መዝሙረ ዳዊት Psalm

አአኵተከ እግዚኦ እስመ ተወከፍከኒ፤
ወስላተ ጸላኢ ኢረሰይከኒ፤
እግዚኦ አምላኪየ ጸራሕኩ ኀቤከ ወተሣሃልከኒ።

ወንጌል Gospel

፲፭. ወርእዮ አሐዱ እምኔሆሙ ከመ ነጽሐ ተመይጠ እንዘ ያአኵቶ ለእግዚአብሔር በዓቢይ ቃል። ፲፮. ወሰገደ ታሕተ እገሪሁ ለእግዚእ ኢየሱስ በገጹ ወአእኰቶ ወሳምራዊ ብእሲሁ። ፲፯. ወአውሥአ እግዚእ ኢየሱስ ወይቤሎ፦ አኮኑ ዐሠርቱ እሙንቱ እለ ነጽሕክሙ? አይቴኑ እንከ ትስዐቱ? ፲፰. ሎሙሰ ተስእኖሙ ተመይጦ ወኣእኵቶ ለእግዚአብሔር ዘእንበለ ዝንቱ ዘካልእ ሕዝቡ? ፲፱. ወይቤሎ፦ ተንሥእ ወሑር፥ ሃይማኖትከ አሕየወተከ። ይቀልል ኅልፈተ ሰማይ ወምድር፥ እምትደቅ አሐቲ ቃል እምኦሪት ወእምነቢያት፥ ይቤ እግዚእ ለአርዳኢሁ።

መልእክተ ጳውሎስ Pauline Epistle

፩. ምንተ እንከ ንብል? ንግበርኑ ኃጢአተ ከመ ይፈድፍድ ጸጋሁ ለእግዚአብሔር? ፪. ሓሰ። አኮኑ ወዳእነ ሞትነ እምኃጢአትነ እፎ እንከ ንክል ሐይወ ባቲ? ፫. ወዘንተ ባሕቱ አእምሩ ኵልክሙ ከመ እለ ተጠመቅነ በእግዚእነ ኢየሱስ ክርሱስ ውስተ ሞቱ ተጠመቅነ? ፬. ወተቀበርነ ምስሌሁ ውስተ ጥምቀት በሞቱ ከመ በከመ ውእቱ ክርስቶስ ተንሥእ እምውታን በስብሓተ አቡሁ ከማሁ ንሕነኒ ናንሶሱ ውስተ ሐዳስ ሕይወት። ፭. ወእመሰኬ ተመሰልናሁ በሞቱ ንትሜሰሎ በሕይወቱሂ። ፮. ወዘንተ ባሕቱ አእምሩ ከመ ብሉይ ብእሲነ ውእቱ ዘተሰቅለ ምስሌሁ ከመ ይስዐሮ ለነፍስተ ኃጢአት ወኢይገብእ ዳግመ ይትቀነይ ለኃጢኦት። ፯. አስመ ዘሞተሰ ድኅነ እምገቢረ ኃጢአት። ፰. ወእምከመሰ ሞትነ ምስሌሁ ለክርስቶስ ንትአመን ከመሂ ነሐዩ ምስሌሁ።

ዘካልእ መልእክት Universal Epistle

፩. እምአይቴ ለክሙ ፀብአ ወቀትል? አኮኑ እምዝየ እምአፍቅሮ ዝሙት ዘይትገበር ውስተ አንጕዕክሙ። ፪. ትፈትዉሂ ወኢትረክቡ፥ ትትቃሉሂ ወትትቃንኡሂ ወኢትክሉ ረኪበ፥ ትትበአሱሂ ወትትፃብኡሂ ወኢትረክቡ እስመ ኢትስእሉ። ፫. ትስእሉሂ ወኢይሁቡክሙ እስመ ለእኪት ትስእሉ ለዝሙትክሙ ከመ ተሀቡ። ፬. ኦ ዘማውያን ኢታአምሩኑ ከመ ፍቁሩሁ ለዝ ዓለም ጸላኢሁ ውእቱ ለእግዚአብሔር? እስመ ዘአብደረ ፍቅሮ ለዝ ዓለም ጸላኢሁ ለእግዚአብሔር ይከውን። ፭. ወሚመ ይመስለክሙኑ ዘሐሰተ ይብል መጽሐፍ፦ ከመ ተቃንኦ ያፈቅር መንፈስ ዘየኀድር ላዕሌክሙ? ፮. ወባሕቱ አምላክነ እንተ ተዐቢ ሞገሰ ይሁበነ። ወበእንተ ዝንቱ ይቤ፦ እስመ ለዕቡያን ይትሄየዮሙ እግዚአብሔር ወለእለሰ ያቴሕቱ ርእሶሙ ይሁቦሙ ሞገሰ። ፯. ኦሆ በልዎ ለእግዚአብሔር። ወእንብየ በልዎ ለጋኔን፥ ወይጐይይ እምኔክሙ።

ግብረ ሃዋርያት Acts

፩. ወሖርነ ንሕነሂ ወኡሙነቱሂ አተዉ። ወረዊጸነ በጻሕነ ብሔረ ቆስ። ወበሳኒታ ወረድነ ሩድ። ወእምህየ ሖርነ ለጳጥራ፤ ፪. ወረከብነ ሐመረ ዘየሐውር ፊንቄን ወዐረግነ ውስቱታ። ፫. ወነገድነ ወርኢናሃ ለቆጵሮስ ወኀደግናሃ በፀጋምነ። ወሖርነ ወነገድነ ለምደረ ሶርያ ወወረድነ ጢሮስ እስመ ህየ አውረዱ ኵሎ ዘውስተ ሐመር። ፬. ወበህየ ረከብናሆሙ ለአርድእት ወነበርነ ኀቤሆሙ ሰቡዐ መዋዕለ። ወይቤልዎ እሙንቱ ለጳውሎስ በመንፈስ ቅዱስ ኢይዕርግ ኢየሩሳሌም። ፭. ወእምድኅረዝ ወፃእነ ለፍኖት ወአስተፋነዉነ ኵሉ ወአንስትኒ ወደቂቅኒ ለአፍአ ሀገር ወሰገዱ በብረኪሆሙ ኀበ ጽንፈ ባሕር ወጸለይነ። ፮. ወተአማኅነ በበይናቲነ ወተፈኖነ። ወእምዝ ዐረግነ ሐመረ ወእሙነቱሂ አተዉ አብያቲሆሙ። ፯. ወንሕነሰ ነገድነ እምጢሮስ ወበጻሕነ ሀገረ አካ ወተአማኅኖሙ ለአኀዊነ ወነበርነ ኀቤሆሙ አሐተ ዕለተ።

ስንክሳር Synaxarium

ተዝካረ ቆዝሞስ
ወድምያኖስ
ወጳውሎስ የዋህ ረድአ እንጦንዮስ

መዝሙር Psalm

ወአጽምዐኒ ጸሎትየ ዘኢኮነ በከናፍረ ጕሕሉት፤
እምቅድመ ገጽከ ይወፅእ ፍትሕየ፤
አዕይንትየኒ ርእያ ጽድቀከ።

ወንጌል Gospel

፴፬. ወእሙንቱሰ አልቦ ዘለበዉ እንዘ ይብሎሙ ወስዉር ውእቱ ዝነገር እምኔሆሙ። ፴፭. ወእምዝ አልጺቆሙ ኢያሪኮ ሀሎ አሐዱ ዕዉር ይነብር ውስተ ፍኖት ወይስእል። ፴፮. ወሰሚዖ ድምፀ ሰብእ ዘየኀልፍ ይቤ፦ ምንትኑዝ። ፴፯. ወይቤልዎ፦ ኢየሱስ ናዝራዊ የኀልፍ። ፴፰. ወዐውየወ ወይቤ፦ ኢየሱስ ወልደ ዳዊት፥ ተሣሀለኒ። ፴፱. ወገሠጽዎ እለ ይመርሕዎ ከመ ያርምሞ ወዐውየወ ፈድፋደ ወይቤ፦ ወልደ ዳዊት ተሣሀለኒ። ፵. ወቆመ እግዚእ ኢየሱስ ወአዘዘ ያምጽእዎ ኀቤሁ ወበጺሖ ኀቤሁ ይቤሎ፦ ፵፩. ምንተ ትፈቅድ እግበር ለከ? ወይቤሎ፦ እግዚኦ፥ ከመ ይርአያ አዕይንትየ። ፵፪. ወይቤሎ እግዚእ ኢየሱስ፦ ርእይ፥ ሃይማኖትከ አሕየወተከ። ፵፫. ወረአየ ሶቤሃ ወተለዎ ወአእኰቶ ለእግዚአብሔር ወርእዮሙ ኵሉ ሕዝብ ሰብሕዎ ለእግዚአብሔር። ይቀልል ኅልፈተ ሰማይ ወምድር፥ እምትደቅ አሐቲ ቃል እምኦሪት ወእምነቢያት፥ ይቤ እግዚእ ለአርዳኢሁ።

ቅዳሴ Liturgy :

