መዝሙረ ዳዊት Psalm

ይስማዕከ እግዚአብሔር በዕለተ ምንዳቤከ፤
ወይቁም ለከ ስሙ ለአምላከ ያዕቆብ፤
ወይፈኑ ለከ ረድኤተ እመቅደሱ።

ወንጌል Gospel

፱. ወዖዝያንኒ ወለደ ኢዮአታምሃ፤ ወኢዮአታምኒ ወለደ አካዝሃ፤ ወአካዝኒ ወለደ ሕዝቅያስሃ። ፲. ወሕዝቅያስኒ ወለደ ምናሴሃ፤ ወምናሴኒ ወለደ አሞጽሃ፤ ወአሞጽኒ ወለደ ኢዮስያስሃ። ፲፩. ወኢዮስያስኒ ወለደ ኢኮንያንሃ ወአኀዊሁ አመ ፍልሰተ ባቢሎን። ፲፪. ወእምድኅረ ፍልስተ ባቢሎን ኢኮንያንኒ ወለደ ሰላትያልሃ፤ ወሰላትያልኒ ወለደ ዘሩባቤልሃ። ፲፫. ወዘሩባቤልኒ ወለደ አብዩድሃ፤ ወአብዩድኒ ወለደ ኤልያቄምሃ፤ ወኤልያቄምኒ ወለደ አዛርሃ። ፲፬. ወአዛርኒ ወለደ ሰዶቅሃ፤ ወሰደቅኒ ወለደ አኪምሃ፤ ወአኪምኒ ወለደ ኤልዩድሃ። ፲፭. ወኤልዩድኒ ወለደ አልዓዛርሃ፤ ወአልዓዛርኒ ወለደ ማትያንሃ፤ ወማትያንኒ ወለደ ያዕቆብሃ። ፲፮. ወያዕቆብኒ ወለደ ዮሴፍሃ ፈኃሪሃ ለማርያም ዘእምኔሃ ተወልደ ኢየሱስ ዘተሰምየ ክርስቶስ። ፲፯. ወኵሎንኬ እንከ ትውለድ እምአብርሃም እስከ ዳዊት ትውልድ ዐሠርቱ ወአርባዕቱ፤ ወእምዳዊት እስከ ፍልሰተ ባቢሎን ትውልድ ዐሠርቱ ወአርባዕቱ፤ ወእምፍልሰተ ባቢሎን እስከ ክርስቶስ ትውልድ ዐሠርቱ ወአርባዕቱ፤ ወኵሎንኬ ትውልድ እምአብርሃም እስከ ክርስቶስ ትውልድ አርብዓ ወክልኤቱ። ሰማይ ወምድር የኀልፍ ወቃልየሰ ኢየኀልፍ ይቤ እግዚእ ለአርዳኢሁ።

መልእክተ ጳውሎስ Pauline Epistle

፩. አስተበቍዐከ ቀዳሜ ኵሉ ትግበር ጸሎተ፥ ወስኢለ፥ ወተጋንዮ፥ ወእምዝ ጸልዩ ላዕለ ኵሉ ሰብእ። ፪. ወላዕለ ኵሉ ነገሥት ወመኳንንት፥ ከመ በህዱእ ወበጽምው ይኩን ንብረትነ በኵሉ ጽድቅ ወንጽሕ። ፫. ዝኩ ሠናይ ወኅሩይ በቅድመ እግዚአብሔር መድኀኒነ። ፬. እሰመ ውእቱ ይፈቅድ ኵሉ ሰብእ ይሕየው ወያእምርዋ ለጽድቅ። ፭. አሐዱ እግዚአብሔር ወአሐዱ ኅሩይ ማእከለ እግዚአብሔር ወሰብእ ኢየሱስ ክርስቶስ ዘኮነ ሰብአ። ፮. ዘመጠወ ርእሶ ቤዛ ኵሉ፥ ወኮነ ሰማዕተ በዕድሜሁ። ፯. ዘሎቱ ተሠየምኩ ሐዋርያ ወዐዋዴ፥ እሙነ እብል ወኢይሔሱ ተሠየምኩ መምህረ ለአሕዛብ በሃይማኖት ወበጽድቅ። ፰. ወእፈቅድ ለኵሉ ሰብእ ይጸልዩ በኵሉ ገጸ መካን ወያንሥኡ እደዊሆመ በንጽሕ ዘእንበለ ነጐርጓር ወኑፋቄ።

ዘካልእ መልእክት Universal Epistle

፲. ወዘሰ ያፈቅራ ለሕይወት ወይፈቱ ይርአይ መዋዕለ ሠናያተ ያርምም ልሳኖ እምእኪት ወከናፍሪሁኒ ከመ ኢይንብባ ሐሰተ። ፲፩. ይትገሐሥ እምእኪት ወይግበራ ለሠናይት፥ ለይኅሥሣ ለሰላም ወይትልዋ። ፲፪. እስመ አዕይንቲሁ ለእግዚአብሔር ኀበ ጻድቃኑ፥ ወእዝኑሂ ኀበ ስእለቶሙ። ገጹ ለእግዚአብሔር ኀበ እለ ይገብሩ እኪተ። ፲፫. ወመኑ ውእቱ ዘእኪተ ይፈቅድ ለክሙ እመ ትቀንኡ ለገቢረ ሠናይ? ፲፬. ወእመሰ በገቢረ ጽድቅ ተሐምሙ ብፁዓን አንትሙ ወዘሰ፦ ይጌርመክሙ ኢትፍርሁ ወኢትደንግፁ። ፲፭. አላ ለእግዚአብሔር ቀድስዎ በኵሉ ልብክሙ ወድልዋኒክሙ ሀልዉ በኵሉ ጊዜ ከመ ታውሥእዎሙ ቃለ ለእለ ይሴአሉክሙ በእንተ ዛቲ ተስፋክሙ።

ግብረ ሃዋርያት Acts

፲. ወሀሎ አሐዱ ብእሲ በሀገረ ደማስቆ ዘእምውስተ አርድእት ዘስሙ ሐናንያ ወአስተርአዮ እግዚእነ በራእይ ወይቤሎ፦ ሐናንያ። ወይቤ፦ ነየ እግዚኦ። ፲፩. ወይቤሎ እግዚእነ፦ ተንሥእ ወሑር ስኰተ እንተ ይብልዋ ርትዕት ወኅሥሥ በቤተ ይሁዳ ዘስሙ ሳውል ዘሀገረ ጠርሴስ እስመ ውእቱ ናሁ ይጼሊ። ፲፪. ወእንዘ ይጸሊ አስተርአዮ ብእሲ ዘስሙ ሐናንያ ቦአ ኀቤሁ ወወደየ እዴሁ ዲቤሁ ከመ ይርአይ። ፲፫. ወአውሥአ ሐናንያ ወይቤ፦ እግዚኦ፥ ሰማዕኩ በእንተ ውእቱ ብእሲ በኀበ ብዙኃን ኵሎ ዘይገብር እኩየ ዲበ ቅዱሳኒከ በኢየሩሳሌም። ፲፬. ወዝየኒ አስተበዊሖ በኀበ ሊቀ ካህናት መጽአ ከመ ይሞቅሖሙ ለኵሎሙ እለ ይጼውዑ ስመከ። ፲፭. ወይበሎ እግዚእነ፦ ሑር፥ እስመ ንዋየ ኅሩየ ረሰይክዎ ሊተ ከመ ይጹር ስምየ በቅድመ አሕዛብ ወነገሥት ወደቂቀ እስራኤል። ፲፮. ወአነ አርእዮ መጠነ ሀለዎ ይሕምም በእንተ ስምየ።

ስንክሳር Synaxarium

ሕዝቅያስ ንጉሥ
ወፊልጶስ ወአሃዊሁ
ወማቴዎስ

መዝሙር Psalm

እግዚኦ በኀይልከ ይትፌሣሕ ንጉሥ፤
ወብዙኀ ይትሐሠይ በአድኅኖትከ፤
ፍትወተ ነፍሱ ወሀብኮ።

ወንጌል Gospel

፳፰. ወእመቦ አሐዱ እምኔክሙ ዘይፈቅድ ይሕንጽ ማኅፈደ አኮኑ ይቀድም ይንበር ወየሐስብ ፃእፃአ እመቦ ዘየአክሎ ከመ ይሳርር መሰረቶ? ፳፱. ከመ ሳሪሮ መሰረተ እመ ስእነ ፈጽሞ ኵሎሙ እለ ይርእይዎ ይእኅዙ ወይሳለቁ ላዕሌሁ። ፴. እንዘ ይበሉ፦ ዝንቱ ብእሲ አኀዘ ይሕንጽ ወስእነ ፈጽሞ። ፴፩. ወእመኒ ፈቀደ ንጉሥ ይሑር ይፅብኦ ለካልእ ንጉሥ አኮኑ ይቀድም ይንበር ወይመክር ለእመ ይክል በእልፍ ፀቢኦቶ ለዘይመጽእ ኀቤሁ ምስለ ክልኤ እልፍ? ፴፪. ወእመአኮሰ እንዘ ርሑቅ ውእቱ ይፌኑ ሐዋርያተ ትንብልና ኀቤሁ ወይዜንውዎ ሰላመ። ፴፫. ከመዝ እንከ ኵሉ ዘእምኔክሙሂ ዘኢወጽአ እምኵሉ ወዘኢይትናከር ኵሎ ዘዚአሁ ንዋየ ኢይክል ከዊነ ረድእየ። ፴፬. ሠናይ ውእቱ ጼው ወእመሰ ጼው ለስኀ በምንት እንከ ይቄስምዎ? ፴፭. አኮኑ ይገድፍዎ አፍአ ውስተ መሬት። ዘቦ እዘነ ሰሚዕ ለይስማዕ። ይቀልል ኅልፈተ ሰማይ ወምድር፥ እምትደቅ አሐቲ ቃል እምኦሪት ወእምነቢያት፥ ይቤ እግዚእ ለአርዳኢሁ።

ቅዳሴ Liturgy :

