እንቋዕ ካብ ዘመነ ማርቆስ ናብ ዘመነ ሉቃስ ብሰላም ኣሰጋገረና!!

“ናይዚ ዓመት እዚ ፍረ እክሊ ትባርክ፤ እቶም እምባታትን ኮረቢትን ብጠሊን ብልምላሜን ይጸግቡ፤ እቶም ምድረ በዳን ሰሃራን ከኣ ረውዮም ይነብሩ” (መዝ 65 ፡ 11)

ክቡራት ሰማዕተይ ኩልኹም ናይ ድምጺ ተዋህዶ ደሓንዶ ውዒልኩም እንቋዕ ካብ ዓመት ናብ ዓመት ብሰላም ኣሰጋገረና ርሑስ ዘመነ ሉቃስን ርሑስ በዓል ቅዱስ ዮሐንስን ቡሩኽ ኣውደ ዓመትን ይግበረና እንቋዕ ካብ ዘመነ ማርቆስ ናብ ዘመነ ሉቃስ ብሰላም ኣብጽሓና። ዘመነ ራህዋን ፡ ዘመነ ቅሳነትን፡ ዘመነ ህድኣትን ሰላምን፡ ዘመነ ምሕረትን ቅሳነትን ንኽገብረልና ናይ ኵሉ መዓልቲ ጸሎተይን ናይ ወትሩ ትምኒተይን እዩ። ናይ ሎሚ ወንጌላዊ ሉቃስ 2015 ፪፻፲፭ ዓመተ ምሕረት ግእዝ 2015 ፈረንጅ እዩ። እግዚኣብሔር ኣምላኽና ቅድሚ ዓለም ሥላሴ ብሐድነት ሰለስትነትን ይምስገኑ ነበሩ። መን የመስግኖም ነበረ እንተ ተባህለ፤ ባህርዮም። ብባህርዩ ይምስገን ነበረ ዝብል መልሲ ኢና ንረክብ። ወይእዜኒ ኣንተ ኣባ ሰብሐኒ በስብሐትየ ዘሀሎ ምስሌከ እምቅድመ ይትፈጠር ዓለም ብዝበሎ ይፍለጥ። ትርጉሙ "ኦ ኣቦይ ሕጂ ድማ በቲ ቅድሚ ዓለም ከይተፈጥረት ኣባኻ ዝነበረኒ ኽብሪ ኣኽብረኒ። " ዮሐ 17 ፤ 5 ደሐር ግን ዓለም ክፈጥር ኢሉ ሐሰበ ስብን መላእክትን ድማ ፈጠረ። ምክንያቱ ስሙ ንምቅዳስ ክብሩ ንውራስ ኢሉ ፈጠሮም። ካልእ ፍጥረት ዝተረፈ ፍጥረት ግን ንኣንክሮ ንተዘከሮ ንምግቢ ሥጋ ኢሉ ፈጠሮም።
እግዚኣብሔር ኣምላኽና ኣዝማናትን ዓመታትን ሓጋይን ክራማትን ኣዋርሕን ሰሙናትን ክሓልፉ ከለዉ፤ ንሱ ግን ሕልፈትን ስዕረትን ዘይብሉ ንኵሉ ዘመናትን ንኵሉ ዓመታትን እንዳፈራረቐ ዝነብር እዩ'ሞ ደጊመ ኣምላኽና እንቋዕ ካብ ዘመነ ማርቆስ ናብ ዘመነ ሉቃስ ኣብጽሓና እብል።
ሎሚ ርእሰ ኣውደ ዓመት መስከረም ዕለት ሓደ እዩ። መስከረም ማለት ከኣ ብናይ ግእዝ ቛንቛ ወይ መዝገበ ቃልት ትርጕም መዘክረ ከርም፤ ናይ ክረምቲ መዘከርታ ወይ መተሓሳሰቢ ማለት እዩ። እዚ ድማ ኣባና ኣብ ኤርትራውያንን ኣብ ኢትዮጵያውያንን ግብጻውያንን ናይ ዘመን መለውጢ መጀመርያ ወርሒ ዓመት ተወዲኡስ ናብ ካልእ ዓመት ንሰጋገረሉ ማለት እዩ። እስራኤላውያንውን ቅድሚ ልደተ ክርስቶስ ናይ ዓለም ናይ መጀመርያ ወርሒ ኢሎም የብዕልዎ ነበሩ። ብአይሁድ'ውን ብዓውደ ዓመት ይፍለጥ ነበረ ብካልእ ኣፈታትሐ ትርጕም'ውን፤ መሰየ ካብ ዝብል ናይ ግእዝ ቃል ዝተርኸበ ኪከውን ከሎ ከርመ ምስኡ ተጠቃሊሉ ክንበብ ከሎ ክረምቲ ሓለፈ ማለት እዩ። ካብ ጭቃ ናብ ደርቂ ፡ ካብ ጥምየት ናብ ጽጋብ ፡ ካብ ቆጽሊ ናብ ፍረ ማለት ሰዊት ፡ ካብቲ ኣረጊት ዓመት ናብ ሓድሽ ዓመት ስለ ዝተሰጋገሩ መሰከረም ሓደሽ ዓመት ርእሲ ኣውደ ዓመት ይብሃል። እግዚአብሔር ነዚ ዓለም እዚ ክፈጥር ከሎ ንዘመን መቑጸርን መስፈርን ዝኮኑ ሰዓታትን ኣዋርሕን ዓመታትን ግዜን ኣዳልወ። እዚ ድማ ክሳብ ልደተ ክርስቶስ ዘሎ ዘመን ፭ሺሕን ፭ሚእትን ዓመት ኮነ ትብል። ዝተፀንሰሉ ወርሒ መጋቢት ፳፱ ዘመነ ዮሐንስ እዩ። ዝተወልደሉ ወርሒ ታሕሣሥ ፳፱ ዘመነ ማቴዎስ እዩ። ዝተጠመቐሉ ወርሒ ጥሪ ፲፩ መዓልቲ ዘመነ ሉቃስ ፤ ዝተሰቕለሉ ዘመነ ሉቃስ ወርሒ መጋቢት ፳፯ እዩ። ስለ ዝኮነ ኣብ ዘመን ኣርባዕቲኦም ወንጌላውያን ዓበይቲ ተኣምራት ስለ ዝተፈጸመ እዩ። ነዚ ዓመታት እዚ ንኣርባዕቲኦም ወንጌላውያን ይካፈልዎ፤ ንሐደ ወንጌላዊ ሓደ ዓመት ይብጽሖ በብዓመት ምስ ተካፈልዎ ነዚ ርእሱ ዝከኣለ ታሪኽ ኣለዎ። ነዚ ኣብ ናይ'ዚ ሎሚ ዓመት ኢና ክንርኢ።
ናይ ቅዱስ ዮሐንስ መጥምቕ ወዲ ዘካርያስ በዓል ግን ኵሉ ግዜ መስከረም ዕለት ሓደ እዩ ዝውዕል ኣይቅየርን እዩ። ንሱ ካብቶም ወንጌላውያን ኣይኮነን። ማለት ንምንታይ ደኣ ዮሐንስ ናብ'ዚ መዓልቲ እዚ ክውዕል ተመርጸ ንዝብል ሕቶ? ከምዚ ዝኾነሉ ምኽንያት ቅዱስ ዮሐንስ ናይ ብሉይ ኪዳን ናዝራዊ ሰለ ዝነበረ ኣብ በረኻታት እዩ ዝሰብኽ ዝነበረ። ኣብ ሩባ ዮርዳኖስ ንሰባት ናይ ንስሐ ጥመቀት የጠምቕ ነበረ። ኣብዚ ወርሓት እዚ ናይ ክርስቶስ ምምጻእ ተነበየ። በዚ ናይ ብሉይ ኪዳን መፈጸምታ ተባህለ። ናይ ሓድሽ ኪዳን ጀማሪ ድማ ዝኮነ ነብይን ሓዋርያን ሰማዕትን ድማ ይብሃል። ነብይ ዘብሎ ኣነ ብማይ እየ ዘጥምቀኩም። ንሱ ግና ብሓውን ብመንፈስ ቅዱስን እዩ ዘጥምቀኩም። ኣነ ስራኽ ኣሳእኑ ክፈትሕ ኣይበቅዕን እየ፤ ንሱ ዓውዱ ዘጽርየሉ መስአ ኣብ ኢዱ ኣሎ ክብል ትንቢት ናይ ክርስቶስ ምምጻእ ተነብዩ እዩ። ከምዚ ማለቱ ከኣ ንኃጥኣን ካብኡ ዘርሕቅ ንጻድቃን ከኣ ናብኡ ዘቕርብ ሥልጣን ዘለዎ እዩ፤ ክብል ትንቢት ስለ ዝተነበየ እዩ። ሐዋርያ ዝብሎ ዘሎ ኸኣ እንሆ ገንሽል ኣምላክ ኃጢኣት ዓለም ዘርሕቕ ክብል መስኪሩ እዩ። ስለ ዝኮነ ካብ ብሉይ ናብ ሓድሽ መሠጋገሪ ድንድል እዩ። ነዚ መሠረት ብምግባር ድማ ቅድስት ቤተ ክርስቲያን ናይ ዘመን መሠጋገሪ ኮይኑ ክነብር ኢላ ወሰነት።

