መዝሙረ ዳዊት Psalm

አሐተ ሰአልክዎ ለእግዚአብሔር ወኪያሃ አኃሥሥ፤
ከመ እኅድር ቤቶ ለእግዚአብሔር በኵሉ መዋዕለ ሕይወትየ፤
ወከመ ያርእየኒ ዘያሠምሮ ለእግዚአብሔር።

ወንጌል Gospel

፴፯. ወሰምዕዎ ክልኤሆሙ አርዳኢሁ እንዘ ይብል ከመዝ ወተለውዎ ለእግዚእ ኢየሱስ። ፴፰. ወተመይጦ እግዚእ ኢየሱስ ርእዮሙ እንዘ ይተልውዎ ወይቤሎሙ፦ ምንተ ተኅሥሡ? ወይቤልዎ፦ ረቢ፥ ዘበትርጓሜሁ ሊቅ ብሂል፥ አይቴ ተኅድር? ፴፱. ወይቤሎሙ፦ ንዑ ትርአዩ ኅበ አኅድር፤ ወሖሩ ወርእዩ ኀበ የኀድር፥ ወወዐሉ ኅቤሁ ይእተ ዕለተ አስከ ዓሥሩ ሰዓት። ዘየአምን በወልድ ቦ ሕይወት ዘለዓለም።

መልእክተ ጳውሎስ Pauline Epistle

፯. እስመ አኮ መንፈሰ ፍርሀት ዘወሀበነ እግዚአብሔር ዘእንበለ መንፈሰ ኀይል ወንጽሕ ወተፋቅር ወጥበብ። ፰. ወኢትኅፈር እንከ በእንተ ስምዑ ለእግዚእነ ወኢታስተኀፍረኒ ኪያየ ሙቁሑ ዳእሙ ጻሙ ለምህሮ በኀይለ እግዚአብሔር። ፱. ዘአድኀነነ ወጸውዐነ በጽዋዔሁ ቅዱስ፥ ወአኮ በከመ ምግባሪነ ዳእሙ በከመ ፈቃዱ ወጸጋሁ ዘተውህበ ለነ በኢየሱስ ክርስቶስ እምቅድመ ዓለመ። ፲. ወአስተርአየ ይእዜ በምጽአቱ ለእግዚእነ ኢየሱስ ክርስቶስ መድኀኒነ ዘሰዐሮ ለሞት ወአብርሃ ለሕይወት ወለሰሰለ ሙስና በትምህርተ ወንጌሉ። ፲፩. ዘሎቱ ተሠየምኩ ሐዋርያ ወዐዋዴ ወመምህረ ለአሕዛብ። ፲፪. ወበእንቲአሁ አሐምም ወኢይትኀፈር እንዘ አነ ቦቱ። እስመ አአምር ዘተአመንኩ ወእትአመንሂ ከመ ይክል ዐቂበ ሊተ ዘአማኅፀንክዎ እስከ ይእቲ ዕለት። ፲፫. ወለይኩን ለከ አርአያ ውእቱ ቃለ ሕይወት ዘሰማዕከ በኀቤየ በሃይማኖት ወበፍቅረ ክርስቶስ ኢየሱስ። ፲፬. ዕቀብ ማኅፀንተከ ሠናየ በመንፈስ ቅዱስ ዘኅዱር ላዕሌነ።

ዘካልእ መልእክት Universal Epistle

፪. ረዐዩ ዘሀሎ ኀቤክሙ መርዔቶ ለእግዚአብሔር እንዘ ተዐቅብዎሙ ወኢትቅንይዎሙ በኵርህ አላ በጽድቅ በእንተ እግዚአብሔር እንዘ ኢትሬብሕዎሙ አላ በምልአ ልብክሙ ወበትፍሥሕት። ፫. እንዘ ኢትትኄየሉ ሕዝቦ አላ አርአያ ኩንዎሙ ለመርዔቱ። ፬. ከመ አመ ያስተርኢ እግዚአ ኖሎት ትንሥኡ አክሊለ ስብሐት ዘኢይጸመሂ። ፭. ወከማሁ አንትሙሂ ወራዙት ተኰነኑ ለእለ ይልህቁክሙ ወኵልክሙ ተመሀርዋ ለአትሕቶ ርእስክሙ እስመ፦ እግዚአብሔር ያኀስሮሙ ለዕቡያን ወያከብሮሙ ለእለ ያቴሕቱ ርእሶሙ። ፮. አትሕቱ እንከ ርእስክሙ ታሕተ እዴሁ ለእግዚአብሔር ጽንዕት ከመ ያልዕልክሙ አመ ይሔውጸክሙ። ፯. ወኵሎ ሕሊናክሙ ግድፉ ላዕሌሁ እስመ ውእቱ ይሔሊ በእንቲአክሙ። ፰. ጥበቡ እንከ ወአጥብቡ ልበክሙ እስመ ጸላኢክሙ ጋኔን ይጥሕር ከመ አንበሳ ወየኀሥሥ ዘይውኅጥ።

ግብረ ሃዋርያት Acts

፶፬. ወዘንተ ሰሚዖሙ ተምዕዑ ወአብደ ልቦሙ ወሐቀዩ ስነኒሆሙ ላዕሌሁ። ፶፭. ወመልአ መንፈስ ቅዱስ ላዕለ እስጢፋኖስ ወነጸረ ሰማየ ወርእየ ስብሐተ እግዚአብሔር ወኢየሱስ ይቀውም በየማነ እግዚአብሔር። ፶፮. ወይቤ፦ ናሁ እሬኢ ተርኅወ ሰማይ ወወልደ እጓለ እመሕያውሰ ይቀውም በየማነ እግዚአብሔር። ፶፯. ወከልሑ በዓቢይ ቃል ወከደኑ እዘኒሆሙ ወሮድዎ ኅቡረ ወሰሐብዎ። ፶፰. ወአውፅእዎ አፍአ እምሀገር ወወገርዎ። ወአንበሩ ሎቱ ሰማዕተ። ወእለ ይወግርዎ አዕቀቡ አልባሲሆሙ ወአንበሩ ኀበ እገሪሁ ለወሬዛ ወልድ ዘስሙ ሳውል። ፶፱. ወወገርዎ ለእስጢፋኖስ እንዘ ይጼሊ ወይብል፦ ኦእግዘእየ ኢየሱስ፥ ተመጠዋ ለነፍስየ። ፷. ወሶበ ሰገደ ከልሐ በዓቢይ ቃል ወይቤ፦ እግዚኦ ስረይ ሎሙ ዘንተ ኃጢአቶሙ ወኢትረሲ ጌጋየ። ወዘንተ ብሂሎ ኖመ።

ስንክሳር Synaxarium

ፊላታዎስ ሰማዕት ኤጲስ ቆጶስ ዘቆምስ
ወጎርጎርዮስ እህወ ባስልዮስ
ወዲዮስቆሮስ ሊቀ ጳጳሳት ዘእስክንድርያ
ወእስጢፋኖስ
ወልደተ ሐና እመ ሳሙኤል

መዝሙር Psalm

ጽንሐሐኒ ኢትሠምር፤
መሥዋዕቱ ለእግዚአብሔር መንፈስ የዋህ፤
ልበ ትሑተ ወየዋሀ ኢይሜንን እግዚአብሔር።

ወንጌል Gospel

፩. ወነጸረ ወርእየ አብዕልተ ዘከመ ያበውኡ መባኦሙ ውስተ ምውዳየ ምጽዋት። ፪. ወርእየ እቤረ መበለተ አበአት ክልኤ ጸሪቀ። ፫. ወይቤሎሙ፦ አማን እብለክሙ ከመ ዛቲ እቤር ነዳይት አብዝኀት አብኦ መባአ ለእግዚአብሔር። ፬. እስመ እሉ ኵሎሙ እምተረፎሙ አብኡ ለእግዚአብሔር ወዛቲሰ እምተጽናሳ ኵሎ ጥሪታ ዘባ አብአት። ፭. ወቦ እለ ይቤልዎ በእንተ ቤተ መቅደስ ሠናየ እበኒሁ ወስርግው ንድቁ ወይቤሎሙ፦ ፮. ትሬእዩኑ ዘንተ፤ ይመጽእ መዋዕል አመ ኢይትኀደግ ዝየ እብን ዲበ እብን ዘኢይትነሠት። ይቀልል ኅልፈተ ሰማይ ወምድር፥ እምትደቅ አሐቲ ቃል እምኦሪት ወእምነቢያት፥ ይቤ እግዚእ ለአርዳኢሁ።

ቅዳሴ Liturgy :