መዝሙረ ዳዊት Psalm

ወለእለሂ ይኤብሱ ኢያንሥኡ ቀርኖሙ፤
ወኢያንሥኡ ቀርኖሙ ውስተ አርያም፤
ወኢይንብቡ ዓመፃ ላዕለ እግዚአብሔር።

ወንጌል Gospel

፳፱. እመኒ ዐይንከ እንተ የማን ታስሕተከ ምልሓ ወግድፋ እምላዕሌከ፤ እስመ ይኄይሰከ ነቋረከ ትባእ ውስተ መንግሥተ ሰማያት እምትባእ ምስለ ክሌሆን አዕይንቲከ ውስተ እሳተ ገሃነም። ፴. ወእመኒ እዴከ እንተ የማን ታስሕተከ ምትራ ወግደፋ እምላዕሌከ፤ እሰመ ይኄይሰከ ይትኅጐል አሐዱ እምነ አባልከ እምኵሉ ሥጋከ ይትወደይ ውስተ እሳተ ገሃነም። (ወእመኒ እግርከ ዘየማን ታስሕተከ ምትራ ወግደፋ እምላዕሌከ፤ እሰመ ይኄይሰከ ሐንካሰከ ትባእ ውስተ መንግሥተ ሰማያተ እምትባእ ምስለ ክሌሆን እግሪከ ውስተ እሳተ ገሃነም።) ፴፩. ሰማዕክሙ ዘተብህለ ለቀደምትክሙ፦ኵሉ ዘይድኅር ብእሲቶ ይጽሐፍ ላቲ መጽሐፈ ኅድጋቲሃ የሀባ ወይድኃራ። ፴፪. ወአንሰ እብለክሙ፥ ከመ ኵሉ ዘይድኅር ብእሲቶ ዘእንበለ ትዘሙ ብላዕሌሁ ለሊሁ ረስያ ዘማ፤ ወዘስ ኅድገተ አውሰበ ዘመወ። ፴፫. ወካዕበ ሰማዕክሙ ዘከመ ተብህለ ለቀደምትክሙ፦ ኢትምሐሉ በሐሰት ባሕቱ አግብኡ መሐላክሙ ለእግዚአበሔር። ፴፬. ወአንሰ እብለክሙ፥ ኢትምሐሉ ግሙራ፤ ወኢ በሰማይ እስመ መንበሩ ለእግዚአብሔር ውእቱ፤ ፴፭. ወኢ በምድር እስመ መከየደ እገሪሁ ይእቲ፥ ወኢ በኢየሩሳሌም እስመ ሀገሩ ይእቲ ለንጉሥ ዓቢይ። ፴፮. ወኢ በርእስክሙ ኢትምሐሉ፥ ወኢ በስዕርተ ርእስክሙ፥ እስመ ኢትክሉ አሐተ እምሥዕርተ ርእስክሙ ኢ አፃዕድዎ ወኢ አጽልሞ። ፴፯. ባሕቱ ይኩን ነገርክሙ አሐደ እመሂ፦ እወ እወ፥ ወእመሂ፦ አልቦ አልቦ፤ ወፈድፋደሰ እምእሉ እምእኩይ ውእቱ። ሰማይ ወምድር የኀልፍ ወቃልየሰ ኢየኀልፍ ይቤ እግዚእ ለአርዳኢሁ።

መዝሙረ ዳዊት Psalm

ወአንሰ በጸሎትየ ኀበ እግዚአብሔር፤
ሣህሉ ለእግዚአብሔር በጊዜሁ፤
እንዘ ብዘኅ ሣህልከ።

ወንጌል Gospel

፩. ወባሕቱ ዑቁ ምጽዋተክሙ ኢትግበሩ ለዐይነ ሰብእ ከመ ታስተርእዩ ሎሙ፥ ወእመ አኮሰ ዐስበ አልብክሙ በኀበ አቡክሙ ዘበሰማያት። ፪. ወሶበሂ ትገብሩ ምጽዋተክሙ ኢትንፋሑ ቀርነ ቅድሜክሙ በከመ ይገብሩ መደልዋን በመኳርብት ወበአስኳት ወበፍናው ከመ ይትአኰቱ እምኀበ ሰብእ፤ አማን እብለክሙ ኅጕሉ ዕሤቶሙ። ፫. ወአንተሰ ሶበ ትገብር ምጽዋተከ ኢታእምር ጸጋምከ ዘትገብር የማንከ። ፬. ከመ በኅቡእ ይኩን ምጽዋትከ ወአቡከ ዘይሬእየከ በኅቡእ የዓሥየከ ክሡተ። ፭. ወሶበሂ ትጼልዩ ኢትኩኑ ከመ መድልዋን እስመ እሙንቱ ያፈቅሩ በመኳርብት ወውስተ መዓዝነ መራኅብት ቀዊመ ወጸልዮ ከመ ያስተርእዩ ለሰብእ፤ አማን እብለክሙ ኅጕሉ ዕሤቶሙ። ፮. ወአንተሰ ሶበ ትጼሊ ባእ ቤተከ ወዕፁ ኆኅተከ ወጸሊ ለአቡከ ሰማያዊ በኅቡእ፤ ወአቡከ ዘይሬእየከ በኅቡእ የዐሥየከ ክሡተ። ፯. ወእንዘ ትጼልዩ ኢትዘንግዑ ከመ አሕዛብ፥ እስመ ይመስሎሙ በአብዝኆ ንባቦሙ ዘይሰምዖሙ። ፰. ኢትትመሰልዎሙኬ፥ እስመ የአምር አቡክሙ ሰማያዊ ዘትፈቅዱ ዘእንበለ ትስአልዎ። ሰማይ ወምድር የኀልፍ ወቃልየሰ ኢየኀልፍ ይቤ እግዚእ ለአርዳኢሁ።

መልእክተ ጳውሎስ Pauline Epistle

፩. አስተበቍዐክሙ አኀዊነ አነ ጳውሎስ በየውሀት ወበምሕረተ ክርስቶስ፥ እስመ ሶበ እሄሉ ኀቤክሙ መጠነ አነ በገጽ፥ ወበኀበሰ ኢሀሎኩ እተፊ ላዕሌክሙ፥ ብቍዑኒ እስመ እንዘ ኢሀለውኩ እትአመን በተፋቅሮትክሙ። ፪. ከመ ኢይስራሕ አመ መጻእኩ ኀቤክሙ ወእትኀበል አጥብዕ። እስመቦ እለ ይትሐዘቡነ ከመ በሕገ ሥጋ ነሐውር። ፫. በሥጋነሰ ነሐውር ወአኮ በሕገ ዚአሁ ዘነሐውር ወዘንፀብእ። ፬. እስመ ንዋየ ሐቅሉ ለፀብእነ ኢኮነ በሕገ ሥጋ አለ በኀይለ እግዚአብሔር ውእቱ ዘይነሥት አጽዋናተ ጽኑዓነ። ፭. ወያንሕል ኵሎ ዘይትዔበይ ወይትሌዐል ላዕለ እግዚአብሔር ከመ ይፄወው ኵሉ ልብ ወሕሊና ወይግነይ ለክርስቶስ። ፮. ወድልዋን ንሕነ ንትበቀሎ ለዘኢይገርር አመ ፈጸምክሙ አንትሙ ትእዛዘ። ፯. ዘመንገለ ገጽ ርእዩ ቅድሜክሙ። ወዘሂ ተአመነ በክርስቶስ ከመዝ ለየሐሊ ለሊሁ እስመ በከመ ክርስቶስ ከማሁ ንሕነኒ። ፰. ወእመኒቦ ዘተመካሕኩ ፈድፋደ በሢመትክሙ እንተ ወሀበኒ እግዚአብሔር ለተሐንጾትክሙ ወአኮ ለተነሥቶ ኢይትኀፈር። ፱. ወባሕቱ እምህክ ዘንተ ከመ ኢይምሰሎ ለዘይትሔዘብ ከመ ዘእጌርመክሙ በመጻሕፍትየ። ፲. እስመቦ እምሰብእ ዘይብል፦ እስመ መጻሕፍትሰ ክቡዳት ወዕፁባት፥ ወሀልዎሰ በሥጋ ድኩም ውእቱ ወነገሩሂ ሕጹር።

ዘካልእ መልእክት Universal Epistle

፭. ወሚመ ይመስለክሙኑ ዘሐሰተ ይብል መጽሐፍ፦ ከመ ተቃንኦ ያፈቅር መንፈስ ዘየኀድር ላዕሌክሙ? ፮. ወባሕቱ አምላክነ እንተ ተዐቢ ሞገሰ ይሁበነ። ወበእንተ ዝንቱ ይቤ፦ እስመ ለዕቡያን ይትሄየዮሙ እግዚአብሔር ወለእለሰ ያቴሕቱ ርእሶሙ ይሁቦሙ ሞገሰ። ፯. ኦሆ በልዎ ለእግዚአብሔር። ወእንብየ በልዎ ለጋኔን፥ ወይጐይይ እምኔክሙ። ፰. ቅረብዎ ለእግዚአብሔር ወይቀርበክሙ። አንጽሑ እደዊክሙ ኃጥኣን፥ ወአንጽሑ ልበክሙ አለ ትናፍቁ። ፱. ግነዩ ወላሕዉ ወብክዩ ወስሓቀክሙ ሚጥዎ ውስተ ላሕ፥ ወትፍሥሕተክሙኒ ውስተ ትካዝ አግብእዎ። ፲. አትሕቱ ርእሰክሙ ወያሌዕለክሙ እግዚአብሔር። ፲፩. ወኢትትሐመዩ በበይናቲክሙ አኀዊነ፥ እስመ ዘሐመዮ ለካልኡ ሐመዮ ለሕገ እግዚአብሔር ወዘይግእዝ ካልኦ ሕገ እግዚአብሔር ገአዘ። ወእመሰ ሕጎ ትግእዝ ኢኮንከ ገባሬ ሕገ አላ ኮንከ ገኣዚሃ ለሕግ። ፲፪. እስመ አሐዱ ውእቱ ወሃቢሃ ለሕግ ወመኰንና ለሕግ ዘውእቱ ይክል አማስኖሂ ወአድኅኖሂ። አንተኬ ምንትኑ አንተ ዘትግእዞ ለካልእከ?