መዝሙረ ዳዊት Psalm

አንሰ ነዳይ ወምስኪን አነ፤
ወእግዚአብሔር ይረድአኒ፤
ረዳእየ ወምስካይየ አንተ እግዚኦ አምላኪየ ወኢትጐንዲ።

ወንጌል Gospel

፲፱. ወአውሥአ ወይቤሎሙ፦ ኦትውልድ እንተ አልባቲ ሃይማኖተ እስከ ማእዜኑ እሄሉ ምስሌክሙ? ወእስከ ማእዜኑ እትዔገሠክሙ? አምጽእዎ ዝየ ኀቤየ። ፳. ወወሰድዎ ኀቤሁ ወሶበ ርእዮ ውእቱ ጋኔን ነፅኆ ሶቤሃ ውስተ ምድር ወአስተራገፆ ወአሠወኖ። ፳፩. ወተስእሎ እግዚእ ኢየሱስ ለአቡሁ ወይቤሎ፦ እማእዜ እምዘ እኀዞ? ወይቤሎ፦ እመንእሱ። ፳፪. ወዘልፈ ያወድቆ በጸድፍ ወውስተ እሳት ወማይ ከመ ይቅትሎ ወባሕቱ፥ በዘትክል ርድአኒ ወመሐረኒ። ፳፫. ወይቤሎ እግዚእ ኢየሱስ፦ እስመ ትቤ፦ በዘትክል ርድአኒ፤ ኵሉ ይትከሀል ለዘየአምን። ፳፬. ወጸርሐ አቡሁ ለውእቱ ወልድ ወይቤ፦ አአምን፥ ርድኦ ለኢአሚኖትየ። ፳፭. ወርእዮ እግዚእ ኢየሱስ ከመ ይትራወጽ ሰብእ ገሠጾ ለውእቱ ጋኔን እኩይ ወይቤሎ፦ ጋኔን በሃም ወጽሙም፥ አነ እኤዝዘከ ትፃእ እምኔሁ ወኢትግባእ እንከ ላዕሌሁ። ፳፮. ወአግዐሮ ብዙኀ ወአስተራገፆ ወወጽአ ወኮነ ከመ በድን እስከ ይብሉ ብዙኃን፦ ሞተ። ፳፯. ወአኀዞ እግዚእ ኢየሱስ በእዴሁ ወአንሥኦ ወተንሥአ። ፳፰. ወበዊኦሙ ቤተ ይቤልዎ አርዳኢሁ በባሕቲቶሙ፦ በእፎ ስእነ ንሕነ አውፅኦቶ? ፳፱. ወይቤሎሙ፦ ዝንቱ ዘመድ ኢይክል ይጻእ ዘእንበለ በጾም ወበጸሎት። ፴. ወወፂኦሙ እምህየ ሖሩ እንተ ገሊላ ወኢፈቀደ ያእምርዎ። ዘቦ እዝን ሰሚዐ ለይስማዕ።

መዝሙረ ዳዊት Psalm

እግዚኦ ኵነኔከ ሀቦ ለንጉሥ፤
ጽድቅከኒ ለወልደ ንጉሥ፤
ከመ ይኰንኖሙ ለሕዝብከ በጽድቅ።

ወንጌል Gospel

፴፰. ወእምዝ አውሥእዎ ሰብእ እምጸሐፍት ወእምፈሪሳውያን እንዘ ይብሉ፦ ሊቅ ንፈቅድ እምኀቤከ ትእምርተ ንርአይ። ፴፱. ወአውሢኦ እግዚእ ኢየሱስ ይቤሎሙ፦ ትውልድ ዐማፂት ወዘማዊት ትእምርተ ተኀሥሥ፥ ወትእምርት ኢይትወሀባ ዘእንበለ ትእምርተ ዮናስ ነቢይ። ፵. እስመ በከመ ነበረ ዮናስ ውስተ ከርሠ ዐንበሪ ሠሉሰ ዕለተ ወሠሉሰ ሌሊተ ከማሁ ይነብር ወልደ እጓለ እመሕያው ውስተ ልባ ለምድር ሠሉሰ ዕለተ ወሠሉሰ ሌሊተ። ፵፩. ሰብአ ነነዌ ይትነሥኡ አመ ኵነኔ ምስለዛ ትውልድ ወይትፋትሕዋ እስመ ነስሑ በስብከት ዮናስ ወናሁ ዘየዐቢ እምዮናስ ዝየ። ፵፪. ንግሥተ አዜብ ትትነሣእ አመ ዕለተ ደይን ምስለዛ ትውልድ ወትትፋትሓ። እስመ መጽአት እምአጽናፈ ምድር ትስማዕ ጥበቦ ለሰሎሞን ወናሁ ዘየዐቢ እምሰሎሞን ዝየ። ሰማይ ወምድር የኀልፍ ወቃልየሰ ኢየኀልፍ ይቤ እግዚእ ለአርዳኢሁ።

መልእክተ ጳውሎስ Pauline Epistle

፩. ለኵሉ ነፍስ መኰንን ተኰነኑ እስመ ኢይሠየም መኰንን ዘእንበለ እምኀበ እግዚአብሔር ወእምከመሰ እምኀበ እግዚአብሔር ውእቱ ኵሉ ብዉሕ ሎቱ። ፪. ወዘሰ አበየ ተኰንኖ ለመኰንን ትእዛዘ እግዚአብሔር አበየ። ወእለሰ አበዩ ተኰንኖ ኵነኔ ያመጽኡ ለርእሶሙ። ፫. ወመኳንንትሰ ኢኮኑ ግሩማነ ለዘይገብር ሠናየ ዘእንበለ ለዘእኩይ ምግባሩ። ወእመሰ ትፈቅድ ኢትፍርሆሙ ለመኳንንት? ግበር ሠናየ ወዓዲ እሙንቱ ያአኵቱከ። ፬. እስመ ላእካነ እግዚአብሔር እሙንቱ ከመ አንተ ታሠኒ ምግባሪከ ወእመሰ ፈቀድከ ኢትፍራህ ግበር ሠናየ። ወዘአኮ ለከንቱ አኰነንዎሙ መጥባሕተ እስመ ላእካኑ እሙንቱ ከመ ይትበቀልዎ ለገባሬ እኪት። ፭. ወይእዜኒ በግብር ተኰነኑ። ወአኮ ዳእሙ ዘእኩይ ዓዲ ዘሠናይኒ ምግባሩ። ፮. ወበእንተዝ ታገብኡ ሎሙ ጸባሕተ። እስመ ላእካነ እግዚአብሔር እሙንቱ ወለዝ ግብር ተሠይሙ። ፯. ወለኵሉ በዘይረትዕ ግበሩ። ወለዘሂ ጸባሕተ ጸብሑ ወለዘሂ ብነተ በንቱ። ወለዘሂ ፍርሃተ ፍርሁ። ወለዘሂ ክብረ አክብሩ። ፰. ወአልቦ ዘይበቍዐክሙ ዘእንበለ አፍቅሮ ቢጽክሙ። ወዘሰ አፍቀረ ቢጾ ኵሎ ሕገ ፈጸመ ገቢረ። ፱. እስመ ከመዝ ይቤ በኦሪት፦ ኢትሑር ብእሲተ ብእሲ፥ ወኢትቅተል ነፍሰ፥ ወኢትስርቅ፥ ወኢትኩን ሰማዕተ በሐሰት፥ ወኢትፍቱ። ወዓዲ ባዕድኒ ቦቱ ትእዛዝ ወርእሱ ለኵሉ፦ አፍቅር ቢጸከ ከመ ነፍስከ። ፲. ዘያፈቅር ቢጾ ኢይገብር እኩየ ተፋቅሮሰ ፍጹም ሕግ ውእቱ።

ዘካልእ መልእክት Universal Epistle

፩. እምያዕቆብ ገብረ እግዚአብሔር ወእግዚእነ ኢየሱስ ክርስቶስ ለዐሠርቱ ወክልኤቱ ሕዝበ ድዮስጶራ ሰለም ለክሙ። ፪. ኦ አኀው ኩኑ በኵሉ ፍሥሓ ሶበ መንሱት ይመጽአክሙ መከራ ዘዘዚአሁ። ፫. እንዘ ታአምሩ ከመ መከራሃ ለሃይማኖትክሙ ተዕግሥተ ይገብር ለክሙ። ፬. ወትዕግሥትሰ ግብር ፈጹም ባቲ ከመ ትኩኑ ፍጹማኒ ወጥዑያነ እንዘ አልቦ ዘተኀጥኡ። ፭. ወእመሰቦ ዘኀጥኣ ለጥበብ ለይስአል ኀበ ወሀቢ እግዚአብሔር ዘይሁብ ለኵሉ በስፉሕ እንዘ ኢይትዔየር ወይትወሀብ ሎቱ። ፮. ወይስአል እንዘ ይትአመን ወኢይናፍቅ እስመ ዘይናፍቅሰ ይከውን ከመ ሞገዳተ ባሕር እንተ ይዘብጣ ነፋስ ወይነውኃ። ፯. ወኢይምሰሎ ለውእቱ ብእሲ ከመ ዘይነሥእ ምንተኒ እምኀበ እግዚአብሔር። ፰. እስመ ብእሲ ዘክልኤ ልቡ ህዉክ ውእቱ በኵሉ ፍኖቱ።

ግብረ ሃዋርያት Acts

፵፬. ወ ደብተራ ስምዕ እንተ ነበረት ኀበ አበዊነ በገዳም በከመ አዘዘ ለሙሴ ዘተናገሮ ይግበራ በአርአያ ዘአርአዮ። ፵፭. ወአብእዋ ምስሌሆሙ ሶበ ተመጠውዋ አበዊነ ምስለ ኢያሱ ውስተ በሐውርተ አሐዛብ እለ አውፅኦሙ እግዚአብሔር እምቅድመ ገጾሙ ለአበዊነ እስከ አመ መዋዕለ ዳዊት። ፵፮. ዘረከበ ሞገሰ በቅድመ እግዚአብሔር ወሰአለ ይርከብ ማኅደሮ ለአምላከ ያዕቆብ። ፵፯. ወዳእሙ ሰሎሞን ሐነጸ ሎቱ ቤተ። ፵፰. ወአኮሰ ዘየኀድር ልዑል ውስተ ግብረ እደ ሰብእ እስመ ከመዝ ይቤ ነቢይ፦ ፵፱. ሰማይኒ መንበርየ ወምድርኒ መከየደ እገርየ፤ አየኑ ቤተ ተሐንጹ ሊተ? ይቤ እግዚአብሔር፦ ወአይኑ መካን ውእቱ መካነ ምዕራፍየ? ፶. አኮኑ እደውየ ገብራ ዝኵሎ? ፶፩. ኦ ጽኑዓነ ክሳድ ወጽሉላነ ልብ ወጽሙማነ እዝን እለ ዘልፈ ተቃወምክምዎ ለመንፈስ ቅዱስ ከመ አበዊክሙ አንትሙሂ። ፶፪. መኑ እምነቢያት ዘኢሰደድዎ ወኢቀተልዎ አበዊክሙ? ወቀተልዎሙ ለእለ አቅደሙ ወዜነውዎሙ በእንተ ምጽአቱ ለጻድቅ ዘአንትሙ ዓሎክምዎ ወቀተልክምዎ። ፶፫. ወነሣአክሙ ኦሪተ በሥርዓተ መላእክት ኢዓቀብክሙ።