1. ሐድሽ ዓመት ምባሉ ቅዱስ ዮሐንስ ንንስሓ ዝበቅዕ ፍረ ግበሩ ኢሉ ንሰባት ናብ ንስሓ ጸዊዑ ካብ ዘመነ ኦሪት ናብ ዘመነ ሐድሽ መሰጋገሪ ስለ ዝኮነ ማለት እዩ። ካልኣይውን ድኅነት ዝተሰብከሉ ዓመት ናይ ምሕረት ማለት እዩ። ካልኣይ ከኣ ካብ ዘመነ ክረምቲ ናብ ዘመነ ቀውዒ ንሠጋገረሉ ወቅቲ ስለ ዝኮነ። ከምኡውን እቲ ኵሉ ዝከኣሎ ሕያው እግዚኣብሔር ንዘመናት ክረምትን ሐጋይን ብምፍርራቅ ንዓመታት ብኣዋርሕን ሰሙናትን ንመዓልቲ ብሰዓታትን ደቃይቅን ከምኡውን ለይትን መዓልትን እናኣፈራረቐ ንዘለዓለም ዝነብር ዘመናት ዘይልውጦ እግዚኣብሔር ኣምላኽ ከም ዝኮነ በዚ ናይ ዘመን መለወጢ ንምዝካር እዩ። ብካልእ ድማ ካብ ኦሪት ናብ መግሥተ ሰማያት ዘእቱ ወንጌል ወይ ንኣትወሉ ዘመን ስለ ዝኮነ እዩ።
2. ርእሲ ዓውደ ዓመት ቅዱስ ዮሐንስን ራጉኤል መልኣኽን በርተሎሜዎስ ሐዋርያን ጻድቕ ኢዮብን ኣብዚ መዓልቲ እዚ ይውዕሉ መዘከርትኦም ድማ በዓል ይግበረሎም።
ባህሊ ናይ ሕዝብና'ውን ኣሎ። እዚ መንፈሳዊ ባህሊ እዩ ካብ ሓደ ጳጐሜን ክሳብ ሓደ መስከረም ቅዱስ ዮሐንስ ኣብ ርባ ወሪድካ ማይ ጸሎት ይሕጸብ። ናይ'ዚ ምክንያት ከኣ ኣቐዲሙ ጻድቅ ኢዮብ ናብ ሩባ ዮርዳኖስ ወሪዱ ምስ ተሓጽበ ካብ ዝነበሮ ሕማም ተፈወሰ። ስለዚ ካብ ሕማምና ንኽንፍወስ ኢና ብዝብል እምነት'ውን ናብ ሩባታት ወሪድና ንሕጸብ። እቲ ካልአይ ከኣ ቅዱስ ዮሐንስ ኣብ ሩባ ዮርዳኖስ ናይ ንስሓ ጥምቀት የጠምቕ ከምዝነበረ፤ መጽሓፍ ቅዱስ ይነግረና ሎሚውን ንሕና ብማየ ንስሐ ክንጥመቕ ዘሎና ነዚ ምሳሌ ብምግባር ኢና።
3. መስከረም ማለት ኣቕዲመ ከም ዝበልክዎ ብቛንቛ ግእዝ መዝገበ ቃላት እንታይ ማለት እዩ ንዝብል ሕቶ፤ መስከረም ማለት መዘክረ ከርም ናይ ክረምቲ መዘከርታ መተሓሳሰቢ ማለት እዩ። እዚ ኣውደ ዓመት እዚ ናይ ኤርትራውያንን ኢትዮጵያውንን ግብጻውያንን ዘመን መለወጢ መሰጋገሪ መጀመርያ ወርሒ ናይ ዓመት ማለት እዩ። ቅድሚ ልደተ ክርስቶስውን ናይ ዓመት መለወጢ ተባሂሉ ብኣይሁዳውያንውን ኣውደ ዓመት ተባሂሉ ይፍለጥ ነበረ። መስየ ከርመ ዝብሉ ቃላት ክትርጐሙ ከለዉ ከረምቲ ሃለፈ ተባሂሉ ይንበብ ስለ ዝኮነ ናይ ክረምቲ መወዳእታ ናይ ቀውዒ መጀመርታ ስለዝኮነ እዩ። ነዚ ዘመናት ኣብ ኣርባዕተ ዘመን ተመዲቡ ንኣርባዕተ ወንጌላውያን ይካፈልዎ ንሳቶም ድማ ማቴዎስ ማርቆስ ሉቃስ ዮሐንስ እዮም። እዚ ዮሐንስ እዚ ግና ወልጌላዊ እዩ እምበር፤ እቲ መጥምቕ ኣይኮነን። እቲ ዮሐንስ መስጋገሪ ናይ ዓመት ኮይኑ ዘሎ ንሱ እቲ መጥምቕ ሰባኺ፤ መንግሥተ ሰማያት ቀሪባ ኣላ'ሞ ተነስሑ እናበለ ምምጻእ ናይ ጐይታና ዝሰበኸ እዩ። ንሱ ካብ ብሉይ ናብ ሓድሽ መሰጋገሪ ዝኮነ እዩ።