ግብረ ሃዋርያት Acts

፵፪. ወነበሩ ይፀመዱ ትምህርተ ሐዋርያት ወኅቡረ ይባርኩ ማዕደ በውስተ ጸሎት። ፵፫. ወፈርሆሙ ኵሉ ዘነፍስ። ወብዙኅ ተኣምር ወመንክር ይከውን በእደዊሆሙ ለሐዋርያት። ፵፬. ወኵሎሙ እለ አምኑ ኅቡረ ይነብሩ ወድሙር ኵሉ ንዋዮሙ። ፵፭. ወጥሪቶሙ ይሠይጡ ወይከፍሉ በከመ መፍቅዱ ለለአሐዱ። ፵፮. ወኵሎ አሚረ ይፀመዱ በአሕዱ ሕሊና ውስተ ቤተ መቅደስ። ወይፌትቱ ኅብስተ ውስተ አብያት ወይሴሰዩ ሲሳዮሙ በትፍሥሕት ወበየውሃተ ልብ። ፵፯. ወያአኵቱ እግዚአብሔርሃ ወቦሙ ሞገሰ በኀበ ኵሉ ሕዝብ። ወእንተ ጸብሐት ይዌስክ እግዚአብሔር ዲቤሆሙ ለእለ የሐይዉ።

ስንክሳር Synaxarium

አብርሃም ካልእ
ወዮሐንስ ሐራ
ወአባ ፊልጶስ ዘደብረ ቢዘን

መዝሙር Psalm

ዝክረ ጻድቅ ለዓለም ይሄሉ፤
ወኢይፈርህ እምነገር እኩይ፤
ጥቡዕ ልቡ ለተወክሎ በእግዚአብሔር።

ወንጌል Gospel

፩. ወሀለዉ ይቀርብዎ መጸብሓውያን ወኃጥኣን ይስምዕዎ። ፪. ወአንጐርጐሩ ጸሐፍት ወፈሪሳውያን እንዘ ይብሉ፦ ዝንቱሰ ኃጥኣነ ይትዌከፍ ወይበልዕ ምስሌሆሙ። ፫. ወመሰለ ሎሙ ከመዝ ወይቤሎሙ፦ ፬. እመቦ ብእሲ እምኔክሙ ዘቦ ምእተ አባግዐ ወለእመ ተገድፈቶ አሐቲ እምኔሆን አኮኑ የኀድግ ተስዓ ወትስዐተ ውስተ ገዳም ወየሐውር ኀበ እንተ ተገድፈቶ እስከ ይረክባ? ፭. ወእምከመ ረከባ ይጸውራ ዲበ መታክፍቱ እንዘ ይትፌሣሕ። ፮. ወአቲዎ ቤቶ ይጼውዕ አዕርክቲሁ ወጎሮ ወይብሎሙ፦ ተፈሥሑ ሊተ እስመ ረከብኩ በግዕየ እንተ ተገድፈተኒ። ፯. እብለክሙ ከመ ከመዝ ይከውን ትፍሥሕተ በሰማያት በበይነ አሐዱ ኃጥእ ዘይኔስሕ ፈድፋደ እምነ ተስዓ ወትስዐቱ ጻድቃን እለ ኢይፈቅዱ ይነስሑ። ፰. ከማሁ ብእሲትኒ ለእመ ባቲ ዓሥሩ አግሙስ ወተገድፈታ አሐቲ አኮኑ ታኀቱ ማኅቶተ ወትፈነቅል ኵሎ ዘውስተ ቤታ ወተኀሥሥ አስተሓሚማ እስከ ትረክብ? ፱. ወእምከመ ረከበት ትጼውዕ አዕርክቲሂ ወጎራ ወትብሎን፦ ተፈሥሓ ሊተ እስመ ረከብኩ ገመስየ እንተ ተገድፈተኒ። ፲. እብለክሙ ከማሁ ይከውን ፍሥሓ በቅድመ መላእክተ እግዚአብሔር በእንተ አሐዱ ኃጥእ ዘይኔስሕ። ይቀልል ኅልፈተ ሰማይ ወምድር፥ እምትደቅ አሐቲ ቃል እምኦሪት ወእምነቢያት፥ ይቤ እግዚእ ለአርዳኢሁ።

ቅዳሴ Liturgy :

መዝሙረ ዳዊት Psalm

ወተኃሥያ አዋልደ ይሁዳ፤
በእንተ ፍትሕከ እግዚኦ፤
እስመ አንተ እግዚአብሔር ባሕቲትከ ልዑል ዲበ ኵሉ ምድር።

ወንጌል Gospel

፶፯. ወመስዮ መጽአ ብእሲ ባዕል እምአርማትያስ ዘስሙ ዮሴፍ፤ ወውእቱሂ ተፀምዶ ለእግዚእ ኢየሱስ። ፶፰. ወሖረ ኀበ ጲላጦስ ወሰአለ በድኖ ለእግዚእ ኢየሱስ፤ ወአዘዘ ጲላጦስ የሀብዎ። ፶፱. ወነሢኦ በድኖ ዮሴፍ ገነዞ በስንዱን ንጹሕ። ፷. ወቀበሮ ውስተ መቃብር ሐዲስ ዘአውቀረ ውስተ ኰኵሕ ወአንኰርኰረ እብነ ዐቢየ ዲበ ኆኅተ መቃብር ወኀለፈ። ፷፩. ወሀለዋ ህየ ማርያም መግደላዊት ወካልእታሂ ማርያም ይነብራ ቅድመ መቃብር። ሰማይ ወምድር የኀልፍ ወቃልየሰ ኢየኀልፍ ይቤ እግዚእ ለአርዳኢሁ።

መዝሙረ ዳዊት Psalm

ይትፌሥሓ አድባረ ጽዮን፤
ወይትኃሠያ አዋልደ ይሁዳ፤
በእንተ ፍትሕከ እግዚኦ።

ወንጌል Gospel

፩. ወእምዝ በሳኒታ አንሶሰወ ውስተ አህጉር ወኣዕጻዳት ወሰበከ ሎሙ ወመሀሮሙ በእንተ መንግሥተ እግዚአብሔር ወዐሠርቱ ወክልኤቱ ምስሌሁ። ፪. ወአንስትኒ እለ አሕየዎን እምአጋንንት እኩያን ወእምደዌሆን ማርያም እንተ ይብልዋ መግደላዊት እንተ ሰብዐቱ አጋንንት ወፅኡ እምኔሃ። ፫. ወዮሐና ብእሲተ ኩዛ መጋቢሁ ለሄሮድስ ወሶስና ወካልኣትሂ ብዙኃት እለ ተልእካሁ በንዋዮን። ፬. ወእንዘ ያጸምእዎ ኵሉ ሕዝብ ወእለሂ መጽኡ ኀቤሁ እምአህጉር ይቤሎሙ ምሳሌ እንተ ከመዝ፦ ፭. ወፈረ ዘይዘርዕ ከመ ይዝራዕ ዘርዖ፤ ወዘሪዖ ቦዘወድቀ ውስተ ፍኖት ወኬድዎ ወበልዕዎ አዕዋፈ ሰማይ። ፮. ወቦዘወድቀ ውስተ ኰኵሕ ወበቊሎ የብሰ እስመ አልቦ ሥርወ። ፯. ወቦዘወድቀ ማእከለ ሦክ ወበቊሎ ጠበቆ ሦክ። ፰. ወቦዘወድቀ ውስተ ምድር ሠናይት ወበቈለሂ ወፈርየሂ ምእተ ምክዕቢተ። ወዘንተ ብሂሎ ይቤሎሙ፦ ዘቦ እዘነ ሰሚዕ ይስማዕ። ይቀልል ኅልፈተ ሰማይ ወምድር፥ እምትደቅ አሐቲ ቃል እምኦሪት ወእምነቢያት፥ ይቤ እግዚእ ለአርዳኢሁ።

መልእክተ ጳውሎስ Pauline Epistle

፲፪. ወለባዕዳንሰ እነግሮሙ ለልየ ወአኮ ዘእምኀበ እግዚእነ ለእመቦ እምአኀዊነ ዘቦ ብእሲት እንተ ኢተአምን ወታፈቅር ምታ ወትፈቅድ ትንበር ምስሌሁ ኢይኅድግ ብእሲቶ። ፲፫. ወእመኒ ብእሲት ባቲ ምት ወኢየአምን ወያፈቅር ብእሲቶ ወይፈቅድ ይንበር ምስሌሃ ኢትኅድግ ምታ። ፲፬. እስመ ይትቄደስ ቢእሲኒ ዘኢየአምን ብእንተ በእሲቱ ወትትቄደስ ብእሲትኒ እንተ ኢተአምን በእንተ ምታ። ወእመ አኮሰ ርኩሳነ ይከውኑ ውሉዶሙ። ወይእዜሰ ቅዱሳን እሙንቱ። ፲፭. ወእመሰ ዘኢየአምን የኀድግ ለይኅዳግ፥ እስመ እኁነ ወእኅትነ ኢይትቀነዮ ለዘከመዝ እስመ ጸውዐነ እግዚአብሔር ለሰላለም። ፲፮. እስመ ኢታአምር ብእሲት ለእመ ታድኅኖ ለምታ? ወኢየአምር ብእሲ ለእመ ያድኅና ለብእሲቱ? ፲፯. ወባሕቱ ኵሉ በከመ ከፈሎ እግዚአብሔር፥ ወኵሉ በከመ ጸውዖ እግዚአብሔር ከማሁ የሀሉ። ወከመዝ ንኤዝዝ ለኵሉ አብያተ ክርስቲያናት። ፲፰. ለእመቦ ዘተጸውዐ እንዘ ግዙር ውእቱ ኢይንሣእ ቍልፈተ። ወእመሰ ቈላፍ ተጸውዐ ኢይትገዘር እንከ። ፲፱. ተገዝሮሂ ኢይበቍዕ ወኢተገዝሮሂ ኢያሰልጥ ዘእንበለ ዳእሙ ዐቂበ ትእዛዘ እግዚአብሔር። ፳. ወኵሉ ዘከመ ተጸውዐ ከማሁ ለየሀሉ።

