መዝሙረ ዳዊት Psalm

ኃያል አንተ እግዚኦ ወጽድቅ የዓውደከ፤
አንተ ትኴንን ኃይለ ባሕር፤
ወአንተ ታረምሞ ለድምፀ ማዕበላ።

ወንጌል Gospel

፭. ወበዊኦ ቅፍርናሆም መጽአ ኀቤሁ መስፍን ምእት። ፮. ወይቤሎ፦ እግዚኦ፥ ብቍዐኒ ቍልዔየ ድውይ ወይሰክብ ውስተ ቤት ወመፃጕዕ ወጥቀ ፅዑር። ፯. ወይቤሎ እግዚእ ኢየሱስ፦ ነየ እመጽእ፥ አነ ወእፌውሶ። ፰. ወአውሥአ ሐቤ ምእት ወይቤ፦ እግዚኦ፥ ኢይደልወኒ ከመ አንተ ትባእ ታሕተ ጠፈርየ። ዳእሙ በል ቃለ ወየሐዩ ወልድየ። ፱. እስመ አነሂ ብእሲ መኰንን አነ ወብየ ሐራ እለ እኴንን። ወእብሎ ለዝ፦ ሑር፥ ወየሐውር፥ ወለካልኡኒ፦ ነዓ፥ ወይመጽእ ወለገብርየኒ፦ ግበር፥ ዘንተ ወይገብር። ፲. ወሰሚዖ እግዚእ ኢየሱስ አንከረ ወይቤሎሙ ለእለ ይተልውዎ፦ አማን እብለክሙ፥ ኢረከብኩ ዘመጠነዝ ሃይማኖት በውስተ ኵሉ እስራኤል። ፲፩. ወባሕቱ እብለክሙ፥ ብዙኃን ይመጽኡ እምሥራቅ ወእምዕራብ ወይረፍቁ ምስለ አብርሃም ወይስሐቅ ወያዕቆብ በመንግሥተ ሰማያት። ፲፪. ወለውሉደ መንግሥትሰ ያወፅእዎሙ ውስተ ጸናፊ ጽልመት። ህየ ሀሎ ብካይ ወሐቅየ ስነን። ፲፫. ወይቤሎ እግዚእ ኢየሱስ ለውእቱ ሐቤ ምእት፦ ሑርኬ፥ ወበከመ ተአመንከ ይኩንከ፤ ወሐይወ ወልዱ በይእቲ ሰዓት፤ ወገቢኦ መስፍን ውሰተ ቤቱ ረከቦ ለቍልዔሁ ሐይዎ። ሰማይ ወምድር የኀልፍ ወቃልየሰ ኢየኀልፍ ይቤ እግዚእ ለአርዳኢሁ።

መልእክተ ጳውሎስ Pauline Epistle

፲. እንከሰ ጽንዑ በእግዚአብሔር ወበጽንዐ ኀይሉ። ፲፩. ወልበሱ ወልታ እግዚአብሔር በዘትክሉ ተቃውሞቶ ለመናግንተ ሰይጣን። ፲፪. እስመ ቀትልክሙ ኢኮነ ምስለ ዘሥጋ ወደም፥ ዘእንበለ ምስለ መኳንንተ ጽልመት ወአጋንንት እኩያን እለ መትሕተ ሰማይ። ፲፫. ወበእንተዝ ንሥኡ ወልታ እግዚአብሔር ከመ ትክሀሉ ተቃውሞታ ለዕለት እኪት፥ ወከኁ ድልዋነ በኵሉ ከመ ትጽንዑ። ፲፬. ቁሙ እንከ ቀኒተክሙ ሐቌክሙ በጽድቅ ወልበሱ ልብሰ ኀጺን ዘጽድቅ። ፲፭. ተሥኢነክሙ ኀይለ ወንጌል ዘበሰላም። ፲፮. ወምስለዝ ኵሉ ንሥኡ ንዋየ ሐቅል ዘሃይማኖት በዘትክሉ አጥፍኦተ ኵሉ አሕጻሁ ለእኩይ ርሱን። ፲፯. ወንሥኡ ጌራ መድኀኒት ወሰይፈ ዘመንፈስ ቅዱስ ዘውእቱ ቃለ እግዚአብሔር። ፲፰. በኵሉ ጸሎት ወስእለት እንዘ ትጼልዩ በኵሉ ጊዜ በመንፈስ ወምስሌሁ ትግሁ ወተፀመዱ በኵሉ ጸሎት በእንተ ኵሎሙ ቅዱሳን።

ዘካልእ መልእክት Universal Epistle

፭. ከማሁ ልሳንኒ ንስቲት አባል ይእቲ ወታመጽእ ዐቢያተ። ወናሁ እሳትኒ ንስቲት ጥቀ ዘመጠነዝ ዖመ ታውዒ። ፮. ወልሳንኒ እሳት ይእቲ ለዓለም ዘዐመፃ። ወናሁ ልሳንኒ ንስቲት ተፈጥረት ውስተ ነፍስትነ ወታረምፆ ለሥጋነ ወትሎሉ ክቡተ ፍጥረተነ ወታውዒ እምገሃነም። ፯. እስመ ኵሉ ፍጥረተ አራዊትኒ አዕዋፍኒ ወዘይትሐወስኒ ውስተ ባሕር ወእንስሳኒ ይገርር ለፍጥረተ እጓለ እመሕይው። ፰. ወለልሳነ እጓለ እመሕያውሰ አልቦ ዘይክል አግርሮታ፥ እኪት ይእቲ ወአልባ ዐቅም ወምልእት ይእቲ ሕምዘ ዘይቀትል። ፱. ባቲ ንባርኮ ለእግዚአብሔር አብ ወባቲ ንረግሞ ለእጓለ እመሕይው፥ ዘበአርአያ እግዚአብሔር ተፈጥረ።

ግብረ ሃዋርያት Acts

፳፱. ወተሀውኩ ኵሉ ሀገር ወሮጹ ኀበ መካነ ተውኔት ኅቡረ ወሰሐብዎሙ ለጋይዮስ ወለአርስጠርኮስ ዕደው መቄዶናውያን አዕርክቱ ለጳሎውስ። ፴. ወፈቀደ ጳውሎስ ይባእ ማእከለ አሐዛብ ወከልእዎ አርድእት። ፴፩. ወእለሂ እምእስያ ዐርካኒሁ ለአኩ ኀቤሁ ኢይባእ ማእከለ አሕዛብ አስተብቍዕዎ። ፴፪. ወጐንደዩ እንዘ ይኬልሑ ሕዝብ እለ ሀለዉ ህየ መካነ ተውኔት ወቦ እለ ይኬልሑ በካልእ ነገር። ወእለሰ ይበዝኁ እምኔሆሙ ኢያአምሩ በእንተ ምንት አንገለጉ። ፴፫. ወሕዝበ አይሁድ እለ ሀለዉ ህየ አንሥኡ እምኔሆሙ ብእሴ አይሁዳዌ ዘስሙ እስክንድሮስ ወተንሢኦ ቀጸበ በእዴሁ ወፈቀደ ይውቅሥ ለዓውድ።

ስንክሳር Synaxarium

እንድርያኖስ ሰማዕት
ወአባ ቢጻርዮን ሰማዕት

መዝሙር Psalm

ወይእዜኒ መኑ ተስፋየ አኮኑ እግዚአብሔር፤
ወትዕግስትየኒ እምኃቤከ ውእቱ፤
ወእምኵሉ ኃጢአትየ አድኃንከኒ።

ወንጌል Gospel

፯. ወተግሕሠ እግዚእ ኢየሱስ ምስለ አርዳኢሁ መንገለ ባሕር ወተለውዎ ብዙኃን ጥቀ እምገሊላ ወእምይሁዳ። ፰. ወእምኢየሩሳሌም፥ ወእምኢዶምያስ፥ ወእማዕዶተ ዮርዳኖስ፥ ወእምጢሮስ፥ ወእምሲዶና፥ ወብዙኃን ጥቀ መጽኡ ኀቤሁ ሰሚዖሙ ኵሎ ዘገብረ። ፱. ወይቤሎሙ ለአርዳኢሁ ያጽንሑ ሎቱ ሐመረ ከመ ኢይትጋፍዕዎ ሰብእ። ፲. እስመ ለብዙኃን አሕየዎሙ ወያስተበቍዕዎ ከመ ይግስስዎ ኵሎሙ ሕሙማን። ፲፩. ወእለሂ እኁዛነ አጋንንት ርኩሳን እምከመ ርእይዎ ይሰግዱ ሎቱ ወይጸርኁ እንዘ ይብሉ፦ አንተ ውእቱ ወልደ እግዚአብሔር። ፲፪. ወብዙኀ ይጌሥጾሙ ከመ ገሃዶ ኢይረስይዎ። ዘቦ እዝን ሰሚዐ ለይስማዕ።

ቅዳሴ Liturgy :

መዝሙረ ዳዊት Psalm

ወመጠውከኒ ዘባኖሙ ለፀርየ፤
ወሠረውኮሙ ለጸላእትየ፤
አውየዉ ወኃጥኡ ዘይረድኦሙ።

ወንጌል Gospel

፫. ወነሥኦሙ ይሁዳ ለሠገራተ ሰጲራ እምኀበ ሊቃነ ካህናት ወፈሪሳውያን ወነሥአ ረድኤተ ወዓሊሆሙ። ወሖረ ህየ በመኃትወ ጽጕ ወበፒናት ወበንዋየ ሐቅል። ፬. ወአእሚሮ እግዚእ ኢየሱስ ኵሎ ዘይበጽሕ ላዕሌሁ ወጽአ አፍአ ኀቤሆሙ ወይቤሎሙ፦ መነ ተኀሥሡ? ፭. ወአውሥኡ ወይቤልዎ፦ ኢየሱስሃ ናዝራዌ። ወይቤሎሙ እግዚእ ኢየሱስ፦ አነ ውእቱ። ወሀለወ ይሁዳኒ ዘያገብኦ ይቀውም ምስሌሆሙ። ፮. ወሶበ ይቤሎሙ እግዚእ ኢየሱስ፦ አነ ውእቱ፥ ገብኡ ድኅሬሆሙ ወወድቁ ዲበ ምድር። ፯. ወእምዝ ካዕበ ተስእሎሙ ወይቤሎሙ፦ መነ ተኀሥሡ? ወይቤልዎ፦ ኢየሱስሃ ናዝራዌ። ፰. ወአውሥአ እግዚእ ኢየሱስ ወይቤሎሙ፦ አኮኑ እቤለክሙ አነ ውእቱ። ወእመሰ ኪያየ ተኀሥሡ ኅድግዎሙ ለእሉ ይሑሩ። ፱. ከመ ይብጻሕ ቃል ዘይቤ፦ እለሰ ወሀብከኒ ኢተሀጕለ ወኢአሐዱሂ እምኔሆሙ። ዘየአምን በወልድ ቦ ሕይወት ዘለዓለም።