ኣብ'ዚ ሐድሽ ዓመት

ኣብዚ ሐድሽ ዓመት ካብ ዝተረኽበ ሐድሽ እክሊ ማለት ሰዊት መዓር ጸባ ቀዳማይ ፍርያት ስቅ ኢልካ ኣይብላዕን፤ ናብ ኣባት ነፍስካ ኢኻ ቅድም ተባርኾ፤ ድሐር ምስ ስድራኻ ትምገብ፤ ነዚ ኩሉ እግዚእብሔር ኣምላኽ ብማይ ኣብቊሉ ብፀሐይ ኣብሲሉ ብነፋስ ኣዕብዩ ኣብ ፍረ ዘብጽሕ እግዚኣብሔር እዩ'ሞ ቅድም፥ ንእግዚኣብሔር ምምስጋን ይግባእ። ምህርትካ ይበዝሕን ይብርክትን ስለዚ ከኣ'ዩ ቅዱስ ዳዊት ኣብ መዝሙሩ "ወትባርክ ኣክሊለ ዓመተ ምሕረትከ ወይጸግቡ ጠላት ገዳም ወይረውዩ ኣድባረ በድው" ዝበለ ትርጉሙ ከኣ "ናይዚ ዓመት እዚ ፍረ እክሊ ትባርክ፤ እቶም እምባታትን ኮረቢትን ብጠሊን ብልምላሜን ይጸግቡ፤ እቶም ምድረ በዳን ሰሃራን ከኣ ረውዮም ይነብሩ" ዝበለ። መዝ 65 ፡ 11

ዝሓለፈ ዓመት ዘመነ ማርቆስ ነይሩ ሎሚ ግን ዘመነ ሉቃስ ይቕበሎ ኣሎ ኣብ ዘመነ ሉቃስ ፪፻፲፭

ናይ ሎሚ ዘመን መጥቅዕ ፡ ኣበቅቴ ፡ ጾመ ነነዌ ፡ ጾመ ኣርብዓ ፡ ደብረ ዘይት ፡ ሆሣዕና ፡ ስቅለት ፡ ትንሥኤ ፡ ርክበ ካህናት ፡ ዕርገት ፡ ጰራቅሊጦስ ፡ ጾመ ሰነ ፡ ጾመ ድኅነት ዝውዕልሉ ብኸም'ዚ ዝስዕብ ንመዘከርታ አቕርብ።