ዘካልእ መልእክት Universal Epistle

፩. ወከማሁ አንትንሂ አንስት ተኰነና ለአምታቲክን ከመ እመቦ ዘኢየአምን በዝነቱ ነገር እምሥነ ምግባሪሆን ለአንስት ይርአዩ ወዘእንበለ ካሕድ ይርብሕዋ ለነፍሶሙ። ፪. ወእንዘ ትፈርሃ አሠንያ ግዕዘክን በንጽሕ። ፫. አኮ ከመ ታድልዋ ለዐይነ ሰብእ በተጸፍሮ ሥዕርትክን ወአኮ በተሰርግዎ ወርቅ ወብሩር ወአኮ በተለብሶ አልባስ ዘብዙኅ ሤጡ። ፬. አላ በኅቡእ ልቡ ለሰብእ ለዘኢይጠፍእ ወለዘኢይደምፅ ምንፈስ ቅዱስ ዘህልው ቅድመ እግዚአብሔር ዘብዙኅ ሐሳቡ። ፭. ወከማሁ ትካትኒ ቅዱሳት አንስት እለ ይትዌከላ ላዕለ እግዚአብሔር ይሰረገዋ ርእሶን በተኰንኖ ለአምታቲሆን። ፮. ከመ ሣራ ትትኤዘዞ ለአብርሃም ወእግዚእየ ትብሎ ወአንትንሂ አዋልዲሃ ኩና በምግባረ ሠናይ እንዘ ኢትፈርሃ እምነ ድንጋፄ ወኢምንተኒ። ፯. ወከማሁ አንትሙሂ ዕደው እንዘ ትነብሩ ምስለ አንስቲያክሙ ኢታስተሐቅሩ አንስቲያክሙ እስመ ይደክም ፍጥረተ ዚአሆን አክብሩ አንስቲያክሙ እስመ ይወርሳ እማንቱኒ ክብረ ወሕይወተ ምስሌክሙ ከመ ኢትትዐቀፍ ጸሎትክሙ።

ግብረ ሃዋርያት Acts

፲፪. ወእምህየ ፊልጱስ እንተ ይእቲ ቀዳሚት ዘመቄዶንያ ወይእቲ ሀገር ቆሎንያ። ወነበርነ በይእቲ ሀገር ኅዳጠ መዋዕለ። ፲፫. ወወፃእነ በዕለተ ሰንበተ እምአንቀጸ ሀገር መንገለ ድንጋገ ፈለግ እስመ ቤተ ጸሎት ህየ ሀሎ። ወነበርነ ወአኀዝነ ከመ ንንግር ለአንስት እለ ተጋብኡ ህየ። ፲፬. ወሀለወት ማእከሎን አሐቲ ብእሲት ሠያጢተ ፐፒራ እንተ ሀገረ ትያጢሮን ፈራሂተ እግዚአብሔር። ወታፀምእ እስም ከሠታ እግዚአብሔር እዝና። ወስማ ልድያ። ፲፭. ወተጠምቀት ምስለ ኵሉ ሰብኣ ወአስተብቍዐ ተነ ወትቤለነ፦ ለእመሁ ረሰይክሙኒ መሃይምንተ ለእግዚአብሔር ባኡ ቤትየ ወኅድሩ። ወአገበረተነ ብዙኀ። ፲፮. ወእንዘ ነሐውር ለጸሎት ረከበተነ አሐቲ ወለት እንተ ይትዋረዳ ጋኔን ወታገብእ ለአጋእዝቲሃ ብዙኀ ብነታ እምዘ ትነሥእ ሐፍሥ። ፲፯. ወእምዝ ተለወት ድኅሬሁ ለጳውሎስ ወድኅሬነ እንዘ ትኬልሕ ወትብል፦ እሉ ዕደው አግብርተ እግዚአብሔር ልዑል እሙንቱ። ወይሜህሩክሙ ፍኖተ ሕይወት። ፲፰. ወከመዝ ትገብር ብዙኀ መዋዕለ ወአጽሀቀቶ ለጳውሎስ። ወተመይጠ ወይቤሎ ለውእቱ መንፈስ፦ እኤዝዘከ በስሙ ለኢየሱስ ክርስቶስ ከመ ትፃእ። ወኀደጋ በጊዜሃ።

ስንክሳር Synaxarium

ኢየሉጣ
ወማርያም መግደላዊት
ወአባ ዊፃ

መዝሙር Psalm

ወይሰግዳ ሎቱ አዋልደ ጠሮስ በአምኃ፤
ወለገጽኪ ይትመሀለሉ ኵሎሙ አሕዛብ ብዑላነ ምድር፤
ኵሉ ክብራ ለወለተ ንጉሥ ሐሴቦን።

ወንጌል Gospel

፱. ወተንሢኦ በጽባሕ በእሑድ ሰንበት አስተርአያ ቅድመ ለማርያም መግደላዊት እንተ እምኔሃ አውጽአ ሰብዐተ አጋንንተ። ፲. ወይእቲ ሐዊራ ዜነወቶሙ ለእለ ምስሌሁ ሀለዉ ቀዲሙ እንዘ ሀለዉ ይላሕዉ ወይበክዩ። ፲፩. ወእሙንቱሂ ሶበ ሰምዑ ከመ አስተርአያ ወሕያው ውእቱ ኢአምንዋ። ፲፪. ወእምዝ አስተርአዮሙ ለክልኤቱ እምኔሆሙ በካልእ ራእይ እንዘ የሐውሩ ሐቅለ። ፲፫. ወሖሩ እሙንቱሂ ወዜነዉ ለቢጾሙ ወሎሙኒ ኢአምንዎሙ። ፲፬. ወእምድኅረዝ ካዕበ እንዘ ይረፍቁ ዐሠርቱ ወአሐዱ አስተርአዮሙ ወግእዘ ጽንዐ ልቦሙ ወኢአሚኖቶሙ እስመ ለእለ ርእይዎ ከመ ተንሥአ ኢአምንዎሙ። ፲፭. ወይቤሎሙ፦ ሑሩ ውስተ ኵሉ ዓለም ወስብኩ ወንጌለ ለኵሉ ፍጥረት። ፲፮. ዘአምነ ወተጠምቀ ይድኅን ወዘሰ ኢአምነ ይደየን። ፲፯. ወተኣምር ባሕቱ ለእለ አምኑ በዝንቱ ይተልዎሙ፥ በስመ ዚአየ አጋንንተ ያወፅኡ፥ ወበካልእ ልሳን ይትናገሩ ሐዲስ። ፲፰. ወአራዊተ ምድር ይእኅዙ፥ ወዘሂ ይቀትል ለእመ ሰትዩ አልቦ ዘይነክዮሙ፥ ወዲበ ድዉያን እደዊሆሙ ያነብሩ ወይሜጥኑ። ዘቦ እዝን ሰሚዐ ለይስማዕ።

ቅዳሴ Liturgy :

መዝሙረ ዳዊት Psalm

ጐሥዐ ልብየ ቃለ ሠናየ፤
ወአነ አየድዕ ግብርየ ለንጉሥ፤
ከመ ቀለመ ጸሐፊ ዘጠበጠበ ይጽሕፍ ልሳንየ።

ወንጌል Gospel

፳፯. ወሖረ እግዚእ ኢየሱስ ወአርዳኢሁ ውስተ አህጉረ ቂሳርያ ዘፊልጶስ ወተስእሎሙ ለአርዳኢሁ በፍኖት ወይቤሎሙ፦ መነ ይብሉኒ ሰብእ? ፳፰. ወይቤልዎ፦ ዮሐንስሃ መጥምቀ፥ አው ኤልያስሃ፥ አው አሐደ እምነቢያት። ፳፱. ወይቤሎሙ፦ አነትሙኬ መነ ትብሉኒ? ወተሠጥዎ ጴጥሮስ ወይቤሎ፦ አንተ ውእቱ ክርስቶስ። ፴. ወገሠጾሙ ከመ ኢይንግሩ ወኢለመኑሂ። ፴፩. ወአኀዘ ይምሀሮሙ ከመ ሀለዎ ለወልደ እጓለ እመያው ብዙኀ ያሕምምዎ ወያመክርዎ ረበናት ወሊቃነ ካህናት ወጸሐፍት ወይቅትልዎ ወይትነሣእ በሣልስት ዕለት። ፴፪. ወገሃደ ነገሮሙ ዘንተ ነገረ፥ ወአቅሪቦ ጴጥሮስ አኀዘ ይገሥጾ። ፴፫. ወተመይጠ ወነጸረ ኀበ አርዳኢሁ ወገሠጾ ለጴጥሮስ ወይቤሎ፦ ሑር እምድኅሬየ ሰይጣን፥ እስመ ኢትሔሊ ዘእግዚአብሔር ዘእንበለ ዘእጓለ እመሕያው። ዘቦ እዝን ሰሚዐ ለይስማዕ።