መዝሙረ ዳዊት Psalm

ጻድቅ አንተ እግዚኦ ወርቱዕ ኵሉ ኵነኔከ፤
ወአዘዝከ ስምዐከ በጽድቅ፤
ወርቱዕ ፈድፋደ።

ወንጌል Gospel

፳. ወተግሒሦሙ አጽንሑ ሎቱ እለ ይትዐቀብዎ እለ ያጸድቁ ርእሶሙ ከመ ያስሕትዎ በቃሉ ወከመ ያግብእዎ ለመኳንንት ወለመሳፍንት። ፳፩. ወተስእልዎ ወይቤልዎ፦ ሊቅ ናአምር ከመ ጽድቀ ትነግር ወትሜህር ወኢታደሉ ለገጽ ወርቱዐ ትሜህር ፍኖተ እግዚአብሔር። ፳፪. ይከውነነሁ ነሀብ ጸባሕተ ለቄሳር ወሚመ አልቦኑ? ፳፫. ወኣእመሮሙ ትምይንቶሙ ወይቤሎሙ፦ ምንተ ታሜክሩኒ? ፳፬. አርእዩኒ ዲናረ። ወአምጽኡ ወይቤሎሙ፦ ዘመኑ መልክዑ ወመጽሐፉ? ወአውሥእዎ ወይቤልዎ፦ ዘነጋሢ ዘቄሳር። ፳፭. ወይቤሎሙ፦ ሀብዎ ዘቄሳር ለቄሳር ወዘእግዚአብሔር ለእግዚአብሔር። ፳፮. ወስእንዎ አስሕቶቶ በቃሉ በቅድመ ኵሉ ሕዝብ ወአንከርዎ ሣእሣኦ ወአርመሙ። ይቀልል ኅልፈተ ሰማይ ወምድር፥ እምትደቅ አሐቲ ቃል እምኦሪት ወእምነቢያት፥ ይቤ እግዚእ ለአርዳኢሁ።

መዝሙረ ዳዊት Psalm

ዘአመከሩኒ አበዊክሙ፤
ፈተኑኒ ወርእዩ ምግባርየ፤
፵ ዓመተ ተቈጣዕክዋ ለይእቲ ትውልድ።

ወንጌል Gospel

፲፭. ወእምዝ ወጺኦሙ ፈሪሳውያን ወተማከሩ ላዕለ እግዚእ ኢየሱስ ከመ ያስሕትዎ በቃሉ። ፲፮. ወፈነዉ ኀቤሁ አርዳኢሆሙ ምስለ ሰብአ ሄሮድስ፤ ወይቤለዎ፦ ሊቅ፥ ናአምር ከመ ራትዕ አንተ ወበጽድቅ ትሜህር ፍኖተ እግዚአብሔር ወኢተሐስብ መነሂ ወኢታደሉ ለገጸ ሰብእ። ፲፯. ንግረነኬ እንከ ዘይረትዐከ? ይብውንሁ ውሂበ ጸባሕተ ዲናር ለንጉሥ ወሚመ ኢይከውንኑ? ፲፰. ወአእሙሮሙ እግዚእ ኢየሱስ እከዮሙ ወይቤሎሙ፦ ምንተ ታሜክሩኒ መድልዋን? ፲፱. አርእዩኒ አላደ ዲናር። ወአምጽኡ ሎቱ ዲናረ። ፳. ወይቤሎሙ እግዚእ ኢየሱስ፦ ዘመኑ ዝንቱ መልክዑ ወመጽሐፉ? ፳፩. ወይቤሎዎ፦ ዘነጋሢ። ወይቤሎሙ፦ ሀቡ ዘነጋሢ ለነጋሢ ወዘእግዚአብሔር ለእግዚአብሔር። ፳፪. ወሰሚዖሙ አንከሩ ወኀደግዎ ወኀለፉ። ሰማይ ወምድር የኀልፍ ወቃልየሰ ኢየኀልፍ ይቤ እግዚእ ለአርዳኢሁ።

መልእክተ ጳውሎስ Pauline Epistle

፯. ወርቱዕ ይሠየም ጳጳስ ዘአልቦ ሐሜት ዘኢያደሉ ከመ መጋቤ እግዚአብሔር ዘኢኮነ መዓትመ ዘልቡብ ዘኢያበዝኅ ሰትየ ወኢያፈጥን እዴሁ ለዘቢጥ ወዘኢያፈቅር ንዋየ ከንቶ። ፰. መፍቀሬ ነግድ ዘሠናይ ምግባሩ ዘያነጽሕ ርእሶ ጻድቅ ወኄር ወየዋህ መስተዓግሥ ዘያነሐሲ። ፱. ዘምሁር ቃለ ሃይማኖት፥ ዘይክል ገሥጾ በትመህርተ ሕይወት ወይዘልፎሙ ለእለ ይትዋሥኡ። ፲. እስመ ብዙኃን እለ ኢይትኤዘዙ ወነገሮሙኒ ከንቱ ወያስሕትዎሙ ለጽሉላነ ልብ፥ ወፈድፋደሰ እለ እምአይሁድ። ፲፩. እለ ርቱዕ ይፍፅምዎሙ አፋሆሙ እስመ እሉ ይገፈትኡ አብያተ ኵሉ ወይሜህሩ በዘኢይደሉ በዘይረብሖሙ ኀሳር። ፲፪. ወናሁ ይቤ አሐዱ እምኔሆሙ ነቢዮሙ በእንቲአሆሙ፦ እስመ ሰብአ ቀርጤስ መደልዋን ሐሳውያን ዘልፈ አራዊት እኩያን ከርሠ መካን። ፲፫. ወዝንቱ ስምዕ እሙን ላዕሌሆሙ። በእንተ ዝንቱ ተዛለፎሙ ምቱረ ከመ ይጠይቁ በሃይማኖት።

ዘካልእ መልእክት Universal Epistle

፫. ይትባረክ እግዚአብሔር አቡሁ ለእግዚእነ ኢየሱስ ክርስቶስ ዘወለደነ በብዝኀ ምሕረቱ ለተስፋ እንተ ባቲ ነሐዩ በተንሥኦቱ ለእግዚእኒ ኢየሱስ ክርስቶስ እምነ ምውታን። ፬. ለተዋርሶ ዘኢይበሊ ወዘኢይረኵስ ወዘኢይጸመሂ ዘዕቁብ ለነ ወለክሙ በሰማያት። ፭. ለእለ በኃይለ እግዚአብሔር ዕቁባን በሃይማኖት ለመድኃኒት እንተ ድሉት ከመ ታስተርኢ በደኃሪ መዋዕል። ፮. ወትትፌሥሑ እስከ ለዓለም፥ ወባሕቱ ኅዳጠ ይእዜ ሀለወክሙ ትተክዙ በዘይመጽአክሙ መከራ ዘዘዚአሁ። ፯. ከመ መከራሃ ለሃይማኖትክሙ ዘይትበደር ፈድፋደ እምነ ወርቅ ዘይማስን ዘበእሳት አመከርዎ ወትትረከብ ሀለዋ በክብር ወበውዳሴ ወበስብሐት አመ ያስተርኢ ኢየሱስ ክርሰቶስ። ፰. ውእቱኬ ዘታፈቅርዎ እንዘ ኢትሬእይዎ፥ ወእስከ ይእዜ ኢርኢክምዎ፥ ወባሕቱ ተአምኑ ቦቱ፥ ወይእዜኒ ትትፌሥሑ በፍሥሐ እንተ አልባቲ ማኅለቅት ወስብሕት። ፱. እንዘ ትነሥኡ በፍጻሜሃ ለሃይማኖትክሙ መድኀኒተ ነፍስክሙ።

