መዝሙረ ዳዊት Psalm

እመሰ ሰማዕከኒ ኢይከውነከ አምላከ ግብት፤
ወኢትስግድ ለአምላክ ነኪር፤
እስመ አነ ውእቱ እግዚአብሔር አምላክከ።

ወንጌል Gospel

፳፱. ወእፎ ይክል መኑሂ በዊአ ቤተ ኃያል ወንዋዮ ሀይደ ዘእንበለ እመ ኢቀደመ አሢሮቶ ለኃያል? ወእምዝ ቤቶ ይበረብር። ፴. ዘኢኮነ ምስሌየ ዕድውየ ውእቱ። ወዘኢያስተጋብእ መስሌየ ይዘርወኒ። ፴፩. በእንተዝ እብለክሙ ኵሎ ኀጢአት ወፅርፈት ይትኀደግ ለሰብእ ወዘሰ ለመንፈስ ቅዱስ ፀረፈ ኢይትኀደግ ሎቱ። ፴፪. ወዘይቤ ቃለ ላዕለ ወልደ እጓለ እመሕያው ይትኀደግ ሎቱ፤ ወዘሰ ይቤ ላዕለ መንፈስ ቅዱስ ኢይትኀደግ ሎቱ ኢበዝ ዓለመ ወኢበዘይመጽእ። ፴፫. እመ አኮ ግበሩ ዕፀ ሠናየ ወፍሬሁኒ ሠናየ ወእመ አኮ ግበሩ ዕፀ እኩየ ወፍሬሁኒ እኩየ እስመ እምፍሬሁ ዕፅ ይትዐወቅ። ፴፬. ኦ ትውልደ አራዊት ምድር በአይቴ ትክሉ ሠናየ ተናግሮ እንዘ እኩያን አንትሙ? እሰመ እምተረፈ ልብ ይነብብ አፍ። ፴፭. ኄር ብእሲ እምሠናይ መዝገበ ልቡ ያወፅእ ሠናየ። ወመዐምፅ ብእሲ እመዝገበ ዐመፃ ያወፅእ ዐመፃ። ሰማይ ወምድር የኀልፍ ወቃልየሰ ኢየኀልፍ ይቤ እግዚእ ለአርዳኢሁ።

መልእክተ ጳውሎስ Pauline Epistle

፲፯. ለአብዕልተ ዝንቱኒ ዓለም አዝዞሙ ከመ ኢይትዐበዩ ወኢይትአመንዎ ለብዕሎሙ ኀላፊ ዘእንበለ በእግዚአብሔር ሕያው ዘውእቱ ይሁበነ በብዝኀ ብዕሉ ኵሎ ከመ ንትፈሣሕ። ፲፰. ከመ ይግበሩ ግብረ ሠናየ ወይብዐሉ በገቢረ ጽድቅ ወይኩኑ ጸጋውያነ ወሱቱፋነ። ፲፱. ወይሣርሩ ለርእሶሙ መሠረተ ሠናየ ለዘይመጽእ ዓለም ከመ ይርከቡ ሕይወተ ዘበአማን። ፳. ኦ ጢሞቴዎስ፥ ዕቀብ ማኅፀንተከ፣ ተገሐሦሙ ለርኩሳን እለ ያመጽኡ ነገረ ከንቶ ወያሴስልዋ ለጽድቅ በሐሰት። ፳፩. እስመ እሉ ስሕቱ እምተስፋ ሃይማኖት። ጸጋ ምስሌከ አሜን። ተፈጸመ መልእክት ቀዳማዊ ኀበ ጢሞቴዎስ፥ ወተጽሕፈ በአቴና፥ ወተፈነወ በእደ ቲቶ። ወስብሐት ለእግዚአብሔር፥ አሜን።

ዘካልእ መልእክት Universal Epistle

፲፪. ወብፁዕ ብእሲ ዘይትዔገሣ ለእኪት እስመ ተመኪሮ ይነሥእ አክሊለ ሕይወት ዘአሰፈዎሙ እግዚአብሔር ለእለ ያፈቅርዎ። ፲፫. ወእመቦ ዘይትሜከር ኢይበል፦ እግዚአብሔር ያሜክረኒ፥ እስመ እግዚአብሔር ኢያሜክር ለእኪተ ወውእቱሰ ኢይሜክር ወኢመነሂ። ፲፬. አለ አሐዱ አሐዱ ይትሜከር በፍትወተ እንቲአሁ ወይወፅእ ኀቤሃ ወይደነግፅ። ፲፭. ወፍትወትሰ እምከመ ፀንሰት ትወልዳ ለኃጢአት፥ ወኃጢአትኒ እምከመ ተፈጸመት ትወልዳ ለሞት። ፲፮. ኢያስሕቱክሙ አኀዊነ ፍቁራን። ፲፯. ኵሉ ሀብት ሠናይ ወኵሉ ፍት ፍጹም እምላዕሉ ይእቲ ትወርድ እምኀበ አቡሃ ለብርሃን ውእቱ ዘአልቦ ተውላጥ ኀቤሁ ወአልቦ ምንትኒ ዘያመስጥ እምእዴሁ። ፲፰. እስመ በፈቃዱ ወለደነ በቃለ ጽድቁ ከመ ንኩን ቀደምተ ለፍጥረቱ። ፲፱. ወይእዜኒ አኀዊነ ይኩን ኵሉ ብእሲ ፍጡኒ ለሰሚዕ ወጕንዱየ ለነቢብ ወጕንድየ ለመዓት።

ግብረ ሃዋርያት Acts

፩. ወቦ እለ ወረዱ እምብሔረ ይሁዳ ወመሀርዎሙ ለሕዝበ ወይቤልዎሙ፦ እምከመ ኢትትገዘሩ በሕገ ሙሴ፥ ኢትክሉ ሐይወ። ፪. ወተሀውኩ ሕዝብ ፈድፋደ ወተዋቀሥዎሙ ለጳውሎስ ወለበርናባስ ወመከሩ ከመ ይፈንውዎሙ ለጳውሎስ ወለበርናባስ ወለቢጾሙኒ ኀበ ሐዋርያት ወቀሲሳን እለ በኢየሩሳሌም በእንተዝ ነገር። ፫. ወተፈኒዎሙ እምቤተ ክርስቲያን በጽሑ ፊኒቄ ወሰማርያ ወነገርዎሙ ዘከመ ተመይጡ አሕዛብ ወገብሩ ዐቢየ ፍሥሐ ምስለ ኵሎሙ ቢጾሙ። ፬. ወበጺሖሙ ኢየሩሳሌም ተቀበልዎሙ ቤተ ክርስቲያን ወሐዋርያት ወቀሲሳን ወዜነውዎሙ ኵሎ ዘከመ ገብረ ሎሙ እግዚአብሔር በውስተ አሕዛብ። ፭. ወቦ እለ ተንሥኡ ሕዝበ ፈሪሳውያን ቢጽ እለ አምኑ ወይቤልዎሙ፦ ርቱዕ ይትገዘሩ ወነአዝዞሙ ይዕቀቡ ሕገ ሙሴ። ፮. ወአንገለጉ ሐዋርያት ወቀሲሳን ከመ ይርአዩ ዘይገብሩ በእንተዝ ነገር። ፯. ወእምድኅረ ተዋቀሥዎሙ በዐቢያ ግዕዝ ተንሥአ ጴጥሮስ ወይቤሎሙ፦ ስምዑ አኀዊነ ለሊክሙ ታአምሩ ከመ እምትካት ኀረየኒ እግዚአብሔር ከመ አስምዖሙ ቃለ አፉየ ለአሕዛብ ወትምህርተ ወንጌሉ ወይእመኑ። ፰. ወእግዚአብሔር ማእምረ ልብ ሰማዕተ ኮኖሙ ወወሀቦሙ መንፈስ ቅዱስ ከማነ። ፱. ወኢፈለጦሙ እምኔነ አንጺሖ ልቦሙ በሃይማኖት።