መዝሙረ ዳዊት Psalm

ፍሬ ፃማከ ተሴሰይ፤
ብፁዕ አናተ ወሠናይ ለከ፤
ብእሲትከ ከመ ወይን ሥሙር ውስተ ጽርሐ ቤትከ።

ወንጌል Gospel

፩. ወእምዝ አሐተ ዕለተ እንዘ ይሜህሮሙ ለሕዝብ በምኵራብ ወይነግሮሙ ቆሙ ላዕሌሁ ሊቃነ ካህናት ወጸሐፍት ወረበናት። ፪. ወይቤልዎ፦ ንግረነ በመባሕተ መኑ ትገብር ዘንተ? ወመኑ አብሐከ ትግበር ከመዝ? ፫. ወአውሥአ ወይቤሎሙ፦ እሴአለክሙ አነሂ አሐተ ነገረ ዘትነግሩኒ። ፬. ጥምቀቱ ለዮሐንስ እምአይቴኑ ይእቲ፥ እምሰማይኑ ወሚመ እምሰብእኑ? ፭. ወተባሀሉ በበይናቲሆሙ፦ እመሂ ንብሎ፦ እምሰማይ፥ ይብለነ፦ ወእፎ ኢአመንክምዎ? ፮. ወእመሂ ንብሎ፦ እምሰብእ፥ ይዌግሩነ ኵሉ ሕዝብ እስመ ኵሎሙ ተአመንዎ ለዮሐንስ ከመ ነቢይ ውእቱ። ፯. ወአውሥእዎ ወይቤልዎ፦ ኢናአምር እምኀበ ኮነት። ፰. ወይቤሎሙ እግዚእ ኢየሱስ፦ አነሂ ኢይነግረክሙ በመባሕተ መኑ እገብር ከመዝ። ይቀልል ኅልፈተ ሰማይ ወምድር፥ እምትደቅ አሐቲ ቃል እምኦሪት ወእምነቢያት፥ ይቤ እግዚእ ለአርዳኢሁ።

መልእክተ ጳውሎስ Pauline Epistle

፰. በተአምኖ ሰምዐ ዘተሰምየ አብርሃም ወተአዘዘ ይሑር ብሔረ ኀበ ሀለዎ ይንሣእ ርስቶ። ወሖረ እንዘ ኢየአምር ኀበ ይበጽሕ። ፱. በተአምኖ ፈለሰ ወነበረ ብሔረ ዘአሰፈዎ ከመ ነኪር በኀይመታት ምስለ ይስሐቅ ወያዕቆብ እለ እሙንቱ ይወርስዋ ለተስፋሁ። ፲. እስመ ኮኑ ይጸንሑ ሀገረ እንተ ባቲ መሠረተ እንተ ኬንያሃ ወገባሪሃ እግዚአብሔር። ፲፩. በተአምኖ ይእቲ ሣራ ረከበት ኀይለ ታውፅእ ዘርዐ እንዘ መካን ይእቲ በዘረሥአት እስመ ተአመነቶ ከመ ጻድቅ ዘአሰፈዋ። ፲፪. እንዘ ክልኤሆሙ ከመ በድን ነፍስቶሙ ከመ ይኩን ብዝኆሙ ከመ ኮከበ ሰማይ ወከመ ኆጻ ባሕር ዘኢይትኌለቍ። ፲፫. እሉ ኵሎሙ እንዘ ይትአመኑ ሞቱ ወኢረከቡ ተስፋሆሙ ወባሕቱ እምርሑቅሰ ርእይዋ ወተአምኅዋ ወአእመሩ ከመ ነግድ ወፈላሲ እሙንቱ ዲበ ምድር። ፲፬. ወእለ ከመዝ ይብሉ ያርእዩ ከመ ሀገሮሙ የኀሥሡ። ፲፭. ወሶበሰ ይፈቅድ ሀገረ እንተ እምኔሃ ወፅኡ እምተክህሎሙ ይግብኡ ኀቤሃ። ፲፮. ወይእዜሰ ተዐውቀ ከመ እንተ ትኄይስ ሀገረ እንተ በሰማያት ኮኑ ይሴፈዉ። ወበእንተዝ ኢየኀፍር እግዚአብሔር ከመ ይትበሀል አምላኮሙ እስመ አስተዳለወ ሎሙ ሀገረ።

ዘካልእ መልእክት Universal Epistle

፩. ወከማሁ አንትንሂ አንስት ተኰነና ለአምታቲክን ከመ እመቦ ዘኢየአምን በዝነቱ ነገር እምሥነ ምግባሪሆን ለአንስት ይርአዩ ወዘእንበለ ካሕድ ይርብሕዋ ለነፍሶሙ። ፪. ወእንዘ ትፈርሃ አሠንያ ግዕዘክን በንጽሕ። ፫. አኮ ከመ ታድልዋ ለዐይነ ሰብእ በተጸፍሮ ሥዕርትክን ወአኮ በተሰርግዎ ወርቅ ወብሩር ወአኮ በተለብሶ አልባስ ዘብዙኅ ሤጡ። ፬. አላ በኅቡእ ልቡ ለሰብእ ለዘኢይጠፍእ ወለዘኢይደምፅ ምንፈስ ቅዱስ ዘህልው ቅድመ እግዚአብሔር ዘብዙኅ ሐሳቡ። ፭. ወከማሁ ትካትኒ ቅዱሳት አንስት እለ ይትዌከላ ላዕለ እግዚአብሔር ይሰረገዋ ርእሶን በተኰንኖ ለአምታቲሆን። ፮. ከመ ሣራ ትትኤዘዞ ለአብርሃም ወእግዚእየ ትብሎ ወአንትንሂ አዋልዲሃ ኩና በምግባረ ሠናይ እንዘ ኢትፈርሃ እምነ ድንጋፄ ወኢምንተኒ። ፯. ወከማሁ አንትሙሂ ዕደው እንዘ ትነብሩ ምስለ አንስቲያክሙ ኢታስተሐቅሩ አንስቲያክሙ እስመ ይደክም ፍጥረተ ዚአሆን አክብሩ አንስቲያክሙ እስመ ይወርሳ እማንቱኒ ክብረ ወሕይወተ ምስሌክሙ ከመ ኢትትዐቀፍ ጸሎትክሙ። ፰. ወማኅለቅቱሰ ለኵሉ ከመ ተዐርዩ ልበ በአሐዱ ሕሊና እንዘ ተሐምሙ ሕማመ ቢጽክሙ። ፱. ወእንዘ ኢተዐብዩ ልበክሙ ወእንዘ ኢትፈድይዎ እኪተ ለዘገብረ ለክሙ እኪተ ወእንዘ ኢትጼእልዎ ለዘጸአለክሙ። ወለጸላኢክሙኒ ባርክዎ እስመ ለዝንቱ ተጸዋዕክሙ ከመ በረከተ ትረሱ።

ግብረ ሃዋርያት Acts

፲. ወይእዜኒ ኢታመክርዎ ለእግዚአብሔር ወኢታስክምዎሙ አርዑተ ዲበ ክሳውዲሆሙ ለአሕዛብ ዘኢክህልነ ጸዊሮቶ ኢአበዊነ ወኢንሕነ? ፲፩. ዳእሙ ከመ ንሕዮ በጸጋ እግዚእነ ኢየሱስ ክርስቶስ ንትአመን ወከማሁ ወእሙንቱሂ። ፲፪. ወሶቤሃ አርመሙ ኵሉ ሕዝብ ወአፅምእዎሙ ለጳውሎስ ወለበርናባስ እንዘ ይነግሩ ኵሎ ዘገብረ ሎሙ እግዚአብሔር ተኣምረ ወመንክረ በውስተ አሕዛብ። ፲፫. ወእምድኅረ አርመሙ ተሠጥወ ያዕቆብ ወይቤ፦ ሰምዑ አኃዊነ። ፲፬. ስምዖንሂ ነገረ ዘከመ አቅደመ ተሣህሎ እግዚአብሔር ለአሕዛብ ወነሥአ ሕዝበ እምውስቴቶሙ። ፲፭. ወየኀብሩ ቃለ ነቢያት በዝንቱ በከመ ይብል መጽሐፍ፦

ስንክሳር Synaxarium

ሞይስስ ሰማዕት ወእኅቱ ሣራ
አጋቦስ
ወቴክላ
ወተዝካራ ለብፅዕት ሣራ ብእሲተ አብርሃም

መዝሙር Psalm

ብፁዕ አንተ ወሠናይ ለከ፤
ብእሲትከ ከመ ወይን ስሙር ውስተ ጽርሐ ቤትከ፤
ወውሉድከ ከመ ተክለ ዘይት ሐይት ሐዲስ ዐውድ ማእድከ።

ወንጌል Gospel

፳፬. ወአውሥአ ወይቤ፦ ኢተፈነውኩ ዘእንበለ ኀበ አባግዕ ዘተሐጕለ ዘቤተ እስራኤል። ፳፭. ወቀሪባ ሰገደት ሎቱ እንዘ ትብል፦ እግዚኦ ርድአኒ። ፳፮. ወአውሥአ ወይቤላ፦ ኢኮነ ሠናየ ነሢአ ኅብስተ ውሉድ ወውሂበ ለከለባት። ፳፯. ወትቤ፦ እወ እግዚኦ፥ እስመ ከለባትኒ ይበልዑ እምፍርፋራት ዘይወድቅ እማእደ አጋእዝቲሆሙ። ፳፰. ወእምዝ አውሥአ እግዚእ ኢየሱስ ወይቤላ፦ ኦብእሲቶ፥ ዓቢይ ሃይማኖትኪ፤ ይኩንኪ በከመ ትፈቅዲ። ወሐይወት ወለታ እምይእቲ ሰዓት። ፳፱. ወኀሊፎ እምህየ እግዚእ ኢየሱስ በጽሐ ኀበ ሐይቀ ባሕር ዘገሊላ ወዐሪጎ ደብረ ነበረ ህየ። ፴. ወቀርቡ ኀቤሁ አሕዛብ ብዙኃን እንዘ ቦሙ ምስሌሆሙ ሐንካሳነ፥ ዕዉራነ፥ ጽሙማነ ፅዉሳነ፥ ወባዕዳነ ብዙኃነ ድውያነ፤ ወገደፍዎሙ ኀበ እገሪሁ ለእግዚእ እግዚእ ኢየሱስ ወፈወሶሙ። ፴፩. እስከ ሶበ አሕዛብ ያነክሩ እንዘ ይሬእዮ ከመ በሃማን ይትናገሩ ወሐንካሳን የሐውሩ ወዕዉራን ይሬእዮ። ወሰብሕዎ ለአምላከ እስራኤል። ሰማይ ወምድር የኀልፍ ወቃልየሰ ኢየኀልፍ ይቤ እግዚእ ለአርዳኢሁ።