ስንክሳር Synaxarium

ሰሎሞን ወልደ ዳዊት
ወአባ ኖብ
ወመርቆሬዎስ
ወቶማስ
ወፊልጶስ ሰማዕት

መዝሙር Psalm

መሐለ እግዚአብሔር ለዳዊት በጽድቅ ወኢይኔስሕ፤
እስመ እምፍሬ ከርሥከ አነብር ዲበ መንበርከ፤
ለእመ ዐቀቡ ደቂቅከ ሕግየ።

ወንጌል Gospel

፩. ወንጌል ቅዱስ ዘእግዚእነ ወአምላክነ ወመድኃኒነ ኢየሱስ ክርስቶስ። ብሥራተ ማቴዎስ ሐዋርያ አሐዱ እምዓሠርቱ ወክልኤቱ ሐዋርያት። ጸሎቱ ወበረከቱ የሀሉ ምስለ ኵልነ ሕዝበ ክርስትያን ለዓለም ዓለም አሜን። መጽሐፈ ልደቱ ለእግዚእነ ኢየሱስ ክርስቶስ ወልደ ዳዊት ወልደ አብርሃም። ፪. አብርሃመ ወለዶ ለያስሐቅ፤ ወይስሐቅኒ ወለዶ ለያዕቆብ፤ ወያዕቆብኒ ወለደ ይሁዳሃ ወአኀዊሁ። ፫. ወይሁዳኒ ወለደ ፋሬስሃ ወዛራሃ እምትእማር፤ ወፋሬስኒ ወለደ ኤስሮምሃ፤ ወኤስሮምኒ ወለደ አራምሃ። ፬. ወአራምኒ ወለደ አሚናዳብሃ፤ ወአሚናዳብኒ ወለደ ነአሶንሃ፤ ወነአሶንኒ ወለደ ሰልሞንሃ። ፭. ወሰልሞንኒ ወለደ ቦዔዝሃ እምራኬብ፤ ወቦዔዝኒ ወለደ ኢዮቤድሃ እምነ ሩት፤ ወኢዮቤድኒ ወለደ እሴይሃ። ፮. ወእሴይኒ ወለደ ዳዊትሃ ንጉሠ፤ ወዳዊትኒ ንጉሥ ወለደ ሰሎሞንሃ እምነ ብእሲተ ኦርዮ። ፯. ወሰሎሞንኒ ወለደ ሮብዓምሃ፤ ወሮብዓምኒ ወለደ አብያሃ፤ ወአብያኒ ወለደ አሳፍሃ። ፰. ወአሳፍኒ ወለደ ኢዮሳፍጥሃ፤ ወኢዮሳፍጥኒ ወለደ ኢዮራምሃ፤ ወኢዮራምኒ ወልደ (አካዝያስሃ፤ ወአካዝያስኒ ወልደ አሜስያስሃ፤ ወአሜስያስኒ) ዖዝያንሃ፤ ዘተሰምየ አዛርያስ። ሰማይ ወምድር የኀልፍ ወቃልየሰ ኢየኀልፍ ይቤ እግዚእ ለአርዳኢሁ።

ቅዳሴ Liturgy :

መዝሙረ ዳዊት Psalm

እግዚኦ አፍቀርኩ ሥነ ቤትከ፤
ወመካነ ማኅደረ ስብሐቲከ፤
ኢትግድፋ ምስለ ኃጥአን ለነፍስየ።

ወንጌል Gospel

፲፰. ወአምጽኡ ብእሴ መፃጕዐ እንዘ ይጸውርዎ ዕደው በዐራት ወፈቀዱ ያብእዎ ኀቤሁ ይፈውሶ። ፲፱. ወኀጥኡ እንተ ኀበ ያበውእዎ እስመ ጽፉቅ ሰብእ ወዐርጉ ናሕሰ ወነሠቱ ጠፈረ ወአውረድዎ ምስለ ዐራቱ ውስተ ቤት ቅድሜሁ ለእግዚእ ኢየሱስ። ፳. ወርእዮ ሃይማኖቶሙ፥ ይቤሎ ለውእቱ፦ ብእሲ፥ ተኀድገ ለከ ኀጢአትከ። ፳፩. ወአኀዙ የሐልዩ ጾሐፍት ወፈሪሳውያን ወይቤሎ፦ ምንትኑ ውእቱ ዝንቱ ዘይነብብ ፅርፈተ? መኑ ይክል ኀዲገ ኀጢአት ዘእንበለ እግዚአብሔር ባሕቲቱ? ፳፪. ወአእመሮሙ እግዚእ ኢየሱስ ዘይሔልዩ ወይቤሎሙ፦ ምንተኑ ትሔልዩ በልብክሙ? ፳፫. ምንት ይቀልል እምብሂለ፦ ተኀድገ ለከ ኀጢአትከ፤ ወእምብሂለ፦ ተንሥእ ወሑር? ፳፬. ከመ ታእምሩ ከመ ብዉሕ ሎቱ ለወልደ እጓለ እመሕያው ይኅድግ ኀጢአተ በዲበ ምድር፥ ወይቤሎ ለውእቱ ድዉይ፦ ለከ፦ እብለከ ተንሥእ ወንሣእ ዐራተከ ወእቱ ቤተከ። ፳፭. ወተንሥአ ሶቤሃ ወነሥአ ዘዲቤሁ ይሰክብ በቅድሜሆሙ ወአተወ ቤቶ እንዘ ይሴብሖ ለእግዚአብሔር። ፳፮. ወደንገፁ ኵሎሙ ወኣእኰትዎ ለእግዚእብሔር ወፈርሁ ብዙኀ ወይቤሉ፦ ርኢነ መንክረ ዮም። ይቀልል ኅልፈተ ሰማይ ወምድር፥ እምትደቅ አሐቲ ቃል እምኦሪት ወእምነቢያት፥ ይቤ እግዚእ ለአርዳኢሁ።

መዝሙረ ዳዊት Psalm

በብርሃንከ ንርአይ ብርሃነ፤
ስፋሕ ምሕረትከ እግዚኦ ላዕለ እለ የአምሩከ፤
ወጽድቅከኒ ለርቱዓነ ልብ።

ወንጌል Gospel

፵፮. ወቦኡ ኢያሪኮ ወወፂኦ እምኢያሪኮ ወእርዳኢሁኒ ምስሌሁ ወሰብእኒ ብዙኅ ወሀሎ ወልደ ጢሜዎስ በርጢሜዎስ ዕዉር ይነብር ውስተ ፍኖት ወይስእል። ፵፯. ወሰሚዖ ከመ ኢየሱስ ናዝራዊ ውእቱ ከልሐ ወይቤ፦ ተሣሀለኒ ኢየሱስ ወልደ ዳዊት። ፵፰. ወገሠጽዎ ብዙኃን ከመ ያርምም ወአፈድፈደ ከሊሐ ወይቤ፦ ወልደ ዳዊት ተሣሀለኒ። ፵፱. ወቆመ እግዚእ ኢየሱስ ወይቤ፦ ይጸውዕዎ፤ ወጸውዕዎ ለውእቱ ዕዉር ወይቤልዎ፦ እመን ተንሥእ ይጼውዐከ። ፶. ወተንሥአ ወለብሰ ልብሶ ወመጽአ ኀበ እግዚእ ኢየሱስ። ፶፩. ወአውሥአ እግዚእ ኢየሱስ ወይቤሎ፦ ምንተ ትፈቅድ እግበር ለከ? ወይቤሎ ውእቱ ዕዉር፦ ረቦኒ፥ ከመ እርአይ። ፶፪. ወይቤሎ እግዚእ ኢየሱስ፦ ሑር፥ ሃይማኖትከ አሕየወተከ። ወርእየ ሶቤሃ ወተለዎ በፍኖት። ዘቦ እዝን ሰሚዐ ለይስማዕ።

መልእክተ ጳውሎስ Pauline Epistle

፳፬. ወንሕነ እሙንቱ እለ ጸውዐነ ውስተ ክብሩ ወአስተጋብአነ አኮ እምአይሁድ ባሕቲቶሙ ዓዲ እምአረሚኒ? ፳፭. በከመ ይቤ ሆሴዕ ነቢይ፦ እሬስዮ ሕዝብየ ለዘኢኮነ ሕዝብየ፥ ወእሬስያ ፍቅርትየ ለእንተ ኢኮነት ፍቅርትየ። ፳፮. ወይከውኑ ውሉደ እግዚአብሔር ሕያው በብሔር ኀበ ይቤልዎሙ፦ ኢኮንክሙ ሕዝበ እግዚአብሔር። ፳፯. ኢሳይያስኒ ከልሐ ወይቤ በእንተ እስራኤል፦ ለእመ ኮነ ኈልቆሙ ለደቂቀ እስራኤል ከመ ኆጻ ባሕር እለ ተርፉ ይድኅኑ። ፳፰. እስመ ኅሉቀ ወምቱረ ነገረ ይነግር እግዚአብሔር ውስተ ዓለም ዘሀለዎ ይግበር። ፳፱. ወበከመ አቅደመ ኢሳይያስ ብሂለ ሶበ፦ አኮ እግዚአብሔር ፀባኦት ዘአትረፈ ለነ ዘርዐ ከመ ሰዶም እምኮነ ወከመ ገሞራ እመሰልነ። ፴. ምንተ እንከ ንብል? አረሚ ጥቀ እለ ኢኀሠሥዎ ለጽድቅ ረከብዎ ለጽድቅ ወጸድቁ በአሚን። ፴፩. ወእስራአልሰ እንዘ ይዴግንዋ ለኦሪቶሙ ስእኑ ጸዲቀ እስመ ኢፈጸሙ ገቢረ ሕገገ ኦሪቶሙ። ፴፪. በእንተ ምንት? እስመ ኢኮነ ጽድቆሙ በአሚን ዘእንበለ ዳእሙ በገቢረ ሕገገ ኦሪት። ወአዕቀፈቶሙ እብነ ዕቅፍት። ፴፫. እስመ ከማሁ ይቤ መጽሐፍ፦ ናሁ እነብር ውስተ ጽዮን እብነ ዕቅፍት ወእብነ ጌጋይ ወዘአምነ ቦቱ ኢይትኀፈር።