ስንክሳር Synaxarium

ዮሴፍ ሊቀ ጳጳሳት
ወኢላርዮስ
ወዲዮናስዮስ
ወጣንቅያቅ
ወቴዎዶስዮስ
ወቲላዎስ
ወዮሳብ
ወገድላ
ወእስክንድርያ ሰማዕት

መዝሙር Psalm

ወኮኖሙ እግዚአብሔር ምስካዮሙ ለነዳያን፤
ወረዳኢሆሙ ውእቱ በጊዜ ምንዳቤሆሙ፤
ወይትዌከሉ ብከ ኵሎሙ እለ ያፈቅሩ ስመከ።

ወንጌል Gospel

፴፮. ወኩኑ መሓርያነ ከመ አቡክሙ መሓሪ ወእቱ። ፴፯. ወኢትኰንኑ ወኢትትኰነኑ፥ ኢትግፍዑ ወኢይገፍዑክሙ፥ አሕይዉ ወያሐይዉ ለክሙ። ፴፰. ሀቡ ወይሁቡክሙ መስፈርተ ሠናየ ወምሉአ ወዝሕዙሐ ወንሕኑሐ ይሁቡክሙ ውስተ ሕፅንክሙ፤ ወበመሥፈርት ዘሰፈርክሙ ይሰፍሩ ለክሙ። ፴፱. ወመሰለ ሎሙ ወይቤሎሙ፦ ይክልኑ ዕዉር ለዕዉር መሪሖቶ? አኮኑ ክልኤሆሙ ይወድቁ ውስተ ግብ? ፵. አልቦ ረድእ ዘየዐቢ እምሊቁ፥ መጠኑ ለኵሉ ይኩን ከመ ሊቁ። ፵፩. ምንተኑ ትኔጽር ሐሠረ ዘውስተ ዐይነ ቢጽከ ወኢትሬኢ ሠርዌ ዘውስተ ዐይንከ? ፵፪. ወእፎ ትክል ብሂሎቶ ለቢጽከ ተዐገሥ እኁየ አውፅእ ሐሠረ እምዐይንከ ወአንተሰ ኢትሬኢ ሠርዌ ዘውስተ ዐይንከ? መድልው፥ አውፅእ ቅድመ ሠርዌ እምዐይንከ ወእምዝ ትኔጽር ታውፅእ ሐሠረ እምዐይነ ቢጽከ። ፵፫. አልቦ ዕፅ ሠናይ ዘይፈሪ እኩየ፥ ወአልቦ ዕፅ እኩይ ዘይፈሪ ሠናየ። ፵፬. ወኵሉ ዕፅ እምፍሬሁ ይትዐወቅ፤ ወኢየአርሩ በለሰ እምአስዋክ፥ ወኢይቀሥሙ አስካለ እምአሜከላ። ፵፭. ኄር ብእሲ እምሠናይ መዝገበ ልቡ ያወፅኣ ለሠናይት፥ ወእኩይሰ ብእሲ እመእኩይ መዝገበ ልቡ ያወፅኣ ለእኪት፤ እስመ እምተረፈ ልብ ይነብብ አፍ። ፵፮. ለምንትኑ እንከ ትብሉኒ፦ እግዚኦ፥ እግዚኦ፥ ወኢትገብሩ ዘእቤለክሙ? ፵፯. ኵሉ ዘይመጽእ ኀቤየ ወይሰምዐኒ ቃልየ ወይገብሮ አርእየክሙ ዘይመስል፤ ፵፰. ይመስል ብእሴ ዘሐነጸ ቤቶ ወከረየ ወአዕመቀ ወሳረረ መሰረቶ ዲበ ኰኵሕ። ወብዙኃን አፍላግ መጺኦሙ ገፍዕዎ ወሓይዝት ለውእቱ ቤት ወስእንዎ አንቀልቅሎቶ እስመ ዲበ ኰኵሕ ተሳረረ። ፵፱. ወዘሰ ይሰምዐኒ ቃልየ ወኢይገብሮ ይመስል ብእሴ ዘሐነጸ ቤቶ መልዕልተ ምድር ዘእንበለ መሰረት፤ ወገፍዕዎ ወሓይዝት ወወድቀ ሶቤሃ ወኮነ ድቀቱ ዐቢየ ለውእቱ ቤት። ይቀልል ኅልፈተ ሰማይ ወምድር፥ እምትደቅ አሐቲ ቃል እምኦሪት ወእምነቢያት፥ ይቤ እግዚእ ለአርዳኢሁ።

ቅዳሴ Liturgy :

መዝሙረ ዳዊት Psalm

አድኅነነ እግዚኦ አምላክነ፤
ወአስተጋብአነ እምአሕዛብ፤
ከመ ንግነይ ለስምከ ቅዱስ።

ወንጌል Gospel

፩. ወእምዝ ጸለየ በአሐቲ መካን ወፈጺሞ ጸሎተ ይቤሎ አሐዱ እምአርዳኢሁ፦ እግዚኦ መሀረነ ጸሎተ ከመ መሀሮሙ ዮሔንስ ለአርዳኢሁ። ፪. ወይቤሎሙ፦ ሶበ ትጼልዩ ከመዝ በሉ፦ አቡነ ዘበሰማያት፥ ይትቀደስ ስምከ፥ ትምጻእ መንግሥትከ፥ ይኩን ፈቃደከ፥ በከመ በሰማይ ከማሁ በምድር። ፫. ሲሳየነ ዘለለ ዕለትነ ሀበነ ዮም። ፬. ወኅድግ ለነ አበሳነ ወጌጋየነ ከመ ንሕነኒ ነኀድግ ለዘ አበሰ ለነ፤ ወኢታብአነ ውስተ መንሱት፥ አላ አድኅነነ ወባልሐነ እምኵሉ እኩይ። ፭. ወመሰለ ሎሙ ወይቤሉሙ፦ ለእመቦ እምውስቴትክሙ ዘቦ ዐርከ ወሖረ ኀቤሁ መንፈቀ ሌሊት ወይቤሎ፦ ዐርክየ ለቅሐኒ ሠለስተ ኅብስተ። ፮. እስመ በጽሐኒ ማኅፈርየ እምሐቅል ወአልብየ ዘኣቀርብ ሎቱ ዘኣሠብጦ። ፯. ወይሠጠዎ ዝኩ ዐርኩ እምውስጥ ወይብሎ፦ ኢታንጥየኒ ወደእነ ቀተርነ ኆኅተ ወደቂቅነ ይሰክቡ ምስሌየ ውስተ ዐራት ወኢይክል ተንሥኦ አሀብከ? ፰. እብለክሙ ለእመሂ ኢተንሥአ የሀቦ እስመ ዐርኩ ውእቱ ከመ ኢያንጥዮ ይትነሣእ ወይሁቦ መጠነ ፈቀደ። ፱. ወአነሂ እብለክሙ ሰአሉ ወይትወሀበክሙ ጐድጕዱ ወይትረኀወክሙ ወኅሥሡ ወትረክቡ። ፲. እስመ ኵሉ ዘሰአለ ይነሥእ ወዘሂ ኀሠሠ ይረክብ ወለዘሂ ጐድጐደ ያርኅውዎ። ይቀልል ኅልፈተ ሰማይ ወምድር፥ እምትደቅ አሐቲ ቃል እምኦሪት ወእምነቢያት፥ ይቤ እግዚእ ለአርዳኢሁ።

መዝሙረ ዳዊት Psalm

ዘረወ ወወሀበ ለነዳይ፤
ወጽድቁኒ ይነብር ለዓለመ ዓለም፤
ወይትሌዐል ቀርኑ በክብር።

ወንጌል Gospel

፲፮. ወናሁ መጽአ አሐዱ ወይቤሎ፦ ሊቅ ምንትኑ ኄር፥ ዘእምገበርኩ ሕይወተ ዘለዓለም በዘ እወርስ? ፲፯. ወይቤሎ፦ ምንተ ትሴእለኒ በእንተ ኄር? አሐዱ ውእቱ ኄር። ወእመሰ ትፈቅድ ትባእ ውስተ ሕይወት፥ ዕቀብ ትእዛዛተ። ፲፰. ወይቤሎ፦ አያተ? ወይቤሎ እግዚእ ኢየሱስ፦ ኢቀቲለ ነፍስ፥ ኢትዘሙ፥ ኢትስረቅ፥ ኢትኩን ስምዕ በሐሰት፤ ፲፱. አክብሮ አቡከ ወእምከ፥ ወአፍቅሮ ቢጽከ ከመ ርእስከ። ፳. ወይቤሎ ውእቱ ወሬዛ፦ ዘንተ ኵሎ ዐቀብኩ እምንእስየ። ምንት እንከ ዘተርፈኒ? ፳፩. ወይቤሎ እግዚእ ኢየሱስ፦ እመሰ ትፈቅድ ፍጹመ ትኩን፥ ሑር ሢጥ ጥሪተከ ወሀብ ለምስኪን፤ ወታጠሪ መዝገበ በሰማያት፤ ወነዓ ትልወኒ። ፳፪. ወሰሚዖ ወሬዛ ዘንተ ነገረ ኀለፈ እንዘ ይቴክዝ እስመቦ ብዙኀ ጥሪተ። ሰማይ ወምድር የኀልፍ ወቃልየሰ ኢየኀልፍ ይቤ እግዚእ ለአርዳኢሁ።

መልእክተ ጳውሎስ Pauline Epistle

፳፮. ወይእዜኒ አኀዊነ? ሶበ ትትጋብኡ ኵልክሙ ብክሙ መዝሙረ ወብክሙ ትምህርተ ዘከሠተ አበይኖ ዘነገረ በሐውርት ወዘምድራሳት። ወኵሎ በዘትትሐነጹ ግበሩ ለበቍዔት። ፳፯. ወእመኒቦ ዘይነብብ በነገረ በሐውርት በበክልኤቱ ወበበሠለስቱ ዝኒ በዝኀ። ወለይትናገሩ በበአሐዱ ወይትፈከር ሎቱ ካልእ። ፳፰. ወእመሰ አልቦ ዘይተረጕም ለያርምም በቤተ ክርስቲያን ዝኩ ዘይትናገር በነገረ በሐውርት። ወይትናገር በዘማእከሌሁ ወማእከለ እግዚአብሔር። ፳፱. ወነቢያትኒ ይትናገሩ በበክልኤቱ ወበበሠለስቱ ከመ ይትዐወቅ ለቤተ ክርስቲያን ቃሎሙ። ፴. ወእመሰቦ ለዘአስተርአዮ ወተከሥተ ሎቱ እንዘ ንቡር ለያርምም ቀዳማዊ። ፴፩. እስመ ይትከሀለክሙ ትትነበዩ ኵልክሙ በበአሐዱ ከመሕ ኵሉ ይትመሀር ወከመ ኵሉ ይትፌሣሕ። ፴፪. እስመ መንፈስ ነቢያት ይትኤዘዝ ለነቢያት። ፴፫. እስመ ኢኮነ እግዚአብሔር አምላከ ሀከክ ዘእንበለ አምላከ ሰላም፥ በከመ ይትገበር በኵሉ ቤተ ክርስቲያኖሙ ለቅዱሳን።

ዘካልእ መልእክት Universal Epistle

፭. ወከማሁ ትካትኒ ቅዱሳት አንስት እለ ይትዌከላ ላዕለ እግዚአብሔር ይሰረገዋ ርእሶን በተኰንኖ ለአምታቲሆን። ፮. ከመ ሣራ ትትኤዘዞ ለአብርሃም ወእግዚእየ ትብሎ ወአንትንሂ አዋልዲሃ ኩና በምግባረ ሠናይ እንዘ ኢትፈርሃ እምነ ድንጋፄ ወኢምንተኒ። ፯. ወከማሁ አንትሙሂ ዕደው እንዘ ትነብሩ ምስለ አንስቲያክሙ ኢታስተሐቅሩ አንስቲያክሙ እስመ ይደክም ፍጥረተ ዚአሆን አክብሩ አንስቲያክሙ እስመ ይወርሳ እማንቱኒ ክብረ ወሕይወተ ምስሌክሙ ከመ ኢትትዐቀፍ ጸሎትክሙ። ፰. ወማኅለቅቱሰ ለኵሉ ከመ ተዐርዩ ልበ በአሐዱ ሕሊና እንዘ ተሐምሙ ሕማመ ቢጽክሙ። ፱. ወእንዘ ኢተዐብዩ ልበክሙ ወእንዘ ኢትፈድይዎ እኪተ ለዘገብረ ለክሙ እኪተ ወእንዘ ኢትጼእልዎ ለዘጸአለክሙ። ወለጸላኢክሙኒ ባርክዎ እስመ ለዝንቱ ተጸዋዕክሙ ከመ በረከተ ትረሱ። ፲. ወዘሰ ያፈቅራ ለሕይወት ወይፈቱ ይርአይ መዋዕለ ሠናያተ ያርምም ልሳኖ እምእኪት ወከናፍሪሁኒ ከመ ኢይንብባ ሐሰተ።