ቅዳሴ Liturgy :

መዝሙረ ዳዊት Psalm

ወገበርከ ወርኀ በዕድሜሁ፤
ፀሐይኒ አእመረ ምዕራቢሁ፤
ታመጽእ ጽልመተ ወይከውን ሌሊተ።

ወንጌል Gospel

፵፭. ወእምስሱ ሰዓት ጸልመ ኵሉ ዓለም እስከ ተስዑ ሰዓት። ፵፮. ወጊዜ ሰዓት ተሱዓት ጸርኀ እግዚእ ኢየሱስ በቃል ዓቢይ እንዘ ይብል፦ ኤሎሂ ኤሎሃ ለማ ሰበቅተኒ? ዝውእቱ ብሂል፦ አምላክየ አምላክየ ለምንት ኀደገኒ? ፵፯. ወሰሚዖሙ እለ ይቀውሙ ህየ ይቤሉ፦ ኤልያስሃ ይጼውዕ ዝሰ። ፵፰. ወውእተ ጊዜ ሮጸ አሐዱ እምኔሆሙ ወነሥእ ስፍንገ ወመልኦ ብሒአ ወአሰረ ውስተ ሕለት ወአሕዘዞ። ፵፱. ወቦ እለ ይቤሉ፦ ኅድግ ንርአይ እመ ይመጽእኑ ኤልያስ ያድኅኖ። ፶. ወጸርኀ ካዕበ እግዚእ ኢየሱስ በዓቢይ ቃል ወወጽአት መንፈሱ። ፶፩. ወተሰጠ መንጦላዕተ ቤተ መቅደስ እምላዕሉ እስከ ታሕቱ ወክልኤተ ኮነ። ወእድለቅለቀት ምድር ወነቅዐ ኰኵሕ። ፶፪. ወተከሥቱ መቃብራት ወተንሥኡ ብዙኃን አብድንቲሆሙ ለጻድቃን። ፶፫. ወወፅኡ እመቃብሪሆሙ ወቦኡ ሀገረ ቅድስተ እምድኅረ ተንሥኡ ወአስተርአይዎሙ ለብዙኃን። ሰማይ ወምድር የኀልፍ ወቃልየሰ ኢየኀልፍ ይቤ እግዚእ ለአርዳኢሁ።

መዝሙረ ዳዊት Psalm

አርአየ እግዚአብሔር አድኅኖቶ፤
ወበቅድመ አሕዛብ ከሠተ ኪዳኖ፤
ወተዘከረ ሣህሎ ለያዕቆብ።

ወንጌል Gospel

፩. ወእምዝ ነሥኦ ጲላጦስ ለእግዚእ ኢየሱስ ወቀሠፎ። ፪. ወጸፈሩ ሐራ አክሊለ ዘሦክ ወአስተቀጸልዎ ላዕለ ርእሱ ወአልበስዎ ልብስ ሜላት። ፫. ወይመጽኡ ኀቤሁ ወይቤልዎ፦ ባሐ ንጉሠ አይሁድ። ወይጸፍዕዎ ገጾ። ፬. ወወጽአ ካዕበ ጲላጦስ አፍአ ወይቤሎሙ፦ ናሁ አወፅኦ ለክሙ አፍአ ከመ ታእምሩ ከመ አልቦ ዘረከብኩ ላዕሌሁ ጌጋየ ወኢአሐተኒ። ፭. ወወጽአ እግዚእ ኢየሱስ አፍአ እንዘ ይትቄጸል አክሊለ ዘሦክ ወይለብስ ሜላተ። ወይቤሎሙ ጲላጦስ፦ ነዋ ውእቱ ብእሲ። ፮. ወሶበ ርእይዎ ሊቃነ ካህናት ወወዓሊሆሙ ከልሑ ወይቤሉ፦ ስቅሎ፥ ስቀሎ። ወይቤሎሙ ጲላጦስ፦ ንሥእዎ ለሊክሙ ስቅልዎ፥ አንሰ ኢረከብኩ ላዕሌሁ ጌጋየ። ፯. ወአውሥኡ አይሁድ ወይቤልዎ፦ ንሕነሰ ሕገ ብነ ወበከመ ሕግነ ርቱዕ ይሙት እስመ ወልደ እግዚአብሔር ረሰየ ርእሶ። ፰. ወሰሚዖ ጲላጦስ ዘንተ ነገረ ፈርሀ ፈድፋደ። ፱. ወቦአ ካዕበ ኀበ ዓውድ ወይቤሎ ለእግዚእ ኢየሱስ፦ እምአይቴ አንተ? ወኢተሠጥዎ እግዚእ ኢየሱስ ወኢምንተኒ። ፲. ወይቤሎ ጲላጦስ፦ ሊተሂ ኢትነብበኒሁ? ኢታአምርሁ ከመ ብዉሕ ሊተ እስቅልከሂ ወብዉሕ ሊት አሕዩከሂ? ፲፩. ወአውሥአ እግዚእ ኢየሱስ ወይቤሎ፦ ኢኮንከ ብዉሐ ላዕሌየ ወኢምንተኒ ሶበ ኢተውህበ ለከ እምሰማይ ወበእንተ ዝንቱ ዘአግብአኒ ኀቤከ ዘየዐቢ ጌጋይ ላዕሌሁ። ፲፪. ወበእንተዝ ፈቀደ ጲላጦስ ያሕይዎ ወከልሑ አይሁድ ወይቤለ፦ እመ አሕየውኮ ለዝንቱ ኢኮንከ ዐርኮ ለቄሳር እስመ ኵለ ዘያነግሥ ርእሶ ዐላዊሁ ለቄሳር ውእቱ። ፲፫. ወሰሚዖ ጲላጦስ ዘንተ ነገረ አውፅኦ ለእግዚእ ኢየሱስ አፍአ ወነበረ ዲበ መንበር ውስተ መካን ዘስሙ፦ ሊቶስጥሮስ፥ ወበዕብራይስጥ ይብልዎ፦ ገበታ። ፲፬. ወዐርበ ፋሲካ ውእቱ ጊዜ ቀትር ዘስሱ ሰዓት። ወይቤሎሙ ጲላጦስ ለአይሁድ፦ ነዋ ንጉሥክሙ። ፲፭. ወከልሑ ወይቤሉ፦ አእትቶ ወስቅሎ። ወይቤሎሙ ጲላጦስ፦ ለንጉሥክሙኑ እስቅሎ? ወአውሥኡ ሊቃነ ካህናት ወይቤሉ፦ አልብነ ንጉሠ ዘእንበለ ቄሳር። ፲፮. ወእምዝ ወሀቦሙ ይስቅልዎ፥ ወተመጠውዎ ለእግዚእ ኢየሱስ ወአውፅእዎ። ፲፯. ወወሰድዎ እንዘ ይጸውር መስቀሎ ውስተ መካን ዘስሙ፦ ቀራንዮ፥ ወበዕብራይስጥ ይብልዎ፦ ጎልጎታ። ፲፰. ኀበ ሰቀልዎ ወሰቀሉ ምስሌሁ ካልኣነ ክልኤተ ፈያተ፥ አሐደ እምለፌ፥ ወአሐደ እምለፌ ወማእከሎሙ ኢየሱስሃ። ፲፱. ወጸሐፈ ጲላጦስ መጽሐፈ ወአንበረ ዲበ መስቀሉ ወይብል መጽሐፉ፦ ኢየሱስ ናዝራዊ ንጉሦሙ ለአይሁድ ውእቱ ዝንቱ። ፳. ወብዙኃን እምአይሁድ እለ አንበብዋ ለይእቲ መጽሐፍ እስመ ቅሩብ ውእቱ መካን ለሀገር ኀበ ሰቀልዎ ለእግዚእ ኢየሱስ። ወጽሕፈቱ ጽሑፍ ውእቱ በዕብራይስጥ ወበሮማይስጥ ወበጽርእ። ፳፩. ወይቤልዎ ሊቃነ ካህናት ለጲላጦስ፦ ኢትጽሐፍ፦ ንጉሦሙ ለአይሁድ፥ አላ ለሊሁ ይቤ፦ ንጉሦሙ ለአይሁድ አነ። ፳፪. ወአውሥአ ጲላጦስ ወይቤሎሙ፦ ዘጸሐፍኩ ጸሐፍኩ። ፳፫. ወሐራሰ ሶበ ሰቀልዎ ለእግዚእ ኢየሱስ ነሥኡ አልባሲሁ ወረሰይዎ አርባዕተ ክፍለ ለአሐዱ ሐራዊ ክፍለ። ወክዳኖሂ እልታኀ ዘአልቦ ርፍአተ ዘእምላዕሉ እኑም ኵለንታሁ። ፳፬. ወተባሀሉ በበይናቲሆሙ፦ ኢንግምድ ወኢንስጥጥ አላ ንትፋሰስ ለዘረከቦ ይርከቦ፤ ከመ ይብጻሕ ቃለ መጽሐፍ ዘይቤ፦ ተካፈሉ አልባስየ ለርእሶሙ ወተዓፀዉ ዲበ ዐራዝየ። ወከመዝ ገብሩ ሐራ። ዘየአምን በወልድ ቦ ሕይወት ዘለዓለም።