ግብረ ሃዋርያት Acts

፴፩. ወይእዜኒ ትግሁ ወተዘከሩ ከመ ሠለስተ ዓመተ ኢነተገ አንብዕየ ሌሊተ ወመዐልተ እንዘ እሜህረክሙ ለኵልክሙ። ፴፪. ወይእዜኒ አማኅፀንኩክሙ ኀበ እግዚአብሔር ወለቃለ ጸጋሁ ዘይክል ሐኒጾተክሙ ወየሀብክሙ ርስተ ምስለ ኵሎሙ ቅዱሳን። ፴፫. ታአምሩ ከመ ኢተሰቆቁ ንዋየክሙ ኢወርቀ ወኢብሩረ ወኢአልባሰ ኢነሣእኩ ወኢኀበ አሐዱሂ እምኔክሙ። ፴፬. ለሊክሙ ታአምሩ ኢለትካዝየ ወኢለእለ ምስሌየ ተቀንያ እላንቱ እደውየ። ፴፭. እስመ ከማሁ ይደልወነ ከመ በጻማነ ወበተግባርነ ንትወከፎሙ ለድኩማን። ወዘንተ መሀርኩክሙ ዘንተ ተዘከሩ ቃሎ ለእግዚእነ ኢየሱስ ዘይቤ፦ ብፁዕ ዘይሁብ እምዘ ይነሥእ። ፴፮. ወዘንተ ብሂሎ ሰገደ ወጸለየ ምስለ ኵሎሙ። ፴፯. ወብዙኀ በከዩ ኵሎሙ ወሐቀፍዎ ክሳዶ ለጳውሎስ ወሰዐምዎ፤ ፴፰. እንዘ ይቴከዙ ወፈድፋደሰ እስመ ይቤሎሙ፦ ኢትሬእዩኒ ገጽየ። ወፈነውዎ ወዐርገ ሐመረ።

ስንክሳር Synaxarium

ቴዎፍሎስ ሊቀ ጳጳሳት
ወሮማኖስ ሰማዕት
ወዮሐንስ
ወአድላ
ወአርቴማዎስ
ወኤርስጦስ
ወሉዲኖስ
ወ፫ቱ ደቂቅ

መዝሙር Psalm

ወይረውዩ እምጠለ ቤትከ፤
ወትሰቅዮሙ ፈለገ ትፍሥሕትከ፤
እስመ እምኀቤከ ነቅዐ ሕይወት።

ወንጌል Gospel

፲፫. ወፈነዉ ኀቤሁ እምፈሪሳውያን ምስለ ሰብአ ሄሮድስ ከመ ያስሕትዎ በቃሉ። ፲፬. ወመጽኡ ኀቤሁ ወይቤልዎ፦ ሊቅ፥ ናአምር ከመ ጻድቅ አንተ ወአልቦ ዘያሐዝነከ ወኢመኑሂ፥ ወኢታደሉ ለገጸ ሰብእ፥ ወበጽድቅ ትሜህር ፍኖተ እግዚአብሔር። ይከውነነሁ ነሀብ ጸባሕተ ዲናር ለነጋሢ አው አልቦ? ፲፭. ወአእመሮሙ እግዚእ ኢየሱስ ጕሕሉቶሙ ወይቤሎሙ፦ ለምንትኑ ታሜክሩኒ? አምጽኡ ዲናረ ወአርእዩኒ። ፲፮. ወአምጽኡ ሎቱ ወይቤሎሙ፦ ዘመኑ ዝንቱ መልክዑ ወመጽሐፉ? ወይቤልዎ፦ ዘነጋሢ። ፲፯. ወአውሥአ እግዚእ ኢየሱስ ወይቤሎሙ፦ ሀቡ ዘነጋሢ ለነጋሢ፥ ወዘእግዚአብሔርኒ ግበሩ ለእግዚአብሔር። ወአንከርዎ። ዘቦ እዝን ሰሚዐ ለይስማዕ።

ቅዳሴ Liturgy :

መዝሙረ ዳዊት Psalm

ንግሩ ለእግዚአብሔር ምሕረቶ፤
ወመንክሮሂ ለዕጓለ እመሕያው፤
እስመ አጽገበ ነፍሰ ርኅብተ።

ወንጌል Gospel

፲. ወእምዝ ዐርገ ሐመረ ምስለ አርዳኢሁ ወበጽሐ ውስተ ደወለ ደልማኑታ። ፲፩. ወወፅኡ ፈሪሳውያን ወአኀዙ ይትኃሠሥዎ ወይስአልዎ ትእምርተ እምሰማይ እንዘ ያሜክርዎ። ፲፪. ወተከዘ በመንፈሱ ወይቤ፦ ምንትኑ ተኀሥሥ ትእምርተ ዛቲ ትውልድ? አማን አብለክሙ፥ ከመ ኢይትወሀባ ለዛቲ ትውልድ ትእምርት። ፲፫. ወኀደጎሙ ወዐርገ ካዕበ ሐመረ ወሖረ ማዕዶተ። ፲፬. ወረስዑ ነሢአ ኅብስት ወአልቦሙ ዘእንበለ አሐቲ ኅብስት ምስሌሆሙ ውስተ ሐመር። ፲፭. ወአዘዞሙ ወይቤሎሙ፦ ዑቁ ወተዓቀቡ እምነ ብሑአ ፈሪሳውያን ወእምነ ብሑአ ሄሮድስ። ዘቦ እዝን ሰሚዐ ለይስማዕ።

መዝሙረ ዳዊት Psalm

ወነበቡ ዓመፃ ውስተ አርያም፤
ወአንበሩ ውስተ ሰማይ አፉሆሙ፤
ወአንሶሰወ ውስተ ምድር ልሳኖሙ።

ወንጌል Gospel

፴፪. ኵሉ እንከ ዘየአምን ብየ በቅድመ ሰብእ አአምኖ አነሂ በቅድመ አቡየ ዘበሰማያት። ፴፫. ወለዘሰ ክሕደኒ በቅድመ ሰብእ እክሕዶ አነሂ በቅድመ አቡየ ዘበሰማያት። ፴፬. ኢይምሰልክሙ ዘመጻእኩ ሰላመ እደይ ውስተ ምድር፥ ኢመጻእኩ እደይ ሰላመ አላ መጥባሕተ። ፴፭. ወመጻእኩ እፍልጥ ብእሴ እምአቡሁ ወወለትኒ እምእማ ወመርዓተኒ እምሐማታ። ፴፮. ወፀሩ ለሰብእ ሰብአ ቤቱ። ፴፯. ዘያፈቅር አባሁ ወእሞ እምኔየ ኢይደሉ ሊተ። ወዘያፈቅር ወልደ ወወለቶ እምኔየ ኢይደሉ ሊተ። ፴፰. ወዘኢነሥአ መስቀሎ ወዘኢተለወ ድኅሬየ ኢይደሉ ሊተ። ፴፱. ዘረከባ ለነፍሱ ይገድፋ፤ ወዘሰ ገደፋ ለነፍሱ በእንቲአየ ይረክባ። ፵. ዘኪያክሙ ተወክፈ ኪያየ ተወክፈ፤ ወዘኪያየ ተወክፈ ተወክፎ ለዘፈነወኒ። ፵፩. ዘተወክፈ ነቢየ በስመ ነቢይ ዐስበ ነቢይ ይነሥእ። ወዘተወክፈ ጻድቀ በስመ ጻድቅ ዐስበ ጻድቅ ይነሥእ። ፵፪. ወዘአስተየ አሐደ እምእሉ ንኡሳን ጽዋዐ ማይ ቈሪር ባሕቲቶ በስመ ረድእ አማን እብለክሙ ኢያሐጕል ዐስቦ። ሰማይ ወምድር የኀልፍ ወቃልየሰ ኢየኀልፍ ይቤ እግዚእ ለአርዳኢሁ።

መልእክተ ጳውሎስ Pauline Epistle

፰. እሙን ነገር ወበእንተዝ እፈቅድ ታጽንዖሙ ከመ የሐልዩ ተራድአ ምግባረ ሠናይ እለ ተአመኑ በእግዚአብሔር። ዝንቱኬ ሠናይ ዘይበቍዖ ለሰብእ። ፱. ነገረ ጋእዝ ወእበድ ዘይፈጥሩ ወመኃደምት ወወካሕ ተገሐሦሙ እስመ ከንቱ ውእቱ ወኢይበቍዕ። ፲. ለመስተካሕድ ብእሲ እምከመ ምዕረ ወካዕበ ገሠጽኮ ወአበየ ኅድጎ። ፲፩. ወአእምሮ ከመ ዐላዊ ውእቱ ዘከማሁ ወያስሕት ወያጌጊ ወይረክብ ኵነኔ። ፲፪. ወእምከመ ፈነውክዎ ለአርጢሞን ኀቤከ አው ቲኪቆስ ፍጡነ ነዓ ኀቤየ ሀገረ ኒቆጵልዮን እስመ አጥባዕኩ እክረም ህየ። ፲፫. ለዜናስ ጸሓፌ ሀገር ወአጵሎስ ጽሁቀ ፈንዎሙ ኢይጸነሱ ምንተኒ። ፲፬. ወእሊአነሂ ይትመሀሩ ምግባረ ሠናየ በዘይቀውሙ ውስተ ዘይትፈቀድ ግብር ከመ ኢይኅጥኡ ፍሬ። ፲፭. አምኁከ ኵሎሙ እለ ምስሌየ አምኀ ኵሎ ዘያፈቅረነ በሃይማኖት፥ ጸጋ የሀሉ ምስለ ኵልክሙ አሜን። ተፈጸመት መልእክት ኀበ ቲቶ፥ ወተጽሕፈት በሀገረ ናቆጵል፥ ወተፈነወት ምስለ አርጣማ ረድኡ። ወስብሐት ለእግዚአብሔር፥ አሜን።