• ባሕቲ መስከረም ሰንበት ፩
• ባሕቲ መስከረም ሰንበት ፩
• ዓብቅቴ ፱
• መጥቅዕ ፳፩
• ጾመ ነነዌ ጥሪ ፳፱
• ጾመ ዓርብዐ የካቲት ፲፫
• ደብረ ዘይት መጋቢት ፲
• ሆሣዕና ሚያዝያ ፩
• ስቕለተ ክርስቶስ ሚያዝያ ፮
• ትንሣኤ ክርስቶስ ሚያዝያ ፰
• ርክበ ካህናት ግንቦት ፪
• ዕርገተ ክርስቶስ ግንቦት ፲፯
• ጰራቅሊጦስ ግንቦት ፳፯
• ጾመ ሐዋርያት ግንቦት ፳፰
• ጾመ ድኅነት ግንቦት ፴
• ጾመ ፍልሰታ ነሓሰ ፩
• ጾመ ነብያት ሕዳር ፲፭ እዩ።

ኣብ መደምደምታ

ኣብ መደምደምታ ክብሎ ዝደለኩ ኣሎ ንሱ ድማ ንህዝብና ከምዚ ናይ ሎሚ ገይሩ መሪርዎ ኣይፈልጥን እዩ። እሞከደኣ ከም'ቲ ዮሐንስ ኣብ ስብከቱ ዝበሎ ኣቱም ውሉድ ኣትማን ካብ'ቲ ዝመጽእ ዘሎ ቁጥዓ ክትመልቑኸ መን ሓበረኩም ዝበሎም ሕጂ'ውን ንሕና ብጣዕሳ ተነሲሕና ናብ እግዚኣብሔር ምምላስ ጥራይ እዩ ዘዋጽኣና። ከምዚ ናይ ሎሚ ዝበለ ጥፍኣትን ብርሰትን ብዘይ ምክንያት ኣይኮነን፤ ዝገበርናዮ በደል እንተ ዘይህሉ ከምዚ እንዳ በልና ኣይምጠፋእናን ነዚ መፍትሒ ግን ናብ እግዚኣብሔር ምምላስ ጥራይ እዩ እንኮ መፍትሒ እሞ ናብ እግዚኣብሔር ዝምለስ ልቢ ይሕድረና። ደጊመ ርሑስ ሐድሽ ዓመት ይግበረና፤ ኣሜን።

. . . . .~ .~ . ~ .

ምዝራእን ምዕጻድን

“ሰብ ነቲ ዝዘርኦ ንእኡ ኸኣ ኪዓጽድ እዩ’ሞ፡ ኣይትሸበሩ ኣምላኽ ኣይዕሾን’ዩ።” (ገላ 6፡7)