መልእክተ ጳውሎስ Pauline Epistle

፯. ታአምሩ እንከ ከመ እለ አምኑ ውሉደ አብርሃም እሙንቱ። ፰. እስመ አቅደመ አእምሮ መጽሐፍ ከመ በአሚን ያጽድቆሙ እግዚአብሔር ለአሕዛብ አቅደመ አስፍዎቶ እግዚአብሔር ለአብርሃም ከመ ቦቱ ይትባረኩ ኵሎሙ አሕዛብ። ፱. ወይእዜሰኬ እለ የአምኑ ይትባረኩ ምስለ አብርሃም ምእመን። ፲. ወኵሎሙ እለ ውስተ ሕገ ኦሪት ሀለዉ ውስተ መርገም ይነብሩ። እስመ ከመዝ ይቤ መጽሐፍ፦ ርጉመ ለይኩን ኵሉ ዘጽሑፍ ውስተ ዝንቱ መጽሐፈ አሪት ዘኢይፌጽም ገቢሮቶ። ፲፩. ወእምከመሰ ኢይጸድቁ በገቢረ ሕገገ ኦሪት በኀበ እግዚአብሔር ይትዐወቅ፦ ወጻድቅኒ በአሚን የሐዩ፥ በከመ ጽሑፍ። ፲፪. ኦሪትሰ ኢኮነ በአሚን ዘያጸድቅ ዳእሙ፦ ዘፈጸመ ገቢሮቶ የሐዩ ቦቱ። ፲፫. ወለነሰ ተሣየጠነ ክርስቶስ እመርገማ ለኦሪት በዘወድአ በእንቲአነ ወጾረ መርገማ እስመ ከመዝ ይቤ መጽሐፍ፦ ርጉም ውእቱ ኵሉ ዘስቁል ዲበ ዕፅ። ፲፬. ከመ ይግባእ በረከተ አብርሃም ላዕለ አሕዛብ በእንተ ኢየሱስ ክርስቶስ ከመ ንርከብ ተስፋሁ ለመንፈስ ቅዱስ በአሚነ ክርስቶስ።

ዘካልእ መልእክት Universal Epistle

፳. ወምንትኑመ ይእቲ አኰቴትክሙ እመ እንዘ ትኤብሱ ትትዔገሡ መቅሠፍተክሙ? አላ እንዘ ሠናየ ትገብሩ እመ ተዐገሥክሙ ግፍዐክሙ ዛቲ አኰቴት ይእቲ በኀበ እግዚአብሔር። ፳፩. እስመ ወበአንተ ዝንቱ ተጸዋዕክሙ እስመ ክርስቶስኒ በእንቲአክሙ ሐመ ይኅድግ ለክሙ ማዕተቦ ከመ ትትልዉ አሰረ ዚአሁ። ፳፪. በከመ ውእቱ ኢገብረ ኃጢአተ፦ ወኢተረክበ ሐሰት ውስተ አፉሁ። ፳፫. እንዘ ይጼእልዎ ኢጸአለ ወእንዘ ያሐምምዎ ኢተቀየመ። አላ አግብአ ለዘይኴንን ጽድቀ። ፳፬. ወበእንተ ኃጣውኢነ ውእቱ ተሰቅለ ዲበ ዕፅ በሥጋሁ ከመ ያውፅአነ እምኃጣውኢኒ ወበጽድቁ ያሕይወነ፥ እስመ በቍስለ ዚአሁ ሐየውክሙ ቍስለክሙ እንዘ ከመ አባግዕ ትሳኰዩ። ፳፭. ወይእዜኒ ግብኡ ኀበ ኖላዊክሙ ወዐቃቢሃ ለነፍስክሙ።

ግብረ ሃዋርያት Acts

፲፯. ወይእዜኒ አኃውየ አአምር ከመ በኢያእምሮ ገበርክምዎ ለዝ ከመ ገብሩ መላእክቲክሙ። ፲፰. ወእግዚአብሔርሰ በከመ አቅደመ ነጊረ በኦፈ ኵሎሙ ነቢያት ከመ ይትቀተል ክርስቶስ አብጽሐ ከማሁ። ፲፱. ወይእዜኒ ነስሑ ወተጠመቁ። ወይደመሰስ ለክሙ ኃጢእትክሙ ወይመጽእ ሣህል እምቅድመ ገጹ ለእግዚአብሔር። ፳. ወይፌንዎ ለክሙ ለእግዚእ ክርስቶስ ዘአቅደመ ቀቢኦ። ፳፩. ዘኪያሁ ይሴፈዉ ሰማያት ወምድር እስከ አመ ያስተራትዕ ኵሎ በከመ ነበበ እግዚአብሔር በአፈ ነቢያቲሁ ቅዱሳን እለ እምዓለም። ፳፪. ሙሴሂ ይቤሎሙ ለአበዊነ፦ ነቢየ ያነሥእ ለክሙ እግዚአብሔር አምላክነ እምአኃዊክሙ ዘከማየ ወሎቱ ስምዕዎ ኵሎ ዘይቤለክሙ። ፳፫. ወኵሉ ነፍስ እንተ ኢትሰምዖ ለውእቱ ነቢይ ለትሠረው እምሕዝባ። ፳፬. ወኵሎሙ ነቢያት እለ እምአመ ሳሙኤል ወእለሂ እምድኅሬሁ ነገሩ ወአይድዑ በእንተ እላንቱ መዋዕል። ፳፭. ወአንትሙ ውሉዶሙ ለነቢያት ወውሉደ ሥርዓት ዘሠርዖሙ እግዚአብሔር ለአበዊነ። እስመ ይቤሎ ለአብርሃም፦ በዘርዕከ ይትባረኩ ኵሎሙ አሕዛበ ምድር። ፳፮. ወለክሙ ቀደመ አንሥኦቶ እግዚአብሔር ለወልዱ ወፈነዎ ይባርክሙ ከመ ትነስሑ ኵልክሙ እምእከይክሙ።

ስንክሳር Synaxarium

ብንያሚን ሰማዕት ወአውዶክስያ እኅቱ
ወተዝካረ ስቅለቱ ለእግዚእነ
ወጸውዖ እግዚአብሔር ለሳሙኤል

መዝሙር Psalm

ወሳሙኤልኒ ምስለ እለ ይጼውዑ ስሞ፤
ይጼውዕዎ ለእግዚአብሔር ወውእቱኒ ይሰጠዎሙ፤
ወይትናገሮሙ በዐምደ ደመና።

ወንጌል Gospel

፳፮. ወእመቦ ዘይትለአከኒ ሊተ ለይትልወኒ እስመ ኀበ ሀሎኩ አነ ህየ ይሄሉ ዘይትለአከኒ። ወዘሊተ ተልእከኒ ያከብሮ አቡየ። ፳፯. ወይእዜሰ ተሀውከት ነፍስየ ወምንተ እብል፦ አባ አድኅና ለነፍስየ እምዛቲ ሰዓት? ወባሕቱ በእንተ ዝንቱ በጻሕኩ ለዛቲ ሰዓት። ፳፰. አባ ሰብሖ ለወልድከ። ወመጽአ ቃል እምሰማይ ዘይብል፦ ሰባሕኩሂ ወዓዲ ካዕበ እሴብሕ። ፳፱. ወሕዝብሰ እለ ይቀውሙ ወይሰምዑ ይቤሉ፦ ነጐድጓድ ውእቱ፤ ወቦ እለ ይቤሉ፦ መልአክ ተናገሮ። ፴. ወአውሥአ እግዚእ ኢየሱስ ወይቤሎሙ፦ አኮ በእንቲአየ ዘመጽአ ዝቃል አላ በእንቲአክሙ። ፴፩. ወናሁ እብለክሙ ይእዜ በጽሐ ኵነኔሁ ለዝንቱ ዓለም፤ ወእምይእዜሰ ይሰድድዎ ለመልአከ ዝንቱ ዓለም ወያወፅእዎ አፍአ። ፴፪. ወአነኒ እምከመ ተለዐልኩ እምድር እስሕብ ኵሎ ኀቤየ። ፴፫. ወዘንተ ዘይቤ እንዘ ይኤምሮሙ በአይ ሞት ሀለዎ ይሙት። ፴፬. ወአውሥእዎ ሕዝብ ወይቤልዎ፦ ንሕነሰ ሰማዕነ በውስተ ኦሪት ከመ ለዓለም ይነብር ክርስቶስ ወእፎ እንከ ትብለነ አንተ ሀለዎ ለወልደ እጓለ እመሕያው ይትለዐል? መኑ እንከ ዝንቱ ወልደ እጓለ እመሕያው? ፴፭. ወይቤሎሙ እግዚእ ኢየሱስ፦ ዓዲ ኅዳጠ መዋዕለ ሀሎ ምስሌክሙ ብርሃን። አንሶስዉ እንዘ ብክሙ ብርሃነ ዘእንበለ ይርከብክሙ ጽልመት እስመ ዘየሐውር ውስተ ጽልመት ኢየአምር ኀበ የሐውር። ዘየአምን በወልድ ቦ ሕይወት ዘለዓለም።

ቅዳሴ Liturgy :

መዝሙረ ዳዊት Psalm

እግዚኦ መኑ ከማከ፤
ኢታርምም ወኢትጸመም እግዚኦ፤
እስመ ናሁ ወውዑ ፀርከ።

ወንጌል Gospel

፴፫. ወአውሥኡ ወይቤልዎ፦ ዘርዐ አብርሃመ ንሕነ ወእምአመ ኮነ ኢተቀነይነ ወኢለመኑሂ እፎ እንከ ትብለነ ትግዕዙ? ፴፬. ወአውሥአ እግዚእ ኢየሱስ ወይቤሎሙ፦ አማን አማን እብለክሙ፥ ኵሉ ዘይገብራ ለኀጢአት ገብራ ውእቱ ለኀጢአት። ፴፭. ወገብርሰ ኢይነብር ውስተ ቤት ለዝሉፉ ወወልድሰ ይነብር ለዓለም። ፴፮. ወእምከመሰ ወልድ አግዐዘክሙ፥ አማን ግዑዛን አንትሙ። ፴፯. ወአአምር ከመ ዘርዐ አብርሃም አንትሙ፥ ወባሕቱ ተኀሥሡ ትቅትሉኒ፥ እስመ ኢይነብር ቃልየ ኀቤክሙ። ፴፰. ወአንሰ ዘርኢኩ በኀበ አቡየ እነግር ወአንትሙሂ ዘርኢክሙ በኀበ አቡክሙ ትገብሩ። ፴፱. ወአውሥኡ ወይቤልዎ፦ ለነሰ አብርሃም አቡነ። ወይቤሎሙ እግዚእ ኢየሱስ፦ ሶበሰ ውሉደ አብርሃም አንትሙ፥ ግብረ አብርሃም እምገበርክሙ። ፵. ወይእዜሰ ተኀሥሡ ትቅትሉኒ ብእሴ ዘጽድቀ እነግረክሙ ዘሰማዕኩ በኀበ እግዚአብሔር፥ ወአብርሃምሰ ኢገብረ ከመዝ። ዘየአምን በወልድ ቦ ሕይወት ዘለዓለም።