ዘካልእ መልእክት Universal Epistle

፩. እምነ ቀሲስ ለጋይዮስ ለእኁነ ዘአነ አፈቅሮ በጽድቅ። ፪. ኦ እኁየ በእንተ ኵሉ እጼሊ ለከ ትሠራሕ ፍኖትከ ወትሕዮ በዘይኤድማ ለነፍስከ። ፫. ተፈሣሕኩ ጥቀ ሶበ መጽኡ አኀዊነ ወስምዐ ኮኑ ላዕል ተፋቅሮትከ ከመ በጽድቅ ተሐውር። ፬. እንተ ተዐቢ እምዛቲ ትፍሥሕት አልብየ ከመ እስማዕ እንዘ በጽድቅ የሐውሩ ደቂቅየ። ፭. ኦ እኁየ እሙነ ግብረ ዘገበርከ ለአኀዊነ፥ ወከመ ዝንቱ ግብር ለነኪራን። ፮. እለ ይከውኑ ለከ ስምዐ ላዕለ ተፋቅሮትከ በቅድመ ቤተ ክርስቲያን። ከመ ሠናየ ትገብር ወአቅደምከ ፈንዎቶሙ ዘይደሉ ለእግዚአብሔር። ፯. እስመ በእንተ ስሙ ወፅኡ ወአልቦ ዘነሥኡ እምነ አሕዛብ። ፰. ወንሕነሰ አኀዊነ ይደልወነ ንትቀበሎሙ ለእለ ከመዝ ከመ ንኩን ሱታፎ ለጽድቅ። ፱. ወጸሐፍኩ ለቤተ ክርስቲያን ወአቅደምኩ ወባሕቱ ዲዮጥራፊስ ዘይፈቅድ ይኩን ሊቀ ላዕሌሆሙ ኢይሰጠወነ።

ግብረ ሃዋርያት Acts

፩. ወበሀገረ ኢቆንዮን ቦኡ ምኵራበ አይሁድ ወነገሩ ከመ ይነግሩ ዘልፈ እስከ አምኑ ብዙኃን ጥቀ እምአይሁድ ወእምአረሚኒ። ፪. ወቢጸ አይሁድ እለ አበዩ ተበአሱ ምስለ አሕዛብ ወምስለ ሐዋርያት ወአጸዐርዋ ለነፍሶሙ። ፫. ወነበሩ ጕንዱየ መዋዕለ እንዘ ይነግሩ በስሙ ለእግዚእነ እንዘ ውሶቱ ያርኢ እማዕተ ቃለ ጸጋሁ ወይገብር ተኣምረ ወመንክረ በእደዊሆሙ። ፬. ወተናፈቁ ኵሉ ሀገር መንፈቆሙ መንገለ አይሁድ ወቦእለሂ ኀበ ሐዋርያት። ፭. ወተበአሱ አይሁድ ወአረሚ ምስለ መላእክቲሆሙ ወይጸአሉ ወይትዋገሩ። ፮. ወርእዮሙ ሐዋርያት ጐዩ ውስተ አህጉረ ሊቃኦንያ ወልስጥራን ወደርቤን ወውስተ አድያም። ፯. ወመሀሩ በህየ።

ስንክሳር Synaxarium

አባ ሙሴ ጸሊም ወሰማዕት
ወ፯ቱ አሃው እለ ኮኑ ሰማዕተ ምስሌሁ

መዝሙር Psalm

ለብዉ አብዳነ ሕዝብ፤
አብዳንኬ ማእዜኑ ይጠቡ፤
ዘተከላሁ ለእዝን ኢይሰምዕኑ።

ወንጌል Gospel

፳፯. ወመጽኡ ኀቤሁ ሰዱቃውያን እለ ይብሉ ኢየሐይዎ ምዉታን ወተስእልዎ። ፳፰. ወይቤልዎ፦ ሊቅ ሙሴ ጸሐፈ ለነ እንዘ ይብል ለእመቦ ዘሞተ እኁሁ ወኀደገ ብእሲቶ ወአልቦ ውሉደ ያውስባ እኁሁ ለብእሲቱ ወያቅም ዘርዐ ለእኁሁ። ፳፱. ወሀለዉ እንከ ኀቤነ ስባዕቱ አኀው ወአውሰበ ዘይልህቅ በእሲተ ወሞተ ወአልቦ ውሉደ። ፴. ወከማሁ አውሰባ ካልኡሂ ወሣልሱሂ ወኢኀደጉ ውሉደ። ፴፩. ወሰባዕቲሆሙ ከማሁ አውሰብዋ ወሞቱ እንዘ አልቦሙ ውሉደ። ፴፪. ወድኅረ ኵሎሙ ሞተት ይእቲ ብእሲትሂ። ፴፫. ወአመ የሐይዉ እንከ ምዉታን፥ ለመኑ እምኔሆሙ ትከውኖ ብእሲተ? እስመ ናሁ ሰባዕቲሆሙ አውሰብዋ። ይቀልል ኅልፈተ ሰማይ ወምድር፥ እምትደቅ አሐቲ ቃል እምኦሪት ወእምነቢያት፥ ይቤ እግዚእ ለአርዳኢሁ።

ቅዳሴ Liturgy :

መዝሙረ ዳዊት Psalm

ዓይን ቦሙ ወኢይሬእዩ፤
ዕዝን ቦሙ ወኢይሰምዑ፤
አንፍ ቦሙ ወኢያጼንዉ።

ወንጌል Gospel

፱. ወይቤ፦ ዘቦ እዘነ ሰሚዐ ለይስማዕ። ፲. ወእምዝ በባሕቲቶሙ ተስእልዎ እሊአሁ ምስለ ዐሠርቱ ወክልኤቱ አርዳኢሁ ምሳሊሁ። ፲፩. ወይቤሎሙ እግዚእ ኢየሱስ፦ ለክሙ ተውህበ ታእምሩ ምሥጢራ ለመንግሥተ እግዚአብሔር ወለእለሰ አፍአ በምሳሌ ኵሉ ይከውኖሙ። ፲፪. ከመ ርእየ ይርአዩ ወኢያእምሩ፥ ወሰሚዐ ይስምዑ ወኢይለብዉ፥ ከመ ኢይነስሑ ወኢይሣሀሎሙ ወኢይትኀደግ ሎሙ ኀጢአቶሙ። ፲፫. ወይቤሎሙ፦ ኢታአምሩኑ ዛተ ምሳሌ? እፎ እንከ ታአምሩ ኵሎ አምሳለ? ፲፬. ዘይዘርዕሰ ቃለ እግዚአብሔር ይዘርዕ። ዘቦ እዝን ሰሚዐ ለይስማዕ።

መዝሙረ ዳዊት Psalm

ሰላም ብዙኅ ለእለ ያፈቅሩ ስመከ፤
ወአልቦሙ ዕቅፍት፤
ተሰፈውኩ አድኅኖተከ እግዚኦ።

ወንጌል Gospel

፯. ወጸውዖሙ ለዐሠርቱ ወክልኤቱ፥ ወፈነዎሙ በበ ክልኤቱ ወአብሖሙ ላዕለ አጋንነት እኩያን። ፰. ወአዘዞሙ ከመ አልቦ ዘይሥንቁ ለፍኖት ወኢይንሥኡ ዘእንበለ በትረ ባሕቲታ ወኢኅብስተ ወኢጽፍነተ ወኢጸሪቀ ውስተ ቅናቶሙ። ፱. ዘእንበለ አሣእነ ዘውስተ እገሪሆሙ ወኢይልብሱ ክልኤ ክዳናተ። ፲. ወይቤሎሙ፦ ቤተ ኀበ ቦእክሙ ህየ ንበሩ እስከ አመ ትወፅኡ እምህየ። ፲፩. ወብሔረ ኀበ ኢተወክፉክሙ ወኢሰምዑክሙ ወፂአክሙ እምህየ ንግፉ ጸበለ እገሪክሙ ከመ ይኩን ስምዐ ላዕሌሆሙ። አማን እብለክሙ ከመ ይረክባ ሣኅተ ሰዶም ወገሞራ አመ ዕለተ ደይን እምይእቲ ሀገር። ፲፪. ወወፂኦሙ ሰበኩ ከመ ኵሉ ይነስሑ። ፲፫. ወብዙኃነ አጋንንተ ያወፅኡ ወይቀብእዎሙ ቅብአ ለብዙኃን ድዉያን ወየሐይዉ። ዘቦ እዝን ሰሚዐ ለይስማዕ።

መልእክተ ጳውሎስ Pauline Epistle

፲፮. ወበቀዳሚ ነገርየ አልቦ ዘኀብረ ምስሌየ ዳእሙ ኵሎሙ ኀደጉኒ። ወይስረይ ሎሙ ዘንተ። ፲፯. ወዳእሙ እግዚአብሔር ቆመ ሊተ ወአጽንዐኒ ከመ ይእመኑ በስብከተ ዚአየ ወይስምዑ ኵሎሙ አሕዛብ ወድኅንኩ እምአፈ አንበሳ። ፲፰. ወያድኅነኒ እግዘአብሔር እምኵሉ ግብር እኩይ ወያሐይወኒ ውስተ መንግሥቱ ዘበሰማያት ውእቱ ዘሎቱ ስብሐት ለዓለመ ዓለም አሜን። ፲፱. አምኅ ጵርስቅላ ወአቂላ ወቤተ ሄኔሴፎሩ። ፳. ኤርስጦስ ነበረ ቆሮንቶስ ወለጥሮፊሞስ ኀደግዎ በሀገረ መሊጦን ይደዊ። ፳፩. አስተፋጥን ትምጻእ ኀቤየ እምቅድመ ክረምት። ይኤምኁከ ኤውቡሎስ ወጱዴስ ወሊኖስ ወቀላውድያ ወኵሎሙ አኀዊነ። ፳፪. ወእግዚእነ ኢየሱስ ክርስቶስ የሀሉ ምስለ ምንፈስከ። ወጸጋሁ ምስሌክሙ አሜን። ተፈጸመት መልእክት ካልእት ኀበ ጢሞቴዎስ፥ ወተጽሕፈ በሮሜ፥ ወተፈነወት በእደ ክንክሮሎስ። ወስብሐት ለእግዚአብሔር፥ አሜን።