ግብረ ሃዋርያት Acts

፲፪. ወእምህየ ፊልጱስ እንተ ይእቲ ቀዳሚት ዘመቄዶንያ ወይእቲ ሀገር ቆሎንያ። ወነበርነ በይእቲ ሀገር ኅዳጠ መዋዕለ። ፲፫. ወወፃእነ በዕለተ ሰንበተ እምአንቀጸ ሀገር መንገለ ድንጋገ ፈለግ እስመ ቤተ ጸሎት ህየ ሀሎ። ወነበርነ ወአኀዝነ ከመ ንንግር ለአንስት እለ ተጋብኡ ህየ። ፲፬. ወሀለወት ማእከሎን አሐቲ ብእሲት ሠያጢተ ፐፒራ እንተ ሀገረ ትያጢሮን ፈራሂተ እግዚአብሔር። ወታፀምእ እስም ከሠታ እግዚአብሔር እዝና። ወስማ ልድያ። ፲፭. ወተጠምቀት ምስለ ኵሉ ሰብኣ ወአስተብቍዐ ተነ ወትቤለነ፦ ለእመሁ ረሰይክሙኒ መሃይምንተ ለእግዚአብሔር ባኡ ቤትየ ወኅድሩ። ወአገበረተነ ብዙኀ። ፲፮. ወእንዘ ነሐውር ለጸሎት ረከበተነ አሐቲ ወለት እንተ ይትዋረዳ ጋኔን ወታገብእ ለአጋእዝቲሃ ብዙኀ ብነታ እምዘ ትነሥእ ሐፍሥ። ፲፯. ወእምዝ ተለወት ድኅሬሁ ለጳውሎስ ወድኅሬነ እንዘ ትኬልሕ ወትብል፦ እሉ ዕደው አግብርተ እግዚአብሔር ልዑል እሙንቱ። ወይሜህሩክሙ ፍኖተ ሕይወት።

ስንክሳር Synaxarium

አብላርዮስ መነኮስ
ወለንጊኖስ ሰማዕት
ወዘይና ቅድስት
ወአውስያ
ወቈስጠንጢኖስ
ወጸበለ ማርያም ተሓራሚት

መዝሙር Psalm

ወሥጋሆሙኒ ለጻድቃኒከ ለአረዊተ ገዳም፤
ከዐዉ ደሞሙ ከመ ማይ ዐውዳ ለኢየሩሳሌም፤
ወኀጥኡ ዘይቀብሮሙ።

ወንጌል Gospel

፲፩. ወሶበሂ ያበጽሑክሙ ኢትቅድሙ ተሐልዩ ዘትብሉ ወዘትነብቡ ዘአንበበክሙ ሶቤሃ ንቡ፤ እስመ ኢኮንክሙ አንትሙ ዘትነብቡ ዘእንበለ መንፈስ ቅዱስ። ፲፪. ወያገብእ እኅው እኅዋሁ ለሞት ወአብ ውሉደ፤ ወውሉድ ይትነሥኡ ዲበ አዝማዲሆሙ ወይቀትልዎሙ። ፲፫. ወትከውኑ ጽሉኣነ በኀበ ኵሉ በእንተ ስምየ፥ ወዘሰ አዝለፈ ትዕግሥቶ፥ ውእቱ ዘይድኅን። ፲፬. ወሶበ ርኢክሙ ኀሳሮ ለሙስና ዘይቤ ዳንኤል ነቢይ ዘይቀውም ውስተ መካን ቅዱስ ኀበ ኢይከውን፤ ዘያነብብ ላይለቡ፥ ይእተ አሚረ እለ ውስተ ይሁዳ ይጐዩ ውስተ አድባር። ፲፭. ወዘኒ ውስተ ናሕስ ኢይረድ ውስተ ቤት፥ ወኢይባእ ይንሣእ ዘኮነ እምቤት። ፲፮. ወዘኒ ገዳመ ሀሎ ኢይትመየጥ ድኅሬሁ ይንሣእ ልብሶ። ፲፯. ወባሕቱ አሌሎን ለፅኑሳት ወላእለ የሐፅና ይእተ አሚረ። ፲፰. ወጸልዩ ከመ ኢይኩን ጕያክሙ በክረምት። ፲፱. እስመ ይከውን ይእተ አሚረ ዐቢየ ሕማመ ዘእምአመ ኮነ ዓለም ኢኮነ ከማሁ ወእምአመ ፈጠረ እግዚአብሔር ኢኮነ፥ ወኢይከወንሂ። ፳. ወሶበ አኮ ዘአኅጸሮን እግዚአብሔር ለእማንቱ መዋዕል እምኢድኅነ ኵሉ ዘነፍስ፤ ወባሕቱ በእንተ ኅሩያኒሁ እለ ኀረየ እግዚአብሔር፥ የኀጽራ እማንቱ መዋዕል። ፳፩. ወይእተ አሚረ እመቦ ዘይቤለክሙ፦ ነዋ ዝየ ሀሎ ክርስቶስ፥ ወነዋ ከሐክ፤ ኢትእመኑ። ፳፪. እስመ ይመጽኡ ሐሳውያነ መሲሕ ወሐሳውያነ ነቢያት ወይገብሩ ተኣምረ ወመንክረ ከመ ያስሕቱ ወሶበሰ ይትከሀል ወለኅሩያንሂ። ፳፫. ወአንትሙሰ ዑቁ፦ ናሁ፥ አቅደምኩ ነጊሮተክሙ ኵሎ። ዘቦ እዝን ሰሚዐ ለይስማዕ።

ቅዳሴ Liturgy :

መዝሙረ ዳዊት Psalm

ወባሕቱ ከንቱ ኵሉ ደቂቀ ዕጓለ እመሕያው፤
ሐሳውያን ደቂቀ ዕጓለ እመሕያው ይዔምፁ መዳልወ፤
እሙንቱሰ እምከንቱ ውስተ ከንቱ ክመ።

ወንጌል Gospel

፵፪. አሌ ለክሙ ጸሐፍት ወፈሪሳውያን፥ እለ ታበውኡ ዐሥራተ እዴሁ ለአዛብ ወለጸናታም ወለኵሉ አኅማላት ወትትዔወርዎ ለጽድቅ ወለፍቅረ እግዚአብሔር ወዘንተኒ ርቱዕ ትግበሩ፥ ወዝክተኒ ኢትኅድጉ። ፵፫. አሌ ለክሙ ጸሐፍት ወፈሪሳውያን መድልዋን፥ እስመ ታፈቅሩ ነቢረ ፍጽም በውስተ አዕዋዳት ወተኣምኆ በምሥያጣት። ፵፬. አሌ ለክሙ ጸሐፍት ወፈሪሳውያን መድልዋን፥ እስመ ከመ መቃብር ዘኢይትዐወቅ አንትሙ ዘያንሶሱ ሰብእ ላዕሌሁ ወኢያአምሮ። ፵፭. ወአውሥአ አሐዱ እምጸሐፍተ ሀገር ወይቤሎ፦ ሊቅ ዘንተ እንዘ ትብል ኪያነሂ ትጼእል። ፵፮. ወይቤሎ፦ ለክሙሂ ለጸሐፍተ፥ ሀገር አሌ ለክሙ እስመ ታጸውርዎ ለሰብእ ጾረ ክቡደ፥ ወለሊክሙሰ ኢትለክፍዎ በአሐቲ አጽባዕትክሙ ለውእቱ ጾር። ይቀልል ኅልፈተ ሰማይ ወምድር፥ እምትደቅ አሐቲ ቃል እምኦሪት ወእምነቢያት፥ ይቤ እግዚእ ለአርዳኢሁ።

መዝሙረ ዳዊት Psalm

ክቡር ሞቱ ለጻድቅ በቅድመ እግዚአብሔር፤
እግዚኦ አነ ገብርከ፤
ገብርከ ወልደ አመትከ።

ወንጌል Gospel

፴፪. ኵሉ እንከ ዘየአምን ብየ በቅድመ ሰብእ አአምኖ አነሂ በቅድመ አቡየ ዘበሰማያት። ፴፫. ወለዘሰ ክሕደኒ በቅድመ ሰብእ እክሕዶ አነሂ በቅድመ አቡየ ዘበሰማያት። ፴፬. ኢይምሰልክሙ ዘመጻእኩ ሰላመ እደይ ውስተ ምድር፥ ኢመጻእኩ እደይ ሰላመ አላ መጥባሕተ። ፴፭. ወመጻእኩ እፍልጥ ብእሴ እምአቡሁ ወወለትኒ እምእማ ወመርዓተኒ እምሐማታ። ፴፮. ወፀሩ ለሰብእ ሰብአ ቤቱ። ፴፯. ዘያፈቅር አባሁ ወእሞ እምኔየ ኢይደሉ ሊተ። ወዘያፈቅር ወልደ ወወለቶ እምኔየ ኢይደሉ ሊተ። ፴፰. ወዘኢነሥአ መስቀሎ ወዘኢተለወ ድኅሬየ ኢይደሉ ሊተ። ፴፱. ዘረከባ ለነፍሱ ይገድፋ፤ ወዘሰ ገደፋ ለነፍሱ በእንቲአየ ይረክባ። ፵. ዘኪያክሙ ተወክፈ ኪያየ ተወክፈ፤ ወዘኪያየ ተወክፈ ተወክፎ ለዘፈነወኒ። ፵፩. ዘተወክፈ ነቢየ በስመ ነቢይ ዐስበ ነቢይ ይነሥእ። ወዘተወክፈ ጻድቀ በስመ ጻድቅ ዐስበ ጻድቅ ይነሥእ። ፵፪. ወዘአስተየ አሐደ እምእሉ ንኡሳን ጽዋዐ ማይ ቈሪር ባሕቲቶ በስመ ረድእ አማን እብለክሙ ኢያሐጕል ዐስቦ። ሰማይ ወምድር የኀልፍ ወቃልየሰ ኢየኀልፍ ይቤ እግዚእ ለአርዳኢሁ።