መዝሙረ ዳዊት Psalm

ዘሠርዐ ለአብርሃም፤
ወመሐለ ለይስሐቅ፤
ወአቀመ ስምዐ ለያዕቆብ።

ወንጌል Gospel

፳፪. ወየሐውር አህጉረ ወአዕጻዳተ ያንሶሱ በኢየሩሳሌም ወይሜህር። ፳፫. ወይቤሎ አሐዱ፦ እግዚኦ፥ ውኁዳንኑ እንጋ እሙንቱ እለ ይድኅኑ? ወይቤሎሙ፦ ፳፬. ተኀየሉ ትባኡ እንተ ጸባብ አንቀጽ እብለክሙ ብዙኃን እለ የኀሥሡ ይባኡ ወኢይክሉ። ፳፭. እስመ ይትነሣእ ባዕለ ቤት ወየዐጹ ኆኅተ ወይእተ ጊዜ ይእኅዙ ይቁሙ አፍአ ወይጐድጕዱ እንዘ ይብሉ፦ እግዚኦ፥ እግዚኦ፥ አርኅወነ፤ ወያወሥእ ወይብሎሙ፦ ኢያአምረክሙ እምአይቴ አንትሙ። ፳፮. ወእምዝ ይእኅዙ ይበልዎ፦ በላዕነሂ ወሰተይነሂ በቅድሜከ ወመሀርከ በመራሕብቲነ። ፳፯. ወይቤሎሙ፦ እብለክሙ ኢያአምረክሙ እምአይቴ አንትሙ፥ ረሐቁ እምኔየ ኵልክሙ ገበርተ ዐመፃ። ፳፰. ሑሩ ውስተ ብካይ ወሐቂየ ስነን አመ ርኢክምዎሙ ለአብርሃም ወለይስሐቅ ወለያዕቆብ ወለኵሎሙ ነቢያት በመንግሥተ እግዚአብሔር ወለክሙሰ ያወፅኡክሙ አፍአ። ፳፱. ወይመጽኡ እምጽባሕ ወእምዕራብ ወእምሰሜን ወእምደቡብ ወይትፌሥሑ በመንግሥተ እግዚአብሔር። ፴. ወይከውኑ ደኀርት ቅድመ ወቀደምት ይገብኡ ድኅረ። ይቀልል ኅልፈተ ሰማይ ወምድር፥ እምትደቅ አሐቲ ቃል እምኦሪት ወእምነቢያት፥ ይቤ እግዚእ ለአርዳኢሁ።

መልእክተ ጳውሎስ Pauline Epistle

፩. ምንተ እንከ ንብል በእንተ አብርሃም አቡሆሙ ለቀደምት፥ ረከበኑ ዘንተ በምግባረ ሥጋ? ፪. ሶበሰኬ አብርሃም በምግባሩ ጸድቀ እምኮኖ ምዝጋና ወአኮ ለመንገለ እግዚአብሔር። ፫. ወእፎኑሙ ዘይብል መጽሐፍ? አምነ አብርሃም በእግዚአብሔር ወኮኖ ጽድቀ። ፬. ወዘሰ ተቀንየ ኢይከውኖ ዐስበ ከመ ዘጸገውዎ አላ ከመ ዘይደልዎ። ፭. ወዘሰ ኢተቀንየ ለእመ ተአምነ በዘያጸድቆ ለኃጥእ ይትኈለቆ ጽድቀ አሚኖቱ። ፮. በከመ ነገረ ዳዊት በዘያበፅዕ ሰብእ ወበዘሂ ይትኈለቆ ጽድቀ በኀበ እግዚአብሔር እንዘ ኢይገብር ሕገገ ኦሪት፤ ወይቤ፦ ፯. ፰. ፤ብፁዓን ለእለ ተኀድገ ሎሙ ኃጢአቶሙ። ፱. ወብፁዕ ብእሲ ዘኢኈለቈ ሎቱ እግዚአብሔር ጌጋዮ። ፲. ምንተ እንከ ገቢሮሙ ያበፅዑ? ዘተገዝረኑ ዳእሙ ያበፅዕ ወቈላፍሰ አልቦኑ ፍኖት ኀበ ይበፅዕ? አኮኑ ይቤ መጽሐፍ ጸድቀ አብርሃም ወአብፅዐ። ፲፩. ወማእዜኑ ጸድቀ አብርሃም? ተገዚሮኑ ወሚመ ዘእንበለ ይትገዘር? አኮኬ ተገዚሮ አላ ዘእንበለ ይትገዘር። ፲፪. ወግዝረትሰ ማዕተበ ጽድቅ ትኩኖ ወሀቦ ኪያሃ ወትእምርተ ከመ ይትዐወቅ በላዕሌሁ ከመ በአሚን አጽደቆ እግዚአብሔር ለአብርሃም እንዘ ኢኮነ ግዙረ ውእተ ዕለተ። ከመ ይኩን ውእቱ አባሆሙ ለኵሎሙ ለእለ የአምኑ ዘእንበለ ይትገዘሩ ከመ ያእምሩ ከመ በአሚን ይጸድቁ እሙንቱሂ ከመ ጸድቀ አብርሃም በአሚን። ፲፫. ወከመ ይኩን አባሆሙ ለግዙራን ወአኮ ለግዙራን ለባሕቲቶሙ። ወለእለሂ ዓዲ ይተልዉ አሰረ ሃይማኖት ለአቡነ አብርሃም እንዘ ኢኮኑ ግዙራነ በከመ ውእቱ አቡነ አብርሃም አምነ እንዘ ቈላፍ ውእቱ።

ዘካልእ መልእክት Universal Epistle

፳. ትፈቅድኑ ታእምር ኦ ብእሲ አብድ ከመ ሃይማኖት ዘእንበለ ምግባር ምውት ይእቲ? ፳፩. አኮነ አብርሃም አቡነ በምግባሩ ጸድቀ ሶበ አዕረጎ ለይስሐቅ ወልዱ ውስተ ምሥዋዕ። ፳፪. ትሬኢኑ ከመ ሃይማኖት ትረድኦ ለገቢር፥ ወበምግባሩ መልአት ወፍጽምተ ኮነት ሃይማኖቱ። ፳፫. ወተፈጸመ ዘይብል መጽሐፍ፦ አምነ አብርሃም በእግዚአብሔር ወተኈለቈ ጽድቀ፥ ወፍቁረ እግዚአብሔር ተሰምየ። ፳፬. ትሬእዩኑ ከመ በምግባሩ ይጸድቅ ሰብእ ወአኮ በሃይማኖቱ ባሕቲታ። ፳፭. ወከማሁ ረአብኒ ዘማ በምግባሪሃ ጸድቀት ሶበ ተቀበለቶሙ ለሰብአ ዐይን ወእንተ ካልእት ፍኖት አውጽአቶሙ። ፳፮. በከመ ሥጋ ዘአልቦ መንፈስ ምዉት ውእቱ፥ ከማሁ ሃይማኖትኒ እንተ አልባቲ ምግባረ ሠናይ ምውት ይእቲ።

ግብረ ሃዋርያት Acts

፩. ወይቤሎ ሊቀ ካህናት፦ አማንኑ ከመዝ ትቤ? ፪. ወይቤ፦ ስምዑ አኃዊነ ወአበዊነ። አምላከ ስብሐት አስተርአዮ ለአቡነ አብርሃም እንዘ ሀሎ በማእከለ አፍላግ ዘሶርያ ዘእንበለ ይፍልስ ካራን። ፫. ወይቤሎ፦ ፃእ እምብሔርከ ወእምአዝማዲከ ወነዓ ውስተ ብሔር ዘአነ አርእየከ። ፬. ወእምዝ ወፂኦ እምከልዴዎን ነበረ ውስተ ካራን ወእምዝ መዊቶ አቡሁ አፍለሶ ውስተ ዛሀገር ኀበ ሀለውክሙ አንትሙ ይእዜ ትነብሩ። ፭. ወኢወሀቦ በውስቴታ ርስቶ ወኢመጠነ ምክያደ እግር ወባሕቱ አስፈዎ የሀቦ ኪያሃ ይኰንና ውእቱ ወዘርዑ እምድኅሬሁ እንዘ አልቦ ውሉደ ይእተ አሚረ። ፮. ወከመዝ ይቤሎ እግዚአብሔር፦ ሀለዉ ዘርእከ ይነብሩ ፈላስያን ብሔረ ነኪር ወይትቀነዩ ሎሙ ወያሐምምዎሙ አርብዐተ ምእተ ዓመተ። ፯. ወለሕዝብሰ እለ ይቀንይዎሙ አነ እኴንኖሙ ይቤ እግዚአብሔር ወእምዝ ይወፅኡ ወያመልኩኒ በዝ ብሔር። ፰. ወወሀቦ ሥርዓተ ግዝረት ወእምዝ ወለደ ለይስሐቅ ወገዘሮ አመ ሳምንት ዕለት። ወከማሁ ይስሐቅኒ ለያዕቆብ። ወያዕቆብኒ ለዐሠርቱ ወክልኤቱ አበው ቀደምት።