ዘካልእ መልእክት Universal Epistle

፩. እምይሁዳ ገብረ ኢየሱስ ክርስቶስ እኁሁ ለያዕቆብ ለእለ ያፈቅርዎ ለእግዚአብሔር አብ ስሙያን ወጽዉዓን በኢየሱስ ክርስቶስ። ፪. ሰላም ለክሙ ወተፋቅሮ ወሣህል ይብዛኅ ማእከሌክሙ። ፫. አኀዊነ በኵሉ አስተፋጠንኩ ከመ እጽሐፍ ለክሙ በእንተ ሕይወተ ኵልነ እስመ ጥቀ እጽሕፍ ለክሙ ጽሁቀ ወአስተበቍዐክሙ ከመ ትትቀነይዋ ለእንተ ተውህበት ለቅዱሳን ሃይማኖት። ፬. እስመ ተደመሩ ብክሙ ሰብእ ረሲዓን እለ ጽሑፋን ቀዲሙ ለዝንቱ ደይን እለ ያፈልስዋ ለጸጋ እግዚአብሔር ውስተ ዝሙቶሙ ወይክሕድዎ ለዘውእቱ ባሕቲቱ ንጉሥ እግዚእነ ኢየሱስ ክርስቶስ። ፭. ወፈቀድኩሰ አዘክርክሙ ኵሎ ወታአምሩ ምዕረሰ ከመ ኢየሱስ አድኀነ ሕዝቦ እምድረ ግብፅ ወበዳግምሰ ለእለ ኢአምኑ አጥፍኦሙ። ፮. ወለመላእክቲሁኒ እለ ኢዐቀቡ ፍጥረቶሙ ወኀደግዋ ለሥርዓቶሙ ውስተ ደይን አንበሮሙ ወተአሥሩ ለዕለት ዓባይ ለዘለሊሆሙ አቅነዩ ርእሶሙ።

ግብረ ሃዋርያት Acts

፴፬. ወአእሚሮሙ ከመ አይሁዳዊ ውእቱ ከልሑ ኵሎሙ በአሐዱ ቃል መጠነ ክልኤ ሰዓት እንዘ ይብሉ፦ ሰንበት ዕበያ ለአርጤምስ እንተ ኤፌሶን። ፴፭. ወእምዝ ተንሥአ ጸሓፌ ሀገር ወአስተጋብኦሙ ለአሕዛብ ወይቤሎሙ፦ ስምዑ ሰብአ ኤፌሶን መኑ ሰብእ ዘኢያአምራ ለሀገረ ኤፌሶን ከመ ይእቲ እንተ አርጤምስ ዓባይ ጣዖታ ዘወረደ እምሰማይ? ፴፮. ወበእንተዝ ይመስለኒ አልቦ ዘይክል ተቃውሞታ ለዛቲ። ወይእዜኒ ርቱዕ በድቡት ንግበሮ ለዝ ወአኮ በሀከክ ወበትዝልፍት። ፴፯. ናሁ ተባጻሕክምዎሙ ለእሉ ሰብእ ዘኢሰረቁ ቤተ አማልክት ወኢፀረፉ ዲበ አማልክቲነ። ፴፰. ወእመሰ ቦተስናነ ድሜጥሮስ ምስለ ኪነት ለይትዋቀሡ በበይናቲሆሙ። ናሁ መኰንን ውስተ ሀገር። ፴፱. ወእመሰ ባዕደ ማኅሠሠ ብክሙ ዘበእንተ ሕግክሙ ንንሥት ዓውደ። ፵. እስመ ንትመነሶ ዮም በዘአምጻእክሙ ለነ ሀከከ ዘአልቦ ጌጋይ ወአልብነ ዘንትዋቀሥ በእንተዝ ሀከክ። ፵፩. ወዘንተ ብሂሎ ነሠተ ዐወደ።

ስንክሳር Synaxarium

ይሁዳ ሐዋርያ
ወጴጥሮስ ወጳውሎስ
ወበዐተ ክረምት
ወጴጥሮስ ሊቀ ጳጳሳት

መዝሙር Psalm

ወአንተ ገበርከ አድባረ ወምድረ ኵሎ፤
ክረምተ ወሐጋየ ዘአንተ ፈጠርከ፤
ወተዘከር ዘንተ ተግባረከ።

ወንጌል Gospel

፴፪. ወመስዮ ጊዜ የዐርብ ፀሓይ አምጽኡ ኀቤሁ ኵሎ ድወያነ ወእለሂ አጋንንት። ፴፫. ወተጋብኡ ኀቤሁ ኵሎሙ ሰብእ ሀገር ኀበ አንቀጽ። ፴፬. ወፈወሶሙ ለብዙኃን ድዉያን ወሐሙማን ወአውፅኦሙ ለብዙኃን አጋንንት ወኢያብሖሙ ይንብቡ እስመ የአምርዎ ከመ ውእቱ ክርስቶስ። ፴፭. ወበጽባሕ ተንሥአ ወአሌለየ ጥቀ ወፂኦ ወሖረ ሐቅለ ወጸለየ በህየ። ፴፮. ወዴገንዎ ስምዖን ወእለ ምስሌሁ። ፴፯. ወሶበ ረከብዎ ይቤልዎ፦ እንጋ ኵሉ ሕዝብ የኀሥሡከ። ፴፰. ወይቤሎሙ፦ ተንሥኡ ንሑር ካልኣተኒ አህጉረ ከመ በህየኒ እስብክ እስመ እንበይነ ዝንቱ ወፃእኩ። ፴፱. ወሖረ ወሰበከ በምኵራባቲሆሙ በኵሉ ገሊላ ወያወፅእ አጋንንተ። ዘቦ እዝን ሰሚዐ ለይስማዕ።

ቅዳሴ Liturgy :

መዝሙረ ዳዊት Psalm

አንተ ፈጠርከ ፀሐየ ወወርኀ፤
ወአንተ ገበርከ አድባረ ወምድረ ኵሎ፤
ክረምተ ወሐጋየ ዘአንተ ፈጠርከ።

ወንጌል Gospel

፲፬. ወሶበ ርኢክሙ ኀሳሮ ለሙስና ዘይቤ ዳንኤል ነቢይ ዘይቀውም ውስተ መካን ቅዱስ ኀበ ኢይከውን፤ ዘያነብብ ላይለቡ፥ ይእተ አሚረ እለ ውስተ ይሁዳ ይጐዩ ውስተ አድባር። ፲፭. ወዘኒ ውስተ ናሕስ ኢይረድ ውስተ ቤት፥ ወኢይባእ ይንሣእ ዘኮነ እምቤት። ፲፮. ወዘኒ ገዳመ ሀሎ ኢይትመየጥ ድኅሬሁ ይንሣእ ልብሶ። ፲፯. ወባሕቱ አሌሎን ለፅኑሳት ወላእለ የሐፅና ይእተ አሚረ። ፲፰. ወጸልዩ ከመ ኢይኩን ጕያክሙ በክረምት። ፲፱. እስመ ይከውን ይእተ አሚረ ዐቢየ ሕማመ ዘእምአመ ኮነ ዓለም ኢኮነ ከማሁ ወእምአመ ፈጠረ እግዚአብሔር ኢኮነ፥ ወኢይከወንሂ። ፳. ወሶበ አኮ ዘአኅጸሮን እግዚአብሔር ለእማንቱ መዋዕል እምኢድኅነ ኵሉ ዘነፍስ፤ ወባሕቱ በእንተ ኅሩያኒሁ እለ ኀረየ እግዚአብሔር፥ የኀጽራ እማንቱ መዋዕል። ፳፩. ወይእተ አሚረ እመቦ ዘይቤለክሙ፦ ነዋ ዝየ ሀሎ ክርስቶስ፥ ወነዋ ከሐክ፤ ኢትእመኑ። ፳፪. እስመ ይመጽኡ ሐሳውያነ መሲሕ ወሐሳውያነ ነቢያት ወይገብሩ ተኣምረ ወመንክረ ከመ ያስሕቱ ወሶበሰ ይትከሀል ወለኅሩያንሂ። ፳፫. ወአንትሙሰ ዑቁ፦ ናሁ፥ አቅደምኩ ነጊሮተክሙ ኵሎ። ዘቦ እዝን ሰሚዐ ለይስማዕ።

መዝሙረ ዳዊት Psalm

ወቀተለ ነገሥተ ጽኑዓነ፤
ለሴዎን ንጉሠ አሞሬዎን፤
ወለዓግ ንጉሠ ባሳን።

ወንጌል Gospel

፪. ወመሀሮሙ ወመሰለ ሎሙ ብዙኀ ወይቤሎሙ እንዘ ይሜህሮሙ፦ ፫. ስምዑ፥ ወፈረ ዘይዘርዕ ይዝራዕ። ፬. ወአንዘ ይዘርዕ ቦዘወድቀ ውስተ ፍኖት ወመጽኡ አዕዋፍ ወበልዕዎ። ፭. ወቦ ዘወድቀ ውስተ ኰኵሕ ኀበ አልቦ መሬተ ብዙኀ ወፍጡነ በቈለ እስመ አልቦ ዕመቀ መሬቱ። ፮. ወሠሪቆ ፀሓይ አውዐዮ ወእስመ ኢኮነ ዕሙቅ መሬቱ ወአልቦ ሥርወ የብሰ። ፯. ወቦ ዘወድቀ ውስተ ሦክ ወደፈኖ ሦክ ወኢፈርየ። ፰. ወቦ ዘወድቀ ውስተ ምድር ሠናይት ወበቈለ ወልህቀ ወፈርየ ወወሀበ ፍሬ ቦሠላሳ ወቦ ኀበ ስሳ ወቦ ኀበ ምእተ። ፱. ወይቤ፦ ዘቦ እዘነ ሰሚዐ ለይስማዕ። ዘቦ እዝን ሰሚዐ ለይስማዕ።