መልእክተ ጳውሎስ Pauline Epistle

፲. እንከሰ ጽንዑ በእግዚአብሔር ወበጽንዐ ኀይሉ። ፲፩. ወልበሱ ወልታ እግዚአብሔር በዘትክሉ ተቃውሞቶ ለመናግንተ ሰይጣን። ፲፪. እስመ ቀትልክሙ ኢኮነ ምስለ ዘሥጋ ወደም፥ ዘእንበለ ምስለ መኳንንተ ጽልመት ወአጋንንት እኩያን እለ መትሕተ ሰማይ። ፲፫. ወበእንተዝ ንሥኡ ወልታ እግዚአብሔር ከመ ትክሀሉ ተቃውሞታ ለዕለት እኪት፥ ወከኁ ድልዋነ በኵሉ ከመ ትጽንዑ። ፲፬. ቁሙ እንከ ቀኒተክሙ ሐቌክሙ በጽድቅ ወልበሱ ልብሰ ኀጺን ዘጽድቅ። ፲፭. ተሥኢነክሙ ኀይለ ወንጌል ዘበሰላም። ፲፮. ወምስለዝ ኵሉ ንሥኡ ንዋየ ሐቅል ዘሃይማኖት በዘትክሉ አጥፍኦተ ኵሉ አሕጻሁ ለእኩይ ርሱን። ፲፯. ወንሥኡ ጌራ መድኀኒት ወሰይፈ ዘመንፈስ ቅዱስ ዘውእቱ ቃለ እግዚአብሔር። ፲፰. በኵሉ ጸሎት ወስእለት እንዘ ትጼልዩ በኵሉ ጊዜ በመንፈስ ወምስሌሁ ትግሁ ወተፀመዱ በኵሉ ጸሎት በእንተ ኵሎሙ ቅዱሳን። ፲፱. ወበእንቲአየ ከመ የሀበኒ ቃለ ወይክሥት አፉየ ከመ እንግር ገሃደ ሕርመተ ትምህርት። ፳. ዘበእንቲአሁ እተነብል ሙቁሕየ ከመ እንግር ገሃደ በእንቲአሁ በከመ ይደሉ እንግር። ፳፩. ወከመ ታእምሩ አንትሙሂ ዜናየ ዘከመ እገብር ኵሎ ያጤይቀክሙ ቲኪቆስ እኁነ ዘናፈቅር ላእኪ እግዚአብሔር ምእመን። ፳፪. ዘፈኖኩ ኀቤክሙ በእንተዝ ከመ ታእምሩ ዜናየ ወይተፈሣሕክሙ ልብክሙ። ፳፫. ሰላም ለአኀዊነ ወተፋቅሮ ምስለ ሃይማኖት እምኀበ እግዚአብሔር አቡነ ወእግዚእነ ኢየሱስ ክርስቶስ። ፳፬. ወጸጋሁ ምሰለ ኵሎሙ እለ ያፈቅርዎ ለእግዚእነ ኢየሱስ ክርስቶስ በኢጥፍአት፥ አሜን። ተፈጸመት መልእክት ኀበ ሰብአ ኤፌሶን፥ ወተጽሕፈት በሮሜ፥ ወተፈነወት በእደ ጢኪቆስ። ወስብሐት ለእግዚአብዝሔር፥ አሜን።

ዘካልእ መልእክት Universal Epistle

፲. ወዕለቱሰ ለእግዚአብሔር ግብተ ትመጽእ ከመ ሰራቂ፥ እንተ ባቲ ሰማያትኒ ይትረኀዋ ወይሴስላ ወኵሉ ፍጥረት ዘቀዲሙ በውዕየተ እሳት ይትመሰው ወምድርነ ወኵሉ ዘላዕሌሃ ግብር ይውዒ። ፲፩. ወዝንቱ ኵሉ ተመሲዎ እፎ ትኩኑ ሀለወክሙ በምግባር ቅዱስ ዘጽድቅ። ፲፪. እንዘ ትሴፈዉ ወትጐጕኡ ለዕለተ ምጽአቱ ለእግዚአብሔር እንተ ባቲ ሰማያትኒ ይረስና ወይትመሰዋ ወኵሉ ፍጥረት ይውዒ ወይትመሰው። ፲፫. ወሐዳሳተ ሰማያተ ወሐዳሰ ምድረ ንሴፎ ዘውስቴቶን የኀድር ጽድቅ። ፲፬. ወይእዜኒ አኀውየ ዘንተ እንዘ ትሴፈዉ ጐጕኡ ይርከብክሙ ዘእንበለ ርስሐት ወዘእንበለ ጌጋይ እንዘ ትሰናአዉ። ፲፭. ወትዕግሥቱሰ ለእግዚእነ የሀብክሙ መድኀኒተ በከመ እኁነ ጳውሎስ ዘናፈቅር ጸሐፈ ለክሙ በእንተ ዘወሀቦ እግዚአብሔር ጥበበ። ፲፮. ዘከመ ሀሎ ውስተ ኵሉ መጻሕፍቲሁ ዘነበበ ውስቴቶን በእንቲአሁ ለዝንቱ፥ ወዘሰ ነበቡ እሙንቱ ሰብእ እለ ይሌብውዎ ወእለሰ አልቦሙ ትምህርት እለ ኢለበዉ ይመይጥዎ ለቃለ መጽሐፍ ከመ ሜጥዎን ለብዙኃት መጻሕፍት ላግዕዞሙ ወያማስኑ። ፲፯. ወአንትሙሰ አኀዊነ አቅድሙ አእምሮ ወተዓቀቡ ከመ ኢትስሐቱ በዘኢይበቍዕ ትምህርት ከመ ኢትደቁ እምነ ምጽናዕክሙ። ፲፰. ተባዝኁ በእግዚእነ ወበአኰቴቱ ለኢየሱስ ክርስቶስ መድኀኒነ ወእግዚአብሔር አብ፤ ዘሎቱ ስብሐት ይእዜኒ ወዘልፈኒ ወለዓለመ ዓለም አሜን። መልአት መልእክተ ጴጥሮስ ዳግሚት። ወስብሐት ለእግዚአብሔር፥ አሜን።

ግብረ ሃዋርያት Acts

፳፪. ወተሰምዐ ዝነገር በአብያተ ክርስቲያናት ዘኢየሩሳሌም በእንቲአሆሙ። ወፈነውዎ ለበርናባስ አንጾኪያ። ፳፫. ወበጺሖ ርእየ ጸጋ እግዚአብሔር ወተፈሥሐ ወመሀሮሙ ለኵሎሙ ይትመየጡ በኵሉ ልቦሙ ኀበ እግዚአብሔር። ፳፬. እስመ ብእሲ ጻድቅ ውእቱ ወምሉእ መንፈስ ቅዱስ ወሃይማኖት። ወተወሰኩ ብዙኃን አሕዛብ ኀበ እግዚእነ። ፳፭. ወእምዝ ሖረ በርናባስ ጠርሶን ይኅሥሦ ለሳውል፥ ፳፮. ወረከቦ ወወሰዶ አንጾኪያ። ወነበሩ አሐተ ዓመተ ኅቡረ በቤተ ክርስቲያን። ወመሀሩ ለብዙኃን አሕዛብ። ወተሰምዩ አርድእት ክርስቲያን በአንጾኪያ ቀዲሙ።

ስንክሳር Synaxarium

አባ ቡላ ዘተሰምየ አቢብ
፲ወ፪፻ ፵ወ፫ እደው ፫፻ወ፯ አንስት ማሕበራነ አቢብ
ወአባ ዕብሎይ

መዝሙር Psalm

ጻድቅሰ ከመ በቀልት ይፈሪ፤
ወይበዝኅ ከመ ዘግባ ዘሊባኖስ፤
ትኩላን እሙንቱ ውስተ ቤተ እግዚአብሔር።

ወንጌል Gospel

፳፫. ወይቤሎ እግዚኡ ለገብሩ፦ ሑር ፍጡነ ውስተ ፍናው ወውስተ ጥቅመ ሀገር ወበግብር አብኡ ከመ ይምላእ ቤትየ። ፳፬. እብለክሙ ከመ አሐዱሂ እምእልክቱ ሰብእ እለ ጸዋዕኩ ኢይጥዕምዋ ለበዓልየ። ፳፭. ወእምዝ እንዘ የሐውሩ ምስሌሁ ብዙኅ ሰብእ ተመይጠ ወይቤሎሙ፦ ፳፮. ዘይመጽእ ኀቤየ ዘይፈቅድ ይትልወኒ ወዘኢይጸልእ አባሁ ወእሞ ወብእሲቶ ወቤቶ ወውሉዶ ወአኀዊሁ ወአኃቲሁ ወዓዲ ነፍሶሂ እንቲአሁ ኢይክል ከዊነ ረድእየ። ፳፯. ዘኢይጸውር መስቀሎ ወኢይመጽእ ይትልወኒ ኢይክል ከዊነ ረድእየ። ይቀልል ኅልፈተ ሰማይ ወምድር፥ እምትደቅ አሐቲ ቃል እምኦሪት ወእምነቢያት፥ ይቤ እግዚእ ለአርዳኢሁ።

ቅዳሴ Liturgy :

መዝሙረ ዳዊት Psalm

የዋሃን ወራትዓን ተለዉኒ፤
እስመ ተሰፈውኩከ እግዚኦ፤
ያድኅኖ እግዚአብሔር ለእስራኤል እምኵሉ ምንዳቤሁ።

ወንጌል Gospel

፭. ወመሰለ ሎሙ ወይቤሉሙ፦ ለእመቦ እምውስቴትክሙ ዘቦ ዐርከ ወሖረ ኀቤሁ መንፈቀ ሌሊት ወይቤሎ፦ ዐርክየ ለቅሐኒ ሠለስተ ኅብስተ። ፮. እስመ በጽሐኒ ማኅፈርየ እምሐቅል ወአልብየ ዘኣቀርብ ሎቱ ዘኣሠብጦ። ፯. ወይሠጠዎ ዝኩ ዐርኩ እምውስጥ ወይብሎ፦ ኢታንጥየኒ ወደእነ ቀተርነ ኆኅተ ወደቂቅነ ይሰክቡ ምስሌየ ውስተ ዐራት ወኢይክል ተንሥኦ አሀብከ? ፰. እብለክሙ ለእመሂ ኢተንሥአ የሀቦ እስመ ዐርኩ ውእቱ ከመ ኢያንጥዮ ይትነሣእ ወይሁቦ መጠነ ፈቀደ። ፱. ወአነሂ እብለክሙ ሰአሉ ወይትወሀበክሙ ጐድጕዱ ወይትረኀወክሙ ወኅሥሡ ወትረክቡ። ፲. እስመ ኵሉ ዘሰአለ ይነሥእ ወዘሂ ኀሠሠ ይረክብ ወለዘሂ ጐድጐደ ያርኅውዎ። ይቀልል ኅልፈተ ሰማይ ወምድር፥ እምትደቅ አሐቲ ቃል እምኦሪት ወእምነቢያት፥ ይቤ እግዚእ ለአርዳኢሁ።