ዘካልእ መልእክት Universal Epistle

፳፪. ወመኑ ውእቱ ሐሳዊ ዘእንበለ ዘይክሕድ ወይብል እስመ ኢየሱስ ኢኮነ መሲሕ? ወዝንቱ ውእቱ ሐሳዌ መሲሕ ዘይክሕድ በአብ ወበወልድ። ፳፫. ወኵሉ ዘይክሕድ በወልድ ወበአብኒ ኢሀለወ። ወዘሰ የአምን በወልድ ወበአብኒ ሀለወ። ፳፬. ወአንትሙሰ ዘሰማዕክሙ ትካት ለይንበር ኀቤክሙ ወእመሰ ዘሰማዕክሙ ትካት ነበረ ኀቤሙ ወአንትሙኒ ትነብሩ በአብ ወበወልድ። ፳፭. ወዛቲ ይእቲ ተስፋ እንተ አሰፈወነ ሕይወተ ዘለዓለም። ፳፮. ወዘንተ ንጽሕፍ ለክሙ በእንተ እለ ያስሕቱክሙ።

ግብረ ሃዋርያት Acts

፲፩. ወርእዮሙ አሕዛብ ዘገብረ ጳውሎስ ከልሑ በነገረ ሊቃኦንስጢ ወይቤሎ፦ አማልክት ሰብአ ተመሰሉ ወወረዱ ኀቤነ። ፲፪. ወሰመይዎ ለበርናባስ፦ ድያ ወለጳውሎስ፦ ሄርሜን እስመ ውእቱ ሊቀ ትምህርቱ። ፲፫. ወአምጽኡ ማሬ ዘድያስ ዘሀሎ ቅድመ ሀገር ምስለ አልህምት ወመሣውዕ ኀበ አንቀጸ ዐጸደ ማኀበሮሙ ምስለ ሕዘቢሆሙ ወፈቀዱ ከመ ይሡዑ ሎሙ። ፲፬. ወሰሚዖሙ ሐዋርያት በርናባስ ወጳውሎስ ሰጠጡ አልባሲሆሙ ወሖሩ ኀበ አሕዛብ ወከልሑ ሎሙ። ፲፭. ወይቤልዎሙ፦ አንትሙ ሰብእ ምንትኑ ዝነገር? አኮኑ ከማክሙ ሰብእ ንሕነ ዘንመውት ወንሜህረክሙ ከመ ትኅድጉ ዘንተ ከንቶ ወትትመየጡ ኀበ እግዚአብሔር ሕያው ዘገብረ ሰማየ ወምድረ ወባሕረ ወኵሎ ዘውስቴቶሙ። ፲፮. ወኀደጎሙ ለኵሎሙ አሕዛብ ይሑሩ በግዕዞሙ በዘቀዲሙ መዋዕል።

ስንክሳር Synaxarium

በርተሎሜዎስ ሰማዕት ወብእሲቱ
ወማሕበረ ቅዱሳን ወጉባኤሆሙ በአንጾኪያ በእንተ ጳውሎስ ሳምሳጢ
ወዮሐንስ ዘጸይለም
ወጻድቃን እለ መጠራ
ወይምራህ ንጉሥ

መዝሙር Psalm

እስከ ማእዜኑ እንከ እግዚኦ ይጼእል ፀራዊ፤
ወዘልፈ ያምዕዖ ለስምከ ጸላኢ፤
ለምንት እግዚኦ ትመይጥ እዴከ።

ወንጌል Gospel

፰. እብለክሙ ኵሉ ዘየአምን ብየ በቅድመ እጓለ እመሕያው አአምኖ አነሂ በቅድመ መላእክተ እግዚአብሔር። ፱. ወዘሰ ክሕደኒ በቅድመ እጓለ እመሕያው እክሕዶ አነሂ በቅድመ መላእክተ እግዚአብሔር። ፲. ወኵሉ ዘነበበ ቃለ ፅርፈት ላዕለ ወልደ እጓለ እመሕያው ይትኀደግ ሎቱ ወዘሰ ነበበ ፅርፈተ ላዕለ መንፈስ ቅዱስ ኢይትኀደግ ሎቱ ኢበዝዓለም ወኢበዘይመጽእ ዓለም። ፲፩. ወሶበሂ ይወስዱክሙ አዕዋዳተ ወኀበሂ መላእክት ወነገሥት ወመኳንንት ኢተሐልዩ ዘከመ ትብሉ ወዘከመሂ ትትናገሩ። ፲፪. እስመ መንፈስ ቅዱስ ውእቱ ዘይነብብ በላዕሌክሙ ሶቤሃ። ይቀልል ኅልፈተ ሰማይ ወምድር፥ እምትደቅ አሐቲ ቃል እምኦሪት ወእምነቢያት፥ ይቤ እግዚእ ለአርዳኢሁ።

ቅዳሴ Liturgy :

መዝሙረ ዳዊት Psalm

ወአልቦ እግዚአብሔር በቅድሜሁ፤
ወርኩስ ኵሉ ፍናዊሁ፤
ወንሡት ኵነኔከ በቅድሜሁ።

ወንጌል Gospel

፳፱. ወእፎ ይክል መኑሂ በዊአ ቤተ ኃያል ወንዋዮ ሀይደ ዘእንበለ እመ ኢቀደመ አሢሮቶ ለኃያል? ወእምዝ ቤቶ ይበረብር። ፴. ዘኢኮነ ምስሌየ ዕድውየ ውእቱ። ወዘኢያስተጋብእ መስሌየ ይዘርወኒ። ፴፩. በእንተዝ እብለክሙ ኵሎ ኀጢአት ወፅርፈት ይትኀደግ ለሰብእ ወዘሰ ለመንፈስ ቅዱስ ፀረፈ ኢይትኀደግ ሎቱ። ፴፪. ወዘይቤ ቃለ ላዕለ ወልደ እጓለ እመሕያው ይትኀደግ ሎቱ፤ ወዘሰ ይቤ ላዕለ መንፈስ ቅዱስ ኢይትኀደግ ሎቱ ኢበዝ ዓለመ ወኢበዘይመጽእ። ፴፫. እመ አኮ ግበሩ ዕፀ ሠናየ ወፍሬሁኒ ሠናየ ወእመ አኮ ግበሩ ዕፀ እኩየ ወፍሬሁኒ እኩየ እስመ እምፍሬሁ ዕፅ ይትዐወቅ። ፴፬. ኦ ትውልደ አራዊት ምድር በአይቴ ትክሉ ሠናየ ተናግሮ እንዘ እኩያን አንትሙ? እሰመ እምተረፈ ልብ ይነብብ አፍ። ፴፭. ኄር ብእሲ እምሠናይ መዝገበ ልቡ ያወፅእ ሠናየ። ወመዐምፅ ብእሲ እመዝገበ ዐመፃ ያወፅእ ዐመፃ። ፴፮. አንሰ እብለክሙ ኵሉ ንባብ ፅሩዕ ዘይነብብ ሰብእ ያገብኡ በእንቲአሁ ቃለ በዕለት ደይን። ሰማይ ወምድር የኀልፍ ወቃልየሰ ኢየኀልፍ ይቤ እግዚእ ለአርዳኢሁ።

መዝሙረ ዳዊት Psalm

ምህረኒ እግዚኦ ፍኖተ ጽድቅከ፤
ወእኅሥሣ በኵሉ ጊዜ፤
አለብወኒ ወእኅሥሥ ሕገከ።

ወንጌል Gospel

፳፯. ወእምዝ አውሥአ ጴጥሮስ ወይቤሎ፦ ናሁ ንሕነ ኀደግነ ኵሎ ወተሎናከ። ምንተ እንጋ ንረክብ? ፳፰. ወይቤሎሙ እግዚእ ኢየሱስ፦ አማን እብለክሙ፥ አንትሙ እለ ተሎክሙኒ አመ ደግም ልደት አመ ይነብር ወልደ እጓለ እመሕያው ዲበ መንበረ ስብሓቲሁ፤ አንትሙኒ ትነብሩ ዲበ ዐሠርቱ ወክልኤቱ መናብርት እንዘ ትኴንኑ ዐሠርተ ወክልኤተ ሕዝበ እስራኤል። ፳፱. ወኵሉ ዘኀደገ አብያተ ወአኀወ ወአኃተ ወአባ ወእመ ወብእሲተ ወውሉደ ወገራውሀ በእንተ ስምየ፥ ምእተ ምክዕቢተ ይነሥእ ወሕይወተ ዘለዓለም ይወርስ። ፴. ወብዙኃን ይከውኑ ቀደምት ድኅረ፥ ወደኀርት ቅድመ። ሰማይ ወምድር የኀልፍ ወቃልየሰ ኢየኀልፍ ይቤ እግዚእ ለአርዳኢሁ።