ስንክሳር Synaxarium

አብርሃም ይስሓቅ ወያዕቆብ
ወአባ ብርሳቦ ወ፲ቱ መነኮሳት አርዳኢሁ
ወሊቀ አፍራስ ዘንጉሠ ፋርስ
ወ፰፻ ማኅበራነ ኤስድሮስ

መዝሙር Psalm

አንሣእኩ አዕይንትየ መንገለ አድባር፤
እምአይቴ ይምጻእ ረድኤትየ፤
ረድኤትየሰ እምኀበ እግዚአብሔር።

ወንጌል Gospel

፳፫. ወበይእቲ ዕለት መጽኡ ኀቤሁ ሰዱቃውያን እለ ይብሉ አልቦ ትንሣኤ ምዉታን። ፳፬. ወተስእልዎ እንዘ ይብሉ፦ ሊቅ፥ ሙሴ ይቤ፦ እመቦ ዘሞተ እኁሁ እንዘ አልቦ ውሉደ ያውስብ ብእሲተ እኁሁ ወያቅም ውሉደ ለእኁሁ። ፳፭. ሀለዉ እንከ ኀቤነ ሰብዐቱ አኀው ወዘይልህቅ አውሰበ ወሞተ ወእስመ አልቦ ውሉደ ኀደገ ብእሲቶ ለእኁሁ። ፳፮. ወከማሁ ካልኡኒ፥ ወሣልሱሂ፥ እስከ ሰብዐቲሆሙ። ፳፯. ወድኅረ ኵሎሙ ሞተት ይእቲ ብእሲት። ፳፰. አመ ይትነሥኡ እንከ ምዉታን፥ ለመኑ እምሰብዐቲሆሙ ትከውን ብእሲተ? እስመ ኵሎሙ አውሰብዋ። ፳፱. ወአውሥአ እግዚእ ኢየሱስ ወይቤሎሙ፦ ትስሕቱ በኢያእምሮ መጻሕፍት ወኢኀይለ እግዚአብሔር። ፴. አመሰ የሐይዉ ምዉታን ኢያወስቡ ወኢይትዋሰቡ አላ ከመ መላእክተ እግዚአብሔር በሰማያት እሙንቱ። ፴፩. ወበእንተ ትንሣኤ ምዉታንሰ፥ ኢያንበብክሙሁ ዘተብህለ ለክሙ እምኀበ እግዚአብሔር ዘይቤ፦ ፴፪. አነ እግዚአብሔር አምላከ አብርሃም ወአምላከ ይስሐቅ ወአምላከ ያዕቆብ? አምላከ ሕያዋንኬ ውእቱ ወአኮ አመላከ ምዉታን። ፴፫. ወሰሚዖሙ ሕዝብ አንከሩ ምሂሮቶ። ሰማይ ወምድር የኀልፍ ወቃልየሰ ኢየኀልፍ ይቤ እግዚእ ለአርዳኢሁ።

ቅዳሴ Liturgy :

መዝሙረ ዳዊት Psalm

ለይትፈሣሕ ልብ ዘየኃሥሦ ለእግዚአብሔር፤
ኅሥዎ ለእግዚአብሔር ወትፀንዑ፤
ወኅሡ ገጾ በኵሉ ጊዜ።

ወንጌል Gospel

፴. ወናሁ ሣዕረ ገዳም ዘዮም ሀሎ ወጌሠመ ውስተ እቶን እሳት ይትወደይ፥ ወእግዚአብሔር ዘከመዝ ያለብሶ፤ እፎ እንከ ፈድፋደ ኪያክሙ ኦ ሕፁፃነ ሃይማኖት? ፴፩. ኢትተክዙኬ እንከ እንዘ ትብሉ፦ ምንተ ንበልዕ? ወምንተ ንሰቲ? ወምንተ ንትከደን? ፴፪. እስመ ዘንተሰ ኵሎ አሕዛብ ዓለም ዘአፍኣ የኀሥሥዎ፥ ወለክሙሰ የአምር አቡክሙ ሰማያዊ ከመ ትፈቅዱ ዘንተ ኵሎ፤ ፴፫. አንትሙሰ ኅሡ መቅድመ መንግሥቶ ወጽድቆ፥ ወዝንቱሰ ኵሉ ይትዌሰከክሙ። ፴፬. ኢትበሉኬ ለጌሠም፥ እስመ ጌሠምሰ ትሔሊ ለርእሳ፤ የአክላ ለዕለት እከያ ወሥርሓ። ሰማይ ወምድር የኀልፍ ወቃልየሰ ኢየኀልፍ ይቤ እግዚእ ለአርዳኢሁ።

መዝሙረ ዳዊት Psalm

ምስሌከ ቀዳማዊ በዕለተ ኀይል፤
በብርሃኖሙ ለቅዱሳን፤
ወለድኩከ እምከርሥ እምቅድመ ኮከበ ጽባሕ።

ወንጌል Gospel

፩. ወኮነ በውእቱ መዋዕል ወጽአ ትእዛዝ እምኀበ ቄሳር ንጉሥ ከመ ይጸሐፍ ኵሉ ዓለም። ፪. ወውእቱ ጸሐፍ ቀዳሚ ውእቱ አመ ቄሬኔዎስ መስፍን ለሶርያ። ፫. ወሖረ ኵሉ ሰብእ ይጸሐፍ በበ ሀገሩ። ፬. ወዐርገ ዮሴፍኒ እመገሊላ እምሀገረ ናዝሬት መንገለ ይሁዳ ኀበ ሀገረ ዳዊት እንተ ስማ ቤተ ልሔም እስመ እምሀገረ ዳዊት ወእምአዝማደ ቤቱ ውእቱ። ፭. ወሖረ ይጸሐፍ ምስለ ማርያም እንተ ፈሐሩ ሎቱ ብእሲተ እንዘ ፅንስት ይእቲ። ፮. ወእምዝ እንከ እንዘ ሀለዉ ህየ በጽሐ ዕለተ ወሊደታ። ፯. ወወለደት ወልደ ዘበኵራ ወአሰረቶ መንኮብያቲሁ ወአስከበቶ ውስተ ጎል እስመ አልቦሙ መካነ ውስተ ማኅደሮሙ። ይቀልል ኅልፈተ ሰማይ ወምድር፥ እምትደቅ አሐቲ ቃል እምኦሪት ወእምነቢያት፥ ይቤ እግዚእ ለአርዳኢሁ።

መልእክተ ጳውሎስ Pauline Epistle

፲፮. እስመ ሕገገ ኦሪት መቅሠፍተ ያመጽእ ዲበ ዘዐለወ ወኀበ አልቦ ኦሪት አልቦ አበሳ። ፲፯. ወበእንተዝ በአሚን ረሰየ እግዚአብሔር ጸዲቀ ከመ ይኩን እሙነ ዘአሰፈዎ እግዚአብሔር ለአብርሃም ወለዘርዑ ከመ ያእምሩ ከመ አኮ በገቢረ ሕገገ ኦሪት ዘይጸድቁ ዘእንበለ ዳእሙ በአሚን። በከመ አምነ አብርሃም አበ ኵልነ። ፲፰. ዘይቤሎ እግዚአብሔር፦ እሬስየከ አባሆሙ ለብዙኃን አሕዛብ። እለ የአምኑ በእግዚአብሔር ዘያነሥኦሙ ለምዉታን ወይሬስዮሙ ለእለ ኢሀለዉ ከመ ዘሀለዉ። ፲፱. ወተአመነ አብርሃም ከመ ይከውን አባሆሙ ለብዙኃን አሕዛብ ከመ አሰፈዎ እግዚአብሔር ወይቤሎ፦ ከማሁ ይከውን ዘርዕከ። ፳. ወተአመነ አብርሃም ወኢናፈቀ እንዘ ይሬኢ ርእሶ ከመ ልሂቅ ወከመ ነፍስተ በድን ሥጋሁ እስመ ምእት ክረምቱ። ወሳራሂ ከመ ምውት ይእቲ ማሕፀና። ፳፩. ወኢናፈቀ ወኢቀብጸ በዘአሰፈዎ እግዚአብሔር። ፳፪. ወተአመነ በኵሉ ልቡ ከመ ይክል ገቢረ ሎቱ እግዚአብሔር ወአእኰቶ። ፳፫. ወእንበይነዝ ጽድቀ ኮኖ። ፳፬. ወአኮ እንበይነ ባሕቲቱ ዘተጽሕፈ ዝንቱ። ፳፭. አኮኑ በእንቲአነሂ እለ አመነ በዘአንሥኦ ለእግዚእነ እምዉታን። ፳፮. ዘተሰቅለ በእንተ ኃጢአትነ ወተንሥአ ከመ ያጽድቀነ ወከመ ያንሥአነ።

ዘካልእ መልእክት Universal Epistle

፱. ወእመሰ ስምዐ ሰብእ ንነሥእ ስምዐ እግዚአብሔር የዐቢ ወዛቲ ይእቲ ስምዑ ለእግዚአበሔር እንተ ስምዐ ኮነ ላዕለ ወልዱ። ፲. ዘየአምን በወልደ እግዚአብሔር ሀለወ ስምዐ እግዚአብሔር ምስሌሁ፥ ወዘሰ ኢየአምን በወልዱ ሐሳዌ ረሰዮ እስመ ኢየአምን በስምዕ እንተ ስምዐ ኮነ እግዚአብሔር ላዕለ ወልዱ። ፲፩. ወዛቲ ይእቲ ስምዑ ለእግዚአብሔር እስመ ወሀበነ ሕይወተ ዘለዓለም ወዛቲ ይእቲ ሕይወት እንተ በወልዱ። ፲፪. ዘሀለወ ምስሌሁ ወልድ ቦቱ ሕይወት። ወዘሰ ኢሀሎ ምስለ ወልደ እግዚአብሔር አልቦቱ ሕይወት። ፲፫. ወዘንተ ጸሐፍኩ ለክሙ ከመ ታእምሩ ከመ ብክሙ ሕይወት ዘለዓለም እለ ተአምኑ በስሙ ለወልደ እግዚአብሔር። ፲፬. ወዛቲ ይእቲ እንተ ብነ ገጽ በኀበ እግዚአብሔር እስመ ዘሰአልነ ኀቤሁ በስመ ዚአሁ ይሰምዐነ። ፲፭. ወእመሰ ርኢነ ከመ ዘሰአልናሁ ይሰምዐነ ናአምር እንከ ከመ ብነ ስእለት ዘሰአልነ በኀቤሁ። ፲፮. ወእመሰቦ ዘርእዮ ለካለኡ እንዘ ይኤብስ አበሳ ዘኢኮነ ለሞት ለይስአሎ ለእግዚአብሔር ከመ ያሕይዎ ለዘይኤብስ አበሳ ዘኢኮነ ለሞት። እስመቦ አበሳ ዘለሞት ወኢኮነ በእንቲአሁ ዘእብለ ከመ ይስአሉ ሎቱ። ፲፯. እስመ ኵሉ አበሳ ኃጢአት ይእቲ ወቦ ጌጋይ ዘኢኮነ ለሞት። ፲፰. ናአምር ከመ ኵሉ ዘተወልደ እምነ እግዚአብሔር ኢይኤብስ አላ ዘተወልደ እምእግዚአብሔር የዐቅብ ርእሶ ወእኩይኒ ኢይስሕጦ። ፲፱. ናአምር ከመ እምነ እግዚአብሔር ንሕነ ወዓልምሰ ኵሉ በእኪት ይቀውም። ፳. ወነአምር ከመ ወልደ እግዚአብሔር መጽአ ወወሀበነ ልበ ከመ ናእምሮ ለእግዚአብሔር ዘበጽድቅ። ወሀለውነ ዘበጽድቅ በወልደ እግዚአብሔር በኢየሱስ ክርስቶስ ውእቱ ዘበአማን እግዚአብሔር ወብነ ሕይወት ዘለዓለም።