መዝሙረ ዳዊት Psalm

ወአንሰ እጼሊ፤
ፈደዩኒ እኪተ ህየንተ ሠናይት፤
ወጸልኡኒ ህየንተ ዘአፍቀርክዎሙ።

ወንጌል Gospel

፶፩. ወይቤሎሙ እግዚእ ኢየሱስ፦ ለበውክሙኑ እንከ ዘንተ ኵሎ? ወይቤልዎ፦ እወ። ፶፪. ወይቤሎሙ፦ በእንተ ዝንቱ ኵሉ ጸሓፊ ዘይፀመድ ለመንግሥተ ሰማያት ይመስል ብእሴ ባዕለ ቤት ዘያወፅእ እመዝገቡ ሐዲሰ ወብሉየ። ፶፫. ወፈጺሞ እግዚእ ኢየሱስ እሎንተ ምሳልያተ ተንሥአ እምህየ። ፶፬. ወሖረ ሀገሮ ወመሀሮሙ በምኵራቦሙ እስከ ሶበ ይደመሙ ወይብሉ፦ እምአይቴ ለዝንቱ ዝኵሎ ጥበብ ወኀይል? ፶፭. አኮኑ ዝንቱ ውእቱ ወልዱ ለጸራቢ? አኮኑ እሙ ስማ ማርያም ወአኀዊሁ ያዕቆብ ወዮሴፍ ወስምዖን ወይሁዳ? ፶፮. ወአኃቲሁ ኵሎን ኀቤነ ሀለዋ? እምአይቴ እንከ ሎቱ ዝንቱ ኵሉ? ፶፯. ወይንጐረጕሩ በእንቲአሁ፥ ወይቤሎሙ እግዚእ ኢየሱስ፦ አልቦ በኀበ ኢይከብር ነቢይ ዘእንበለ በሀገሩ ወበቤቱ። ፶፰. ወኢገብረ በህየ ኀይለ ብዙኀ በእንተ ኢአሚኖቶሙ። ሰማይ ወምድር የኀልፍ ወቃልየሰ ኢየኀልፍ ይቤ እግዚእ ለአርዳኢሁ።

መልእክተ ጳውሎስ Pauline Epistle

፲፭. ወአመ ሠምረ እግዚአብሔር ዘፈለጠኒ ወአውጽአኒ እምከርሠ እምየ ጸውዐኒ በጸጋሁ። ፲፮. ወከሠተ ሊተ ወልዶ ከመ እስብክ ለአሕዛብ በስሙ ወኢተለውኩ ሶቤሃ ዘሥጋ ወደም። ፲፯. ወኢዐረጉ ኢየሩሳሌም ኀበ ሐዋርያት ቀደምትየ ወሖርኩ ብሔረ ዐረብ ወካዕበ ተመየጥኩ ደማስቆ። ፲፰. ወእምድኅረ ሠለስቱ ዓመት ዐረጉ ኢየሩሳሌም እርአዮ ለኬፋ ወነበርኩ ኀቤሁ ዐሡረ ወኀሙሰ መዋዕለ። ፲፱. ወኢየአምር ባዕደ ሐዋርያተ ዘእንበለ ያዕቆብሃ እኁሁ ለእግዚእነ። ፳. ወዘኒ ዘጸሐፍኩ ለክሙ ናሁ ቅድመ እግዚአብሔር ከመ ኢይሔሱ። ፳፩. ወእምድኅረ ዝንቱ ነገር በጻሕኩ ደወለ ቂልቅያ ወሶርያ። ፳፪. ወኢያእመሩኒ ቤተ ክርስቲያናት ዘብሔረ ይሁዳ እለ በክርስቶስ በገጽየ። ፳፫. ወዳእሙ ሰምዑ፦ ዝኩአ ዝትካት ይሰድድ ይእዜ ይሰብክ ትምህርተ ሃይማኖት። ፳፬. ወይሴብሕዎ ለእግዚአብሔር በእንቲአየ።

ዘካልእ መልእክት Universal Epistle

፩. ወርእዩ ዘከመ እፎ ፍቅሩ ዘወሀበነ አብ ከመ ውሉደ እግዚአብሔር ንኩን ወኮነሂ። ወበእንተዝ ኢፈተወነ ዓለም እስመ ሎቱኒ ኢያእመሮ። ፪. አኀዊነ ይእዜሰ ደቂቀ እግዚአብሔር ንሕነ ወዓዲ ኢተዐውቀ ለነ ምንተ ንከውን። ናአምር ባሕቱ ከመ እምከመ ተዐውቀ ለነ ከማሁ ንከውን እስመ ንሬእዮ ሎቱ በከመ ውእቱ። ፫. ወኵሉ ዘተወከለ ኪያሁ ያነጽሕ ርእሶ በከመ ውእቱ ንጹሕ። ፬. ወኵሉ ዘይገብራ ለኃጢአት ወለአበሳኒ ገብራ ውእቱ እስመ አበሳ ኃጢአት ይእቲ። ፭. ወታአምሩ ከመ አስተርአየ ዝክቱ ከመ ያሰስላ ለኃጢአት ወኃጢአትሰ አልቦ ኀቤሁ። ፮. ወኵሉ ዘቦቱ ይነብር ኢይኤብስ እስመ ኵሉ ዘይኤብስ ኢይሬእዮ ወኢያአምሮ። ፯. ደቂቅየ ኢያስሕቱክሙ። ኵሉ ዘይገብራ ለጽድቅ ጻድቅ ውእቱ በከመ ዝክቱ ጻድቅ ውእቱ። ፰. ወዘሰ ይገብራ ለኃጢአት እምነ ጋኔን ውእቱ እስመ ቀዳሚሁ ሰይጣን አበሰ። ወበእንተ ዝንቱ አስተርአየ ወልደ እግዚአብሔር ከመ ይሰዐር ግብሮ ለጋኔን። ፱. ወኵሉ ዘይትወለድ እምእግዚአብሔር ኢይገብራ ለኃጢአት፥ እስመ ዘርዐ ዚአሁ ቦቱ ይነብር ወኢይክል አብሶ እስመ እምእግዚአብሔር ተወልደ።

ግብረ ሃዋርያት Acts

፩. ወውእተ አሚረ በዝኁ ሕዝብ ወግእዝዎሙ እለ እምአረሚ አርድእት ለአይሁድ እስመ ይሬእይዎን ለመበለታቲሆን እንዘ ኢይፀመዳ ኵሎ አሚረ ወያስትታ ተልእኮቶን። ፪. ወጸውዕዎሙ ዐሠርቱ ወክልኤቱ ለኵሉ ሕዝብ ወይቤልዎሙ፦ ኢይደልወነ ከመ ንኅድግ ቃለ እግዚአብሔር ወንፀመድ ማእዳተ። ፫. ኅረዩ እምውስቴትክሙ ሰብዐተ ዕደወ እለ ምሉኣን መንፈስ ቅዱስ ወጥበብ እለ ንሠይም ዲበ ዝግብር። ፬. ወንሕነሰ ንፀመድ ጸሎተ ወመልእክተ ቃል። ፭. ወኀብሩ ኵሎሙ ሕዝብ። ወሠናየ ኮነ ዝነገር በኀቤሆሙ ወኀረዩ እስጢፋኖስሃ ብእሴ ዘምሉእ ሃይማኖተ ወመንፈስ ቅዱስ፥ ወፊልጶስ፥ ወጰሮኮሮን፥ ወኒቃኖራ፥ ወጢሞና፥ ወጰርሜና፥ ወኒቃሊዎን ፈላሴ ዘሀገረ አንጾኪያ። ፮. ወአቀምዎሙ ቅድመ ሐዋርያት። ወጸለዩ ወወደዩ እደዊሆሙ ላዕሌሆሙ። ፯. ወዐብየ ቃለ እግዚአብሔር ወበዝኁ ሕዝብ በኢየሩሳሌም ፈድፋደ ወብዙኃን እምውስተ ካህናት እለ አምኑ።

ስንክሳር Synaxarium

ጢሞና ፩እም ፸ወ፪ አርድእት ወ፩ እም፯ ዲያቆናት
ወዕረፍተ ያዕቆብ እሁሁ ለእግዚእነ
ወፊልጶስ
ወአግናጥዮስ ሰማዕት

መዝሙር Psalm

ይዌስክ እግዚአብሔር ላዕሌክሙ፤
ላዕሌክሙ ወላዕለ ውሉድክሙ፤
ብሩካን አንትሙ ለእግዚአብሔር።

ወንጌል Gospel

፩. ወወፂኦ እግዚእ ኢየሱስ እምህየ ቦአ ሀገሮ ወተለውዎ አርዳኢሁ። ፪. ወበሰንበት መሀሮሙ በምኵራብ ወብዙኃን ያፀምእዎ ወያነክሩ እንዘ ይብሉ፦ እምአይቴ ሎቱ ዝንቱ ኵሉ ወምንትኑ ዛቲ ጥበብ እንተ ተውህበት ሎቱ ወዝኒ ኀይል ዘይገብር በእደዊሁ? ፫. እኮኑ ዝንቱ ውእቱ ወልደ ጸራቢ ወልደ ማርያም ወእኁሁ ያዕቆብ ወዮሴፍ ወይሁዳ ወስምዖን ወአኮኑ አኃቲሁኒ ሀለዋ ዝየ ኀቤነ? ወተዐቅፉ በእንቲአሁ። ፬. ወይቤሎሙ እግዚእ ኢየሱስ፦ ኢኮነ ምኑነ ነቢይ ዘእንበለ በሀገሩ በቤቱ ወበኀበ አዝማዲሁ። ፭. ወኢተክህሎ ገቢረ ኀይል በህየ ዘእንበለ ኅዳጣን ድዉያን እለ አንበረ እዴሁ ዲቤሆሙ ወአሕየዎሙ። ፮. ወአንከረ ኢአሚኖቶሙ ወአንሶሰወ ውስተ አህጉረ አድያም እንዘ ይሜህር። ዘቦ እዝን ሰሚዐ ለይስማዕ።

