ እንጋ ገብር ማ እመን ወጠቢብ ዘይሠይሞ እግዚኡ ውስተ ቤቱ ከመ የሀቦሙ ሲሲተ በጊዜሁ? ፵፮. ብፁዕ ውእቱ ገብር ዘመጺኦ እግዚኡ ይረክቦ እንዘ ዘንተ ይገብር። ፵፯. አማን እብለክሙ ከመ ዲበ ኵሉ ጥሪቱ ይሠይሞ። ፵፰. ወእመሰ ይቤ ውእቱ ገብር እኩይ በልቡ፦ ይጐነዲ አቲወ እግዚእየ። ፵፱. ወይዘብጥ አብያጺሁ ወይበልዕ ወይሰቲ ምስለ ሰከርት። ፶. ወይመጽእ እግዚኡ ለውእቱ ገብር በዕለት ኢትሐዘበ ወበጊዜ ኢያእመረ። ፶፩. ወይኴንኖ ወይመትሮ ወያገብእ መክፈልቶ ምስለ መድልዋን ኀበ ብካይ ወሐቂየ ስነን። ሰማይ ወምድር የኀልፍ ወቃልየሰ ኢየኀልፍ ይቤ እግዚእ ለአርዳኢሁ።

ቅዳሴ Liturgy :

መዝሙረ ዳዊት Psalm

ዘይሜህሮሙ ለሰብእ ጥበበ፤
እግዚአብሔር የአምር ሕሊናሆሙ ለጠቢባን ከመ ከንቱ ውእቱ፤
ብፁዕ ብእሲ ዘአንተ ገሠፅኮ እግዚኦ።

ወንጌል Gospel

፲፯. እምይእቲ ዕለት አኀዘ እግዚእ ኢየሱስ ይስብክ ወይበል፦ ነስሑ እስመ ቀርበት መንግሥት ሰማያት። ፲፰. ወእንዘ ያንሶሱ መንገለ ባሕረ ገሊላ ርእየ ክልኤተ አኀወ፥ ስምዖንሃ ዘተሰምየ ጴጥሮስ፥ ወእንድርያስሃ እኅዋሁ እንዘ ያወርዱ መርበብቶሙ ውስተ ባሕር እስመ መሠግራን እሙንቱ። ፲፱. ወይቤሎሙ እግዚእ ኢየሱስ፦ ንዑ ትልዉኒ ድኅሬየ ወእሬስየክሙ ትኩኑ መሠግራነ ሰብእ። ፳. ወበጊዜሃ ኀደጉ መሣግሪሆሙ ወተለውዎ። ፳፩. ወኅሊፎ ሕቀ እምህየ ርእየ ካልኣነ ክልኤተ አኀወ ያዕቆብሃ ወልደ ዘብዴዎስ ወዮሐንስሃ እኅዋሁ ውስተ ሐመር ምስለ ዘብዴዎስ አቡሆሙ ይሠርዑ ወያስተሣንዩ መሣግሪሆሙ ወጸውዖሙ። ፳፪. ወበጊዜሃ ኀደጉ ሐመሮሙ ወአባሆሙ ወተለውዎ። ሰማይ ወምድር የኀልፍ ወቃልየሰ ኢየኀልፍ ይቤ እግዚእ ለአርዳኢሁ።

መዝሙረ ዳዊት Psalm

ወለነዳያኒሃኒ አጸግቦሙ እክለ፤
ወለካህናቲሃኒ አለብሶሙ ሕይወተ፤
ወጻድቃኒሃኒ ትፍሥሕተ ይትፌሥሑ።

ወንጌል Gospel

፴፬. ወአውሥአ እግዚእ ኢየሱስ ወይቤሎሙ፦ አኮኑ ጽሑፍ ውስተ ኦሪትክሙ፦ አንሰ እቤ አማልክት አንትሙ? ፴፭. ወሶበ ለእልክቱ አማልክት ይቤሎሙ እለ ኮነ ቃለ እግዚአብሔር ኀቤሆሙ፤ ወኢይትከሀል ይትነሠት ቃለ መጽሐፍ። ፴፮. ወዘሰ ቀደሶ አብ ወፈነዎ ውስተ ዓለም እፎ እንከ ትብሉኒ፦ ትፀርፍ፥ ለእመ እቤለክሙ፦ ወልደ እግዚአብሔር አነ? ፴፯. ወእመሰ ኢይገብር ግብሮ ለአቡየ ኢትእመኑ ብየ። ፴፰. ወእመሰ እገብር ለእመ ኪያየ ኢአመንክሙ ለግብርየ፥ እመኑ ከመ ታእምሩ ወትጠይቁ ከመ አነ በአብ ወአብ ብየ። ፴፱. ወየኀሥሡ ካዕበ የአኀዝዎ ወአምሰጠ እምእዴሆሙ። ፵. ወሖረ ካዕበ ማዕዶተ ዮርዳኖስ ብሔረ ኀበ አጥመቀ ዮሐንስ ቀዲሙ ወነበረ ህየ። ፵፩. ወብዙኃን ሖሩ ኀቤሁ ወይቤሉ፦ ዮሐንስ አልቦ ዘገብረ ተኣምረ ወኢምንተኒ፤ ወባሕቱ ኵሉ ዘይቤ ዮሐንስ በእንተዝ ብእሲ እሙነ ኮነ። ፵፪. ወብዙኃን እለ አምኑ ቦቱ በህየ። ዘየአምን በወልድ ቦ ሕይወት ዘለዓለም።

መልእክተ ጳውሎስ Pauline Epistle

፳፱. ወነቢያትኒ ይትናገሩ በበክልኤቱ ወበበሠለስቱ ከመ ይትዐወቅ ለቤተ ክርስቲያን ቃሎሙ። ፴. ወእመሰቦ ለዘአስተርአዮ ወተከሥተ ሎቱ እንዘ ንቡር ለያርምም ቀዳማዊ። ፴፩. እስመ ይትከሀለክሙ ትትነበዩ ኵልክሙ በበአሐዱ ከመሕ ኵሉ ይትመሀር ወከመ ኵሉ ይትፌሣሕ። ፴፪. እስመ መንፈስ ነቢያት ይትኤዘዝ ለነቢያት። ፴፫. እስመ ኢኮነ እግዚአብሔር አምላከ ሀከክ ዘእንበለ አምላከ ሰላም፥ በከመ ይትገበር በኵሉ ቤተ ክርስቲያኖሙ ለቅዱሳን። ፴፬. ወአንስትኒ ለያርምማ በቤተ ክርስቲያን እስመ ኢእዙዘ ይትናገራ ዘእንበለ ከመ ይትአዘዛ እስመ ከማሁ ይቤ ኦሪት። ፴፭. ወእመሰ ይፈቅዳ ይትመሀራ በአብያቲሆን አምታቲሆን ይሰአላ። እስመ ኀሳር ውእቱ ለብእሲት ተናግሮ በቤተ ክርስቲያን። ፴፮. እምኀቤክሙኑ፥ ዳእሙ ወጽአ ቃለ እግዚአብሔር ወኀበ ባሕቲትክሙኑ ዘጽሐ ቃለ እግዚአብሔር? ፴፯. ወእመቦ ዘይብል ርእሶ ከመ ነቢይ ውእቱ አው መንፈስ ቅዱስ ላዕሌሁ ያእምር ዘንተ ዘጸሐፍኩ ለክሙ እስመ ትእዘዛ እግዚአብሔር ውእቱ። ፴፰. ወዘሰ ኢየአምር፥ አያእምር። ፴፱. ወይእዜኒ አኀዊነ ትቃኀዉ ለተነብዮ ወለዘኒ ይነብብ በነገረ በሐውርት ኢትክልእዎ። ፵. ወኵሎ ሥሩዐ ወዕቁመ ወውሱነ ግበሩ።