መልእክተ ጳውሎስ Pauline Epistle

፩. ንፍራህ እንከ እምእለ ሰምዑ ወኢንኅድግ ተእዛዞ ከመ ንባእ ውስተ ዕረፍቱ ወለእመቦ እንጋ ዘይትረከብ እምኔክሙ ውስተ ስሒት ዘልማድ ወይጸንዕ ኢይምሰሎ ዘየኀድግዎ ከመ ይባእ ውስተ ዕረፍቱ። ፪. እስመ ስሙዓን ንሕነ ከመ ሰምዑ እልክቱ፥ ወባሕቱ ለእልክቱሰ ኢበቍዖሙ ቃል ዘሰምዑ አስመ ኢተቶስሐ ልቦሙ በሃይማኖት ምስለ እለ ሰምዑ። ፫. ንበውእ ንሕነሰ ውስተ ዕረፍቱ እለ አመነ እስመ ይቤ፦ በከመ መሐልኩ በመዓትየ ከመ ኢይበውኡ ውስተ ዕረፍትየ፥ ወናሁ ዝንቱ ውእቱ በእንተ ምግባሩ ለእግዚአብሔር ዘእምፍጥረተ ዓለም። ፬. ዘኮነ ይቤ ከመዝ በእንተ ሰንበት፦ ወአዕረፈ እግዚአብሔር በዕለተ ሰንበት እምኵሉ ግብሩ። ፭. ወካዕበ ይቤ፦ ኢይበውኡ ውስተ ዕረፍትየ። ፮. እስመቦ ሰብእ እለ ቦሙ ፍኖት ከመ ይባኡ ህየ ወቀደምትሰ ሰሚዖሙ ኢቦኡ እስመ ክሕዱ። ፯. ወእንበይነ መኑ ይብል ከማሁ ካልአ ዕለተ እምድኅረ ጕንዱይ መዋዕል በከመ ተጽሕፈ ዘቀዳሚ እስመ ይቤ ዳዊት፦ ዮም ለእመ ሰማዕክሙ ቃሎ ኢታጽንዑ ልበክሙ። ፰. ሶበሰ ሎሙ አዕረፎሙ ኢያሱ እምኢይቤ በእንተ ካልእ እመድኅረ እማንቱ መዋዕል። ፱. ተዐውቀኬ ከመ ሀሎ ዕረፍቱ ኀበ ይበውኡ ሕዝበ እግዚአብሔር። ፲. ቀዋሚ ዘይነብር እስመ ዘቦአ ውስተ ዕረፍት ናሁኬ አዕረፈ ውእቱ እምኵሉ ግብሩ በከመ አዕረፈ እግዚአብሔር እምኵሉ ግብሩ። ፲፩. ናስተፋጥን እንከ ከመ ንባእ ውስተ ዕረፍቱ ከመ ኢንደቅ ከማሆሙ ለእሙንቱ እላ ዐለዉ። ፲፪. እስመ ሕያው ቃለ እግዚአብሔር ወጽኑዕ ወይበልሕ እምኵሉ ሰይፍ ዘክልኤ አፉሁ ወይፈልጥ ነፍሰ እምነፍስት ወይሌሊ ሥርወ እመሌሊት ወየኀሥሥ ሕሊና ወፍትወተ ወምክረ ልብ። ፲፫. ወአልቦ ዘፈጥረ ዘኢኮነ ክሡተ በቅድሜሁ ወኵሉ ክሡት ወስጡሕ በቅድመ አዕይንቲሁ ወሎቱኒ ናወሥእ በእንተ ኵሉ ዘገበርነ።

ዘካልእ መልእክት Universal Epistle

፲፫. እመቦ ዘይቴክዝ ለይጸሊ፥ ወእመቦ ዘተፈሥሐ ለይዘምር። ፲፬. ወእመቦ ዘይደዊ እምኔክሙ? ለይጸውዕ ቀሳውስተ እለ ቤተ ክርስቲያን ወይጸልዩ ላዕሌሁ ወይቅብእዎ ቅብአ ጸሎት በስሙ ልእግዚእነ። ፲፭. ወጸሎተ ሃይማኖት ያሐይዎ ለድውይ ወያነሥኦ እግዚአብሔር ወእመኒ ቦቱ ኃጢአት ይትኀደግ ሎቱ። ፲፮. ተአመኑ በበይናቲክሙ ኃጢአተክሙ ወጸልዩ ላዕለ ቢጽክሙ ከመ ትሕየዉ። ብዙኀ ትረድእ ጸሎቱ ለጻድቅ ትክል ወታሰልጥ። ፲፯. ኤልያስ ዘከማነ ሰብእ ውእቱ ወዘከመ ነሐምም የሐምም ወጸሎተ ጸለየ ከመ ኢይዝንም ዝናም ወኢዘንመ ውስተ ምድር ሰለስተ ዓመተ ወስድስተ አውራኀ። ፲፰. ወካዕበ ጸለየ ከመ ይዝንም ወወሀበ ሰማይ ዝናሞ ወምድርኒ አብቈለት ፍሬሃ። ፲፱. አኀዊነ እመቦ ዘስሕተ እምኔክሙ እምጽድቅ። ወእመቦ ዘሜጦ እምነ ጌጋዩ። ፳. ለያእምር ከመ ዘሜጦ እምጌጋዩ አድኀነ ርእሶ እምነ ሞት ወከደኖን ለብዙኃት ኃጣውኢሁ። ተፈጸመት መልእክተ ያዕቆብ ሐዋርያ፥ እኁሁ ለእግዚእነ ኢየሱስ ክርስቶስ። ወስብሐት ለእግዚአብሔር፥ አሜን።

ግብረ ሃዋርያት Acts

፴፭. ለውእቱ ሙሴ ዘክሕድዎ ወይቤልዎ፦ መኑ ሤመከ መልአከ ወመኰንነ ላዕሌነ? ኪያሁ ፈነወ እግዚአብሔር መልአከ ወመድኅነ በእደ መልአኩ ዘአስተርአዮ በኀበ ዕፀ ጳጦስ። ፴፮. ወውእቱ አውፅኦሙ እንዘ ይገብር ተኣምረ ወመንክረ በምድረ ግብፅ ወበባሕረ ኤርትራ ወበገዳም አርብዓ ዓመተ። ፴፯. ወውእቱ ሙሴ ይቤሎሙ ለደቂቀ እስራኤል፦ ነቢየ ያነሥእ ለክሙ እግዚአብሔር እምአኃዊክሙ ዘከማየ፥ ሎቱ ስምዕዎ። ፴፰. ውእቱኬ ዘነበረ ውስተ ማኅበር በገዳም ምስለ ውእቱ መልአክ ዘተናገሮ በደብረ ሲና ወምስለ አበዊነ ዘተመጠወ ቃለ ሕይወት ከመ የሀበነ። ፴፱. ወአበዩ አበዊነ ተአዝዞ ሎቱ ወዓለዉ ወሜጡ ልቦሙ ብሔረ ግብፅ። ፵. ወይቤልዎ ለአሮን፦ ግበር ለነ አማልክተ እለ የሐውሩ ቅድሜነ እስመ ዝኩ ሙሴ ዘአውጽአነ እምድረ ግብፅ ኢናአምር ዘኮነ። ፵፩. ወገብሩ ላህመ ውእተ አሚረ ወአዕረጉ መሥዋዕተ ለጣዖት ወተፈሥሑ በግብረ እደዊሆሙ። ፵፪. ወተመይጠ እግዚአብሔር ወኀደጎሙ ያምልኩ ሐራ ሰማይ በከመ ይብል መጽሐፈ ነቢያት፦ ቦኑ መሥዋዕተ ወቍርባነ ዘአባእክሙ ሊተ አርብዓ ዓመተ በገዳም ኦቤተ እስራኤል? ፵፫. እላ ነሣእክሙ ደብተራ ሞሎሕ ወኮከበ አምላክሙ ዘስሙ ሬፋን ወገበርክሙ አምሳሊሁ ከመ ትስግዱ ሎቱ። ወአፈልሰክሙ ውስተ ባቢሎን።

ስንክሳር Synaxarium

ገብርኤል መልአክ
ወኢያሱ ወልደ ነዌ
ወአቡነ ሰበነ ድንግል

መዝሙር Psalm

በቅድመ መላእክቲከ እዜምር ለከ፤
ወእሰግድ ውስተ ጽርሐ መቅደስከ፤
ወእገኒ ለስምከ።

ወንጌል Gospel

፲፩. ወአስተርአዮ መልአከ እግዚአብሔር መንገለ የማነ ምሥዋዕ ዘዕጣን። ፲፪. ወሶበ ርእዮ ደንገፀ ዘካርያስ ወፍርሀት ወረዓድ ወረደ ላዕሌሁ። ፲፫. ወይቤሎ መልአክ፦ ኢትፍራህ ዘካርያስ፥ እስመ ተሰምዐ ጸሎትከ ወብእሲትከኒ ኤልሳቤጥ ትወልድ ለከ ወልደ ወትሰምዮ ስሞ፦ ዮሐንስ። ፲፬. ወይከውነከ ትፍሥሕተ ወሐሤተ ወብዙኃን ይትፌሥሑ በልደቱ። ፲፭. እስመ ዐቢየ ይከውን ውእቱ በቅድመ እግዚአብሔር ወኢይሰቲ ወይነ ወሜሰ ወይመልእ ላዕሌሁ መንፈስ ቅዱስ እምከርሠ እሙ። ፲፮. ወለብዙኃን እምደቂቀ እስራኤል ይመይጦሙ ኀበ እግዚአብሔር አምላኮሙ። ፲፯. ወውእቱ የሐውር ቅድሜሁ በመንፈስ ቅዱስ ወበኀይለ ኤልያስ፦ ከመ ይሚጥ ልበ አበው ኀበ ውሉድ፤ ወለከሓድያን ውስተ ሕሊና ጻድቃን ከመ ይሥራዕ ሕዝበ ዘይደልው ለእግዚአብሔር። ፲፰. ወይቤሎ ዘካርያስ ለመልአከ እግዚአብሔር፦ በምንት አአምር ከመ ይከውን ዝንቱ? ናሁ አነሂ ልሂቅ ወለብእሲትየኒ ኀለፈ መዋዕሊሃ። ፲፱. ወተሠጥዎ መልአክ ወይቤሎ፦ አነ ውእቱ ገብርኤል ዘእቀውም ቅድመ እግዚአብሔር ዘተፈነውኩ ኀቤከ እንግረከ ወእዜኑከ ዘንተ። ፳. ወናሁ ትከውን በሃመ ወኢትክል ነቢበ እስከ አመ ይከውን ዝንቱ እስመ ኢአመንከኒ ነገርየ ዘይከውን ወይትፌጸም በዕድሜሁ። ይቀልል ኅልፈተ ሰማይ ወምድር፥ እምትደቅ አሐቲ ቃል እምኦሪት ወእምነቢያት፥ ይቤ እግዚእ ለአርዳኢሁ።