መዝሙረ ዳዊት Psalm

መሠረታቲሃ ውስተ አድባር ቅዱሳን፤
ያበድሮን እግዚአብሔር ለአናቅጸ ጽዮን፤
እምኵሉ ተዓይኒሁ ለያዕቆብ።

ወንጌል Gospel

፩. ወንጌል ቅዱስ ዘእግዚእነ ወአምላክነ ወመድኃኒነ ኢየሱስ ክርስቶስ። ብሥራተ ማቴዎስ ሐዋርያ አሐዱ እምዓሠርቱ ወክልኤቱ ሐዋርያት። ጸሎቱ ወበረከቱ የሀሉ ምስለ ኵልነ ሕዝበ ክርስትያን ለዓለም ዓለም አሜን። መጽሐፈ ልደቱ ለእግዚእነ ኢየሱስ ክርስቶስ ወልደ ዳዊት ወልደ አብርሃም። ፪. አብርሃመ ወለዶ ለያስሐቅ፤ ወይስሐቅኒ ወለዶ ለያዕቆብ፤ ወያዕቆብኒ ወለደ ይሁዳሃ ወአኀዊሁ። ፫. ወይሁዳኒ ወለደ ፋሬስሃ ወዛራሃ እምትእማር፤ ወፋሬስኒ ወለደ ኤስሮምሃ፤ ወኤስሮምኒ ወለደ አራምሃ። ፬. ወአራምኒ ወለደ አሚናዳብሃ፤ ወአሚናዳብኒ ወለደ ነአሶንሃ፤ ወነአሶንኒ ወለደ ሰልሞንሃ። ፭. ወሰልሞንኒ ወለደ ቦዔዝሃ እምራኬብ፤ ወቦዔዝኒ ወለደ ኢዮቤድሃ እምነ ሩት፤ ወኢዮቤድኒ ወለደ እሴይሃ። ፮. ወእሴይኒ ወለደ ዳዊትሃ ንጉሠ፤ ወዳዊትኒ ንጉሥ ወለደ ሰሎሞንሃ እምነ ብእሲተ ኦርዮ። ፯. ወሰሎሞንኒ ወለደ ሮብዓምሃ፤ ወሮብዓምኒ ወለደ አብያሃ፤ ወአብያኒ ወለደ አሳፍሃ። ፰. ወአሳፍኒ ወለደ ኢዮሳፍጥሃ፤ ወኢዮሳፍጥኒ ወለደ ኢዮራምሃ፤ ወኢዮራምኒ ወልደ (አካዝያስሃ፤ ወአካዝያስኒ ወልደ አሜስያስሃ፤ ወአሜስያስኒ) ዖዝያንሃ፤ ዘተሰምየ አዛርያስ። ፱. ወዖዝያንኒ ወለደ ኢዮአታምሃ፤ ወኢዮአታምኒ ወለደ አካዝሃ፤ ወአካዝኒ ወለደ ሕዝቅያስሃ። ፲. ወሕዝቅያስኒ ወለደ ምናሴሃ፤ ወምናሴኒ ወለደ አሞጽሃ፤ ወአሞጽኒ ወለደ ኢዮስያስሃ። ፲፩. ወኢዮስያስኒ ወለደ ኢኮንያንሃ ወአኀዊሁ አመ ፍልሰተ ባቢሎን። ፲፪. ወእምድኅረ ፍልስተ ባቢሎን ኢኮንያንኒ ወለደ ሰላትያልሃ፤ ወሰላትያልኒ ወለደ ዘሩባቤልሃ። ፲፫. ወዘሩባቤልኒ ወለደ አብዩድሃ፤ ወአብዩድኒ ወለደ ኤልያቄምሃ፤ ወኤልያቄምኒ ወለደ አዛርሃ። ፲፬. ወአዛርኒ ወለደ ሰዶቅሃ፤ ወሰደቅኒ ወለደ አኪምሃ፤ ወአኪምኒ ወለደ ኤልዩድሃ። ፲፭. ወኤልዩድኒ ወለደ አልዓዛርሃ፤ ወአልዓዛርኒ ወለደ ማትያንሃ፤ ወማትያንኒ ወለደ ያዕቆብሃ። ፲፮. ወያዕቆብኒ ወለደ ዮሴፍሃ ፈኃሪሃ ለማርያም ዘእምኔሃ ተወልደ ኢየሱስ ዘተሰምየ ክርስቶስ። ፲፯. ወኵሎንኬ እንከ ትውለድ እምአብርሃም እስከ ዳዊት ትውልድ ዐሠርቱ ወአርባዕቱ፤ ወእምዳዊት እስከ ፍልሰተ ባቢሎን ትውልድ ዐሠርቱ ወአርባዕቱ፤ ወእምፍልሰተ ባቢሎን እስከ ክርስቶስ ትውልድ ዐሠርቱ ወአርባዕቱ፤ ወኵሎንኬ ትውልድ እምአብርሃም እስከ ክርስቶስ ትውልድ አርብዓ ወክልኤቱ። ሰማይ ወምድር የኀልፍ ወቃልየሰ ኢየኀልፍ ይቤ እግዚእ ለአርዳኢሁ።

መልእክተ ጳውሎስ Pauline Epistle

፩. ወለቀዳሚትኒ ደብተራ ሥርዓተ ምሥዋዕ ባቲ ወመቅደስ። ፪. ወለቀዳሚትኒ ደብተራ እንተ ተሠርዐት ትርሲታ ባቲ ተቅዋመ መራናት ወማእድ ወኅብስት ዘይሠርዑ፥ ወይብልዋ ቅድስተ። ፫. ወውሣጢትሰ ደብተራ እንተ እምድኅረ ካልእ መንጦላዕት ይብልዋ ቅድስተ ቅዱሳን። ፬. ወውስቴታ ማዕጠንት ዘወርቅ ወታቦትኒ እንተ ውስቴታ ኦሪት እነተ ይከድንዋ በወርቅ ውቱረ። ወውስቴታ መሶበ ወርቅ ዘመና፥ ወበትረ አሮን እንተ ሠረጸት፣ ወጽላትኒ ዘኦሪት፥ ፭. ወመልዕልታ ኪሩቤል ዘስብሐት ይጼልሉ ዲበ ምሥሀል፥ ወኢኮነ ይእዜ ጊዜሁ ከመ ንንግር በበገጹ። ፮. ወዘከመዝ ሥርዓቱ ወትርሲቱ ወውስተ ጸናፊትሰ ደብተራ ዘልፈ ይበውኡ ካህናት ይግበሩ ምሥዋዒሆሙ ኵሎ ጊዜ። ፯. ወውስተ ውሣጢትሰ ምዕረ በበዐመት ይበውእ ሊቀ ካህናት ባሕቲቱ ምስለ ደም ዘያበውእ በእንተ ርእሱ ወበእንተ ሕዝቡ በበይነ ኃጢአቶሙ። ፰. ወከመዝ አዘዘ መንፈስ ቅዱስ እስመ ዓዲሃ ኢተዐውቀት ፍኖቶሙ ለቅዱሳን በቀዳሚት ደብተራ። ፱. ወባሕቱ አምሳለ ኮነት ለዝ መዋዕል። ዘቦቱ ያበውኡ ቍርባነ ወመሥዋዕተ ዘኢይክል ፈጽሞ ለዘያቄርብ። ፲. ዘእንበለ በመባልዕት ወበዘይሰትዩ ወጥምቀታት ዘዘዚአሁ እንት ይእቲ ሕግ ዝሥጋ እስከ አመ ይትራታዕ ተሠርዓ።

ዘካልእ መልእክት Universal Epistle

፩. አሰስለዋ እንከ እምኔክሙ ለኵለ እከይ ወለኵሉ ሕብል ወለናፍቆ ወለተሐምዮ ወለተቃንኦ። ፪. ወኩኑ ከመ እለ ይእዜ ተወልዱ ሕፃናት ወአፍቅሩ ሐሊበ ነባቤ ዘአልቦቱ ቱስሕት ከመ ቦቱ ትልሀቁ ለድኂን። ፫. ወናሁ ጥዕምክሙ ከመ ኄር እግዚአብሔር ወኀቤሁ ምግባኢክሙ። ፬. ወይእቲ እብን እንተ በኀበ ሰብእ ምንንት ወበኀበ እግዚአብሔርሰ ኅሪት ወክብርት። ፭. ወአንትሙኒ ጽንዑ ከመ እብን መንፈሳዊ ወኩኑ ታቦተ መንፈሳዌ ለክህነት ቅድስት ወንጽሕት ከመ ታቅርቡ ወታዕርጉ መሥዋዕተ መንፈሳዌ ዘይሰጠወክሙ እግዚአብሔር በእደዊሁ ኢየሱስ ክርስቶእስ። ፮. እስመ ከመዝ ጽሑፍ፦ ናሁ እሠይም ውስተ ጽዮን እብን ማዕዘንት ኅሪት ወክብርት። ወዘአምነ ባቲ ኢይትኀፈር። ፯. ለክሙ ውእቱ ክብር ለእለ ተአምኑ ወለእለሰ ይክሕዱ እብን እንተ መኒንዋ ነደቅት ወይእቲ ኮነት ውስተ ርእሰ ማዕዘንት። ፰. ውእቱኬ እብነ ዕቅፍት ወእብነ ካሕድ ለእለ ይትዓቀፉ በቃሉ ወይክሕድዎ ለዘቦቱ ተፈጥሩ። ፱. ወአንትሙሰ ፍጥረት ኅሩያን ወታቦት ለንጉሥ ወሕዝብ ንጹሕ ወሕዝብ ዘይትሜካሕ ከመ ትንግሩ ሠናይቶ ለዘጸውዐክሙ እምጽልመት ውስተ ብርሃነ ስብሐቲሁ። ፲. እንዘ ቀዲሙ ኢኮንክሙ ሕዝቦ ይእዜሰ ሕዝበ እግዚአብሔር አንትሙ፥ እንዘ ቀዲሙ ኢኮነክሙ ምሑራነ፥ ይእዜሰ መሐረክሙ።

ግብረ ሃዋርያት Acts

፱. ወበሳኒታ እንዘ የሐውሩ በጽሑ ኢዮጴ ኀበ አንቀጸ ሀገር። ወጴጥሮስኒ ዐርገ ናሕሰ ይጸሊ ጊዜ ቀትር። ፲. ወሶበ ርኅበ ፈቀደ ይምሳሕሰ። ወእንዘ ያስተዳልዉ እሙንቱ መጽኦ ድንጋፄ ላዕሌሁ። ፲፩. ወርእየ ሰማየ ርኅወ ወይወርድ ከመ ዘሞጣሕት ዓቢይ ዲበ ምድር እኁዝ በአርባዕቱ ጽነፊሁ። ፲፪. ወቦ ውስቴቱ ኵሉ እንስሳ ወአራዊተ ገዳም ወአዕዋፈ ሰማይ። ፲፫. ወነበቦ ቃል ወይቤሎ፦ ተንሥእ ጴጥሮስ ኅርድ ወብላዕ። ፲፬. ወይቤሎ ጴጥሮስ፦ ሓሰ፤ ሊተ እግዚኦ ግሙራ ኢቦአ ርኩስ ውስተ አፉየ ወኢበላዕኩ ዘኢኮነ ንጹሐ። ፲፭. ወነበቦ ዳግመ ወይቤሎ፦ ዘእግዚአብሔር አንጽሖ አንተ ኢታስተራኵስ። ፲፮. ወከመዝ ይቤሎ ሥልሰ ወኵሉ ተመይጠ ውስተ ሰማይ።