ግብረ ሃዋርያት Acts

፳፩. ወይቤልዎ፦ ረበናተ አይሁድ ለነሰ ኢበጽሐነ መጽሐፈ መልእክት እምድረ ይሁዳ በእንቲአከ ወኢአሐዱ እምአኀው እለ መጽኡ እምኢየሩሳሌም ኢተናገረ ቅድመ ወኢዜነዉነ በእንቲአከ በነገር እኩይ። ፳፪. አላ ንሕነ ንፈቱ ንስማዕ እምኔከ አሚኖተከ ወበእንተ ትምህርተ ሕግ ዘትብል እስመ ሰማዕነ ከመ በኵለሄ ትትከሓዱ። ፳፫. ወእምዝ ዐደሞሙ ዕለተ በዘይመጽኡ ኀቤሁ ወመጽኡ ኀቤሁ ብዙኃን ኀበ ሀሎ የኀድር። ወነገሮሙ በእንተ መንግሥተ እግዚአብሔር እንዘ ያስምዖሙ ወያአምኖሙ በእንተ እግዚኦ ኢየሱስ እምኦሪተ ሙሴ ወእምነቢያት እምነግህ እስከ ሰርክ። ፳፬. ወቦ እለሂ አምንዎ ወመንፈቆሙሰ አበይዎ። ፳፭. ወእንዘ ኢየኀብሩ ተመይጡ እምኀቤሁ፥ ወይቤሎሙ ጳውሎስ፦ ከመዝ አማን ይቤ መንፈስ ቅዱስ በቃለ ኢሳይያስ ነቢይ ለአበዊነ፥ እንዘ ይብል፦ ፳፮. ሑር ኀበ ዝንቱ ሕዝብ ወበሎ ሰሚዐ ትሰምዑ ወኢትሌብዉ ወርእየ ትሬእዩ ወኢታአምሩ። ፳፯. እስመ ገዝፈ ልቦሙ ለዝንቱ ሕዝብ ወድንቅወ ሰምዑ በእዘኒሆሙ ወከደኑ አዕይንቲሆሙ ከመ ኢይርአዩ በአዕይንቲሆሙ ወኢይስምዑ በእዘኒሆሙ ወኢይለብዉ በልቦሙ ወኢይትመየጡ ወኢይሣሀሎሙ።

ስንክሳር Synaxarium

ተዝካረ ልደቱ ለእግዚእነ
ወአትናቴዎስ
ወዮሐንስ ሐፂር

መዝሙር Psalm

ዘርዐ አብርሃም አግብርቲሁ፤
ወደቂቀ ያዕቆብ ኅሩያኒሁ፤
ውእቱ እግዚአብሔር አምላክነ።

ወንጌል Gospel

፴፬. ወአውሥአ እግዚእ ኢየሱስ ወይቤሎሙ፦ ውሉደ ዝንቱ ዓለም ያወስቡ ወይትዋሰቡ ወይወልዱ ወይትዋለዱ። ፴፭. ወእለሰ ይደልዎሙ ይርከብዎ ለዝክቱ ዓለም አመ የሐይዉ ምዉታን ኢያወስቡ ወኢይትዋሰቡ። ፴፮. ወኢሂ ይትከሀሎሙ እንከ መዊት አላ ከመ መላእክት እሙንቱ ወውሉደ እግዚአብሔር ይከውኑ ወውሉደ ሕይወት እሙንቱ። ፴፯. ወከመሰ የሐይዉ ምዉታን ሙሴሂ ነገረ ዘከመ ይቤሎ እግዚአብሔር በኀበ ዕፀ ባጦስ፦ አነ ውእቱ አምላከ አብርሃም ወአምላከ ይስሐቅ ወአምላከ ያዕቆብ። ፴፰. ኢኮነኬ አምላከ ምዉታን አላ አምላከ ሕያዋን ውእቱ እስመ ኵሎሙ ሕያዋን እሙንቱ በኀቤሁ። ፴፱. ወአውሥኡ ሰብእ እምጸሐፍት ወይቤሎ፦ ሊቅ ሠናየ ትቤ። ፵. ወአልቦ እንከ መኑሂ ዘተኀበለ ይስአሎ። ይቀልል ኅልፈተ ሰማይ ወምድር፥ እምትደቅ አሐቲ ቃል እምኦሪት ወእምነቢያት፥ ይቤ እግዚእ ለአርዳኢሁ።

ቅዳሴ Liturgy :

መዝሙረ ዳዊት Psalm

ውስተ ኵሉ ምድር ወፅአ ነገሮሙ፤
ወእስከ አጽናፈ ዓለም በጽሐ ነቢቦሙ፤
ወውስተ ፀሐይ ሤመ ጽላሎቶ።

ወንጌል Gospel

፰. ወይቤሎ አሐዱ እምአርዳኢሁ ዘውእቱ እንድርያስ እኁሁ ለስምዖን ጴጥሮስ፦ ፱. ሀሎ ዝየ ወልድ ዘቦቱ ኃምስ ኅብስተ ሰገም ወክልኤቲ ዓሣት ወባሕቱ ምንተ ይበቍዓ እማንቱ ለዘመጠነዝ ሰብእ? ፲. ወይቤሎሙ እግዚእ ኢየሱስ፦ ግበሩ ምርፋቃተ ለሰብእ፤ ወብዙኅ ሣዕሩ ለውእቱ መካን፤ ወረፈቁ ዕደዊሆሙ ወየአክል ኈልቆሙ መጠነ ኀምሳ ምእት ብእሲ። ፲፩. ወነሥአ እግዚእ ኢየሱስ ውእተ ኅብስተ ወአእኰተ ባረከ ወፈተተ ወወሀቦሙ ለአርዳኢሁ ወአርዳኢሁኒ አቅረቡ ለሰብእ ወእምዓሣሁኒ ከማሁ መጠነ ፈቀዱ። ፲፪. ወእምድኅረ በልዑ ወጸገቡ፥ ይቤሎሙ እግዚእ ኢየሱስ ለአርዳኢሁ፦ አስተጋብኡ ዘተርፈ ፍተታተ ከመ አልቦ ዘይትገደፍ ወኢምንትኒ እምኔሆን፤ ፲፫. ወአስተጋብኡ ወመልአ ዐሠርተ ወክልኤተ መሣይምተ እምኀምስቱ ኅብስተ ሰገም ዘተርፈ ፍተታት እምዘ በልዑ ወጸግቡ። ፲፬. ወርእዮሙ ሕዝብ ዘገብረ ተአምረ እግዚእ ኢየሱስ ይቤሉ፦ አማን ነቢይ ውእቱ ዝንቱ ዘመጽአ ውስተ ዓለም። ዘየአምን በወልድ ቦ ሕይወት ዘለዓለም።

መዝሙረ ዳዊት Psalm

መንክር ተላህያ ለባሕር፤
መንክርሰ እግዚአብሔር በአርያሙ፤
ስምዐ ዚአከ እሙን ፈድፋደ።
 

ወንጌል Gospel

፲፯. እምይእቲ ዕለት አኀዘ እግዚእ ኢየሱስ ይስብክ ወይበል፦ ነስሑ እስመ ቀርበት መንግሥት ሰማያት። ፲፰. ወእንዘ ያንሶሱ መንገለ ባሕረ ገሊላ ርእየ ክልኤተ አኀወ፥ ስምዖንሃ ዘተሰምየ ጴጥሮስ፥ ወእንድርያስሃ እኅዋሁ እንዘ ያወርዱ መርበብቶሙ ውስተ ባሕር እስመ መሠግራን እሙንቱ። ፲፱. ወይቤሎሙ እግዚእ ኢየሱስ፦ ንዑ ትልዉኒ ድኅሬየ ወእሬስየክሙ ትኩኑ መሠግራነ ሰብእ። ፳. ወበጊዜሃ ኀደጉ መሣግሪሆሙ ወተለውዎ። ፳፩. ወኅሊፎ ሕቀ እምህየ ርእየ ካልኣነ ክልኤተ አኀወ ያዕቆብሃ ወልደ ዘብዴዎስ ወዮሐንስሃ እኅዋሁ ውስተ ሐመር ምስለ ዘብዴዎስ አቡሆሙ ይሠርዑ ወያስተሣንዩ መሣግሪሆሙ ወጸውዖሙ። ፳፪. ወበጊዜሃ ኀደጉ ሐመሮሙ ወአባሆሙ ወተለውዎ። ሰማይ ወምድር የኀልፍ ወቃልየሰ ኢየኀልፍ ይቤ እግዚእ ለአርዳኢሁ።