መልእክተ ጳውሎስ Pauline Epistle

፯. ለተግሣጽክሙ ተዐገሡ እስመ ከመ ውሉዱ ያፈቅረክሙ እግዚአብሔር። መኑ ውሉድ ዘኢይጌሥጾ አቡሁ? ፰. ወእመሰ ኢገሠጹክሙ አንዳባራ አንትሙ ወኢኮንክሙ ውሉደ ወዐረይክሙ ኵልክሙ። ፱. ወእመሰ አበዊነ እለ ወለዱነ በሥጋ ይጌሥጹነ ወነኀፍሮሙ እፎ እንከ ፈድፋደ ንግነይ ወንትአዘዝ ለአበ መንፈስነ ይደልወነ ወንሕየው። ፲. ወእሙንቱሰ ለስላጤ ለኅዳጥ መዋዕል ይጌሥጹነ በከመ ፈቀዱ ወውእቱሰ ለእንተ ትኄይስ ለነ ከመ ንርከብ ቅድሳቲሁ። ፲፩. ኵሉ ተግሣጽ ኢይመስል ትፍሥሕተ በጊዜሁ ዳእሙ ሐዘን ውእቱ። ወድኅረሰ ትፈሪ ሰላመ ለእለ ተገሠጹ ወተዐስዮሙ ጽድቀ። ፲፪. ወበእንተዝ አርትዑ እደ ፅውስተ ወእገረ ፅቡሳተ። ፲፫. ወግበሩ መንኰራኵረ ርቱዐ ለእገሪክሙ ከመ ይሕየው ሕንካሴክሙ ወኢትትዓቀፉ። ፲፬. ወሩጹ ኀበ ሰላም ምስለ ኵሉ ወኢትኅድጉ ቅድሳቲክሙ ወዘእንበሌሁሰ አልቦ ዘይርእዮ ለእግዚአብሔር። ፲፭. አስተሐይጹ አልቦ ዘያሰትት ጸጋ እግዚአብሔር ወአልቦ ዘይትረከብ ሥርው መሪር እንተ ታሠርጽ ሕማመ እንተ ታረኵሶሙ ለብዙኃን።

ዘካልእ መልእክት Universal Epistle

፮. ወበእንተ ዝንቱ ዜነውዎሙ ለምውታን ከመ ይትኰነኑ በሥጋሆሙ በሕገ እጓለ እመሕያው ወይሕየዉ በመንፈሶሙ በሕገ እግዚአብሔር። ፯. እስመ ቀርበ ማኅለቅቱ ለኵሉ አንጽሑ ልበክሙ ወጸሐዉ ለጸሎት። ፰. ወእምኵሉሰ ዘይቀድም ተሩቀሩ በበይናቲክሙ በምልአ ልብክሙ እስመ ተፋቅሮ ይደመስሶን ለኵሎን ኃጣውእ። ፱. ወአፍቅሩ ነግደ እንዘ ኢታስተዓፅቡ። ፲. ወኵልክሙ በከመ ነሣእክሙ ፍቶ ለእግዚአብሔር በበይናታክሙ ተለአኩ ከመ ኄር ላእክ። እስመ ለለአሐዱ ዘዘዚአሁ ዕሤቱ እምኀበ እግዚአብሔር። ፲፩. ወለእለሂ ትሜህሩ መሀሩ ቃሎ ለእግዚአብሔር ወዘኒ ይትለአክ ለይትለአክ በኀይለ እግዚአብሔር ዘወሀቦ ከመ በኵሉ ይሰባሕ እግዚአብሔር በኢየሱስ ክርስቶሰ ዘሎቱ ስብሐት ለዓለመ ዓለም አሜን።

ግብረ ሃዋርያት Acts

፴፩. ወይእዜኒ ትግሁ ወተዘከሩ ከመ ሠለስተ ዓመተ ኢነተገ አንብዕየ ሌሊተ ወመዐልተ እንዘ እሜህረክሙ ለኵልክሙ። ፴፪. ወይእዜኒ አማኅፀንኩክሙ ኀበ እግዚአብሔር ወለቃለ ጸጋሁ ዘይክል ሐኒጾተክሙ ወየሀብክሙ ርስተ ምስለ ኵሎሙ ቅዱሳን። ፴፫. ታአምሩ ከመ ኢተሰቆቁ ንዋየክሙ ኢወርቀ ወኢብሩረ ወኢአልባሰ ኢነሣእኩ ወኢኀበ አሐዱሂ እምኔክሙ። ፴፬. ለሊክሙ ታአምሩ ኢለትካዝየ ወኢለእለ ምስሌየ ተቀንያ እላንቱ እደውየ። ፴፭. እስመ ከማሁ ይደልወነ ከመ በጻማነ ወበተግባርነ ንትወከፎሙ ለድኩማን። ወዘንተ መሀርኩክሙ ዘንተ ተዘከሩ ቃሎ ለእግዚእነ ኢየሱስ ዘይቤ፦ ብፁዕ ዘይሁብ እምዘ ይነሥእ። ፴፮. ወዘንተ ብሂሎ ሰገደ ወጸለየ ምስለ ኵሎሙ። ፴፯. ወብዙኀ በከዩ ኵሎሙ ወሐቀፍዎ ክሳዶ ለጳውሎስ ወሰዐምዎ፤ ፴፰. እንዘ ይቴከዙ ወፈድፋደሰ እስመ ይቤሎሙ፦ ኢትሬእዩኒ ገጽየ። ወፈነውዎ ወዐርገ ሐመረ።

ስንክሳር Synaxarium

ዮሐንስ ሐጺር
ወኤልሳዕ ነቢይ

መዝሙር Psalm

ወሐለዩ ምክረ እንተ ኢይክሉ አቅሞ፤
ወታገብኦሙ ድኅሬሆሙ፤
ወታስተደሉ ገጾሙ ለጊዜ መዐትከ።

ወንጌል Gospel

፳፬. ወይቤሎሙ፦ አማን እብለክሙ፥ ኢይከብር ነቢይ በሀገሩ። ፳፭. አማን እብለክሙ፥ ብዙኃት መበለታት ሀለዋ በውስተ እስራኤል በመዋዕለ ኤልያስ አመ ተዐጽወ ሰማይ ሠለስተ ዐመተ ወስድስተ አውራኀ አመ ኮነ ረኃብ ዓቢይ ውስተ ኵሉ ምድር። ፳፮. ወኢተፈነወ ኤልያስ ወኢኀበ አሐቲ እምኔሆን ዘእንበለ በሰራጵታ ዘሲዶና ኀበ ብእሲት መበለት። ፳፯. ወብዙኃን እለ ለምጽ ሀለዉ በውስተ እስራኤል አመ ኤልሳዕ ነቢይ ወኢነጽሐ አሐዱሂ እምኔሆሙ ዘእንበለ ንዕማን ሶርያዊ። ፳፰. ወተምዑ ኵሎሙ በምኵራብ ሰሚዖሙ ዘንተ። ፳፱. ወተንሥኡ ወአውፅእዎ አፍአ እምሀገር ወወሰድዎ ውስተ ሕፅነ ደብር ዘተነድቀት ላዕሌሁ ሀገሮሙ ከመ ያጽድፍዎ። ፴. ወውእቱሰ ኀለፈ እንተ ማእከሎሙ ወሖረ። ይቀልል ኅልፈተ ሰማይ ወምድር፥ እምትደቅ አሐቲ ቃል እምኦሪት ወእምነቢያት፥ ይቤ እግዚእ ለአርዳኢሁ።

ቅዳሴ Liturgy :