ስንክሳር Synaxarium

ፅንሰታ ለእግዝእትነ
ወተስእሎተ ቂሣርያ
ወጢሞቴዎስ ሊቀ ጳጳሳት
ወልደቱ ለዮሴፍ ወልደ ራሄል
ወናዖድ ንጉሠ ኢትዮጵያ

መዝሙር Psalm

ብፁዕ ብእሲ ዘአንተ ገሠጽኮ እግዚኦ፤
ወዘመሀርኮ ሕገከ፤
ከመ ይትገሐስ እምዋዕል እኩያት።

ወንጌል Gospel

፲፫. ወበጺሖ እግዚእ ኢየሱስ ብሔረ ቂሳርያ ዘፊልጶስ፥ ተስእሎሙ ለአርዳኢሁ እንዘ ይብል፦ መነሂ ይብልዎ ይኩን ሰከእ ለወልደ እጓለ እመሕያው? ፲፬. ወይቤሉ፦ ቦእለ ዮሐንስሃ መጥምቀ፥ ወካልኣን ኤልያስሃ፥ ወመነፈቆሙ ኤርምያስሃ፥ ወእመአኮ አሐደ እምነቢያት። ፲፭. ወይቤሎሙ፦ አንትሙኬ፥ መነ ትብሉኒ ከዊነ? ፲፮. ወአውሥአ ስምዖን ጴጥሮስ ወይቤ፦ አንተ ውእቱ መሲሕ ወልዱ ለእግዚአበሔር ሕያው። ፲፯. ወአውሥአ እግዚእ ኢየሱስ ወይቤሎ፦ ብፁዕ አንተ ስምዖን ወልደ ዮና፤ እስመ ሥጋ ወደም ኢከሠተ ለከ አላ አቡየ ዘበሰማያት። ፲፰. ወአንሰ እብለከ ከመ እንተ ኰኵሕ ወዲበ ዛቲ ኰኵሕ አሐንጻ ለቤተ ክርስቲያንየ። ወአናቅጸ ሲኦል ኢይኄይልዋ። ፲፱. ወእሁበከ መራኁተ መንግሥተ ሰማያት። ወዘአሰርከ በምድር ይከውን እሱረ በሰማያት፤ ወዘፈታሕከ በምድር ይከውን ፍቱሐ በሰማያት። ፳. ወእምዝ ገሠጾሙ ለአርዳኢሁ ከመ አልቦ ለዘ ይንግሩ ከመ ውእቱ ክርስቶስ። ሰማይ ወምድር የኀልፍ ወቃልየሰ ኢየኀልፍ ይቤ እግዚእ ለአርዳኢሁ።

ቅዳሴ Liturgy :

መዝሙረ ዳዊት Psalm

ሕጽበኒ ወአንጽሐኒ እምኃጢአትየ፤
ወእምአበሳየኒ አንጽሐኒ፤
እስመ ለልየ አአምር ጌጋይየ።

ወንጌል Gospel

፵. ወአውሥአ እግዚእ ኢየሱስ ወይቤሎ፦ ስምዖን፥ ብየ ዘእብለከ፥ ወይቤሎ፦ ሊቅ በል። ፵፩. ክልኤቱ ይፈድይዎ ለአሐዱ ባዕለ ዕዳ አሐዱ ይፈድዮ ኀመስተ ምእተ ዲናረ ወካልኡኒ ኀምሳ። ፵፪. ወኀጢኦሙ ዘይፈድይዎ ኀደገ ሎሙ ለክልኤሆሙ መኑ እንከ ርቱዕ ፈድፋደ ያፈቅሮ እምኔሆሙ? ፵፫. ወተሠጥወ ስምዖን ወይቤሎ፦ እብልሰ ዘብዙኀ ኀደገ ሎቱ። ወይቤሎ፦ ሠናየ ፈታሕከ። ፵፬. ወተመይጠ ኀበ ይእቲ ብእሲት ወይቤሎ ለስምዖን፦ ትሬእያኑ ለዛቲ ብእሲት? ቦእኩ ቤተከ ወኢወሀብከኒ ማየ ለእገርየ፥ ወይእቲሰ በአንብዓ አርሐሰት እገርየ ወበሥዕርታ መዝመዘት። ፵፭. ወአንተሰ ኢተአማኅከኒ፥ ወይእቲሰ እምዘ ቦእኩ ኢያንተገት እገርየ ስዒመ። ፵፮. ወአንተሰ ቅብአ ርእስየ ኢቀባእከኒ፥ ወይእቲሰ ዕፍረተ ቀብአተኒ እገርየ። ፵፯. በእንተ ዝንቱ እብለከ፥ ተኀድገ ላቲ ኀጢአታ ብዙኅ እስመ ብዙኀ አፍቀረት ወዘሰ ውኁደ አፍቀረ ውኁደ ይትኀደግ ሎቱ። ፵፰. ወይቤላ፦ ተኀድገ ለኪ ኀጢአትኪ። ፵፱. ወአኀዙ ይበሉ እለ ይረፍቁ በበይናቲሆሙ፦ መኑ ውእቱ ዝንቱ ዘየኀድግ ኀጢአተ? ፶. ወይቤላ ለይእቲ ብእሲት፦ ሃይማኖትኪ አድኀነተኪ፥ እተዊ በሰላም። ይቀልል ኅልፈተ ሰማይ ወምድር፥ እምትደቅ አሐቲ ቃል እምኦሪት ወእምነቢያት፥ ይቤ እግዚእ ለአርዳኢሁ።

መዝሙረ ዳዊት Psalm

ወተጓሕለውዎሙ ምክረ ለሕዝብከ፤
ወተማከሩ ዲበ ቅዱሳኒከ፤
ወይቤሉ ንዑ ንስርዎሙ እምአሕዛብ።

ወንጌል Gospel

፳፱. አሌ ለክሙ ጸሐፍት ወፈሪሳውያን መድልዋን፥ እለ ትነድቁ መቃብሪሆሙ ለነቢያት ወታስተሣንዩ ዝኅሮሙ ለጻድቃን። ፴. ወትብሉ፦ ሶበሰ ሀለውነ በመዋዕለ አበዊነ እመ ኢኀበርነ ምስሌሆሙ ንቅትል ነቢያተ። ፴፩. ናሁኬ ለሊክሙ ተአምኑ ከመ ደቂቆሙ አንትሙ ለቀተልተ ነቢያት። ፴፪. አንትሙሂ ፈጽሙ መስፈርተ አበዊክሙ። ፴፫. አፍዖት ትውልደ አራዊተ ምድር፥ እፎ ትክሉ አምስጦ እምኵነኔ ገሃነም? ፴፬. በእንትዝ ናሁ አነ እፌኑ ኀቤክሙ ነቢያተ ወጠበብተ ወጸሐፍተ ወትቀትሉ በውስቴቶሙ ወትሰቅሉ። ወትቀሥፉ እምውስቴቶሙ በመኳርብቲክሙ ወትሰዱ እምሀገር ውስተ ሀገር። ፴፭. ከመ ይብጻሕ ላዕሌክሙ ደመ ኵሉ ጻድቃን ዘተክዕወ ዲበ ምድር እምደመ አቤል ጻድቅ እስከ ደመ ዘካርያስ ወልደ በራክዩ ዘቀተልክሙ በማእከለ ቤተ መቅደስ። ፴፮. አማን እብለክሙ፥ ይበጽሓ ለዛቲ ትውልድ ዝኵሉ። ፴፯. ኢየሩሳሌም፥ ኢየሩሳሌም፥ እንተ ትቀትሎሙ ለነቢያት ወእንተ ትዌግሮሙ ለሐዋርያት፥ ለእለ ተፈነዉ ኀቤሃ ሚመጠነ ፈቀድኩ አስተጋብኦሙ ለውሉድኪ ከመ እንተ ታስተጋብእ ዶርሆ አፍርኅቲሃ ታሕተ ክነፊሃ ወአበይክሙ። ፴፰. ናሁ ይትኀደግ ለክሙ ቤትክሙ በድወ። ፴፱. አማን እብለክሙ፥ ኢትሬእዩኒ እምይእዜ እስከ ሶበ ትብሉ፦ ቡሩክ ዘይመጽእ በስመ እግዚአብሔር። ሰማይ ወምድር የኀልፍ ወቃልየሰ ኢየኀልፍ ይቤ እግዚእ ለአርዳኢሁ።

መልእክተ ጳውሎስ Pauline Epistle

፳፬. ወንሕነ እሙንቱ እለ ጸውዐነ ውስተ ክብሩ ወአስተጋብአነ አኮ እምአይሁድ ባሕቲቶሙ ዓዲ እምአረሚኒ? ፳፭. በከመ ይቤ ሆሴዕ ነቢይ፦ እሬስዮ ሕዝብየ ለዘኢኮነ ሕዝብየ፥ ወእሬስያ ፍቅርትየ ለእንተ ኢኮነት ፍቅርትየ። ፳፮. ወይከውኑ ውሉደ እግዚአብሔር ሕያው በብሔር ኀበ ይቤልዎሙ፦ ኢኮንክሙ ሕዝበ እግዚአብሔር። ፳፯. ኢሳይያስኒ ከልሐ ወይቤ በእንተ እስራኤል፦ ለእመ ኮነ ኈልቆሙ ለደቂቀ እስራኤል ከመ ኆጻ ባሕር እለ ተርፉ ይድኅኑ። ፳፰. እስመ ኅሉቀ ወምቱረ ነገረ ይነግር እግዚአብሔር ውስተ ዓለም ዘሀለዎ ይግበር። ፳፱. ወበከመ አቅደመ ኢሳይያስ ብሂለ ሶበ፦ አኮ እግዚአብሔር ፀባኦት ዘአትረፈ ለነ ዘርዐ ከመ ሰዶም እምኮነ ወከመ ገሞራ እመሰልነ። ፴. ምንተ እንከ ንብል? አረሚ ጥቀ እለ ኢኀሠሥዎ ለጽድቅ ረከብዎ ለጽድቅ ወጸድቁ በአሚን። ፴፩. ወእስራአልሰ እንዘ ይዴግንዋ ለኦሪቶሙ ስእኑ ጸዲቀ እስመ ኢፈጸሙ ገቢረ ሕገገ ኦሪቶሙ። ፴፪. በእንተ ምንት? እስመ ኢኮነ ጽድቆሙ በአሚን ዘእንበለ ዳእሙ በገቢረ ሕገገ ኦሪት። ወአዕቀፈቶሙ እብነ ዕቅፍት። ፴፫. እስመ ከማሁ ይቤ መጽሐፍ፦ ናሁ እነብር ውስተ ጽዮን እብነ ዕቅፍት ወእብነ ጌጋይ ወዘአምነ ቦቱ ኢይትኀፈር።