መልእክተ ጳውሎስ Pauline Epistle

፱. ወብፁዕ ብእሲ ዘኢኈለቈ ሎቱ እግዚአብሔር ጌጋዮ። ፲. ምንተ እንከ ገቢሮሙ ያበፅዑ? ዘተገዝረኑ ዳእሙ ያበፅዕ ወቈላፍሰ አልቦኑ ፍኖት ኀበ ይበፅዕ? አኮኑ ይቤ መጽሐፍ ጸድቀ አብርሃም ወአብፅዐ። ፲፩. ወማእዜኑ ጸድቀ አብርሃም? ተገዚሮኑ ወሚመ ዘእንበለ ይትገዘር? አኮኬ ተገዚሮ አላ ዘእንበለ ይትገዘር። ፲፪. ወግዝረትሰ ማዕተበ ጽድቅ ትኩኖ ወሀቦ ኪያሃ ወትእምርተ ከመ ይትዐወቅ በላዕሌሁ ከመ በአሚን አጽደቆ እግዚአብሔር ለአብርሃም እንዘ ኢኮነ ግዙረ ውእተ ዕለተ። ከመ ይኩን ውእቱ አባሆሙ ለኵሎሙ ለእለ የአምኑ ዘእንበለ ይትገዘሩ ከመ ያእምሩ ከመ በአሚን ይጸድቁ እሙንቱሂ ከመ ጸድቀ አብርሃም በአሚን። ፲፫. ወከመ ይኩን አባሆሙ ለግዙራን ወአኮ ለግዙራን ለባሕቲቶሙ። ወለእለሂ ዓዲ ይተልዉ አሰረ ሃይማኖት ለአቡነ አብርሃም እንዘ ኢኮኑ ግዙራነ በከመ ውእቱ አቡነ አብርሃም አምነ እንዘ ቈላፍ ውእቱ። ፲፬. ወአኮ በእንተ ሕገገ ኦሪት ዘረከበ ተስፋ አብርሃም ወዘርዑ ከመ ይረስ ዓለመ። አላ ዳእሙ ዘረከበ ዘንተ በጽድቀ ሃይማኖቱ በቃለ እግዚአብሔር ወአሚን ቦቱ። ፲፭. ሶበሰኬ ዘገብረ ዳእሙ ሕገገ ኦሪት ይነሥእ ተስፋ ወይወርስ ዓለመ እምኢበቍዖ ለአብርሃም አሚኖቱ ወእመሂ ኢረከበ ተስፋሁ። ፲፮. እስመ ሕገገ ኦሪት መቅሠፍተ ያመጽእ ዲበ ዘዐለወ ወኀበ አልቦ ኦሪት አልቦ አበሳ።

ዘካልእ መልእክት Universal Epistle

፲፩. አሌ ሎሙ፥ እስመ በፍኖተ ቃየን ሖሩ ወበዐስበ ጌጋዩ ለበለዓም ውዕዩ ወበካሕዱ ለቆሬ ተሐጕሉ። ፲፪. እሉ እሙንቱ እለ በፍቅር አፍቀሩክሙ ከመ ያስሕቱክሙ ተባዕያን ለኃጢአቶሙ ወየሐውሩ በፍትወቶሙ ወዘእንበለ ፍርሀት ይሬዕዩ ርእሶሙ። ከመ ደመና እሙንቱ እንተ አልባቲ ዝናም እንተ ትትሀወክ እምነፋስ ከመ ዕፀዋትኒ ይቡሳት እለ አልቦን ፍሬ እለ ካዕበ ሞታ ወተሠረዋ። ፲፫. ወከመ ሞገዳተ ባሕር እሙንቱ እቡዳት እለ ያፈልሕዋ ለኀሳሮሙ ወከመ ከዋክብት ጽልሙታን እለ ለፍጻሜ ጽልመቶሙ ይጸንሖሙ ለዓለመ ዓለም። ፲፬. በከመ ተነበየ ሄኖክ በእንቲአሆሙ ዘውእቱ ሳብዕ እምአዳም፥ ወይቤ ናሁ ይመጽእ እግዚአብሔር በአእላፊሁ ቅዱሳን። ፲፭. ከመ ይግበር ኵነኔ ወይፈድዮ ለኵሉ ወይዛለፎሙ ለኵሎሙ ኃጥኣነ በእንተ ኵሉ ግብረ ኃጣውኢሆሙ ዘአበሱ ወበእንተ ኵሉ ዘነበቡ ላዕሌሁ ዘኢይከውን ቃለ ኃጥኣን ወጽልሕዋን። ፲፮. እሉ እሙንቱ እለ ያንጐረጕሩ እስመ ቅቡጻን ተስፋሆሙ እለ የሐውሩ በፍትወተ ልቦሙ ወአፉሆሙኒ ይነብብ ትዕቢተ ወያስተብዕሉ ወያደልዉ ለገጽ ወዝኵሉ ዘይገብሩ ከመ ይርብሖሙ። ፲፯. ወአንትሙሰ አኀዊነ ተዘከሩ ቃለ ዘነገሩክሙ ቀዲሙ ሐዋርያቲሁ ለእግዚእነ ኢየሱስ ክርስቶስ። ፲፰. ወዘይቤሉክሙ ከመ፦ በደኃሪ መዋዕል ይመጽኡ መስሕታን እለ ይሜህሩ በፍትወተ ልቦሙ ወያስሕቱ በኃጣውኢሆሙ።

ግብረ ሃዋርያት Acts

፳፮. ወባሕቱ ንበጽሕ አሐተ ደሴተ። ፳፯. ወአመ ዐሡር ወረቡዕ ጊዜ መንፈቀ ሌሊት መሰሎሙ ለኖትያት ከመ ይበጽሑ ምድረ። ፳፰. ወአውረዱ ሐብለ ወረከቡ ዕሥራ በቆመ ብእሲ። ወተአተቱ እምህየ ወአውረዱ ካዕበ ወረከቡ ዐሠርተ ወኀምስተ በቆም። ፳፱. ወፈርሁ ከመ ኢይደቁ ውስተ መካን ዘቦቱ ኰኵሕ ወአውረዱ አርባዕተ መልሕቀ ውስተ ባሕር እንተ ድኅረ ሐመር ወጸለይነ ከመ ፍጡነ ይጽባሕ። ፴. ወእምዝ ሶበ ፈቀዱ ይተኃጥኡ ኖተያት እምሐመር ወአውረዱ እምኔሃ ራግናተ ውስተ ባሕር ከመ ይደሀሉ ቦቱ ወያጽንዑ ሐመሮሙ በምድር። ፴፩. ወርኢዮ ጳውሎስ ይቤሎ ለሐቢ ወለሠገራት፦ እምከመ ኢነበሩ እሉ ኖትያት ውስተ ሐመር ኢንክል ሐይወ።

ስንክሳር Synaxarium

ሚልኪያስ ነቢይ
ወአባ ሙሴ
ወአስተርአዮ እግዚእነ ለእንድርያስ ውስተ ባሕር

መዝሙር Psalm

ዘየሐውር በፍኖት ንጹሕ ውእቱ ይትለአከኒ፤
ወኢይነብር ማእከለ ቤትየ ዘይገብር ትዕቢተ፤
ወኢያረትዕ ቅድሜየ ዘይነብብ ዐመፃ።

ወንጌል Gospel

፲፬. ወእምድኅረ አኀዝዎ ለዮሐንስ መጽአ እግዚእ ኢየሱስ ገሊላ ወሰበከ ወንጌለ መንግሥተ እግዚአብሔር። ፲፭. ወይቤ፦ በጽሐ ጊዜሁ ወቀርበት መንግሥተ ሰማያት፥ ነስሑ ወእመኑ በወንጌል። ፲፮. ወእንዘ የኀልፍ መንገለ ባሕረ ገሊላ ረከቦሙ ለስምዖን ወለእንድርያስ እኁሁ እንዘ ያሤግሩ ውስተ ባሕር እስመ መሠግራን እሙንቱ። ፲፯. ወይቤሎሙ እግዚእ ኢየሱስ፦ ንዑ ትልዉኒ፥ ወእሬስየክሙ መሠግራነ ሰብእ። ፲፰. ወኀደጉ መሣግሪሆሙ ወተለውዎ ሶቤሃ። ፲፱. ወኀሊፎ እምህየ ሕቀ ረከቦሙ ለያዕቆብ ወለዮሐንስ እኁሁ ደቂቀ ዘብደዎስ ወለሊሁኒ ምስሌሆሙ ውስተ ሐመር ያስተሣንዩ መሣግሪሆሙ። ፳. ወጸውዖሙ ወኀደጉ ዘብዴዎስሃ አባሆሙ ምስለ ዐሳቡ ውስተ ሐመር ወሖሩ ወተለውዎ። ፳፩. ወሖሩ ቅፍርናሆም ወቦአ በሰንበት ምኵራበ ወአኀዘ ይምሀሮሙ። ፳፪. ወአንከርዎ ምህሮቶ እስመ ከመ መኰንን ይሜህሮሙ ወአኮ ከመ ጸሐፍቶሙ። ዘቦ እዝን ሰሚዐ ለይስማዕ።

ቅዳሴ Liturgy :

መዝሙረ ዳዊት Psalm

ደቂቀ ዕጓለ እመሕያው እስከ ማዕዜኑ ታከብዱ ልበክሙ፤
ለምንት ታፈቅሩ ከንቶ ወተሐሱ ሐሰተ፤
አእምሩ ከመ ተሰብሐ እግዚአብሔር በጻድቁ።
 

ወንጌል Gospel

፳. ወእምሰብአ ጽርእ እለ ዐርጉ ይስግዱ ለበዓል። ፳፩. ወሖሩ እሙንቱሂ ኀበ ፊልጶስ ዘቤተ ሳይዳ ዘገሊላ ወሰአልዎ ወይቤልዎ፦ እግዚኦ ንፈቅድ ንርአዮ ለእግዚእ ኢየሱስ። ፳፪. ወሖረ ፊልጶስ ወነገሮ ለእንድርያስ ወሖሩ እንድርያስ ወፊልጶስ ወነገርዎ ለእግዚእ ኢየሱስ። ፳፫. ወአውሥአ እግዚእ ኢየሱስ ወይቤሎሙ፦ በጽሐ ጊዜሁ ከመ ይሰባሕ ወልደ እጓለ እመሕያው። ፳፬. አማን አማን እብለክሙ እመ ኢወድቀተ ኅጠተ ስርናይ ውስተ ምድር ወኢሞተት ባሕቲታ ትነብር፥ ወእመሰ ሞተት ብዙኀ ፍሬ ትፈሪ። ፳፭. ወዘሰ ያፈቅራ ለነፍሱ ይገድፋ፥ ወዘሰ ጸልኣ ለነፍሱ በዝንቱ ዓለም የዐቅባ ለሕይወት ዘለዓለም። ፳፮. ወእመቦ ዘይትለአከኒ ሊተ ለይትልወኒ እስመ ኀበ ሀሎኩ አነ ህየ ይሄሉ ዘይትለአከኒ። ወዘሊተ ተልእከኒ ያከብሮ አቡየ። ዘየአምን በወልድ ቦ ሕይወት ዘለዓለም።