እዚ ባህርያዊ ሕጊ ኣምላኽ ካብ ምጅማር ዓለም ዝሰርዖ እዩ፡ ግዜ ዘርእን ግዜ ዓጺድን፡ ግዜ ቁሪን ግዜ ዋዒን፡ ግዜ ክረምትን ግዜ ሓጋይን፡ ግዜ መዓልቲን ግዜ ለይቲን(ዘፍ 1፡11) እዩ፡ እዚ ዘየቋርጽ ድማ እዩ። ኩሉ ሰብ ጥዑይ ዘርኢ ወይ ሕማቕ ዘርኢ፡ ናይ በረኸት ዘርኢ፡ ወይ ናይ መርገም ዘርኢ፡ ዘርኢ ዓወት ወይ ዘርኢ ውድቀት፡ ናይ ነጻነት ዘርኢ ወይ ናይ ባርነት ዘርኢ፡ ናይ ድሕነትን ዘልኣለማዊ ህይወትን ዘርኢ ወይ ዘርኢ ኩነኔን ሲኦልን ዘርኢ ኪዘርእ ይኽእል። ከም’ዚ ብምዃኑ ሓደ ጸሓፋይ ይብል “መፈጸምታ ወዲ ሰብ ኣምላኽ ጽሒፍዎ እዩ ግና ብኢድ ወዲ ሰብ ባዕሉ እዩ።” ስለ’ዚ ምዝራእን ምዕጻድን ኣብ ህይወትና እንተ ኣተግቢርናዮም እዞም ዝስዕቡ ኣገደስቲ ትምህርታት ክንመሃር ንኽእል።
(1) ዓጺድና እነእትዎ ኣታዊ፦ ፍረ ናይ’ቲ ዝዘራእናዮ ሓደ ዓይነት ዘርኢ እዩ። ስርናይ ዝዘርእ ስርናይ ይዓጽድ፡ ዕፉን ዝዘርእ ዕፉን ይዓጽድ፡ ጎይታና ኢየሱስ ክርስቶስ ክብሪ ንስሙ ይኹን ነዚ ከብርሃልና ከም’ዚ ይብል “ ሰባት ካብ ተኾርባ’ዶ ወይ ፍረ በለስ’ዶ ወይኒ ክእክቡ ይኽእሉ”። ስለ’ዚ ኮሚደረ ዘሪእካ ኣራንሺ ክትጽበ ኣይትኽእልን ኢኻ፡ ስለዚ እቲ ዝዘራእካዮ ምስ’ቲ እትዓጽዶ ዘርኢ ምስቲ እትዓጽዶ ሓደ ዓይነት እዩ። ሃዋርያ ጳውሎስ ድማ ነዚ እዩ” ሰብ ነቲ ዝዘርኦ ንእኡ ኸኣ ክዓጽዶ እዩ ዝበለ”(ገላ 6፡7) ከምኡ’ውን ንሱ ከም’ዚ ክብል ገሊጹ ኣሎ “ እቲ ንስግኡ ኢሉ ዝዘርእ ካብ’ቲ ስጋስ ጥፍኣት ክዓጽድ እዩ። እቲ ንመንፈሱ ኢሉ ዝዘርእ ግና ካብ’ቲ መንፈስ ናይ ዘልኣለም ህይወት ክዓጽድ እዩ።”(ገላ 6፡8-9)
ሓደ ሰብ እቲ ዝዘርኦ ውሑድ እንተ ኮነ እቲ ዝዓጽዶ ግና ብዙሕን ካዕበት እዩ። ኣብ ሓደ ሰከንድ ሰብ ክቐትል ይኽእል ንሱ ዝዓጽዶ ግና ንሕልፈት ማእሰርቲ ወይ ክቕተል ብስቓይ ወይ ሲኦል ንዘልኣለም እዩ ዝኸውን።
እስከ ነዚ ሕጊ ኣብ ጽቡቕን ክፉእን ኣተግቢርና ንርኣዮ፦
ሀ. ኣብ ናይ ክፍኣት መሬት ዝዘርኡ፦
ያዕቆብ ኣቦና ናይ ምትላልን ናይ ምድንጋርን ዘርኢ’ዩ ዘሪኡ። ንሱ ነቡኡ ንይስሓቕ ኣታለሎ፡ ሓሶት’ውን ተዛረቦ፡ ግና እንታይ’ዩ ዝዓጸደ? ዝዓጸዶ ሓደ ዓይነት እዩ፡ ደቁ ኣታለልዎ ሓሶት’ውን ተዛረብዎ። “ ኣራዊት በረኻ ንዮሴፍ በሊዕዎ” በሉ። “ፈርዖን ነፍስ ወከፍ በኹሪ እስራኤል ናብ ፈለግ ኒል ብምጥሓል ቀተለ። እመኑ ኣይትእመኑ ንሱ ዝዘርኦ እዩ ዓጺዱ፡ ድሕሪ ወዱ ኩሎም በኹሪ ግብጺ ምቕታል፤ ፈርዖን ንባዕሉ ምስ ሰራዊቱ ኣብ ባሕሪ ኤርትራ ጠሓለ(ዘጸ 14)።
ለ. ኣብ ጽቡቕ መሬት (ጽቡቕ ተግባር) ዝዘርኡ፦
“ዮሴፍ ዘርኢ መከራን ቅንዕናን ዘርአ፣ ነቲ ዝተቐረበሉ ሓጢኣት ማለት ብሰበይቲ ጎይትኡ ሓጢኣት ንክገብር፤ ንፉንፉን ተግባራት ነጸገ፤ ከም’ዚ’ውን በለ “ ነዚ ከም’ዚ ዝኣመሰለ ዓቢ ክፍኣት ኣንጻር ኣምላኽ ከመይ ጌረ ክገብሮ ይኽእል በለ”(ዘጸ 39፡9) ጎይታ ድማ ብግልጺ ፈደዮ፤ ድሕሪ ፈርዖን ኣብ መላእ ግብጺ ካልኣይ ሰብ ኮነ። “ ዳንኤል’ውን ብልቡ ካብ’ቲ ናይ ንጉስ ከም ፍንፉን ግደ ከይውሰድ ከምኡ’ውን ወይኒ ከይሰቲ መደበ”(ዳን 1፡8)። ንሱ ዝዓጸዶ ምሉእ ጥዕና ፡ ዝዓበየ ቦታ ነይ ራእይን ትንቢትን እዩ ኔሩ” ኣምላኽ ካብ ኣፍ ኣናብስቲ ጉድጋድ ኣድሓኖ፡ ንሱ ብግቡእ ሕልሚ ንጉስ ነብከድነጾር ተርጎመ፤ ንሱ ሊቀ መላእክት ቅዱስ ገብርኤል ነቲ ኣብ ሕልሙ ዝነገሮ “ዝተባረኽካ ሰብ” ብምባል ዝገለጾ፣ ክርኢ በቕዐ።