ቅዳሴ Liturgy :

መዝሙረ ዳዊት Psalm

ስምዐኒ እግዚኦ ጸሎትየ፤
ወይብጻሕ ቅድሜከ ገዓርየ፤
ወኢትሚጥ ገጸከ እምኔየ።

ወንጌል Gospel

፴፮. ወእምዝ ሖረ ምስሌሆሙ ዐጸደ ወይን ዘስሙ ጌቴሴማን፤ ወይቤሎሙ ለአርዳኢሁ፦ ንበሩ ዝየ እስከ ሶበ አሐውር ከሐ ወእጸሊ። ፴፯. ወነሥኦ ለጴጥሮስ ወለክልኤሆሙ ደቂቀ ዘብዴዎስ ወአኀዘ ይተክዝ ወይሕዝን። ፴፰. ወእምዝ ይቤሎሙ፦ ተከዘት ነፍስየ እስከ ለመዊት፤ ንበሩ ዝየ ወትግሁ ምስሌየ። ፴፱. ወተአተተ ሕቀ እምህየ ወሰገደ በገጹ ወጸለየ ወይቤ፦ አቡየ እመሰ ይትከሀል ይኅልፍ እምኔየ ዝጽዋዕ፤ ወባሕቱ ፈቃደከ ይኩን ወአኮ ፈቃድየ። ፵. ወሖረ ኀበ አርዳኢሁ ወረከቦሙ እንዘ ይነውሙ ወይቤሎ ለጴጥሮስ፦ ከመዝኑ ስእንክሙ ተጊሀ አሐተ ሰዓተ ምስሌየ? ፵፩. ትግሁ ወጸልዩ ከመ ኢትባኡ ውስተ መንሱት። መንፈስሰ ይፈቱ ወሥጋ ድኩም። ፵፪. ወካዕበ ሖረ ዳግመ ወጸለየ ወይቤ፦ አቡየ እመ ኢይትከሀል ዝኀሊፈ ዘእንበለ እስትዮ ይኩን ፈቃደከ። ፵፫. ወገብአ ካዕበ ኀበ አርዳኢሁ ወረከቦሙ እንዘ ይነውሙ እስመ አዕይንቲሆሙ ክቡዳት። ፵፬. ወሖረ ካዕበ በሣልስ ወጸለየ ኪያሁ ክመ ቃለ እንዘ ይብል። ፵፭. ወገብአ ካዕበ ኀበ አርዳኢሁ ወይቤሎሙ፦ ኑሙ እንከሰ ወኣዕርፉ ናሁ በጽሐ ጊዜሁ ወያገብእዎ ለወልደ እጓለ እመሕያው ውሰተ እደ ኃጥኣን። ፵፮. ተንሥኡ ንሑር፤ ናሁ ቀርበ ዘያገብአኒ። ሰማይ ወምድር የኀልፍ ወቃልየሰ ኢየኀልፍ ይቤ እግዚእ ለአርዳኢሁ።

መዝሙረ ዳዊት Psalm

እግዚአብሔርሰ ንጉሥ ውእቱ እምቅድመ ዓለም፤
ወገብረ መድኀኒተ በማእከለ ምድር፤
አንተ አጽናዕካ ለባሕር በኀይልከ።

ወንጌል Gospel

፩. ወይቤሎሙ እግዚእ ኢየሱስ፦ እስመ ትመስል መንግሥተ ሰማያት ብእሴ ባዕለ ቤት ዘወጽአ በነግህ ይትዓሰብ ገባእተ ለዐጸደ ወይኑ። ፪. ወተካሀለ ምስለ ገባእት በበ ዲናር ለዕለት ወፈነዎሙ ውስተ ዐጸደ ወይኑ። ፫. ወወፂኦ ጊዜ ሠላስ ሰዓት ርእየ ካልኣነ እንዘ ይቀውሙ ውስተ ምሥያጥ ፅሩዓነ። ፬. ወሎሙኒ ይቤ፦ ሑሩ አንትሙኒ ውስተ ዐጸደ ወይንየ ወዘበርቱዕ እሁበክሙ። ወእሙንቱሂ ሖሩ። ፭. ወካዕበ ወፂኦ ጊዜ ስሱ ወተስዑ ሰዓት ገብረ ከማሁ ክመ። ፮. ወጊዜ ዐሥሩ ወአሐቲ ወፂኦ ረከበ ካልኣነ እንዘ ይቀውሙ ወይቤሎሙ፦ ምንት አቀመክሙ ዝየ ኵሎ ዕለተ ፅሩዓኒክሙ? ፯. ወይቤልዎ፦ እስመ አልቦ ዘተዓሰበነ። ወይቤሎሙ፦ ሑሩ እንትሙኒ ውስተ ዐጸደ ወይንየ ወዘረትዐኒ እሁበክሙ። ፰. ወእምዘ መስየ ይቤ ባዕለ ዐጸደ ወይን ለመጋቢሁ፦ ጸውዖሙ ለገባእት ወሀቦሙ ዐስቦሙ ወአኀዝ ቅድም እምደኀርት እስከ ቀደምት። ፱. ወመጽኡ እለ ዐሥሩ ወአሐቲ ሰዓት ወነሥኡ በበ ዲናር። ፲. ወመጽኡ ቀደምት ወመሰሎሙ ዘያፈደፍዱ ነሢአ፤ ወነሥኡ በበ ዲናር እሙንቱሂ። ፲፩. ወነሢኦሙ አንጐርጐሩ ላዕሊሁ ለባዕለ ቤት። ፲፪. እንዘ ይብሉ፦ እሉ ደኀርት አሐተ ሰዓተ ተቀንዩ ወአስተዐረይኮሙ ምስሌነ፥ ለእለ ጾርነ ክበዳ ወላህባ ለዕለት። ፲፫. ወአውሢኦ ይቤሎ ለአሐዱ እምኔሆሙ፦ ካልእየ ኢገፋዕኩከ፤ አኮኑ በዲናር ተከሀልኩከ? ፲፬. ንሣእ ዘይረክበከ ወሑር፤ ፈቀድኩ አነ ለዝ ደኃሪ አሀቦ ከመ ለከ። ፲፭. ኢይከውነኒሁ እግበር ዘፈቀድኩ በንዋይየ? ዐይንከኑ ሐማሚ ውእቱ እስመ ኣነ ኄር አነ? ፲፮. ከማሁኬ ይከውኑ ደኀርት ቅድመ ወቀደምት ድኅረ። እስመ ብዙኃን እሙንቱ ጽዉዓን፥ ወኅዳጣን ኅሩያን። ፲፯. ወእንዘ የዐርግ እግዚእ ኢየሱስ ኢየሩሳሌም ነሥኦሙ ለዐሠርቱ ወክልኤቱ አርዳኢሁ እንተ ባሕቲቶሙ ወአግሐሦሙ እምፍኖት፤ ወይቤሎሙ፦ ፲፰. ናሁ ነዐርግ ኢየሩሳሌም ወይእኅዝዎ ለወልደ እጓለ እመሕያው፥ ወያገብእዎ ኀበ ሊቃነ ካህናት ወጸሐፍት፥ ወይኴንንዎ በሞት። ፲፱. ወይሜጥውዎ ለሕዝብ ወይሳለቁ ላዕሌሁ ወይቀሥፍዎ ወይሰቅልዎ ወበሣልስት ዕለት ይትነሣእ። ሰማይ ወምድር የኀልፍ ወቃልየሰ ኢየኀልፍ ይቤ እግዚእ ለአርዳኢሁ።

መልእክተ ጳውሎስ Pauline Epistle

፳፪. ወብከ መለያልይ ዝኩ ዘታስተሐቅሮ ፈድፋደ መፍቅድከ። ፳፫. ወዝኩ ዘታንእሶ ያፈድፍድ ለከ ክብረ። ፳፬. ወቶስሐ እግዚአብሔር ለነፍስትነ ወአክበሮ ፈድፋደ ለመሌሊት ንኡስ። ፳፭. ከመ ኢይትዓበዩ በበይናቲሆሙ መለያልይነ ከመ ያዐሪ ክብረ ወከመ ኢይትናፈቅ አባልነ። ፳፮. ለእመ አሐዱ አባል ሐመ የሐምም ምስሌሁ ኵሉ ነፍስትነ ወእመኒ ተፈሥሐ አሐዱ አባል ይትፌሣሕ ምስሌሁ ኵሉ ነፍስትነ። ፳፯. እንትሙኬ ሥጋሁ ለክርስቶስ ወአባሉ በመክፈልትክሙ። ፳፰. ወለእለሰ ሤሞሙ እግዚአብሔር ለቤተ ክርስቲያን ቀዳሚ ሐዋርያተ ወዳግመ ነቢያተ ወሣልሰ መምህራነ ወእምዝ ዘትእምርት ወኀይል። ወእምዝ ዘአሶት ወዘረድኤት ወአምርሕት ወዘነገረ በሐውርት። ፳፱. ቦኑ ይከውኑ ኵሉ ሐዋርያተ? ወቦኑ ኵሉ ነቢያተ? ወቦኑ ኵሉ መምህራነ? ወቦኑ ለኵሉ ኀይለ ትእምርት? ፴. ወዘአኮ ለኵሉ ጸጋ እሶት? ወቦኑ ኵሎሙ በነገረ በሐውርት ይነብቡ? ወቦኑ ኵሎሙ መፈክራን? ፴፩. ቅንኡ ለእንት ተዐቢ ጸጋ ወዓዲ እንተ ትኄይስ ፍኖተ እሜህረክሙ።