ቅዳሴ Liturgy :

መዝሙረ ዳዊት Psalm

ሰደዱኒ ይእዜ ዓገቱኒ፤
ወአትሐቱ አዕይንቲሆሙ ውስተ ምድር፤
ወተመጠዉኒ ከመ አንበሳ ዘጽኑሕ ለመሢጥ።

ወንጌል Gospel

፱. ወቦአ ካዕበ ኀበ ዓውድ ወይቤሎ ለእግዚእ ኢየሱስ፦ እምአይቴ አንተ? ወኢተሠጥዎ እግዚእ ኢየሱስ ወኢምንተኒ። ፲. ወይቤሎ ጲላጦስ፦ ሊተሂ ኢትነብበኒሁ? ኢታአምርሁ ከመ ብዉሕ ሊተ እስቅልከሂ ወብዉሕ ሊት አሕዩከሂ? ፲፩. ወአውሥአ እግዚእ ኢየሱስ ወይቤሎ፦ ኢኮንከ ብዉሐ ላዕሌየ ወኢምንተኒ ሶበ ኢተውህበ ለከ እምሰማይ ወበእንተ ዝንቱ ዘአግብአኒ ኀቤከ ዘየዐቢ ጌጋይ ላዕሌሁ። ፲፪. ወበእንተዝ ፈቀደ ጲላጦስ ያሕይዎ ወከልሑ አይሁድ ወይቤለ፦ እመ አሕየውኮ ለዝንቱ ኢኮንከ ዐርኮ ለቄሳር እስመ ኵለ ዘያነግሥ ርእሶ ዐላዊሁ ለቄሳር ውእቱ። ፲፫. ወሰሚዖ ጲላጦስ ዘንተ ነገረ አውፅኦ ለእግዚእ ኢየሱስ አፍአ ወነበረ ዲበ መንበር ውስተ መካን ዘስሙ፦ ሊቶስጥሮስ፥ ወበዕብራይስጥ ይብልዎ፦ ገበታ። ፲፬. ወዐርበ ፋሲካ ውእቱ ጊዜ ቀትር ዘስሱ ሰዓት። ወይቤሎሙ ጲላጦስ ለአይሁድ፦ ነዋ ንጉሥክሙ። ፲፭. ወከልሑ ወይቤሉ፦ አእትቶ ወስቅሎ። ወይቤሎሙ ጲላጦስ፦ ለንጉሥክሙኑ እስቅሎ? ወአውሥኡ ሊቃነ ካህናት ወይቤሉ፦ አልብነ ንጉሠ ዘእንበለ ቄሳር። ፲፮. ወእምዝ ወሀቦሙ ይስቅልዎ፥ ወተመጠውዎ ለእግዚእ ኢየሱስ ወአውፅእዎ። ዘየአምን በወልድ ቦ ሕይወት ዘለዓለም።

መዝሙረ ዳዊት Psalm

እግዚአብሔርሰ ንጉሥ ውእቱ እምቅድመ ዓለም፤
ወገብረ መድኀኒተ በማእከለ ምድር፤
አንተ አፅናዕካ ለባሕር በኃይልከ።
 

ወንጌል Gospel

፳፫. ወአውሥአ እግዚእ ኢየሱስ ወይቤሎሙ፦ በጽሐ ጊዜሁ ከመ ይሰባሕ ወልደ እጓለ እመሕያው። ፳፬. አማን አማን እብለክሙ እመ ኢወድቀተ ኅጠተ ስርናይ ውስተ ምድር ወኢሞተት ባሕቲታ ትነብር፥ ወእመሰ ሞተት ብዙኀ ፍሬ ትፈሪ። ፳፭. ወዘሰ ያፈቅራ ለነፍሱ ይገድፋ፥ ወዘሰ ጸልኣ ለነፍሱ በዝንቱ ዓለም የዐቅባ ለሕይወት ዘለዓለም። ፳፮. ወእመቦ ዘይትለአከኒ ሊተ ለይትልወኒ እስመ ኀበ ሀሎኩ አነ ህየ ይሄሉ ዘይትለአከኒ። ወዘሊተ ተልእከኒ ያከብሮ አቡየ። ፳፯. ወይእዜሰ ተሀውከት ነፍስየ ወምንተ እብል፦ አባ አድኅና ለነፍስየ እምዛቲ ሰዓት? ወባሕቱ በእንተ ዝንቱ በጻሕኩ ለዛቲ ሰዓት። ፳፰. አባ ሰብሖ ለወልድከ። ወመጽአ ቃል እምሰማይ ዘይብል፦ ሰባሕኩሂ ወዓዲ ካዕበ እሴብሕ። ፳፱. ወሕዝብሰ እለ ይቀውሙ ወይሰምዑ ይቤሉ፦ ነጐድጓድ ውእቱ፤ ወቦ እለ ይቤሉ፦ መልአክ ተናገሮ። ፴. ወአውሥአ እግዚእ ኢየሱስ ወይቤሎሙ፦ አኮ በእንቲአየ ዘመጽአ ዝቃል አላ በእንቲአክሙ። ፴፩. ወናሁ እብለክሙ ይእዜ በጽሐ ኵነኔሁ ለዝንቱ ዓለም፤ ወእምይእዜሰ ይሰድድዎ ለመልአከ ዝንቱ ዓለም ወያወፅእዎ አፍአ። ፴፪. ወአነኒ እምከመ ተለዐልኩ እምድር እስሕብ ኵሎ ኀቤየ። ፴፫. ወዘንተ ዘይቤ እንዘ ይኤምሮሙ በአይ ሞት ሀለዎ ይሙት። ፴፬. ወአውሥእዎ ሕዝብ ወይቤልዎ፦ ንሕነሰ ሰማዕነ በውስተ ኦሪት ከመ ለዓለም ይነብር ክርስቶስ ወእፎ እንከ ትብለነ አንተ ሀለዎ ለወልደ እጓለ እመሕያው ይትለዐል? መኑ እንከ ዝንቱ ወልደ እጓለ እመሕያው? ዘየአምን በወልድ ቦ ሕይወት ዘለዓለም።

መልእክተ ጳውሎስ Pauline Epistle

፩. ወበእንተ ዝንቱ ንሕነኒ እለ ብነ እሙንቱ ሰማዕት ኵሎሙ ዘየዓውዱነ ከመ ደመና ንግድፍ እምላዕሌነ ኵሎ ክበደ ወሁከተ ኃጢአት ወንሩጽ በትዕግሥት ኀበ ዘጽኑሕ ለነ ተስፋነ። ፪. ወንትልዎ ለፍጹም መልአክነ ኢየሱስ ክርስቶስ ዘተዐገሠ ኀፍረተ መስቀል አናኅሲዮ በእንተ ፍሥሓሁ ዘጽኑሕ ሎቱ። ወነበረ በየማነ መንበረ እግዚአብሔር። ፫. ሐልይዎ እስኩ ለዘከመዝ ተዐገሠ እምኃጥኣን ወተናገርዎ በበይናቲክሙ ከመ ኢትስራሕ ነፍስክሙ ወኢትድከሙ። ፬. እስመ ዓዲክሙ ኢጸናዕክሙ እስከ ለደም ትበጽሑ፥ ተጋደልዋ ለኃጢአት ወእበይዋ፥ ፭. ወአብድርዋ ለትምህርተ ተስፋክሙ እስመ ከመ ውሉድ ይብለክሙ፦ ወልድየ ኢታስተጽሕብ ተግሣጸ እግዚአብሔር ወኢትትገሐሥ እምኔሁ ሶበ ይዘልፈከ አመ ገሠፀከ። ፮. እስመ ለዘአፍቀረ እግዚአብሔር ይጌሥጽ ወይቀሥፍዎ ለኵሉ ውሉድ ዘይትፈቀድ። ፯. ለተግሣጽክሙ ተዐገሡ እስመ ከመ ውሉዱ ያፈቅረክሙ እግዚአብሔር። መኑ ውሉድ ዘኢይጌሥጾ አቡሁ? ፰. ወእመሰ ኢገሠጹክሙ አንዳባራ አንትሙ ወኢኮንክሙ ውሉደ ወዐረይክሙ ኵልክሙ። ፱. ወእመሰ አበዊነ እለ ወለዱነ በሥጋ ይጌሥጹነ ወነኀፍሮሙ እፎ እንከ ፈድፋደ ንግነይ ወንትአዘዝ ለአበ መንፈስነ ይደልወነ ወንሕየው። ፲. ወእሙንቱሰ ለስላጤ ለኅዳጥ መዋዕል ይጌሥጹነ በከመ ፈቀዱ ወውእቱሰ ለእንተ ትኄይስ ለነ ከመ ንርከብ ቅድሳቲሁ።