ዘካልእ መልእክት Universal Epistle

፲፪. ወእምኵሉሰ ዘይቀድም አኀዊነ ኢትምሐሉ ኢ በሰማይ፥ ወኢ በምድር፥ ወኢ በካልእ መሐላ ኢትምሐሉ ግሙራ ወኢበምንትኒ አላ አሐደ ይኩን ቃልክሙ እመኒ፦ እወ እወ፥ ወእመኒ፦ አልቦ አልቦ፥ ከመ ኢትትኰነኑ ወኢትባኡ ውስተ ደይን። ፲፫. እመቦ ዘይቴክዝ ለይጸሊ፥ ወእመቦ ዘተፈሥሐ ለይዘምር። ፲፬. ወእመቦ ዘይደዊ እምኔክሙ? ለይጸውዕ ቀሳውስተ እለ ቤተ ክርስቲያን ወይጸልዩ ላዕሌሁ ወይቅብእዎ ቅብአ ጸሎት በስሙ ልእግዚእነ። ፲፭. ወጸሎተ ሃይማኖት ያሐይዎ ለድውይ ወያነሥኦ እግዚአብሔር ወእመኒ ቦቱ ኃጢአት ይትኀደግ ሎቱ። ፲፮. ተአመኑ በበይናቲክሙ ኃጢአተክሙ ወጸልዩ ላዕለ ቢጽክሙ ከመ ትሕየዉ። ብዙኀ ትረድእ ጸሎቱ ለጻድቅ ትክል ወታሰልጥ።

ግብረ ሃዋርያት Acts

፳፬. ወሰበከ ሎሙ ዮሐንስ ጥምቀተ ለኵሉ ሕዝበ እስራኤል ከመ ይነስሑ እምቅድመ ምጽአተ ዚአሁ። ፳፭. ወፈጺሞ ዮሐንስ መልእክቶ ይቤሎሙ፦ ምንትኑ ትትሐዘቡኒ ኪያየ? አንሰ ኢኮንኩ ኪያሁ። ናሁ ይመጽእ እምድኅሬየ ዘኢይደልወኒ እፍታሕ ቶታነ አሣእኒሁ እምእገሪሁ። ፳፮. አንትሙ አኃዊነ ትውልደ ዘመደ አብርሃም ወእለ ይፈርህዎ ለእግዚአብሔር። ለክሙ ተፈነወ ዝነገረ ሕይወት። ፳፯. ወእለሰ ይነብሩ ኢየሩሳሌም ወመላእክቲሆሙ ኢያእመርዎ ለዝንቱ ወኢለበዉ መጻሕፍት ነቢያት እንዘ ያነብብዎ በኵሉ ሰንብት። አላ ፈትሑ ላዕሌሁ ወፈጸሙ ዘተጽሕፈ። ፳፰. ወሶበ ኢረከቡ ሎቱ ጌጋየ ወኢምንተኒ በዘይቀትልዎ ሰአልዎ ለጲላጦስ ከመ ይቅትሎ። ፳፱. ወሶበ ፈጸሙ ኵሎ ዘተጽሕፈ በእንቲአሁ አውረድዎ እምዕፅ ወወደይዎ ውስተ መቃብር። ፴. ወእግዚአበሔር አንሥኦ እሙታን። ፴፩. ወአስተርአዮሙ ብዙኀ መዋዕለ ለእለ ዐርጉ ምስሌሁ እምገሊላ ለኢየሩሳሌም። ወእሙንቱ ኮንዎ ሰማዕተ በኀበ ሕዝብ።

ስንክሳር Synaxarium

አስተርእዮተ ሥጋሆሙ ለቅዱስ ዮሐንስ መጥምቅ ወለኤልሳዕ ነቢይ
ወበዓለ ሰዊት አው ዝአዊት
ወቄርሎስ
ወአኬልጥስ
ወቀውስጦስ

መዝሙር Psalm

ብፁዓን ኵሎሙ እለ ይነብሩ ውስተ ቤትከ፤
ወለዓለመ ዓለም ይሴብሑከ፤
ብፁዕ ብእሲ ዘእምኀቤከ ረድኤቱ እግዚኦ።

ወንጌል Gospel

፳፬. ወኀሊፎሙ አርዳኢሁ ለዮሐንስ አኀዘ ይበሎሙ ለሕዝብ በእንተ ዮሐንስ መጥምቅ፦ ምንተኑ ወፃእክሙ ገዳመ ትርአዩ? ብርዐኑ ዘይትሐወስ እምነፋስ? ፳፭. ወምንተኑመ ወፃእክሙ ትርአዩ? ብእሴኑ ዘርሱይ በቀጠንት አልባስ? ናሁ እለሰ ርሱያን አልባሰ ክብር ውስተ አብያተ ንገሥት ሀለዉ። ፳፮. ወምንተኑመ ወፃእክሙ ትርአዩ? ነቢየኑ? እወ እብለክ፥ ወየዐቢ እምነቢይ። ፳፯. ዝውእቱ ዘበእንቲአሁ ተጽሕፈ፦ ናሁ፥ አነ እፌኑ መልአክየ ቅድመ ገጽከ ዘይጸይሕ ፍኖተከ በቅድሜከ። ፳፰. አማን እብለክሙ፥ ኢይትነሣእ እምትውልደ አንስት ዘየዐቢ እምዮሐንስ መጥምቅ ወኢመኑሂ፤ ወበመንግሥተ እግዚአብሔርሰ ዘይንእሶ የዐብዮ። ፳፱. ወሰሚዖመ ኵሎሙ ሕዝብ ወመጸብሓን አጽደቅዎ ለእግዚአብሔር እስመ ተጠመቁ ጥምቀተ ዮሐንስ። ፴. ወፈሪሳውያንሰ ወጸሐፍተ ሕግ ሀለዉ ትእዛዘ እግዚአብሔር ወኢተጠምቁ በኀቤሁ። ፴፩. ወይቤ እግዚእነ፦ በምንት አስተማስሎሙ ለሰብአ ዛቲ ትውልድ? ወመነ ይመስሉ? ፴፪. ይመስሉ ደቂቀ እለ ይነብሩ ውስተ ምሥያጥ ወይጼውዑ ቢጾሙ ወይብልዎሙ፦ ኀለይነ ለክሙ ወኢዘፈንክሙ፤ አሰቆቀውነሂ ለክሙ ወኢበከይክሙ። ፴፫. እስመ መጽአ ዮሐንስ መጥምቅ ኢይበልዕ እክለ ወኢይሰቲ ወይነ ወትቤልዎ፦ ጋኔነቦ። ፴፬. ወመጽአ ወልደ እጓለ እመሕያው ይበልዕ ወይሰቲ ወትቤሉ፦ ነዋ ብእሲ በላዒ ወሰታዬ ወይን ዐርከ መጸብሓን ወኃጥኣን። ፴፭. ወጸድቀት ጥበብ እምኵሉ ውሉዳ። ይቀልል ኅልፈተ ሰማይ ወምድር፥ እምትደቅ አሐቲ ቃል እምኦሪት ወእምነቢያት፥ ይቤ እግዚእ ለአርዳኢሁ።

ቅዳሴ Liturgy :