ዘካልእ መልእክት Universal Epistle

፳. ወምንትኑመ ይእቲ አኰቴትክሙ እመ እንዘ ትኤብሱ ትትዔገሡ መቅሠፍተክሙ? አላ እንዘ ሠናየ ትገብሩ እመ ተዐገሥክሙ ግፍዐክሙ ዛቲ አኰቴት ይእቲ በኀበ እግዚአብሔር። ፳፩. እስመ ወበአንተ ዝንቱ ተጸዋዕክሙ እስመ ክርስቶስኒ በእንቲአክሙ ሐመ ይኅድግ ለክሙ ማዕተቦ ከመ ትትልዉ አሰረ ዚአሁ። ፳፪. በከመ ውእቱ ኢገብረ ኃጢአተ፦ ወኢተረክበ ሐሰት ውስተ አፉሁ። ፳፫. እንዘ ይጼእልዎ ኢጸአለ ወእንዘ ያሐምምዎ ኢተቀየመ። አላ አግብአ ለዘይኴንን ጽድቀ። ፳፬. ወበእንተ ኃጣውኢነ ውእቱ ተሰቅለ ዲበ ዕፅ በሥጋሁ ከመ ያውፅአነ እምኃጣውኢኒ ወበጽድቁ ያሕይወነ፥ እስመ በቍስለ ዚአሁ ሐየውክሙ ቍስለክሙ እንዘ ከመ አባግዕ ትሳኰዩ። ፳፭. ወይእዜኒ ግብኡ ኀበ ኖላዊክሙ ወዐቃቢሃ ለነፍስክሙ።

ግብረ ሃዋርያት Acts

፲፱. ወይእዜኒ ኦ ንጉሥ አግሪጳ፥ ኢክሕድኩ ዘአስትርአየኒ ሊተ እምሰማይ። ፳. ወቀደምኩ ወነገርክዎሙ ለእለ በደማስቆ ወለእለ በኢየሩሳሌም ወለኵሉ በሐውርተ ይሁዳ ወለአሕዛብኒ ወመሀርክዎሙ ይነስሑ ወይትመየጡ ኀበ እግዚአብሔር ወይግበሩ ዘይደሉ ለንስሓሆሙ። ፳፩. በእንተዝኬ አኀዙኒ አይሁድ በምኵራብ ወፈቀዱ ይቅትሉኒ። ፳፪. ወአድኀነኒ እግዚአብሔር ወበጻሕኩ እስከ ዮም ወቆምኩ እንዘ እነግር ለንኡስ ወለዓቢይ ወአልቦ ባዕድ ዘመሀርኩ ዘእንበለ ዘይብሉ ነቢያት ዘሀለዎ ይኩን ሙሴሂ ዘይቤ። ፳፫. ከመ ይትቀተል ክርስቶስ ወያቀድም ተንሥኦ እምዉታን ወያበርህ ለሕዝብ ወለኵሉ አሕዛብ ወበሐውርት።

ስንክሳር Synaxarium

አባ መቃርስ ዘሞተ ሶበ ረገጾ ብእሲ
ወተዝካረ ስቅለቱ ለእግዚእነ

መዝሙር Psalm

መድኃኒቶሙ ለጻድቃን እምኀበ እግዚአብሔር፤
ወቀዋሚሆሙ ውእቱ በጊዜ ምንዳቤሆሙ፤
ይረድኦሙ እግዚአብሔር ወያድኅኖሙ።

ወንጌል Gospel

፴፪. ወሖሩ ዐጸደ ወይን እንተ ስማ ጌቴሴማኒ ወይቤሎሙ ለአርዳኢሁ፦ ንበሩ ዝየ እስከ አሐውር እጼሊ። ፴፫. ወነሥኦሙ ለጴጥሮስ ወለያዕቆብ ወለዮሐንስ ምስሌሁ ወአኀዘ ይተክዝ ወየሐዝን። ፴፬. ወይቤሎሙ፦ ተከዘት ነፍስየ እስከ ለሞት፥ ንበሩ ዝየ ወትግሁ እንከ። ፴፭. ወእምዝ ተአተተ ሕቀ ወሰገደ ውስተ ምድር ወጸለየ ከመ ትኅልፍ እምኔሁ ይእቲ ሰዓት ለእመ ይትከሀል። ፴፮. ወይቤ፦ አባ፥ ወአቡየ፥ ኵሉ ይትከሀለከ አኅልፋ እምኔየ ለዛቲ ጽዋዕ ወባሕቱ ፈቃደ ዚአከ ለይኩን ወአኮ ፈቃደ ዚአየ። ፴፯. ወገቢኦ ረከቦሙ ይነውሙ ወይቤሎ ለጴጥሮስ፦ ስምዖን፥ ተነውምኑ? ወኢትክል ተዐግሦ አሐተ ሰዓተ? ፴፰. ትግሁ ወጸልዩ፥ ከመ ኢትባኡ ውስተ መንሱት፥ እስመ መንፈስ ይፈቅድ ወሥጋ ይደክም። ፴፱. ወሖረ ካዕበ ወጸለየ ወከማሁ ክመ ይቤ። ፵. ወገቢኦ ካዕበ ረከቦሙ ይነውሙ እስመ ከብዳ አዕይንቲሆሙ ወኢያአምሩ ዘይነብበ። ፵፩. ወመጽአ በሣልስ ወይቤሎሙ፦ ኑሙ፥ እንከሰ ወአዕርፉ፥ ምዕረ እስመ ናሁ በጽሐ ጊዜሁ ወናሁ ያገብእዎ ለወልደ እጓለ እመሕያው ውስተ እደ ኃጥኣን። ፵፪. ተንሥኡ ንሑር ናሁ በጽሐ ዘያገብአኒ። ዘቦ እዝን ሰሚዐ ለይስማዕ።

ቅዳሴ Liturgy :

መዝሙረ ዳዊት Psalm

አርዘ ሊባኖስ ዘተከልከ፤
ወበህየ ይትዋለዳ አዕዋፍ፤
ወትጋወሮን ቤተ ሄሮድያኖስ።

ወንጌል Gospel

፩. ወዘንተ ብሂሎ ወጽአ እግዚእ ኢየሱስ ምስለ አርዳኢሁ ማዕዶተ ቄድሮስ ፈለገ አርዝ። ወቦቱ ህየ ገነት ዐጸደ ኀምል ወቦአ እግዚእ ኢየሱስ ውስቴታ ምስለ አርዳኢሁ። ፪. ወያአምሮ ይሁዳ ዘያገብኦ ለውእቱ ብሔር እስመ ብዙኀ ጊዜ ይወፍር እግዚእ ኢየሱስ ህየ ምስለ አርዳኢሁ። ፫. ወነሥኦሙ ይሁዳ ለሠገራተ ሰጲራ እምኀበ ሊቃነ ካህናት ወፈሪሳውያን ወነሥአ ረድኤተ ወዓሊሆሙ። ወሖረ ህየ በመኃትወ ጽጕ ወበፒናት ወበንዋየ ሐቅል። ፬. ወአእሚሮ እግዚእ ኢየሱስ ኵሎ ዘይበጽሕ ላዕሌሁ ወጽአ አፍአ ኀቤሆሙ ወይቤሎሙ፦ መነ ተኀሥሡ? ፭. ወአውሥኡ ወይቤልዎ፦ ኢየሱስሃ ናዝራዌ። ወይቤሎሙ እግዚእ ኢየሱስ፦ አነ ውእቱ። ወሀለወ ይሁዳኒ ዘያገብኦ ይቀውም ምስሌሆሙ። ፮. ወሶበ ይቤሎሙ እግዚእ ኢየሱስ፦ አነ ውእቱ፥ ገብኡ ድኅሬሆሙ ወወድቁ ዲበ ምድር። ፯. ወእምዝ ካዕበ ተስእሎሙ ወይቤሎሙ፦ መነ ተኀሥሡ? ወይቤልዎ፦ ኢየሱስሃ ናዝራዌ። ፰. ወአውሥአ እግዚእ ኢየሱስ ወይቤሎሙ፦ አኮኑ እቤለክሙ አነ ውእቱ። ወእመሰ ኪያየ ተኀሥሡ ኅድግዎሙ ለእሉ ይሑሩ። ዘየአምን በወልድ ቦ ሕይወት ዘለዓለም።

መዝሙረ ዳዊት Psalm

ይፀንሑኒ ወይትኀብኡኒ፤
እሙንቱሰ ሰኰናየ ያስተሐይፁኒ፤
ወዘልፈ ይጸንሕዋ ለነፍስየ።
 

ወንጌል Gospel

፵፬. ወእምዝ ይብል፦ እገብእ ውስተ ቤትየ እምኀበ ወፃእኩ፤ ወመጺኦ ይረክቦ እንዘ ያስተረክብ እድወ ወምሩገ። ፵፭. ወእምዝ የሐውር ወያመጽእ መስሌሁ ሰብዐተ ካልኣነ መናፍስተ እለ የእክዩ እምኔሁ ወበዊኦሙ የኀድሩ ህየ፤ ወይከውን ደኃሪቱ ለውእቱ ብእሲ ዘየአኪ እምቀዳሚቱ፤ ከማሁ ይከውና ለዛቲ ትውልድ እኪት። ፵፮. ወእንዘ ይነግሮሙ ለአሕዛብ ናሁ እሙ ወአኀዊሁ ይቀውሙ አፍአ እንዘ ይፈቅድ ይትናገርዎ። ፵፯. ወቦ እምእርዳኢሁ ዘይቤሎ፦ ናሁ እምከ ወአኀዊከ አፍአ ይቀውሙ ወየኀሥሡ ይትናገሩከ። ፵፰. ወአውሥአ ወይቤ ለዘነገሮ፦ መኑ ይእቲ እምየ? ወእለ መኑ እሙንቱ አኀውየ? ፵፱. ወሰፍሐ እዴሁ ኀበ አርዳኢሁ ወይቤ፦ ናሁ እምየ ወአኀውየ፤ ፶. እስመ ዘገብረ ፈቃዶ ለአቡየ ዘበሰማያት ውእቱ እኁየ ወእኅትየ ወእምየኒ ውእቱ ሰማይ ወምድር የኀልፍ ወቃልየሰ ኢየኀልፍ ይቤ እግዚእ ለአርዳኢሁ።