ዘካልእ መልእክት Universal Epistle

፭. ወታአምሩ ከመ አስተርአየ ዝክቱ ከመ ያሰስላ ለኃጢአት ወኃጢአትሰ አልቦ ኀቤሁ። ፮. ወኵሉ ዘቦቱ ይነብር ኢይኤብስ እስመ ኵሉ ዘይኤብስ ኢይሬእዮ ወኢያአምሮ። ፯. ደቂቅየ ኢያስሕቱክሙ። ኵሉ ዘይገብራ ለጽድቅ ጻድቅ ውእቱ በከመ ዝክቱ ጻድቅ ውእቱ። ፰. ወዘሰ ይገብራ ለኃጢአት እምነ ጋኔን ውእቱ እስመ ቀዳሚሁ ሰይጣን አበሰ። ወበእንተ ዝንቱ አስተርአየ ወልደ እግዚአብሔር ከመ ይሰዐር ግብሮ ለጋኔን። ፱. ወኵሉ ዘይትወለድ እምእግዚአብሔር ኢይገብራ ለኃጢአት፥ እስመ ዘርዐ ዚአሁ ቦቱ ይነብር ወኢይክል አብሶ እስመ እምእግዚአብሔር ተወልደ። ፲. ወበዝንቱ እሙራን ውእቶሙ ደቂቀ እግዚአብሔር ወደቂቀ ጋኔን። ኵሉ ዘኢይገብራ ለጽድቅ ኢኮኒ እምእግዚአብሔር፥ ወከማሁ ዘኢያፈቅር ቢጾ። ፲፩. እስመ ዛቲ ይእቲ ትእዛዝ እንተ ሰማዕክሙ ትካት ከመ ንትፋቀር በበይናቲነ።

ግብረ ሃዋርያት Acts

፲. ወሀሎ አሐዱ ብእሲ በሀገረ ደማስቆ ዘእምውስተ አርድእት ዘስሙ ሐናንያ ወአስተርአዮ እግዚእነ በራእይ ወይቤሎ፦ ሐናንያ። ወይቤ፦ ነየ እግዚኦ። ፲፩. ወይቤሎ እግዚእነ፦ ተንሥእ ወሑር ስኰተ እንተ ይብልዋ ርትዕት ወኅሥሥ በቤተ ይሁዳ ዘስሙ ሳውል ዘሀገረ ጠርሴስ እስመ ውእቱ ናሁ ይጼሊ። ፲፪. ወእንዘ ይጸሊ አስተርአዮ ብእሲ ዘስሙ ሐናንያ ቦአ ኀቤሁ ወወደየ እዴሁ ዲቤሁ ከመ ይርአይ። ፲፫. ወአውሥአ ሐናንያ ወይቤ፦ እግዚኦ፥ ሰማዕኩ በእንተ ውእቱ ብእሲ በኀበ ብዙኃን ኵሎ ዘይገብር እኩየ ዲበ ቅዱሳኒከ በኢየሩሳሌም። ፲፬. ወዝየኒ አስተበዊሖ በኀበ ሊቀ ካህናት መጽአ ከመ ይሞቅሖሙ ለኵሎሙ እለ ይጼውዑ ስመከ። ፲፭. ወይበሎ እግዚእነ፦ ሑር፥ እስመ ንዋየ ኅሩየ ረሰይክዎ ሊተ ከመ ይጹር ስምየ በቅድመ አሕዛብ ወነገሥት ወደቂቀ እስራኤል። ፲፮. ወአነ አርእዮ መጠነ ሀለዎ ይሕምም በእንተ ስምየ። ፲፯. ወሶቤሃ ሖረ ሐናንያ ወቦአ ቤቶ ወወደየ እዴሁ ዲቤሁ፥ ወይቤሎ፦ ሳውል እኁየ፥ እግዚእነ ኢየሱስ ክርስቶስ ፈነወኒ ኀቤከ ዘአስተርአየከ በፍኖት እንዘ ትመጽእ ከመ ትርአይ ወይምላእ መንፈስ ቅዱስ ላዕሌከ። ፲፰. ወሶቤሃ ተሥዕዓ እምአዕይንቲሁ ከመ ዘሳሬት ወተከሥታ አዕይንቲሁ ወርእየ ሶቤሃ። ወተንሥአ ወተጠምቀ። ፲፱. ወበልዐ እክለ ወጸንዐ። ወነበረ ደማስቆ ኅዳጠ መዋዕለ ምስለ አርድእት።

ስንክሳር Synaxarium

ሐናንያ ረድእ
ወቶማስ ሰማዕት
ወማማስ
ወሲላስ
ወተዝካሩ ለአልአዛር ነዳይ
ወተዝካረ ስቅለቱ ለእግዚእነ

መዝሙር Psalm

እስመ ዐብየት እስከ ሰማያት ምሕረትከ፤
ወእስከ ደመናት ጽድቅከ፤
ተለዐለ እግዚአብሔር መልዕልተ ሰማያት።

ወንጌል Gospel

፶፭. ወይቤሎሙ ለሕዝብ እግዚእ ኢየሱስ፦ ሶቤሃ ከመ ዘሰራቂ ትዴግኑ መጻእክሙ በዕፀው ወበመጣብሕ ተአኀዙኒ? ወዘልፈ እነብር ምስሌክሙ በምኵራብ ወእሜህር ወኢአኀዝክሙኒ። ፶፮. ወዝኵሉ ዘኮነ ከመ ይብጻሕ ቃለ ነቢያት። ወእምዝ ኵሎሙ አርዳኢሁ ኀደግዎ ወጐዩ። ፶፯. ወእለ አኀዝዎ ለእግዚእ ኢየሱስ ወሰድዎ ኀበ ቀያፋ ሊቀ ካህናት ኀበ ተጋብኡ ጸሐፍት ወሊቃናት። ፶፰. ወተለዎ ጴጥሮስ እምርሑቅ እስከ ዐጸደ ሊቀ ካህናት ወቦአ ውስጠ ወነበረ ምስለ ወዐሊ ይርአይ ማኅለቅቶ ለነገር። ፶፱. ወየኀሥሡ ሊቃነ ካህናት ወጸሐፍት ወሊቃናት ወኵሉ ዓውድ ሰማዕተ ሐሰት በዘ ይቅትልዎ ለእግዚእ ኢየሱስ ወኢረከቡ። ፷. ወመጽኡ ብዙኃን ሰማዕት ሐሰት ወስእኑ። ወድኅረ መጽኡ ክልኤቱ። ፷፩. ወይቤሉ፦ ይቤ ዝንቱ፦ እክል ነሢቶቶ ለቤተ እግዚአብሔር ወበሣልስት ዕለት አንሥኦቶ። ፷፪. ወተንሥአ ሊቀ ካህናት ወይቤሎ፦ ኢትሰምዕኑ፥ ዘመጠነዝ ያስተዋድዩከ? ፷፫. ወኢያውሥኦ እግዚእ ኢየሱስ፤ ወይቤሎ ሊቀ ካህናት፦ አምሐልኩከ በእግዚአብሔር ሕያው ከመ ትንግረኒ እመ አንተሁ ክርስቶስ ወልዱ ለእግዚአብሔር። ፷፬. ወይቤሎ እግዚእ ኢየሱስ፦ አንተ ትቤ ወባሕቱ እብለክሙ እምይእዜሰ ትሬእይዎ ለወልደ እጓለ እመሕያው እንዘ ይነብር በየማነ ኀይል ወእንዘ ይመጽእ በደመናተ ሰማይ። ፷፭. ወሰጠጠ አልባሲሁ ሊቀ ካህናት እንዘ ይብል፦ ምንተ እንከ ትፈቅዱ ሎቱ ሰማዕተ? ናሁ ፀርፈ ወሰማዕክሙ ፅርፈቶ። ፷፮. ምንተ እንከ ትብሉ? ወአውሥኡ ወይቤሉ፦ ይቅትልዎ። ፷፯. ወእምዝ ተፍኡ ውስተ ገጹ ወኰርዕዎ ወጸፍዕዎ፤ ፷፰. እንዘ ይብሉ፦ ተነበይ ለነ ክርስቶስ፥ መኑ ውእቱ ዘጸፍዐከ? ሰማይ ወምድር የኀልፍ ወቃልየሰ ኢየኀልፍ ይቤ እግዚእ ለአርዳኢሁ።

ቅዳሴ Liturgy :

መዝሙረ ዳዊት Psalm

ወያጸሉ ህየ አዕዋፈ ሰማይ፤
ወይነቅዉ በማእከለ ጾላእት፤
ዘይሠቅዮሙ ለአድባር እምውሣጥያቲሆሙ።
 

ወንጌል Gospel

፴. ወይቤ፦ በምንት አስተማስላ ለመንግሥተ እግዚአብሔር? ወምንተ ትመስል? ፴፩. ከመ ኅጠተ ስናፔ እነ ተዘርዐት ውስተ ምድር ወትንእስ እምኵሉ አዝርዕት ዘውስተ ምድር። ፴፪. ወእምከመ ዘርእዋ ትበቍል ወተዐቢ እምኵሎን አኅማላት ወትገብር አዕጹቀ ዐበይተ እስከ ይክሉ አዕዋፈ ሰማይ አጽልሎ ውስተ አዕጹቂሃ። ፴፫. ወበዘከመዝ አምሳል ተናገሮሙ ቃሎ በአምነ ይክሉ ሰሚዐ። ፴፬. ወዘእንበለ ምሳሌሰ ኢተናገሮሙ ወበባሕቲቶሙ ይፌክር ለአርዳኢሁ ኵሎ። ፴፭. ወይእተ አሚረ መስዮ ይቤሎሙ ለአርዳኢሁ፦ ንዕዱ ማዕዶተ። ፴፮. ወኀደጎሙ ለሕዝብ ወነሥእዎ በሐመር ወቦ ካልኣተኒ አሕማረ ምስሌሆሙ። ፴፯. ወመጽአ ዐውሎ ዓቢይ ነፋስ ወይሰወጥ ማይ እሞገድ ውስተ ሐመር እስከ መልአ ማይ ውስተ ሐመር። ፴፰. ወውእቱሰ መንገለ ከወላ ሐመር ተተርእሰ ወኖመ፤ ወአንቅህዎ ወይቤልዎ፦ ሊቅ፥ ኢያሐዝነከኑ እንዘ ንመውት? ዘቦ እዝን ሰሚዐ ለይስማዕ።