መዝሙረ ዳዊት Psalm

ፍትሕ ወርትዕ ተድላ መንበሩ፤
እሳት የሐውር ቅድሜሁ፤
ወነድ የዓግቶሙ ለጸላእቱ።

ወንጌል Gospel

፵፱. እሳተ አምጻእኩ ለብሔር ወምንተ እፈቅድ ለእመ ወድአት ነደት። ፶. ጥምቀተ ብየ ዘእጠመቅ ወእፎ እትዔገሥ እስከ እፌጽማ። ፶፩. ወይቤሎሙ ለሕዝብ፦ ይመስለክሙኑ ሰላመ ዘአምጻእኩ ለምድር? አልቦ፥ እብለክሙ ዘእንበለ መጥባሕተ ወፍልጣነ። ፶፪. ወእምይእዜሰ ለእመ ኃምስቱ ሀለዉ ውስተ ቤት ይትፋለጡ ሠለስቱ እምክልኤቱ ወይትፋለጡ ክልኤቱ እምሠለስቱ። ፶፫. ወይትፈለጥ አብ እምወልዱ ወወልድኒ እምአቡሁ፤ ወትትፈለጥ እም እምወለታ ወወለትኒ እምእማ። ወሐማት እመርዓታ ወመርዓት እምሐማታ። ፶፬. ወይቤሎሙ ለሕዝብ፦ ሶበ ትሬእዩ ደመና ዘይዴምን መንገለ ዐረብ ዝናም ለመጺእ ከመዝ ይከውን ትብሉ። ፶፭. ወሶበ ይነፍኅ ንፋሰ አዜብ ሐሩር ለመጺእ ከመዝ ይከውን ትብሉ። ፶፮. ኦ መድልዋን፥ ለገጸ ሰማይ ወምድር ታአምሩ አመክሮቶ፥ ወእፎ ኢታአምሩ አመክሮቶን ለእላንቱ መዋዕል? ፶፯. ወለምንትኑ ለሊክሙ ኢትፈትሑ ጽድቀ? ፶፰. ሶበ ተሐውር ምስለ ዕድውከ ኀበ መልአክ ተዓረቅ በፍኖት ወስልጥ ዘትፈድዮ ከመ ኢይትባጽሐከ ኀበ መኰንን ወመኰንን ይሜጥወከ ለወዓሊሁ ወወዓሊሁ ይሞቅሐከ። ፶፱. እብለከ ከመ ኢትወፅእ እምህየ እስከ ትሰልጥ ደኃሪተ ገመሰ። ይቀልል ኅልፈተ ሰማይ ወምድር፥ እምትደቅ አሐቲ ቃል እምኦሪት ወእምነቢያት፥ ይቤ እግዚእ ለአርዳኢሁ።

መዝሙረ ዳዊት Psalm

ወአድኅነኒ በእንተ ምሕረትከ፤
እስመ አልቦ በውስተ ሞት ዘይዜከረከ፤
ወበሲኦልኒ መኑ የአምነከ።

ወንጌል Gospel

፲፰. ወእንዘ ዘንተ ይነግሮሙ ናሁ መጽአ አሐዱ መኰንን ወሰገደ ሎቱ እንዘ ይብለ፦ ወለትየ ይእዜ ሞተት፤ ወባሕቱ ነዓ አንብር እዴከ ላዕሌሃ ወተሐዩ። ፲፱. ወተንሥአ እግዚእ ኢየሱስ ወተለዎ ወአርዳኢሁኒ። ፳. ወናሁ ብእሲት እንተ ደም ይውሕዛ እምዐሠርቱ ወክልኤቱ ዐመት መጽአት እንተ ድኅሬሁ ወገሰሰት ጽንፈ ልብሱ፤ ፳፩. ወትቤ በልባ፦ እምከመ ገሰስኩ ጽንፈ ልብሱ፥ አሐዩ። ፳፪. ወተመይጠ እግዚእ ኢየሱስ ወርእያ ወይቤ፦ ተአመኒ ወለትየ ሃይማኖትኪ አሕየወተኪ፤ ወሐይወት ይእቲ ብእሲት እምውእቱ ሰዓት። ፳፫. ወመጺኦ እግዚእ ኢየሱስ ቤቶ ለውእቱ መኰንን ርእየ መባክያነ ወሰብአ እንዘ ይትሀወኩ። ፳፬. ወይቤሎሙ፦ ተገሐሡ፥ እስመ አኮ ዘሞተት ሕፃን አላ ትነውም፤ ወሠሐቅዎ። ፳፭. ወሶበ ወፅኡ ሰብእ ቦአ ወአኀዛ እዴሃ ወተንሥአት ሕፃን። ፳፮. ወወጽአ ስሙዓቱ ውስተ ኩላ ይእቲ ምድር። ፳፯. ወኀሊፎ እግዚእ ኢየሱስ እምህየ ተለውዎ ክልኤቱ ዕዉራን እንዘ ይጸርኑ ወይብሉ፦ ተሣሀለነ፥ ወልደ ዳዊት። ሰማይ ወምድር የኀልፍ ወቃልየሰ ኢየኀልፍ ይቤ እግዚእ ለአርዳኢሁ።

መልእክተ ጳውሎስ Pauline Epistle

፲፬. ዘአኮ ብነ ዝየ ሀገር ዘይነብር፥ አላ እንተ ትመጽእ ነኀሥሥ። ፲፭. ቦኑ እንከ ኢይከውነነ ናብእ መሥዋዕተ ስብሐት በኵሉ ጊዜ ለእግዚአብሔር ፍሬ ከናፍሪነ ከመ ንእመን በስሙ። ፲፮. ወኢትርስዑ ምሒረ ነዳያን ወተሳተፈቶሙ እስመ ዘከማሁ መሥዋዕት ይኤድሞ ለእግዚአብሔር። ፲፯. ተአዘዙ ለመኳንንቲክሙ ወተኰነኑ ሎሙ እስመ እሙንቱ ይተግሁ በእንተ ነፍስክሙ ከመ ዘይትሐሰብዎሙ በእንቲአክሙ ከመ በፍሥሐ ይግበርዎ ለዝንቱ ወኢይንሀኩ። ፲፰. ወዝንቱ ይደልወክሙ ከመ ትጸልዩ በእንቲአነ፥ ንትአመን ከመ ታፈቅሩ ወትፈቅዱ ሠናየ ለኵሉ። ፲፱. ወፈድፋደ ትግበሩ አስተበቍዐክሙ ዘነተ ከመ ፍጡነ እብጻሕክሙ።

ዘካልእ መልእክት Universal Epistle

፩. ወከማሁ አንትንሂ አንስት ተኰነና ለአምታቲክን ከመ እመቦ ዘኢየአምን በዝነቱ ነገር እምሥነ ምግባሪሆን ለአንስት ይርአዩ ወዘእንበለ ካሕድ ይርብሕዋ ለነፍሶሙ። ፪. ወእንዘ ትፈርሃ አሠንያ ግዕዘክን በንጽሕ። ፫. አኮ ከመ ታድልዋ ለዐይነ ሰብእ በተጸፍሮ ሥዕርትክን ወአኮ በተሰርግዎ ወርቅ ወብሩር ወአኮ በተለብሶ አልባስ ዘብዙኅ ሤጡ። ፬. አላ በኅቡእ ልቡ ለሰብእ ለዘኢይጠፍእ ወለዘኢይደምፅ ምንፈስ ቅዱስ ዘህልው ቅድመ እግዚአብሔር ዘብዙኅ ሐሳቡ። ፭. ወከማሁ ትካትኒ ቅዱሳት አንስት እለ ይትዌከላ ላዕለ እግዚአብሔር ይሰረገዋ ርእሶን በተኰንኖ ለአምታቲሆን። ፮. ከመ ሣራ ትትኤዘዞ ለአብርሃም ወእግዚእየ ትብሎ ወአንትንሂ አዋልዲሃ ኩና በምግባረ ሠናይ እንዘ ኢትፈርሃ እምነ ድንጋፄ ወኢምንተኒ።

ግብረ ሃዋርያት Acts

፲፮. እስመ አጥብዐ ጳውሎስ ከመ ይሑር ኤፌሶን ከመ ኢይጐንዲ ውስተ እስያ ወጐጕአ ለእመ ይትከሀሎ ይብጻሕ ኢየሩሳሌም ለጰንጠቆስቴ። ፲፯. ወእምነ መሊጢ ለአከ ኤፌሶን ይጸውዕዎሙ ለቀሲሳን እለ ቤተ ክርስቲያን። ፲፰. ወበጺሖሙ ኀቤሁ ይቤሎሙ ለሊክሙ፦ ታአምሩ እምአመ መጻእኩ እስያ ዘከመ ነበርኩ ኀቤክሙ በኵሉ መዋዕል። ፲፱. እንዘ እትቀነይ ለእግዚአብሔር ወእሰርሕ በኵሉ ሕማም ወአንብዕ ወመንሱትሂ ዘረከበኒ እምአይሁድ። ፳. ወአልቦ ዘሰወርኩክሙ እምኵሉ ዘይደልወክሙ ዘኢነገርኩክሙ። ፳፩. እንዘ አሰምዖሙ ለአይሁድ ክሡተ ወለአረሚኒ በአፍአኒ ወበውሥጥኒ ከመ ይትጋነዩ ወይነስሑ ለእግዚአብሔር ወይእመኑ በእግዚእነ ኢየሱስ ክርስቶስ። ፳፪. ወይእዜኒ ናሁ ተአሠርኩ በመንፈስየ ወአሐውር ኢየሩሳሌም ወኢየአምር ዘይረክበኒ በውስቴታ። ፳፫. ወባሕቱ አስምዐ ሊተ መንፈስ ቅዱስ በበአህጉር እንዘ ይብል ሕማም ወመዋቅሕት ይጸንሓከ። ፳፬. ወባሕቱ ኢአሐስባ ለነፍስየ ወኢምንተኒ ዳእሙ ከመ እፈጽም መልእክትየ ወእሰልጥ ግብርየ ዘነሣእኩ እምኀበ እግዚእነ ኢየሱስ ከመ እምሀር ወእስብክ ወንጌለ ጸጋሁ ለእግዚአብሔር።