መልእክተ ጳውሎስ Pauline Epistle

፱. ንትአመነክሙ አኀዊነ ኅሩያን ከመ ትቅረቡ ውስተ እንተ ባቲ ሕይወት እመኒ ከመዝ ንቤለክሙ። ፲. ዘአኮ ይዔምፅ እግዚአብሔር ከመ ይርሳዕ ምግባሪክሙ ወተፋቅሮተክሙ ዘአርአይክሙ በስሙ ወተልእክምዎሙ ለቅዱሳን ወትትለእኩሂ። ፲፩. ወንፈቱሰ ኵልክሙ ከማሁ ታርእዩ ጻሕቀክሙ በዛቲ ተስፈክሙ እስከ ለዝሉፉ። ፲፪. ከመ ኢትኩኑ ድንዙዛነ ወተመሰልዎሙ ለእለ በአሚን ወበትዕግሥት ወረሱ ተስፋሆሙ። ፲፫. እግዚአብሔርኒ አመ አሰፈዎ ለአብርሃም ወአልቦ ባዕድ ዘየዐቢ እምኔሁ ከመ ይምሐል ቦቱ መሐለ በርእሱ። ፲፬. ወይቤ፦ ከመ ባርኮ እባርከከ ወአብዝኆ አስተባዝኀከ። ፲፭. ወእምዝ ተዐጊሦ አድምዐ ተስፋሁ። ፲፮. ወሰብእሰ ይምሕል በዘየዐቢ እምኔሁ ወሞፃእቱ ለቅሥቶሙ በመሐላ የኀልቅ። ፲፯. ወበእንተዝ ፈቀደ እግዚአብሔር ያርኢ ለእለ ይወርሱ ተስፋሁ ከመ ኢይመይጥ ምክሮ ወአጽንዖ በመሐላ ከመ ኢይመይጥ። ፲፰. ወኢይትከሀል ይትሐሰው ቃለ እግዚአብሔር፥ ዐቢየ ፍሥሐ ብነ እለ ተማኅፀነ ወአጽናዕነ ተወክሎ በተስፋነ ዘጽኑሕ ለነ። ፲፱. እንተ ታጸነዓ ከመ መርሶ ለነፍስነ ከመ ኢታንቀልቅል፥ ወታበውእ ውስተ ውሣጤ መንጦላዕት። ፳. ኀበ ቦአ ኢየሱስ ሐዋርያነ እምቅድሜነ ሊቀ ካህናት በከመ ሢመቱ ለመልከ ጼዴቅ ከዊኖ ዘለዓለም።

ዘካልእ መልእክት Universal Epistle

፲፪. አኀዊነ ኢታንክርዋ ለእንተ ትመጽአክሙ መከራ ከመ ዘነኪር ግብር ዘይከውን ብክሙ። ፲፫. ዳእሙ ከመ ትሳተፍዎ በሕማሙ ለክርስቶስ ወተፈሥሑ ከመ አመ ያስተርኢ በስብሐቲሁ ትትሐሠዩ ፍሡሓኒክሙ። ፲፬. ወእመሰቦ ዘተዐየሩክሙ በእንተ ስሙ ለክርስቶስ ብፁዓን አንትሙ እስመ ስብሐቲሁ ወኀይሉ ለእግዚአብሔር ወመንፈሱ ያዕርፍ ላዕሌክሙ። ፲፭. አልቦ ዘየሐምም እምውስቴትክሙ አው ከመ ቀታሊ አው ከመ ሰራቂ አው ከመ ዘእኩይ ምግባሩ አው ከመ ዘባዕደ ያፈቅር ወይፈቱ። ፲፮. ወእመሰ ከመ ክርስቲይናዊ ኢትኅፈሩ አላ ሰብሕዎ ለእግዚአብሔር በዝንቱ ስም። ፲፯. እስመ በጽሐ ጊዜሁ ለፍዳ ዘያቀድም እምነ ቤቱ ለእግዚአብሔር። ወእመሰ ኮነ እምኀቤነ አቅድሞቱ ምንተ እንከ ይከውን ደኃሪቶሙ ለእለ ይክሕድዎ ለወንጌሉ ለእግዚአብሔር? ፲፰. ወሶበ ጻድቅ እምዕፁብ ይድኅን፥ ኃጥእ ወዐማፂ በአይቴ ያስትርኢ ሀለዎ? ፲፱. ወእለኒ የሐምሙ በእንተ ፈቃዱ ለእግዚአብሔር ያማኅፅኑ ነፍሶሙ ኀበ ምእመን ፈጣሪ በገቢረ ሠናይ። ኦ አኃውየ ብቍዑኒ።

ግብረ ሃዋርያት Acts

፲፪. ወሶበ ርእዮሙ ጴጥሮስ ለሕዝብ ወይቤሎሙ፦ አንትሙ ሰብአ እስራኤል ምንትኑ ታነክሩ ዘንተ ወኪያነኒ? ምንትኑ ትኔጽሩነ ከመ ዘበኃይልነ ወከመ ዘበጽድቅነ ረሰይናሁ ለዝንቱ ከመ ይሑር በእገሪሁ? አልቦኬ። ፲፫. አላ አምላከ አብረሃም ወአምላከ ይስሐቅ ወአምላከ ያዕቆብ። አምላከ አበዊነ ሰብሖ ለወልዱ ኢየሱስ ክርስቶስ ዘአንትሙ ዓለውክምዎ ወክሕድክምዎ በቅድመ ገጸ ጲላጦስ ፈቂዶ ውእቱ ያሕይዎ ለክሙ። ፲፬. ወአንትሙሰ ክሕድክምዎ ለቅዱስ ወለጻድቅ። ወሰአልክሙ ብእሴ ቀታሌ ነፍስ ያሕዩ ለክሙ። ፲፭. ወለመልአከ ሕይወትሰ ቀተልክምዎ ወእግዚአብሔር አንሥኦ እሙታን ወንሕነ ሰማዕቱ። ፲፮. ከመ በሃይማኖተ ስሙ ለዝ ዘትሬእዩ ወታአምሩ አጽንዖ ወበሃይማኖተ ዚአሁ ወሀቦ ዘንተ ሕይወተ በቅድሜክሙ።

ስንክሳር Synaxarium

ተዝካረ አብርሃም ይስሐቅ ወያዕቆብ
መርትያኖስ ወመርቆሬዎስ
አባ መቅዩ
ወአባ መቃርስ
ወያፌት ወልደ ኖህ
ወአባ ይምዐታ ፩ዱ እምቅዱሳን

መዝሙር Psalm

ትውልደ ጻድቃን ይትባረኩ፤
ክብር ወብዕል ውስተ ቤቱ፤
ወጽድቁኒ ይነብር ለዓለመ ዓለም።

ወንጌል Gospel

፭. ወበዊኦ ቅፍርናሆም መጽአ ኀቤሁ መስፍን ምእት። ፮. ወይቤሎ፦ እግዚኦ፥ ብቍዐኒ ቍልዔየ ድውይ ወይሰክብ ውስተ ቤት ወመፃጕዕ ወጥቀ ፅዑር። ፯. ወይቤሎ እግዚእ ኢየሱስ፦ ነየ እመጽእ፥ አነ ወእፌውሶ። ፰. ወአውሥአ ሐቤ ምእት ወይቤ፦ እግዚኦ፥ ኢይደልወኒ ከመ አንተ ትባእ ታሕተ ጠፈርየ። ዳእሙ በል ቃለ ወየሐዩ ወልድየ። ፱. እስመ አነሂ ብእሲ መኰንን አነ ወብየ ሐራ እለ እኴንን። ወእብሎ ለዝ፦ ሑር፥ ወየሐውር፥ ወለካልኡኒ፦ ነዓ፥ ወይመጽእ ወለገብርየኒ፦ ግበር፥ ዘንተ ወይገብር። ፲. ወሰሚዖ እግዚእ ኢየሱስ አንከረ ወይቤሎሙ ለእለ ይተልውዎ፦ አማን እብለክሙ፥ ኢረከብኩ ዘመጠነዝ ሃይማኖት በውስተ ኵሉ እስራኤል። ፲፩. ወባሕቱ እብለክሙ፥ ብዙኃን ይመጽኡ እምሥራቅ ወእምዕራብ ወይረፍቁ ምስለ አብርሃም ወይስሐቅ ወያዕቆብ በመንግሥተ ሰማያት። ፲፪. ወለውሉደ መንግሥትሰ ያወፅእዎሙ ውስተ ጸናፊ ጽልመት። ህየ ሀሎ ብካይ ወሐቅየ ስነን። ፲፫. ወይቤሎ እግዚእ ኢየሱስ ለውእቱ ሐቤ ምእት፦ ሑርኬ፥ ወበከመ ተአመንከ ይኩንከ፤ ወሐይወ ወልዱ በይእቲ ሰዓት፤ ወገቢኦ መስፍን ውሰተ ቤቱ ረከቦ ለቍልዔሁ ሐይዎ። ሰማይ ወምድር የኀልፍ ወቃልየሰ ኢየኀልፍ ይቤ እግዚእ ለአርዳኢሁ።

ቅዳሴ Liturgy :

መዝሙረ ዳዊት Psalm

ረኀቁ እምኔየ ኵልክሙ ገበርተ ዓመፃ፤
እስመ ሰምዐኒ እግዚአብሔር ቃለ ብካይየ፤
ወሰምዐኒ እግዚአብሔር ስእለትየ።
 

ወንጌል Gospel

፳፩. ወአምጣነ የዐቅብ ኀያል ዐጸዶ ርሱዩ በንዋየ ሐቅሉ ዳኅን ኵሉ ጥሪቱ። ፳፪. ወእመሰ ይመጽእ ዘይኄይሎ ይመውኦ ወይሰልቦ ንዋየ ሐቅሉ ዘቦቱ ይትአመን ወይከፍል በርበሮ። ፳፫. ዘኢሀሎ ምስሌየ ዕድውየ ውእቱ ወዘኢይትጋባእ ምስሌየ ይዘርወኒ። ፳፬. ወሶበ ይወፅእ ጋኔን እኩይ እምሰብእ የዓውድ በድወ ወየኀሥሥ ምንባረ ኀበ ያዐርፍ ወእምከመ ኢረከበ ይብል፦ እገብእ ቤትየ እምኀበ ወፃእኩ። ፳፭. ወመጺኦ ይረክቦ እንዘ ያስተራክብ እድወ ወኵስቱረ። ፳፮. ወእምዝ የሐውር ወያመጽእ ሰብዐተ ቢጾ አጋንንተ እለ የአክይዎ ወይበውእዎ ላዕሌሁ ወየኀድሩ ወይብእሶ ደኃሪቱ ለውእቱ ብእሲ እምቀዳሚቱ። ይቀልል ኅልፈተ ሰማይ ወምድር፥ እምትደቅ አሐቲ ቃል እምኦሪት ወእምነቢያት፥ ይቤ እግዚእ ለአርዳኢሁ።