መዝሙረ ዳዊት Psalm

የዐሥየኒ እግዚአብሔር በከመ ጽድቅየ፤
ወይፈድየኒ በከመ ንጽሐ እደውየ፤
በቅድመ አዕይንቲሁ።

ወንጌል Gospel

፩. ወእምዝ ነገሮሙ እግዚእ ኢየሱስ ለሕዝብ ወለአርዳኢሁ፤ ፪. እንዘ ይብል፦ ዲበ መንበረ ሙሴ ነበሩ ጸሐፍት ወፈሪሳውያን። ፫. ኵሎ ዘመሀሩክሙ ግበሩ ወዕቀቡ፤ ወበከመ ይገብሩሰ ኢትግበሩ እስመ ዘይሜህሩ ኢይገብሩ። ፬. ወየአስሩ ጾረ ዐቢየ ወክቡደ ወያሰክምዎ ለሰብእ ዲበ መታክፍቱ ወለሊሆሙሰ ኢይለክፍዎ በአጽባዕቶሙ። ፭. ወኵሎ ምግባሮሙ ዘይገብሩ ለዐይነ ሰብእ ይገብሩ። ወይሰፍሑ ኵርበታቲሆሙ ወያዐብዩ አዝፋሪሆሙ። ፮. ወያፈቅሩ ርእሰ ምርፋቃት በውስተ ምሳሓት ወነቢረ ፍጽመ በውስተ አዕዋዳት። ፯. ወተኣምኆ በውስተ ምሥያጣት ወይብሎሙ ሰብእ፦ ረቢ። ፰. አንትሙሰኬ ኢትሰመዩ፦ ረቢ፤ እስመ አሐዱ ውእቱ መምህርክሙ ወአንትሙሰ አኀው ኵልክሙ። ፱. ወኢትረስዩ አበ በዲበ ምድር እስመ አሐዱ ውእቱ አቡክሙ ሰማያዊ። ፲. ወኢተሰመዩ መምህራነ፤ እስመ አሐዱ መምህርክሙ ውእቱ ክርስቶስ። ፲፩. ወባሕቱ ዘይልህቀክሙ ይኩንክሙ ላእከ። ፲፪. እስመ ዘአዕበየ ርእሶ የኀስር ወዘአትሐተ ርእሶ ይከብር። ሰማይ ወምድር የኀልፍ ወቃልየሰ ኢየኀልፍ ይቤ እግዚእ ለአርዳኢሁ።

መዝሙረ ዳዊት Psalm

ወትቀውም ንግሥት በየማንከ፤
በአልባሰ ወርቅ ዑጽፍት ወሑብርት፤
ስምዒ ወለትየ ወርእዪ ወአፅምዒ እዝነኪ።

ወንጌል Gospel

፴፱. ወተንሥአት ማርያመ ፍጡነ በውእቱ መዋዕል ወሖረት ደወለ ወበጽሐት ሀገረ ይሁዳ። ፵. ወቦአት ቤተ ዘካርያስ ወአምኀታ ለኤልሳቤጥ። ፵፩. ወሶበ ሰምዐታ ኤልሳቤጥ ቃላ ለማርያም እንዘ ትትአምኃ አንፈርዐጸ እጓለ በውስተ ከርሣ። ወመልአ መንፈስ ቅዱስ ላዕለ ኤልሳቤጥ። ፵፪. ወከልሐት በዓቢይ ቃል ወትቤ፦ ቡርክት አንቲ እምአንስት ወቡሩክ ፍሬ ከርሥኪ። ፵፫. ወምንትኑ አነ ከመ ትምጽኢ እሙ ለእግዚእየ ኀቤየ? ፵፬. እስመ ናሁ ሶበ ሰማዕኩ ቃለኪ እንዘ ትትእምኀኒ አንፈርዐጸ እጓል በውስተ ከርሥየ በፍሥሓ ወበሐሤት። ፵፭. ወብፅዕት አንቲ እንተ ተእምኒ ከመ ይከውን ቃለ ዘነገሩኪ እምኀበ እግዚአብሔር። ፵፮. ወትቤ ማርያም፦ ታዐብዮ ነፍስየ ለእግዚአብሔር። ፵፯. ወትትሐሠይ መንፈስየ በአምላክየ ወመድኀኒየ። ፵፰. እስመ ርእየ ሕማማ ለአመቱ ወናሁ እምይእዜሰ ያስተበጽዑኒ ኵሉ ትውልድ። ፵፱. እስመ ገብረ ሊተ ኀይለ ዐቢያተ ወቅዱስ ስሙ። ፶. ወሣህሉኒ ለትውልደ ትውልድ ለእለ ይፈርህዎ። ፶፩. ወገብረ ኀይለ በመዝራዕቱ ወዘረዎሙ ለእለ ያዐብዩ ሕሊና ልቦሙ። ፶፪. ወነሠቶሙ ለኀያላን እመናብርቲሆሙ ወአዕበዮሙ ለትሑታን። ፶፫. ወአጽገቦሙ በረከቶ ለርኁባን ወፈነዎሙ ዕራቆሙ ለብዑላን። ፶፬. ወተወክፎ ለእስራኤል ቍልዔሁ ወተዘከረ ሣህሎ። ፶፭. ዘይቤሎሙ ለአበዊነ ለአብርሃም ወለዘርኡ እስከ ለዓለም። ፶፮. ወነበረት ማርያም ኀቤሃ መጠነ ሠለስቱ አውራኅ ወእምድኅሬሁ አተወት ቤታ። ይቀልል ኅልፈተ ሰማይ ወምድር፥ እምትደቅ አሐቲ ቃል እምኦሪት ወእምነቢያት፥ ይቤ እግዚእ ለአርዳኢሁ።

መልእክተ ጳውሎስ Pauline Epistle

፲፪. አምኀክሙ አጰፍራስ ዘእምኀቤክሙ ውእቱ ገብረ ክርስቶስ ወዘልፈ ይጼሊ በእንቲአክሙ ወይስእል ከመ ትኩኑ ፍጹማነ ወምሉኣነ በኵሉ ሥምረተ እግዚአብሔር። ፲፫. ወአነ ሰማዕቱ ከመ ፈድፋደ ያፈቅረክሙ ወይቴክዝ በእንቲአክሙ ወለእለ ሎዲቅያ ወሀገረ ኢያራ። ፲፬. አምኀክሙ ሉቃስ ዐቃቤ ሥራይ ፍቁርነ ወዴማስ። ፲፭. አምኅዎሙ ለአኀዊነ እለ በሎዲቅያ ወነምፋን ወእለ ሀለዉ ቤተ ክርስቲያን። ፲፮. ወአንቢበክሙ ዘንተ መጽሐፈ ፈንውዎ ሎዲቅያ ያንብብዋ በቤተ ክርስቲያን፥ ወካዕበ አንብብዋ አንትሙ ለመልእክት እንተ ጸሐፍኩ እምሎዲቅያ። ፲፯. ወበልዎ ለአክርጳ፦ ዑቅአ መልእክተከ ዘተሠየምከ እምኀበ እግዚአብሔር ከመ ትፈጽማ። ፲፰. ወአማኅኩክሙ ጽሒፍየ በእዴየ አነ ጳውሎስ፥ ተዘከሩ መዋቅሕትየ። ጸጋ ምስሌክሙ፥ አሜን። ተፈጸመ መልእክት ኀበ ሰብአ ቄላስይስ፥ ወተጽሕፈ በሮሜ፥ ወተፈነወ በእደ ጢኪቆስ። ወስብሐት ለእግዚአብዝሔር፥ አሜን።

ዘካልእ መልእክት Universal Epistle

፩. እምነ ቀሲስ ለኅሪት ወለእግዝእት ወለደቂቃ ለእንተ አነ አፈቅራ በጽድቅ ወበእንተ ዛቲ ጽድቅ ወአኮ አነ ባሕቲትየ አላ ወእለኒ የአምርዋ ለጽድቅ ኵሎሙ። ፪. ወበእንተ ዛቲ ጽድቅ እንተ ትነብር ኀቤነ ወትሄሉ ምስሌነ፥ ወምስሌነ ይእቲ ለዓለም፥ ወትሄሉ ምስሌነ። ፫. ሞገስ ወምሕረት ወሰላም እምኀበ እግዚአብሔር አብ ወእምኀበ ኢየሱስ ክርስቶስ ወልዱ ለአብ እግዚአብሔር በጽድቅ ወበተፋቅሮ። ፬. ተፈሣሕኩ ጥቀ እስመ ረከብኩ እምደቂቅኪ እለ የሐውሩ በጽድቅ በከመ ነሣእነ ትእዛዞ እምኀበ አብ። ፭. ወይእዜኒ እስእለኪ ኦ እግዝእት ወአኮ ትእዛዘ ሐዲሰ ዘእጽሕፍ ለኪ አላ ትእዛዘ ብሊተ እንተ ብን ትካት ከመ ንትፋቀር በበይናቲነ። ፮. ወዛቲ ይእቲ ተፋቅሮትነ ከመ ንሑር በትእዛዙ፥ ወዛቲ ይእቲ ትእዛዝ ከመ ንሑር በዛቲ እንተ ሰማዕክሙ ትካት።