ዘካልእ መልእክት Universal Epistle

፲፪. አኀዊነ ኢታንክርዋ ለእንተ ትመጽአክሙ መከራ ከመ ዘነኪር ግብር ዘይከውን ብክሙ። ፲፫. ዳእሙ ከመ ትሳተፍዎ በሕማሙ ለክርስቶስ ወተፈሥሑ ከመ አመ ያስተርኢ በስብሐቲሁ ትትሐሠዩ ፍሡሓኒክሙ። ፲፬. ወእመሰቦ ዘተዐየሩክሙ በእንተ ስሙ ለክርስቶስ ብፁዓን አንትሙ እስመ ስብሐቲሁ ወኀይሉ ለእግዚአብሔር ወመንፈሱ ያዕርፍ ላዕሌክሙ። ፲፭. አልቦ ዘየሐምም እምውስቴትክሙ አው ከመ ቀታሊ አው ከመ ሰራቂ አው ከመ ዘእኩይ ምግባሩ አው ከመ ዘባዕደ ያፈቅር ወይፈቱ። ፲፮. ወእመሰ ከመ ክርስቲይናዊ ኢትኅፈሩ አላ ሰብሕዎ ለእግዚአብሔር በዝንቱ ስም። ፲፯. እስመ በጽሐ ጊዜሁ ለፍዳ ዘያቀድም እምነ ቤቱ ለእግዚአብሔር። ወእመሰ ኮነ እምኀቤነ አቅድሞቱ ምንተ እንከ ይከውን ደኃሪቶሙ ለእለ ይክሕድዎ ለወንጌሉ ለእግዚአብሔር? ፲፰. ወሶበ ጻድቅ እምዕፁብ ይድኅን፥ ኃጥእ ወዐማፂ በአይቴ ያስትርኢ ሀለዎ? ፲፱. ወእለኒ የሐምሙ በእንተ ፈቃዱ ለእግዚአብሔር ያማኅፅኑ ነፍሶሙ ኀበ ምእመን ፈጣሪ በገቢረ ሠናይ። ኦ አኃውየ ብቍዑኒ።

ግብረ ሃዋርያት Acts

፳፪. ወይእዜኒ ሀለዎሙ ይስምዑ ከመ መጻእከ ዝየ። ፳፫. ወከመዝ ግበር ዘከመ ንብለከ። ሀለዉ ኀቤነ አርባዕቱ ዕደው እለ ቦሙ ብፅአተ። ፳፬. ንሥኦሙ ወአንጽሕ ርእሰከ ምስሌሆሙ ወአስተዋፅእ በእንቲአሆሙ ከመ ይትላጸዩ ርእሶሙ ወያእምሩ ኵሎሙ ከመ ሐሰት ውእቱ ዘየሐምዩከ። ወከመ ተዐቅብ አንተሂ ሕገ ኦሪት። ፳፭. ወበእንተሰ አሕዛብ እለ የአምኑ ንሕነ አዘዝነ ከመ ይዕቀቡ ዘይትሔረሙ እምዘ ይዘብሑ ለአማልክት ወእምዝሙት ወእማውታ ወደም። ፳፮. ወነሥኦሙ ጳውሎስ ለእሙንቱ ዕደው ወተቀደሰ ምስሌሆሙ ወቦአ ምኵራበ ወነገሮሙ መዋዕለ ዕድሜ ንጽሖሙ እስከ ያበውኡ መሥዋዕተ ለለአሐዱ እምኔሆሙ። ፳፯. ወአመ ሰቡዕ መዋዕል ርእይዎ አይሁድ እለ መጽኡ እምእስያ ለጳውሎስ በምኵራብ ወአስተጋብኡ ላዕሌሁ ኵሎ ሕዝበ ወአኀዝዎ።

ስንክሳር Synaxarium

አልአዛር ወሰሎሜ ብእሲቱ ወውሉዱ ፯ቱ
ወአሞን

መዝሙር Psalm

ወድቀት እሳት ወኢርኢክዋ ለፀሐይ፤
ዘእንበለ ይትዐወቅ ሦክክሙ ሕለተ ኮነ፤
ከመ ሕያዋን በመዐቱ ይውኅጠክሙ።

ወንጌል Gospel

፲፪. ኵሎኬ ዘትፈቅዱ ይግበሩ ለክሙ ሰብእ፥ ከማሁ ግበሩ ሎሙ አንትሙኒ፤ እስመ ከማሁ ኦሪትኒ ወነቢያትኒ። ፲፫. ባኡ እንተ ጸባብ አንቀጽ፤ እስመ ረኃብ አንቀጽ ወስፍሕት ፍኖት እንተ ትወስድ ውስተ ኃጕል፤ ወብዙኃን እሙንቱ እለ ይበውኡ ውስቴታ። ፲፬. ጥቀ ጸባብ አንቀጽ ወጽዕቅት ፍኖት እንተ ትወስድ ውስተ ሕይወት፤ ወውኁዳን እሙንቱ እለ ይበውእዋ። ፲፭. ተዐቀቡኬ እምሐሳውያን ነቢያት እለ ይመጽኡ ኀቤክሙ በአልባሰ አባግዕ፥ ወእንተ ውስጦሙሰ ተኵላት መሠጥ እሙንቱ። ፲፮. ወእምፍሬሆሙ ታአምርዎሙ፤ ይቀሥሙሁ እምአሥዋክ አስካለ፥ ወእምአሜከላ በለሰ? ፲፯. ከማሁኬ ኵሉ ዕፅ ሠናይ ፍሬ ሠናየ ይፈሪ፥ ወእኩይሰ ዕፅ ፍሬ እኩየ ይፈሪ። ፲፰. ኢይክል ዕፅ ሠናይ ፍሬ እኩየ ፈርየ፥ ወኢ ዕፅ እኩይ ፍሬ ሠናየ ፈርየ። ፲፱. ኵሎ ዕፅ ዘኢይፈሪ ፍሬ ሠናየ ይገዝምዎ ወውስተ እሳት ይወድይዎ። ፳. ወእምፍሬሆሙ እንከ ታአምርዎሙ። ሰማይ ወምድር የኀልፍ ወቃልየሰ ኢየኀልፍ ይቤ እግዚእ ለአርዳኢሁ።

ቅዳሴ Liturgy :

መዝሙረ ዳዊት Psalm

ዘረወ ወወሀበ ለነዳይ፤
ወጽድቁኒ ይነብር ለዓለም፤
ወይትሌዓል ቀርኑ በክብር።

ወንጌል Gospel

፩. ወባሕቱ ዑቁ ምጽዋተክሙ ኢትግበሩ ለዐይነ ሰብእ ከመ ታስተርእዩ ሎሙ፥ ወእመ አኮሰ ዐስበ አልብክሙ በኀበ አቡክሙ ዘበሰማያት። ፪. ወሶበሂ ትገብሩ ምጽዋተክሙ ኢትንፋሑ ቀርነ ቅድሜክሙ በከመ ይገብሩ መደልዋን በመኳርብት ወበአስኳት ወበፍናው ከመ ይትአኰቱ እምኀበ ሰብእ፤ አማን እብለክሙ ኅጕሉ ዕሤቶሙ። ፫. ወአንተሰ ሶበ ትገብር ምጽዋተከ ኢታእምር ጸጋምከ ዘትገብር የማንከ። ፬. ከመ በኅቡእ ይኩን ምጽዋትከ ወአቡከ ዘይሬእየከ በኅቡእ የዓሥየከ ክሡተ። ፭. ወሶበሂ ትጼልዩ ኢትኩኑ ከመ መድልዋን እስመ እሙንቱ ያፈቅሩ በመኳርብት ወውስተ መዓዝነ መራኅብት ቀዊመ ወጸልዮ ከመ ያስተርእዩ ለሰብእ፤ አማን እብለክሙ ኅጕሉ ዕሤቶሙ። ፮. ወአንተሰ ሶበ ትጼሊ ባእ ቤተከ ወዕፁ ኆኅተከ ወጸሊ ለአቡከ ሰማያዊ በኅቡእ፤ ወአቡከ ዘይሬእየከ በኅቡእ የዐሥየከ ክሡተ። ሰማይ ወምድር የኀልፍ ወቃልየሰ ኢየኀልፍ ይቤ እግዚእ ለአርዳኢሁ።

መዝሙረ ዳዊት Psalm

ወኢተፈሥሑ ጸላእትየ ላዕሌየ፤
ወሊተሰ በእንተ የዋሃትየ ተወከፍከኒ፤
ወአፅናዕከኒ ቅድሜከ ለዓለም።
 

ወንጌል Gospel

፩. ወዐሪጎ ውስተ ሐመር ዐደወ ወበጽሐ ሀገሮ። ፪. ወአምጽኡ ኀቤሁ ድውየ መፃጕዐ እንዘ ይጸውርዎ በዐራት፤ ወርእዮ እግዚእ ኢየሱስ ሃይማኖቶሙ ይቤሎ ለውእቱ መፃጕዕ፦ ተአመን ወልድየ፥ ተኀደገ ለከ ኀጢአትከ። ፫. ወናሁ እለ እምውስተ ጸሐፍት ይቤሉ በበይናቲሆሙ፦ ይፀርፍ ዝንቱሰ። ፬. ወአእመሮሙ እግዚእ ኢየሱስ ሕሊናሆሙ ወይቤሎሙ፦ ለምንት ትሔልዩ እኩየ በአልባቢክሙ? ፭. ምንት ይቀልል እምብሂለ፦ ይትኀደጉ ለከ ኀጣውኢከ፤ ወእምብሂለ፦ ተንሥእ ወሑር? ፮. ወከመ ታእምሩ ከመ ብዉሕ ሎቱ ለወልደ እጓለ እመሕያው በዲበ ምድር ያኅድግ ኀጢአተ፤ ወእምዝ ይቤሎ ለውእቱ መፃጕዕ፦ ተንሥእ፥ ወንሣእ ዐራተከ ወሑር ቤተከ። ፯. ወተንሢኦ ሖረ ቤቶ። ፰. ወርእዮሙ አሕዛብ አንከሩ ወኣእኰትዎ ለእግዚአብሔር ዘወሀበ ዘከመዝ ሥልጣነ ለሰብእ። ሰማይ ወምድር የኀልፍ ወቃልየሰ ኢየኀልፍ ይቤ እግዚእ ለአርዳኢሁ።