ስንክሳር Synaxarium

ኢላርዮስ ኤጲስቆጶስ
ወቅድስት ተሐራሚት ማርታ

መዝሙር Psalm

አርኅዉ ሊተ አናቅጸ ጽድቅ፤
እባእ ውስቴቶን ወእግነይ ለእግዚአብሔር፤
ዛ አንቀጽ እንተ እግዚአብሔር።

ወንጌል Gospel

፴፯. ወመጽአት ብእሲት ኃጥእት እምሰብአ ይእቲ ሀገር አእሚራ ከመ ይመስሕ ውስተ ቤተ ፈሪሳዊ ተሣየጠት ዕፍረተ ዘአልባስጥሮስ። ፴፰. ወቆመት ድኅሬሁ ኀበ እገሪሁ ወበከየት ወአርሐሰት እገሪሁ በአንብዓ ወትመዘምዝ በሥዕርተ ርእሳ ወትስዕም እገሪሁ ወትቀብኦ ዕፍረተ። ፴፱. ወርእዮ ፈሪሳዊ ዘጸውዖ ሐለየ በልቡ ወይቤ፦ ሶበሁ ነቢይ ውእቱ ዝንቱ እምኢያእመረኑ ምንት ብእሲታ ወዘከመ እፎ ይእቲ ዛቲ ብእሲት እንተ ትገስሶ ከመ ኃጥእት ይእቲ። ፵. ወአውሥአ እግዚእ ኢየሱስ ወይቤሎ፦ ስምዖን፥ ብየ ዘእብለከ፥ ወይቤሎ፦ ሊቅ በል። ፵፩. ክልኤቱ ይፈድይዎ ለአሐዱ ባዕለ ዕዳ አሐዱ ይፈድዮ ኀመስተ ምእተ ዲናረ ወካልኡኒ ኀምሳ። ፵፪. ወኀጢኦሙ ዘይፈድይዎ ኀደገ ሎሙ ለክልኤሆሙ መኑ እንከ ርቱዕ ፈድፋደ ያፈቅሮ እምኔሆሙ? ፵፫. ወተሠጥወ ስምዖን ወይቤሎ፦ እብልሰ ዘብዙኀ ኀደገ ሎቱ። ወይቤሎ፦ ሠናየ ፈታሕከ። ፵፬. ወተመይጠ ኀበ ይእቲ ብእሲት ወይቤሎ ለስምዖን፦ ትሬእያኑ ለዛቲ ብእሲት? ቦእኩ ቤተከ ወኢወሀብከኒ ማየ ለእገርየ፥ ወይእቲሰ በአንብዓ አርሐሰት እገርየ ወበሥዕርታ መዝመዘት። ፵፭. ወአንተሰ ኢተአማኅከኒ፥ ወይእቲሰ እምዘ ቦእኩ ኢያንተገት እገርየ ስዒመ። ፵፮. ወአንተሰ ቅብአ ርእስየ ኢቀባእከኒ፥ ወይእቲሰ ዕፍረተ ቀብአተኒ እገርየ። ፵፯. በእንተ ዝንቱ እብለከ፥ ተኀድገ ላቲ ኀጢአታ ብዙኅ እስመ ብዙኀ አፍቀረት ወዘሰ ውኁደ አፍቀረ ውኁደ ይትኀደግ ሎቱ። ፵፰. ወይቤላ፦ ተኀድገ ለኪ ኀጢአትኪ። ፵፱. ወአኀዙ ይበሉ እለ ይረፍቁ በበይናቲሆሙ፦ መኑ ውእቱ ዝንቱ ዘየኀድግ ኀጢአተ? ፶. ወይቤላ ለይእቲ ብእሲት፦ ሃይማኖትኪ አድኀነተኪ፥ እተዊ በሰላም። ይቀልል ኅልፈተ ሰማይ ወምድር፥ እምትደቅ አሐቲ ቃል እምኦሪት ወእምነቢያት፥ ይቤ እግዚእ ለአርዳኢሁ።

ቅዳሴ Liturgy :

መዝሙረ ዳዊት Psalm

ልቦሙኒ ከንቱ፤
ከመ መቃብር ክሡት ጐራዒቶሙ፤
ወጸልሐዉ በልሳናቲሆሙ።

ወንጌል Gospel

፲. ወእምዝ በባሕቲቶሙ ተስእልዎ እሊአሁ ምስለ ዐሠርቱ ወክልኤቱ አርዳኢሁ ምሳሊሁ። ፲፩. ወይቤሎሙ እግዚእ ኢየሱስ፦ ለክሙ ተውህበ ታእምሩ ምሥጢራ ለመንግሥተ እግዚአብሔር ወለእለሰ አፍአ በምሳሌ ኵሉ ይከውኖሙ። ፲፪. ከመ ርእየ ይርአዩ ወኢያእምሩ፥ ወሰሚዐ ይስምዑ ወኢይለብዉ፥ ከመ ኢይነስሑ ወኢይሣሀሎሙ ወኢይትኀደግ ሎሙ ኀጢአቶሙ። ፲፫. ወይቤሎሙ፦ ኢታአምሩኑ ዛተ ምሳሌ? እፎ እንከ ታአምሩ ኵሎ አምሳለ? ፲፬. ዘይዘርዕሰ ቃለ እግዚአብሔር ይዘርዕ። ዘቦ እዝን ሰሚዐ ለይስማዕ።

መዝሙረ ዳዊት Psalm

ተመይጡ ወአመከርዎ ለእግዚአብሔር፤
ወወሀክዎ ለቅዱሰ እስራኤል፤
ወኢተዘከሩ እዴሁ።

ወንጌል Gospel

፲፬. ወሰሚዖሙ ዘንተ ኵሎሙ ፈሪሳውያን መፍቀርያነ ንዋይ ተቃጸብዎ። ፲፭. ወይቤሎሙ፦ አንትሙሰ ትጼደቁ ለዐይነ ሰብእ ወእግዚአብሔር ያአምረክሙ ልበክሙ እስመ በኀበ ሰብእ ዓቢይ በኀበ እግዚአብሔር ትሑት ወርኩስ ውእቱ። ፲፮. ኦሪትኒ ወነቢያትኒ እስከ ዮሐንስ እምትካት ሰበኩ በእንተ መንግሥተ እግዚአብሔር ወኵሉ ይትገፋዕ በእንቲአሃ። ፲፯. ወባሕቱ ይቀልል ሰማይ ወምድር ይኅልፍ እምትደቅ አሐቲ ቃል እምኦሪት። ፲፰. ወኵሉ ዘይድኅር ብእሲቶ ወያወስብ ካልእተ ዘመወ ወእንተኒ ደኀራ ምታ ለእመ ቀርበት ካልአ ዘመወት። ይቀልል ኅልፈተ ሰማይ ወምድር፥ እምትደቅ አሐቲ ቃል እምኦሪት ወእምነቢያት፥ ይቤ እግዚእ ለአርዳኢሁ።