ግብረ ሃዋርያት Acts

፲፬. ወቆመ ጴጥሮስ ምስለ ዐሠርቱ ወአሐዱ ወከልሐ በቃሉ ወይቤ፦ አንትሙ ሰብአ ይሁዳ ወእለሂ ትነብሩ ኢየሩሳሌም ኵልክሙ አእምሩ ዘንተ ወሰምዑኒ ቃልየ። ፲፭. አኮ ከመ ትትሐዘብዎሙ አንትሙ ስኩራን እሙንቱ ዘትብሉ። እስመ ነግህ ብሔር ሶቤሁ ሠለስቱ ሰዓት። ፲፮. አላ ዝውእቱ ዘይቤ ኢዩኤል ነቢይ፦ ፲፯. ወይከውን እምድኅረዝ ይቤ እግዚአብሔር እሰውጥ እምነ መንፈስየ ዲበ ኵሉ ዘሥጋ ወይትኔበዩ ደቂቅክሙ ወአዋልዲክሙ ወወራዙቲክሙ ራእየ ይሬእዩ። ወሊቃውንቲክሙ ሕልመ የሐልሙ። ፲፰. ወላዕለ አግብርትየ ወአእማትየ እሰውጥ እምነ መንፈስየ ይእተ አሚረ ወይትኔበዩ። ፲፱. ወእሁብ ትእምርተ በሰማይ በላዕሉ ወመንክረ በምድር በታሕቱ። ደመ ወእሳተ ወጢሰ። ፳. ፀሐይኒ ይጸልም ወወርኅኒ ደመ ይከውን ዘእንበለ ትብጻሕ ዕለተ እግዚአብሔር ዓባይ ወግርምት። ፳፩. ወኵሉ ዘጸውዐ ስመ እግዚአብሔር ይድኅን።

ስንክሳር Synaxarium

በዓለ እግዝእትነ ማርያም
ወፍልሰተ ሥጋሁ ለአልአዛር ዘአንሥኦ እግዚእነ
ወዮሐንስ ኤጲስ ቆጶስ ዘኢዮሩሳሌም
ወኢዩኤል
ወማትያስ ላእክ

መዝሙር Psalm

ገሠጸ ነገሥተ በእንቲአሆሙ፤
ኢትግስሱ መሲሓንየ፤
ወኢታሕሥሙ ዲበ ነቢያትየ።

ወንጌል Gospel

፵፫. ወአውሥአ እግዚእ ኢየሱስ ወይቤሎሙ፦ ኢታንጐርጕሩ በበይናቲክሙ። ፵፬. አልቦ ዘይክል መጺአ ኀቤየ እመ ኢሰሐቦ አብ ዘፈነወኒ ወአነ አነሥኦ በደኃሪት ዕለት። ፵፭. ወሀሎ ጽሑፍ ውስተ መጽሐፈ ነቢያት፦ ከመ ይከውኑ ኵሎሙ ምሁራነ እምኀበ እግዚአብሔር፤ ወኵሉ እንከ ዘሰምዐ በኀበ አቡየ ተምሂሮ ይመጽእ ኀቤየ። ፵፮. ወአልቦ ዘርእዮ ለአብ ዘእንበለ ዘእምኀቤሁ ለእግዚአብሔር ውእቱ፤ ወውእቱ ርእዮ ለአብ። ፵፯. አማን አማን እብለክሙ፥ ዘየአምን ብየ ቦ ሕይወት ዘለዓለም። ዘየአምን በወልድ ቦ ሕይወት ዘለዓለም።

ቅዳሴ Liturgy :

መዝሙረ ዳዊት Psalm

ወእምቀላየ ምድር አውፃእከኒ፤
ወአብዛኅኮ ለጽድቅከ፤
ወገባእከ ታስተፍሥሐኒ።

ወንጌል Gospel

፴፰. ወእምዝ ሐዊሮሙ ቦኡ አሐተ ሀገረ ወተቀበለቶ አሐቲ ብእሲት በቤታ እንተ ስማ ማርታ። ፴፱. ወስመ እኅታ ማርያም እንተ ነበረት ኀበ እገሪሁ ለእግዚእ ኢየሱስ ወሰምዐቶ ነገሮ። ፵. ወማርታሰ ትሰርሕ በአስተደልዎ ብዙኀ፤ ወቆመት ወትቤሎ፦ እግዚእየ ኢያጽህቀከኑ ዘተኀድገኒ እኅትየ ባሕቲትየ አስተዳሉ? በላኬ ታርድአኒ። ፵፩. ወአውሥአ እግዚእ ኢየሱስ ወይቤላ፦ ማርታ፥ ማርታ፥ ትሰርሒ ብዙኀ ታስተዳልዊ። ፵፪. ወኅዳጥ የአክል፥ ወእመአኮ አሐቲ መክፈልት፥ ወማርያምሰ መክፈልተ ሠናየ ኀርየት፥ ላቲ ዘአልቦ ዘየሀይዳ። ይቀልል ኅልፈተ ሰማይ ወምድር፥ እምትደቅ አሐቲ ቃል እምኦሪት ወእምነቢያት፥ ይቤ እግዚእ ለአርዳኢሁ።

መዝሙረ ዳዊት Psalm

ይኩን ሰላም በኃይልከ፤
ወትፍሥሕት ውስተ ማኅፈደ ክበዲከ፤
በእንተ አኀውየ ወቢጽየ።
 

ወንጌል Gospel

፩. ወእምዝ ኃረየ እግዚእነ ካልኣነ ሰብዓ ወፈነዎሙ በበ ክልኤቱ ቅድመ ገጹ ውስተ ኵሉ አህጉር ወበሐውርት ኀበ ሀለዎ ይባእ። ፪. ወይቤሎሙ እግዚእ ኢየሱስ፦ ማእረሩሰ ብዙኅ ወገባሩ ኅዳጥ ሰአልዎ እንከ ለባዕለ ማእረር ከመ ይወስክ ወይፈኑ ገባረ ለማእረሩ። ፫. ሑሩ ናሁ አነ እፌንወክሙ ከመ አባግዕ ማእከለ ተኵላት። ፬. ወኢትጹሩ ቈናማተ ወኢጽፍነተ ወኢአሣእነ ወኢምንተኒ ወኢተአምኁ ወኢመነሂ በፍኖት። ፭. ወቤት ኀበ ቦእክሙ ቅድሙ በሉ፦ ሰላም ለዝንቱ ቤት። ፮. ወእመሂ ቦህየ ወልደ ሰላም ያዕርፍ ሰላምክሙ ላዕሌሁ ወእመአኮሰ ይግባእ ሰላምክሙ ላዕሌክሙ። ፯. ወውእተ ቤተ ንበሩ ወብልዑ ወስትዩ ዘእምኀቤሆሙ እስመ ይደልዎ ዐስቡ ለዘይትቀነይ ወኢትፍልሱ እምቤት ውስተ ቤት። ፰. ወሀገርኒ ኀበ ቦእክሙ ወተወክፉክሙ ብልዑ ዘአቅረቡ ለክሙ። ፱. ወፈውሱ ድዉያነ እለ ውስቴታ ወበልዎሙ፦ ቀርበት መንግሥተ እግዚአብሔር ኀቤክሙ። ፲. ወሀገርሰ ኀበ ቦእክሙ ወኢተወክፉክሙ ወፂአክሙ ውስተ መርሕባ ንግፉ ጸበለ እገሪክሙ እንዘ ትብሉ፦ ፲፩. ወጸበለክሙኒ ዘተለወነ እምሀገርክሙ ንነግፍ ለክሙ ወባሕቱ ዘንተ አእምሩ ከመ ቀርበት መንግሥተ እግዚአብሔር ላዕሌክሙ። ይቀልል ኅልፈተ ሰማይ ወምድር፥ እምትደቅ አሐቲ ቃል እምኦሪት ወእምነቢያት፥ ይቤ እግዚእ ለአርዳኢሁ።

መልእክተ ጳውሎስ Pauline Epistle

፱. እምከመ ተአምን በአፉከ ከመ ክርስቶስ ውእቱ እግዚእ ወተአምን በልብከ ከመ አንሥኦ እግዚአብሔር እምውታን ተሐዩ። ፲. ወልብኒ ዘየአምን ቦቱ ይጸድቅ ወአፍኒ ዘየአምን ቦቱ የሐዩ። ፲፩. ወይቤ መጽሐፍ፦ ኵሉ ዘየአምን ቦቱ የሐዩ። ፲፪. ወኢፈለጠ ወኢሌለየ አይሁዳዌ ወአረማዌ እስመ ባዕል እግዚኦብሔር ወየአክል ለኵሉ ዘጸውዖ። ፲፫. እስመ ኵሉ ዘጸውዐ ስመ እግዚአብሔር የሐዩ። ፲፬. ወባሕቱ እፎ ይጼውዕዎ እንዘ ኢየአምኑ ቦቱ? ወእፎ የአምኑ በዘኢይሰምዑ? ወእፎኑ ይሰምዑ ዘኢሰበኩ ሎሙ? ፲፭. ወእፎኑ ይሰብኩ ሎሙ ዘኢተፈነወ ሐዋርያ ኀቤሆሙ? በከመ ይቤ መጽሐፍ፦ ሠናይ እገሪሆሙ ለእለ ይዜንዉ ሠናየ ዜና። ፲፮. ወባሕቱ አኮ ኵሎሙ ዘሰምዑ ትምህርተ ወንጌል። አኮኑ ኢሳይያስኒ ይቤ፦ እግዚኦ መኑ የአምነነ ቃለነ?