መልእክተ ጳውሎስ Pauline Epistle

፲፪. ወእፈቅድ አኃዊነ ታእምሩ ዜናየ ከመ ፈድፋደ ተለዐለ ውስተ ትምህርተ ወንጌል። ፲፫. ወተዐውቀ መዋቅሕትየ በክርስቶስ በኀበ ኵሉ ምኵናን ወበኀበ ኵሉ ሰብእ። ፲፬. ወከመ ብዙኃን እምአኀዊነ ምእመናን በእግዚእነ ወተዐገሡ በመዋቅሕትየ ወፈድፋደ ተኀበሉ ይንግሩ አጥቢዖሙ ቃለ እግዚአብሔር ዘእንበለ ፍርሀት። ፲፭. ወቦ እለ በቅንአቶሙ፥ ወቦ እለ በተቃኅዎቶሙ፥ ወቦእለ ፈቀዱ ይስብኩ በፍቅር ሠናይ፥ ፲፮. ወይምሀሩ በእንተ ክርስቶስ፥ እስመ ያአምሩ ከመ ለምህሮ ወንጌል ተሠየምኩ ዓዲ። ፲፯. ወእለሰ በትዝህርቶሙ ይነግሩ በእንተ ክርስቶስ ወአኮ በንጽሕ፥ ዳእሙ ይትሐዘቡ ከመ ገቢሮሙ ኪያሁ ይወስኩ ሊተ ሕማመ በመዋቅሕትየ። ፲፰. ወባሕቱ በኵሉ ምክንያት ይነግሩ በእንተ ክርስቶስ እመኒ በአድልዎ ወእመኒ በአማን ወተፈሣሕኩ በዝንቱ ወእትፌሣሕኒ። ፲፱. ወአነ አአምር ከመ ዛቲ ግብር ታበጽሐኒ ኀበ ሕይወት በጸሎትክሙ ወበሀብተ መንፈሱ ለኢየሱስ ክርስቶስ። ፳. በከመ ተሰፈውኩ ወተወከልኩ ከመ ኢይትኀፈር ወኢበምንትኒ ዳእሙ ገሃደ በፍሥሐ መንፈስ ከመ ዘልፈ፥ ወይእዜኒ ዕበዩ ለክርስቶስ በሥጋየ እመኒ በሕይወትየ ወእመኒ በሞትየ። ፳፩. አንሰ እመኒ ሐየውኩ ለክርስቶስ፥ ወእመኒ ሞትኩ ርቡሕ ሊተ። ፳፪. ወለእመኒ ሐየውኩ በሥጋየ ከመ እፍረይ በምግባርየ፥ ወኀጣእኩ ዘአኀሪ ለነፍስየ እምእሉ ክልኤቱ ዘያጽህቀኒ ፈቂዶቶሙ። ፳፫. እፈቱሰ እፍልስ ወአሀሉ ኀበ ክርስቶስ፥ ወፈድፋደ ይኄይስ ወይደሉ ሊተ ዝንቱ።

ዘካልእ መልእክት Universal Epistle

፲. እምአሐዱ አፍ ይጻእ ቡራኬ ወመርገም፥ ኢይረትዕ ከመዝ አኀዊነ ይኩን። ፲፩. ይትከሀልኑ ይጻእ እምአሐዱ ዐይን ወእምውስተ አሐቲ ዐዘቅት ይነቅዕኑ ማይ መሪር ወማይ ጥዑም? ፲፪. ይክልኑ አኀዊነ በለስ ዘይተ ፈርየ ወእመ አኮ ወይን በለሰ ፈርየ? ከማሁኬ ማይኒ መሪር ኢይከውን ጥዑመ ወማይኒ ጥዑም ኢይከውን መሪረ። ፲፫. ወመኑ ጠቢብ እምኔክሙ ወምኩር? ከመ ያርኢ ምግባሮ በየውሀት ወበጥበብ እምሥነ ግዕዙ። ፲፬. ወእመሰ ተቃንኦ መሪር ወካሕድ ብክሙ ውስተ ልብክሙ ኢትትመክሑ ወኢተሐስውዋ ለጽድቅ። ፲፭. ኢኮነት ዛቲ ጥበብ እንተ እመላዕሉ ትወርድ አላ እንተ እምድር እንተ እምነፍሰ አጋንንት። ፲፮. እስመ ኀበ ሀለወ ተቃንኦ ህየ ሀለወ ሀውክ ወካሕድ ወኵለ እከየ ምግባር። ፲፯. ወእንተሰ እምላዕሉ ጥበብ ቀዳሚሃ ንጽሕት ይእቲ እንተ ታስተሰናኡ ወእንተ በዐቅም ኦሆ በሃሊት ወምልእት ምሕረተ። ፲፰. ወፍሬሃ ሠናይ ዘእንበለ ኑፋቄ አማኒት፥ ወፍሬሃኒ ዘጽድቅ በሰላም ይዘራዕ ለእለ ይገብርዋ ለሰላም።

ግብረ ሃዋርያት Acts

፳. ዳእሙ አዝዝዎሙ ይርሐቁ እምዘ ይዘብሑ ለአማልክት ወእማውታ ወደም ወእምዝሙት ወዘይጸልኡ ለርእሶሙ ኢይግበሩ ዲበ ቢጾሙ። ፳፩. ወሙሴሂ ቦእምቅዲሙ ዘይሰብክ ሎቱ በበአህጉር ወያነብብዎ በመኳርብት በኵሉ ሰንበት። ፳፪. ወእምዘ ኀብሩ ሐዋርያት ወቀሲሳን ወኵሉ ሕዝብ ከመ ይኅርዩ እምውስቴቶሙ ዕደወ ዘይፌንዉ አንጾኪያ ምስለ ጳውሎስ ወበርናባስ። ወኀረዩ ይሁዳሃ ዘተሰምየ በርሰባስ ወሲላስሃ ዕደወ ሊቃውንተ በውስተ ቢጾሙ። ፳፫. ወጸሐፉ በእደዊሆሙ መልእክተ እንተ ትብል ከመዝ፦ እምልኡካን ወቀሲሳን ወአኀው ለእለ በአንጾኪያ ወሶርያ ወቂልቅያ አኀዊነ እለ አምኑ እምውስተ አሕዛብ ሰላም ለክሙ ወትፍሥሕት። ፳፬. እስመ ሰማዕነ ከመቦ እለ ወፅኡ እምኔነ ወሆክዋ ለነፍስክሙ በነገር እንዘ ይብሉክሙ፦ ተገዘሩ ወዕቀቡ ሕገ ኦሪት። ዕደው እለ ኢአዘዝናሆሙ ወኢበአሐቲኒ እምዝንቱ ነገር ዘይቤሉክሙ።

ስንክሳር Synaxarium

አባ ኦሪ ሰማዕት
ወጲላጦስ ሊቀ ጳጳሳት

መዝሙር Psalm

ንዑ ወትርአዩ ገብሮ ለእግዚአብሔር፤
ዘገብረ መንክረ በዲበ ምድር፤
ይስዕር ፀብአ እስከ አጽናፈ ምድር።

ወንጌል Gospel

፲፭. ወእምዝ ዐሪጎሙ መላእክት እምኀቤሆሙ ውስተ ሰማይ ወይቤሉ እሙንቱ ሰብእ ኖሎት በበይናቲሆሙ፦ ንሑር ናንሶሱ እስከ ቤተ ልሔም ወናእምር ዘንተ ነገረ ዘአርአየነ እግዚአብሔር። ፲፮. ወሖረ ፍጡነ ወረከብዎሙ ለማርያም ወለዮሴፍ ወለሕፃንኒ ይሰክብ ውስተ ጎል። ፲፯. ወርእዮሙ አእመሩ በእንተ ሕፃን ዘነገርዎሙ። ፲፰. ወኵሎሙ እለ ሰምዑ አንከሩ ዘነገርዎሙ ኖሎት። ፲፱. ወማርያምሰ ተዐቅብ ዘንተ ኵሎ ነገረ ወትወድዮ ውስተ ልባ። ፳. ወተመይጡ ኖሎት እንዘ ይሴብሕዎ ወያአኵትዎ ለእግዚአብሔር በእንተ ኵሉ ዘርእዩ ወሰምዑ ዘከመ ይቤልዎሙ። ይቀልል ኅልፈተ ሰማይ ወምድር፥ እምትደቅ አሐቲ ቃል እምኦሪት ወእምነቢያት፥ ይቤ እግዚእ ለአርዳኢሁ።

ቅዳሴ Liturgy :

መዝሙረ ዳዊት Psalm

ይረትዕሰ ይርታዕ ፍኖትየ፤
ከመ እዕቀብ ኵነኔከ፤
ውእተ ጊዜ ኢይትኀፈር።
 

ወንጌል Gospel

፶፯. ወእመዝ እንዘ የሐውሩ በፍኖት ይቤሎ አሐዱ፦ ሊቅ፥ እትሉከኑ ኀበ ሖርከ። ፶፰. ወይቤሎ እግዚእ ኢየሱስ፦ ለቈናጽልኒ ግበበ ቦሙ፥ ወለአዕዋፈ ሰማይኒ ምጽላል ቦሙ፥ ወወልደ እጓለ እመሕያውሰ አልቦቱ ኀበ ያስምክ ርእሶ። ፶፱. ወይቤሎ እግዚእ ኢየሱስ ለካልኡኒ፦ ትልወኒ፤ ወካልኡኒ ይቤሎ፦ እግዚኦ፥ አብሐኒ እሑር እቅድም እቅብሮ ለአቡየ። ፷. ወይቤሎ እግዚእ ኢየሱስ፦ ኅድጎሙ ለምዉታን ይቅብሩ ምዉታኒሆሙ፥ ወአንተሰ ሑር ወሰብክ መንግሥተ እግዚአብሔር። ፷፩. ወይቤሎ ሣልሱኒ፦ እትሉከኑ እግዚኦ፥ ወባሕቱ አብሐኒ እሑር እሥራዕ ኵሎ ሰብአ ቤትየ። ፷፪. ወይቤሎ እግዚእ ኢየሱስ፦ አልቦ ዘይእኅዝ ዕርፈ ወየሐርስ ድኅሪተ ርትዕት ይእቲ መንግሥተ እግዚአብሔር። ይቀልል ኅልፈተ ሰማይ ወምድር፥ እምትደቅ አሐቲ ቃል እምኦሪት ወእምነቢያት፥ ይቤ እግዚእ ለአርዳኢሁ።