መልእክተ ጳውሎስ Pauline Epistle

፲፮. ኢታአምሩኑ ከመ ታቦቱ ለእግዚአብሔር አንትሙ ወመንፈስ እግዚአብሔር ላዕሌክሙ? ፲፯. ወዘሰ አማሰነ ቤተ እግዚአብሔር ሎቱኒ ያማስኖ እግዚአብሔር። ወቤቱሰ ለእግዚአብሔር አንትሙ ውእቱ፥ ወቅዱስ አንትሙ ወኢታርኵሱ ቤቱ ለእግዚአብሔር። ፲፰. ወኢታስሕቱ ርእሰክሙ ወዘይሔሊ እምውስቴትክሙ ከመ ጠቢብ ውእቱ በዝ ዓለም አብደ ለይረሲ ርእሶ ከመ ይኩን ጠቢበ። ፲፱. እስመ እበድ ውእቱ በኀበ እግዚአብሔር ጥበቡ ለዝ ዓለም። እስመ ከመዝ ይቤ መጽሐፍ፦ ዘይእኅዞሙ ለጠቢባን ትምይንቶሙ። ፳. ወካዕበ ይቤ፦ የአምር እግዚአብሔር ሕሊናሆሙ ለጠቢባን ከመ ከንቱ ውእቱ። ፳፩. ወበእንተ ዝንቱ ኢይትመካሕ እንከ አሐዱሂ በእጓለ እመሕያው እስመ ኵሉ ዘዚአክሙ። ፳፪. እመኒ ጳውሎስ፥ ወእመኒ አጵሎስ፥ ወእመኒ ጴጥሮስ፥ ወእመኒ ዓለም፥ ወእመኒ ሕይወት፥ ወእመኒ ሞት፥ ወእመኒ ዘኮነ፥ ወእመኒ ዘይከውን ኵሉ ዘዚአክሙ። ፳፫. ወአንትሙሰ ዘክርስቶስ፥ ወክርስቶስኒ ዘእግዚአብሔር።

ዘካልእ መልእክት Universal Epistle

፭. ወዘሰ የዐቅብ ቃሎ አማን ፍቅረ እግዚአብሔር ፍጹም ላዕሌሁ። ወበዝንቱ ናአምር ከመ ቦቱ ሀለውነ። ፮. ወዘሰ ይብል ቦቱ ሀለውኩ መፍትው ይሑር በከመ ሖረ ዝክቱ። ፯. አኀዊነ አኮ ትእዛዘ ሐዲሰ ዘእጽሕፍ ለክሙ አላ ትእዛዘ ብሊተ እንተ ብክሙ ትካት። እስመ ትእዛዝ ብሉይ ውእቱ ዝንቱ ቃል ዘሰማዕክሙ። ፰. ወካዕበ ትእዛዘ ሐዲሰ እጽሕፍ ለክሙ ወውእቱ እሙን ቦቱ ወብክሙ፥ እስመ ኀለፈት ጽልመት ወብርሃን ዘበአማን ወድአ አስተርአየ። ፱. ወዘሰ ይብል ውስተ ብርሃን ሀሎኩ ወይጸልእ ቢጾ ሐሳዊ ውእቱ ወውስተ ጽልመት ሀሎ እስከ ይእዜ። ፲. ወዘሰ ያፈቅር ቢጾ ውስተ ብርሃን ይነብር ወአልቦ ዕቅፍት በኀቤሁ። ፲፩. ወዘሰ ይጸልእ ቢጾ ውስተ ጽልመት ውእቱ የሐውር ወኢየአምር ኀበ የሐውር እስመ ጽልመት አዖሮ አዕይንቲሁ።

ግብረ ሃዋርያት Acts

፲፰. ወጸቢሖ ተሀውኩ ሠገራት ፈድፋደ ወይቤሉ፦ ምንተ ኮነ እንከ ጴጥሮስ? ፲፱. ወኀሠሦ ሄሮድስ ወኀጢኦ ኰነኖሙ ለሠገራት ወአዘዘ ይቅትልዎሙ። ወእምዝ ወረደ እምይሁዳ ለቂሳርያ። ፳. ወሄሮድስ እስመ ተምዓ ላዕለ ሰብአ ጢሮስ ወሲዶና። ወመጽኡ ኅቡረ ኀቤሁ ወአስተብቍዕዎ ለበላስጦን መጋቤ ንጉሥ ከመ ይዕርቆሙ እስመ ሲሳየ ብሔሮሙ ኮነ እምሄሮድስ ንጉሥ። ፳፩. ወእምዝ አሐተ ዕለተ ለብሰ ሄሮድስ ልብሰ መንግሥቱ ወነበረ ዓውደ ወአኀዘ ይኵንኖሙ። ፳፪. ወዐውየዉ ሕዝብ፦ ቃለ እግዚአብሔር፥ ወአኮ ቃለ ሰብእ። ፳፫. ወቀሠፎ መልአከ እግዚአብሔር ሶቤሃ እስመ ኢያእኰቶ ለእግዚአብሔር ወዐጺዮ ሞተ። ፳፬. ወቃለ እግዚአብሔር ዐብየ ብዙኃ። ፳፭. ወገብኡ በርናባስ ወሳውል እምኢየሩሳሌም ፈጺሞሙ መልእክቶሙ ወነሥእዎ ለዮሐንስ ዘተሰምየ ማርቆስ።

ስንክሳር Synaxarium

አሙናስያ
ወሶፍያ
ወአባ ስምዖን
አሃዝያስ
ወሳኑሲ ሰማዕት
ወዮሐንስ ዘሐራቅሊ
አቅሮንዮስ
ወዲሙናሲያ
አሞኒ
ወሚናስ

መዝሙር Psalm

ወአድኀንካ እምንዳቤሃ ለነፍስየ፤
ወኢዘጋሕከኒ ውስተ እደ ፀርየ፤
ወአቀምኮን ውስተ መርሕብ ለእገርየ።

ወንጌል Gospel

፩. ወቦአ ካዕበ ምኵራበ ወሀሎ ህየ ብእሲ ዘየብሰት እዴሁ። ፪. ወይትዐቀብዎ ለእመ ይፌውሶ በሰንበት ከመ ያስተዋድይዎ። ፫. ወይቤሎ ለውእቱ ብእሲ ዘፅውስተ እዴሁ፦ ተንሥእ ወቁም ማእከለ። ፬. ወይቤሎሙ፦ ይከውንኑ በሰንበት ገቢረ ሠናይ አው ገቢረ እኩይ? አሕይዎ ነፍስ ወሚመ ቀቲል? ወአርመሙ። ፭. ወነጸሮሙ እግዚእ ኢየሱስ እንዘ ይትመዓዕ ወይቴክዝ በእንተ ዑረተ ልቦሙ ወይቤሎ ለውእቱ ብእሲ፦ ስፋሕ እዴከ፤ ወሰፍሐ እዴሁ ወሐይወት ወኮነት ከመ ካልእት። ፮. ወወፂኦሙ ፈሪሳውያን ምስለ ሰብአ ሄሮድስ ተማከሩ ከመ ይቅትልዎ። ዘቦ እዝን ሰሚዐ ለይስማዕ።

ቅዳሴ Liturgy :