ዘካልእ መልእክት Universal Epistle

፬. ወዘንተ ንጽሕፍ ለክሙ ከመ ትፍሥሕትክሙ ፍጽምተ ትኩን። ፭. ወዛቲ ይእቲ ዜና እንተ ሰማዕናሃ ትካት እምኔሁ ወንዜንወክሙ ከመ እግዚአብሔር ብርሃን ውእቱ ወጽልመትሰ አልቦ ኀቤሁ ወኢአሐቲኒ። ፮. ወእመሰ ንቤለክሙ ብነ ሱታፌ ምስሌሁ ወውስተ ጽልመት ነሐውር ንሔሱ ወኢንገብራ ለርትዕ። ፯. ወእመሰ ውስተ ብርሃን ነሐውር በከመ ውእቱ ውስተ ብርሃን ውእቱ ሱቱፋን ንሕነ በበይናቲነ ወደሙ ለኢየሱስ ክርስቶስ ያነጽሐነ እምኵሉ ኃጣውኢነ። ፰. ወእመሰ ንብል አልብነ ኃጢአት ንጌጊ ለርእስነ ወአልቦ ርትዕ ኀቤነ። ፱. ወእመሰ ነገርነ ወአመነ ኃጢአተነ ምእመን ውእቱ ወጻድቅ ከመ ይኅድግ ለነ ኃጣውኢነ ወያነጽሐነ እምኵሉ አበሳነ። ፲. ወእመሰ ንቤ ኢአበስነ ሐሳዌ ንሬስዮ ሎቱ፥ ወቃሉኒ ኢሀሎ ኀቤነ።

ግብረ ሃዋርያት Acts

፩. መጽሐፈ ግብረ ልኡካን ዝንቱ ውእቱ ዜና ሐዋርያት ንጹሓን እምጊዜ ዕርገቱ ለእግዚእነ ኢየሱስ ክርስቶስ። ቀዳሚ ጸሐፍኩ ለከ መጽሐፈ ኦቴዎፍላ። በኵሉ ግብር ዘአኀዘ እግዚእነ ኢየሱስ ክርስቶስ ይግበር ወይምሀር። ፪. እስከ ዕለት እንተ ባቲ ዓርገ አዚዞ ለሐዋርያቲሁ ለእለ ኀረዮሙ በመንፈስ ቅዱስ። ፫. እሉ እሙንቱ እለ አርአዮሙ ርእሶ ሕያወ እምድኅረ ሞተ በተኣምር ብዙኅ በአርብዓ ዕለት እንዘ ያስተርእዮሙ ወይዜንዎሙ ወይነግሮሙ በእንተ መንግሥተ እግዚአብሔር። ፬. ወእንዘ ይመስሕ ምስሌሆሙ አዘዞሙ ኢይፃኡ እምኢየሩሳሌም አላ ይጽንሑ ተስፋሁ ለአብ። ፭. ወይቤሎሙ፦ እስመ ዮሐንስ አጥመቀ በማይ አንትሙሰ ትጠመቁ በመንፈስ ቅዱስ እስከ መዋዕል ዘኢኮነ ርኁቀ። ፮. ወእንዘ ጉቡኣን እሙንቱ ተስእልዎ ወይቤልዎ፦ እግዚኦ በዝኑ መዋዕል ታገብእ መንግሥተ ለደቂቀ እስራኤል?

ስንክሳር Synaxarium

ሉቃስ ወንጌላዊ ፩እም ፸ወ፪ አርድእት
ወ፪፻ወ፸ወ፯ እደው ማህበራኒሁ

መዝሙር Psalm

አልቦ ነገር ወአልቦ ነቢብ ዘኢተሰምዐ ቃሎሙ፤
ውስተ ኵሉ ምድር ወፅአ ነገሮሙ፤
ወእስከ አጽናፈ ዓለም በጽሐ ነቢቦሙ።

ወንጌል Gospel

፩. ወንጌል ቅዱስ ዘእግዚእነ ወመድኃኒነ ኢየሱስ ክርስቶስ ዘከመ ጽሐፈ ቅዱስ ሉቃስ። ጸሎቱ ወበረከቱ የሀሉ ምስለ ኵልነ ሕዝበ ክርስትያን ለዓለም ዓለም አሜን። እስመ ብዙኃን እለ ወጠኑ ይንግሩ ወይምሀሩ በእንተ ግብር ዘአምኑ በላዕሌነ። ፪. በከመ መሀሩነ እለ ቀደሙነ ርእዮቶ ወተልእክዎ በቃሉ። ፫. ወረትዐኒ ሊተኒ እትልዎ እምጥንቱ ወጥዩቀ ኵሎ በበ መትልው እጽሕፍ ለከ ዐዚዝ ቴዎፊሌ። ፬. ከመ ታእምር ጥዩቀ በእንተ ኵሉ ኀይለ ነገር ትምህርተ ዘተመሀርከ። ይቀልል ኅልፈተ ሰማይ ወምድር፥ እምትደቅ አሐቲ ቃል እምኦሪት ወእምነቢያት፥ ይቤ እግዚእ ለአርዳኢሁ።

ቅዳሴ Liturgy :

መዝሙረ ዳዊት Psalm

ወእምጸላእትየ አጥበበኒ ትእዛዝከ፤
እስመ ለዓለም ሊተ ውእቱ፤
ወእምኵሎሙ እለ መሀሩኒ ጠበብኩ።
 

ወንጌል Gospel

፰. እብለክሙ ኵሉ ዘየአምን ብየ በቅድመ እጓለ እመሕያው አአምኖ አነሂ በቅድመ መላእክተ እግዚአብሔር። ፱. ወዘሰ ክሕደኒ በቅድመ እጓለ እመሕያው እክሕዶ አነሂ በቅድመ መላእክተ እግዚአብሔር። ፲. ወኵሉ ዘነበበ ቃለ ፅርፈት ላዕለ ወልደ እጓለ እመሕያው ይትኀደግ ሎቱ ወዘሰ ነበበ ፅርፈተ ላዕለ መንፈስ ቅዱስ ኢይትኀደግ ሎቱ ኢበዝዓለም ወኢበዘይመጽእ ዓለም። ፲፩. ወሶበሂ ይወስዱክሙ አዕዋዳተ ወኀበሂ መላእክት ወነገሥት ወመኳንንት ኢተሐልዩ ዘከመ ትብሉ ወዘከመሂ ትትናገሩ። ፲፪. እስመ መንፈስ ቅዱስ ውእቱ ዘይነብብ በላዕሌክሙ ሶቤሃ። ፲፫. ወይቤሎ አሐዱ እምሕዝብ፦ ሊቅ በሎ ለእኁየ ይክፍለኒ ርስትየ። ፲፬. ወይቤሎ እግዚእ ኢየሱስ፦ አንተ ብእሲ መኑ ሤመኒ ከፋሌ ወመኰንነ ላዕሌክሙ? ፲፭. ወይቤሎሙ፦ ዑቁ ወተዐቀቡ እምነ ኵሉ ትዕግልት እስመ አኮ በአብዝኆ ንዋይ ዘየሐዩ ሰብእ። ይቀልል ኅልፈተ ሰማይ ወምድር፥ እምትደቅ አሐቲ ቃል እምኦሪት ወእምነቢያት፥ ይቤ እግዚእ ለአርዳኢሁ።