መዝሙረ ዳዊት Psalm

ወጸልሐዉ በልሳናቲሆሙ፤
ኰንኖሙ እግዚኦ ወይደቁ በውዴቶሙ፤
ወበከመ ብዝኀ ሕብሎሙ ስድዶሙ።

ወንጌል Gospel

፲. ወይቤልዎ አይሁድ ለዘሐይወ፦ ሰንበት ውእቱ ዮም፥ ወኢይከውነከ ወትጹር ዐራተከ። ፲፩. ወአውሥአ ወይቤሎሙ፦ ዘአሕየወኒ ውእቱ ይቤለኒ፦ ጹር ዐራተከ ወሑር። ፲፪. ወተስእልዎ ወይቤልዎ አይሁድ፦ መኑ ውእቱ ብእሲሁ ዘይቤለከ፦ ተንሥእ ወጹር ዐራተከ ወሑር? ፲፫. ወውእቱሰ ዘሐይወ ኢያእመረ መኑ ውእቱ ዘአሕየዎ እስመ ተሰወረ እግዚእ ኢየሱስ ማእከለ ብዙኃን ሰብእ እለ ሀለዉ በውእቱ መካን። ፲፬. ወእምዝ ረከቦ እግዚእ ኢየሱስ ለውእቱ ዘሐይወ በምኵራብ ወይቤሎ፦ ናሁኬ ሐየውከ፥ ዑቅ ኢተአብስ ዳግመ ከመ ዘየአኪ እምዝ ኢይርከብከ። ፲፭. ወሖረ ውእቱ ብእሲ ወነገሮሙ ለአይሁድ ከመ እግዚእ ኢየሱስ ውእቱ ዘአሕየዎ። ፲፮. ወበእንተ ዝንቱ ያስተዋድይዎ አይሁድ ለእግዚእ ኢየሱስ ወየኀሥሡ ይቅትልዎ እስመ ከመዝ ይገብር በሰንበት። ፲፯. ወአውሥአ እግዚእ ኢየሱስ ወይቤሎሙ፦ አቡየሂ እስከ ይእዜ ይገብር ወአነሂ ከማሁ እገብር። ፲፰. ወበእንተ ዝንቱ ፈድፋደ የኀሥሡ አይሁድ ይቅትልዎ፤ እስመ አኮ ክመ ሰንበተ ባሕቲቶ ዘይስዕር፤ ዳእሙ ዓዲ አባሁ ይሬስዮ ለእግዚአብሔር ወያዔሪ ርእሶ ምስለ እግዚአብሔር። ዘየአምን በወልድ ቦ ሕይወት ዘለዓለም።

መዝሙረ ዳዊት Psalm

እሙንቱሰ ዘንተ ርእዮሙ አንከሩ፤
ደንገፁ ወፈርሁ ወአኀዞሙ ረዓድ፤
ወሐሙ በህየ ከመ እንተ ትወልድ።

ወንጌል Gospel

፳. ወአመ ርኢክሙ ዐገትዋ ሰራዊት ለኢየሩሳሌም ኣእምሩ ከመ በጽሐ ሙስናሃ። ፳፩. ወይእተ አሚረ እለ ውስተ ይሁዳ ይጐዩ ውስተ አድባር ወእለሂ ማእከለ ይወፅኡ እምኔሃ ወእለሂ ውስተ በሓውርቲሃ ኢይበውእዋ። ፳፪. እስመ ዕድሜሃ ውእቱ በዘይትቤቀልዋ ከመ ይብጻሕ ኵሉ ዘጽሑፍ ላዕሌሃ። ፳፫. ወባሕቱ አሌ ሎን ለፅኑሳት ወለእለ የሐፅና በውእቱ መዋዕል እስመ ይከውን ዓቢይ ምንዳቤ ዲበ ምድር ወመቅሠፍት ውስተ ዝንቱ ሕዝብ። ፳፬. ወይወድቁ በኲናት ወይፄወዉ ውስተ ኵሉ አሕዛብ ወይከይድዋ አሕዛብ ለኢየሩሳሌም እስከ ይበጽሕ ዕድሜሆሙ ለአሕዛብ። ይቀልል ኅልፈተ ሰማይ ወምድር፥ እምትደቅ አሐቲ ቃል እምኦሪት ወእምነቢያት፥ ይቤ እግዚእ ለአርዳኢሁ።

መልእክተ ጳውሎስ Pauline Epistle

፩. ወናአምር ከመ ለእመሂ ተነሥተ ቤተ ማኅደርነ ዘበምድር ብነ ሕንጻ በኀበ እግዚአብሔር በሰማያት ዘኢገብሮ እደ ሰብእ። ፪. ወኪያሁ ንሴፎ ንልበስ ቤተነ ዘውስተ ሰማያት ዘበእንቲአሁ ንስርሕ። ፫. ወእምከመ ለበስናሃ ኢኮነ ዘንትረከብ ዕራቃቲነ። ፬. እስመ እንዘሂ ሀለውነ ውስተ ዝንቱ ቤት ነሐዝን ፈድፋደ እምክበደ ዚአሁ፥ ወኢንፈቅድ ንሰለብ ዘእንበለ ከመ ንልበስ ካልአ መልዕልቴሁ ከመ ይሠጠም መዋቲ በሕይወት። ፭. ወውእቱ እግዚአብሔር ይረድአነ በዝንቱ ዘወሀበነ አረቦነ መንፈስ ቅዱስ። ፮. ተአመኑ እንከ ወአጥብዑ በኵሉ ጊዜ ወታአምሩ እንከ ከመ እንግደ አንትሙ ውስተ ዝንቱ ሥጋ፥ ወትነግዱ እምነፍስትክሙ ወተሐውሩ ኀበ እግዚእነ። ፯. እስመ በአሚን ነሐውር፥ ወአኮ በአድልዎ። ፰. ወፈድፋደ ንትአመን ወንትፌሣሕ እስመ ወፂአነ እምነፍስትነ ነሐውር ኀበ እግዚእነ። ፱. ወየእዜኒ ናአኵቶ እመኒ ነገድነ ወእመኒ ሀሎነ ሎቱ ዳእሙ ናድሉ። ፲. እስመ ሀለወነ ኵልነ ንቁም ቅድመ መንበረ ምኵናኑ ለክርስቶስ። ከመ ንትፈደይ በከመ ገበርነ በሥጋነ እመኒ ሠናየ ወእመኒ እኩየ።

ዘካልእ መልእክት Universal Epistle

፩. ወርእዩ ዘከመ እፎ ፍቅሩ ዘወሀበነ አብ ከመ ውሉደ እግዚአብሔር ንኩን ወኮነሂ። ወበእንተዝ ኢፈተወነ ዓለም እስመ ሎቱኒ ኢያእመሮ። ፪. አኀዊነ ይእዜሰ ደቂቀ እግዚአብሔር ንሕነ ወዓዲ ኢተዐውቀ ለነ ምንተ ንከውን። ናአምር ባሕቱ ከመ እምከመ ተዐውቀ ለነ ከማሁ ንከውን እስመ ንሬእዮ ሎቱ በከመ ውእቱ። ፫. ወኵሉ ዘተወከለ ኪያሁ ያነጽሕ ርእሶ በከመ ውእቱ ንጹሕ። ፬. ወኵሉ ዘይገብራ ለኃጢአት ወለአበሳኒ ገብራ ውእቱ እስመ አበሳ ኃጢአት ይእቲ። ፭. ወታአምሩ ከመ አስተርአየ ዝክቱ ከመ ያሰስላ ለኃጢአት ወኃጢአትሰ አልቦ ኀቤሁ። ፮. ወኵሉ ዘቦቱ ይነብር ኢይኤብስ እስመ ኵሉ ዘይኤብስ ኢይሬእዮ ወኢያአምሮ። ፯. ደቂቅየ ኢያስሕቱክሙ። ኵሉ ዘይገብራ ለጽድቅ ጻድቅ ውእቱ በከመ ዝክቱ ጻድቅ ውእቱ። ፰. ወዘሰ ይገብራ ለኃጢአት እምነ ጋኔን ውእቱ እስመ ቀዳሚሁ ሰይጣን አበሰ። ወበእንተ ዝንቱ አስተርአየ ወልደ እግዚአብሔር ከመ ይሰዐር ግብሮ ለጋኔን። ፱. ወኵሉ ዘይትወለድ እምእግዚአብሔር ኢይገብራ ለኃጢአት፥ እስመ ዘርዐ ዚአሁ ቦቱ ይነብር ወኢይክል አብሶ እስመ እምእግዚአብሔር ተወልደ። ፲. ወበዝንቱ እሙራን ውእቶሙ ደቂቀ እግዚአብሔር ወደቂቀ ጋኔን። ኵሉ ዘኢይገብራ ለጽድቅ ኢኮኒ እምእግዚአብሔር፥ ወከማሁ ዘኢያፈቅር ቢጾ።

ግብረ ሃዋርያት Acts

፴፭. ወጸቢሖ ለአኩ መኳንንት ወዓሊሆሙ እንዘ ይብሉ ፍትሕዎሙ ለእሉ ዕደው ወኅድግዎሙ ይሑሩ። ፴፮. ወሰሚዖ ዐቃቤ ቤተ ሞቅሕ ነገሮሙ ዘነገረ ለጳውሎስ ወለሲላስ ከመ ለአኩ መኳንንት ይኅድግዎሙ፥ ወይቤሎሙ ይእዜኒ፦ ሑሩ በሰላም። ፴፯. ወይቤልዎ ቀሠፉነ ገሃደ ዘአልብነ አበሳ እንዘ ሰብአ ሮሜ ንሕነ ወሞቅሑነ፥ ወይእዜኒ ጽሚተ ያውፅኡነ ይፈቅዱ? አበይነ። ይምጽኡ ለሊሆሙ ያውፅኡነ። ፴፰. ወሖሩ ወነገርዎሙ ወዓልያኒሆሙ ዘንተ ነገረ ለመኳንንት፥ ወፈርሁ ሰሚዖሙ ከመ ሰብአ ሮሜ እሙንቱ። ፴፱. ወመጽኡ ወአስተብቍዕዎሙ ከመ ይፃኡ እምብሔሮሙ። ፵. ወወፂኦሙ እሞቅሕ ቦኡ ቤተ ልድያ ወረከቡ ቢጾሙ ወመሀርዎሙ ወወፅኡ።

ስንክሳር Synaxarium

አባ ያዕቆብ ምሥራቃዊ
ወብሶይ
ወቢፋሞን
ወመርቆሬዎስ
ወመቃርስ

መዝሙር Psalm

አብርሆን ለአዕይንትየ ከመ ኢይኑማ ለመዊት፤
ወከመ ኢይበሉኒ ጸላእትየ ሞዕናሁ፤
ወእለሰ ይሣቅዩኒ ይትፌሥሑ ለእመ ተሀወኩ።

ወንጌል Gospel

፳፯. ወኀሊፎ እግዚእ ኢየሱስ እምህየ ተለውዎ ክልኤቱ ዕዉራን እንዘ ይጸርኑ ወይብሉ፦ ተሣሀለነ፥ ወልደ ዳዊት። ፳፰. ወበዊኦ ቤተ መጽኡ ኀቤሁ እሙንቱ ዕዉራን ወይቤሎሙ እግዚእ ኢየሱስ፦ ተአምኑሁ ከመ እክል ዘንተ ገቢረ? ወይቤልዎ፦ እወ እግዚኦ። ፳፱. ወገሰሶሙ አዕይንቲሆሙ እንዘ ይብል፦ በከመ ሃይማኖትክሙ ይኩነክሙ። ፴. ወሶቤሃ ተከሥተ አዕይንቲሆሙ፥ ወገሠጾሙ እግዚእ ኢየሱስ እንዘ ይብል፦ ዑቁ አልቦ ዘየአምር። ፴፩. ወወፂኦሙ ነገሩ ውስተ ኵሉ ውእቱ ብሔር። ሰማይ ወምድር የኀልፍ ወቃልየሰ ኢየኀልፍ ይቤ እግዚእ ለአርዳኢሁ።

ቅዳሴ Liturgy :

መዝሙረ ዳዊት Psalm

አድኅና በሰላም ለነፍስየ እምእለ ይትቃረኑኒ፤
እስመ ይበዝኁ እምእለ ምስሌየ፤
ይስማዕ እግዚአብሔር ወያኅሥሮሙ።

ወንጌል Gospel

፯. ወተግሕሠ እግዚእ ኢየሱስ ምስለ አርዳኢሁ መንገለ ባሕር ወተለውዎ ብዙኃን ጥቀ እምገሊላ ወእምይሁዳ። ፰. ወእምኢየሩሳሌም፥ ወእምኢዶምያስ፥ ወእማዕዶተ ዮርዳኖስ፥ ወእምጢሮስ፥ ወእምሲዶና፥ ወብዙኃን ጥቀ መጽኡ ኀቤሁ ሰሚዖሙ ኵሎ ዘገብረ። ፱. ወይቤሎሙ ለአርዳኢሁ ያጽንሑ ሎቱ ሐመረ ከመ ኢይትጋፍዕዎ ሰብእ። ፲. እስመ ለብዙኃን አሕየዎሙ ወያስተበቍዕዎ ከመ ይግስስዎ ኵሎሙ ሕሙማን። ፲፩. ወእለሂ እኁዛነ አጋንንት ርኩሳን እምከመ ርእይዎ ይሰግዱ ሎቱ ወይጸርኁ እንዘ ይብሉ፦ አንተ ውእቱ ወልደ እግዚአብሔር። ፲፪. ወብዙኀ ይጌሥጾሙ ከመ ገሃዶ ኢይረስይዎ። ዘቦ እዝን ሰሚዐ ለይስማዕ።

መዝሙረ ዳዊት Psalm

ገሠፅኮሙ ለአሕዛብ ወተኀጕሉ ረሲዓን፤
ወደምሰስከ ስሞሙ ለዓለመ ዓለም፤
ፀርሰ ተገምሩ በኵናት ለዝሉፉ።
 

ወንጌል Gospel

፵፩. ወእምዝ ይብሎሙ ለእለ በፀጋም፦ ሑሩ፥ ርጉማን ውስተ እሳት ዘለዓለም ዘድልው ለሰይጣን ወለመላእክቲሁ። ፵፪. እስመ ርኅብኩ ወኢያብላዕክሙኒ፥ ጸማእኩ ወኢያስተይክሙኒ። ፵፫. ወነግደ ኮንኩ ወኢተወከፍክሙኒ፥ ዐረቁ ወኢያልበስክሙኒ፥ ደወይኩ ወኢሐወጽክሙኒ፥ ተሞቃሕኩ ወኢነበብክሙኒ። ፵፬. አሜሃ ያወሥኡ እለ በፀጋም እንዘ ይብሉ፦ እግዚኦ ማእዜ ርኢናከ ርኁበከ ወጽሙአከ ወእንግዳከ ወዕራቀከ ወድዉየከ ወተሞቂሐከ ወኢተልእክናከ? ፵፭. ወእምዝ ያወሥኦሙ ንጉሥ እንዘ ይብል፦ አማን እብለክሙ፥ ዘኢገበርክሙ ለአሐዱ እምእሉ ንኡሳን ሊተ ኢገበርክሙ። ፵፮. ወየሐውሩ እሉሂ ውስተ ኵነኔ ዘለዓለም ወጻድቃንሰ ውስተ ሕይወት ዘለዓለም። ሰማይ ወምድር የኀልፍ ወቃልየሰ ኢየኀልፍ ይቤ እግዚእ ለአርዳኢሁ።

መልእክተ ጳውሎስ Pauline Epistle

፲፫. ወንሕነሰ ኢንትሜካሕ ፈድፋደ እምዐቅምነ ዘእንበለ በመሥፈርት ወሕግ ዘዐቀመ ለነ እግዚአብሔር እስከ ንበጽሕ ኀቤክሙ። ፲፬. እስመ እኮ ዘንዌድሰ ርእሰነ ከመ ዘኢበጻሕነ ኀቤክሙ ዳእሙ በጻሕነ ውስተ ትምህርተ ክርስቶስ። ፲፭. ወንሕነሰ ኢንትሜካሕ በዘኢይረትዕ በጻማ ነኪር። ወባሕቱ እሴፎ ትብዛኅ ሃይማኖትክሙ ወትዕበይ በላዕሌክሙ በሕገ ሥርዐትክሙ። ፲፮. ወፈድፋደ ንሜህረክሙ ወአሜሃ የዐቢ ምስሌሁ አምጣንነ። ወንሕነሰ ኢንትሜካሕ በዘኢይረትዕ ወበዘኢድልው። ፲፯. ወዘሰ ይትሜካሕ በእግዚአብሔር ለይትመካሕ። ፲፰. ወአኮ ዳእሙ ዘርእሶ ንእደ ኅሩየ ይከውን፥ አኮኑ ዘእግዚአብሔር ንእዶ ክመ።

ዘካልእ መልእክት Universal Epistle

፲፪. ወብፁዕ ብእሲ ዘይትዔገሣ ለእኪት እስመ ተመኪሮ ይነሥእ አክሊለ ሕይወት ዘአሰፈዎሙ እግዚአብሔር ለእለ ያፈቅርዎ። ፲፫. ወእመቦ ዘይትሜከር ኢይበል፦ እግዚአብሔር ያሜክረኒ፥ እስመ እግዚአብሔር ኢያሜክር ለእኪተ ወውእቱሰ ኢይሜክር ወኢመነሂ። ፲፬. አለ አሐዱ አሐዱ ይትሜከር በፍትወተ እንቲአሁ ወይወፅእ ኀቤሃ ወይደነግፅ። ፲፭. ወፍትወትሰ እምከመ ፀንሰት ትወልዳ ለኃጢአት፥ ወኃጢአትኒ እምከመ ተፈጸመት ትወልዳ ለሞት። ፲፮. ኢያስሕቱክሙ አኀዊነ ፍቁራን። ፲፯. ኵሉ ሀብት ሠናይ ወኵሉ ፍት ፍጹም እምላዕሉ ይእቲ ትወርድ እምኀበ አቡሃ ለብርሃን ውእቱ ዘአልቦ ተውላጥ ኀቤሁ ወአልቦ ምንትኒ ዘያመስጥ እምእዴሁ። ፲፰. እስመ በፈቃዱ ወለደነ በቃለ ጽድቁ ከመ ንኩን ቀደምተ ለፍጥረቱ።

ግብረ ሃዋርያት Acts

፳፮. ወእምዝ ሖረ መጋቤ ምኵራብ ምስለ ወዓሊሁ ያምጽእዎሙ እንዘ ይዬውህዎሙ እስመ ይፈርህዎሙ ለሕዝብ ኢይውግርዎሙ። ፳፯. ወአምጽእዎሙ ወአቀምዎሙ ማእከለ ዓውድ ወሐተትዎሙ ሊቃነ ካህናት። ፳፰. ወይቤልዎሙ፦ አኮኑ ከላእናክሙ ከመ ኢትምሀሩ በስሙ ለኢየሱስ ወኢለመኑሂ? ወናሁ መላእክምዋ ትምህርተክሙ ለኢየሩሳሌም ወትፈቅዱ ታግብኡ ላዕሌነ ደሞ ለዝ ብእሲ። ፳፱. ወተሠጥዎሙ ጴጥሮስ ምስለ ሐዋርያት ወይቤሎሙ፦ ይኄይሰነ ናድሉ ለእግዚአብሔር እምነ አድልዎ ለሰብእ። ፴. አምላከ አበዊነ አንሥኦ ለኢየሱስ ዘአንትሙ ዓለውክምዎ ወሰቀልክምዎ ዲበ ዕፅ። ፴፩. ኪያሁ ረሰዮ እግዚአብሔር መልአከ ሕይወት ወአልዐሎ በየማኑ። ወወሀቦሙ ለእስራኤል ንስሐ ከመ ይትኀደግ ሎሙ ኃጢአቶሙ። ፴፪. ወንሕነሰ ሰማዕቱ ለዝንቱ ነገር ወመንፈስ ቅዱስ ዘወሀቦሙ እግዚአብሔር ለእለ የአምኑ ቦቱ። ፴፫. ወሰሚዖሙ ዘንተ ተምዕዑ ወሐቀዩ ስነኒሆሙ ወፈቀዱ ይቅትልዎሙ።

ስንክሳር Synaxarium

ቴዎድሮስ መነኮስ ወ፵ ሰማዕታት
ወአሞንዮስ
ወ፬ቱ መኳንንት

መዝሙር Psalm

ዘረወ ወወሀበ ለነዳይ፤
ወጽድቁኒ ይነብር ለዓለመ፤
ወይትሌዐል ቀርኑ በክብር።

ወንጌል Gospel

፴፪. ኢትፍራሕ ኦንኡስ መርዔት፥ እስመ ሠምረ አቡክሙ የሀብክሙ መንግሥቶ። ፴፫. ሢጡ ንዋየክሙ ወሀቡ ምጽዋተ፤ ግበሩ ለክሙ ቈናማተ ዘኢይበሊ ወመዛግብተ በሰማያት ዘኢየኀልቅ ኀበ ኢይረክቦ ሰራቂ ወኢያማስኖ ፃፄ። ፴፬. ወኀበ ሀሎ መዝገብክሙ ህየ ሀሎ ልብክሙ። ፴፭. ወይኩን ቅኑተ ሐቌክሙ፥ ወኅትወ መኃትዊክሙ። ፴፮. ወአንትሙኒ ኩኑ ከመ ዕደው እለ ይጸንሑ እግዚኦሙ እስከ የአቱ እምከብካብ ከመ መጺኦ ወጐድጕዶ ያርኅውዎ ሶቤሃ። ፴፯. ብፁዓን እሙንቱ አግብርት እለ ያረክቦሙ እግዚኦሙ መጺኦ እንዝ ከመዝ ይገብሩ ወይተግሁ። አማን እብለክሙ ከመ ይቀንት ወያረፍቆሙ ወያንሶሱ ወይትለአኮሙ። ፴፰. ወእመኒ በካልእት፥ ወእመኒ በሣልስት ሰዓተ ሌሊት፥ ሶበ መጽአ ወረከቦሙ ከመዝ ብፁዓን እሙንቱ እልክቱ አግብርት። ፴፱. ወዘንተ ባሕቱ አእምሩ ሶበሁ የአምር ባዕለ ቤት ሶበ እንተ ጊዜ ይመጽእ ሰራቂ እምተግሀ ወእምሐለወ ወእምኢያብሐ ይክርዩ ቤቶ። ፵. ወአንትሙሂ ድልዋኒክሙ ሀልዉ እስመ በጊዜ ኢተሐዘብክሙ ይመጽእ ወልደ እጓለ እመሕያው። ይቀልል ኅልፈተ ሰማይ ወምድር፥ እምትደቅ አሐቲ ቃል እምኦሪት ወእምነቢያት፥ ይቤ እግዚእ ለአርዳኢሁ።

ቅዳሴ Liturgy :

መዝሙረ ዳዊት Psalm

እስመ ሠምሩ አግብርቲከ እበኒሃ፤
ወአክበርዎ ለመሬታ፤
ወይፍርሁ አሕዛብ ስመከ እግዚኦ።
 

ወንጌል Gospel

፩. ወወፂኦ እግዚእ ኢየሱስ እምቤተ መቅደስ ሖረ ወቀርቡ አርዳኢሁ ወአርአይዎ ሕንጻሁ ለምኵራብ። ፪. ወአውሥአ ወይቤሎሙ፦ ትሬእዩኑ ዘንተ ኵሎ? አማን እብለክሙ፥ ኢይትኀደግ ዝየ እብን ዲበ እብን ዘኢይትነሠት። ፫. ወእንዘ ይነብር በደብረ ዘይት ቀርቡ አርዳኢሁ ኀቤሁ እንዘ ይብሉ፦ እንተ ባሕቲቶሙ ንግረነ ማእዜ ይከውንዝ? ወምንት ትእምርቱ ለምጽአትከ ወለኅልቀተ ዓለም? ፬. ወአውሥአ እግዚእ ኢየሱስ ወይቤሎሙ፦ ዑቁ አልቦ ዘያስሕተክሙ። ፭. እስመ ብዙኃን ይመጽኡ በስመ ዚአየ እንዘ ይብሉ፦ አነ ውእቱ መሲሕ፤ ወብዙኃነ ያስሕቱ። ፮. ወሀለወክሙ ትስምዑ ቀትለ ወድምፀ ፀባኢት ዑቁ ኢትደንግፁ እስመ ግብር ይከውን ከማሁ ወአኮ በጊዜሃ ዘየኀልቅ። ፯. ወይትነሣእ ሕዝብ ዲበ ሕዝብ ወነገሥት ላዕለ ነገሥት ወይመጽእ ረኃብ ወብድብድ ወሀከክ በበ በሓውርቲሁ። ፰. ወዝኵሉ ቀዳሚ ማሕመም። ፱. አሜሃ ይሜጥዉክሙ ለምንዳቤ ወይቀሥፉክሙ ወይቀትሉክሙ ወይጸልኡክሙ ኵሉ ሕዝብ በእንተ ስምየ። ሰማይ ወምድር የኀልፍ ወቃልየሰ ኢየኀልፍ ይቤ እግዚእ ለአርዳኢሁ።