ምዝራእ ዝወሓደ እዩ እቲ ዓጺድ ግና ካዕበት(ብዙሕ) እዩ።

እቲ ዘራኢ “ነቲ ዘርኢ ኣብ ኢዱ ጨቢጡ ወይ ኣብ ንእሽቶ ኸረጺት ብምውሳድ ኣብ ኩሉ ቦታ ድማ ይዘርኦ (ፋሕ የብሎ)። ኣብ ግዜ ዓጺድ ግን ንሕና ሓደ ዓቢይ ግርሁ ወይ ዓቢይ ዝሕፈስ ኣዝርእቲ፤ ኣትክልቲ፤ ፍረታት፡ ኣግራብ፡ ዝመልኦ ዘርኢ ይረክብ። እዚ’ውን ኣብ ቅኑዕ ወይ ግጉይ ዘርኢ ምዝራእ ጌርካ ክግለጽ ይከኣል እዩ።
ሀ. ኣምላኽ ናይታ ክልተ ሳንቲም ዝሃበት መበለትን ናይ ማርያም ህያብ ብልቃጥ ዝመልአ ፍሉይ ጨናን ኣመስገነ። ነዚኦም ድማ ብሃብትን ብልግስን ፈደዮም። እቲ ምዝራእ ውሑድ እዩ እቲ ዝዕጸድ ግና ብዙሕ እዩ።
ለ. ኣናንያ ምስ ሰበይቱ ሰጲራ ንቅዱስ ጴጥሮስ ሓሰዉ፡ ከምኡ’ውን ብቕልጡፍ ክልቲኦም ናይ ሞት ፍርዲ ዓጸዱ።
ክርስቶስ ጎይታና ከም'ዚ ይብል “እቲ ንብጻዩ “ ኣታ ዓሻ” ዝብል ንገሃነም ሓዊ ክፍረዶ እዩ።”(ማቴ 5፡22) እቲ ዘርኢ ውሑድ’ዩ እቲ ዓጺድ ግና ብዙሕ’ዩ። ንእሽቶ ቃል ሕሜት ኣብ ናይ ሓደ ወዲ ወይ ጓል ወይ ስድራቤት ወይ ቤተ ክርስትያን ዓቢ ዕንወት ከኸትል ይኽእል’ዩ።
ሓደ ሰብ ብሓደ ጥይት ኣብ ሓደ ሰከንድ ሰብ ክቐትል ይኽእል፡ ንሱ ዝዓጽዶ ግና ንሕልፈት ማእሰርቲ ወይ ብስቓይ ክቕተል ወይ ሲኦልን ዘልኣለማዊ ጥፍኣት’ዩ። ስለ’ዚ እቲ ዝዘርኦ ውሑድ እኳ እንተኾነ እቲ ዝዓጽዶ ግና ካዕበት እዩ።

እቲ ዘርኢ ዘይርአ እዩ፡ እቲ ዓጺድ ግና ግሉጽ’ዩ።

ሓደ ዘራኢ ንዘርኢ ክዘርእ ኲዒቱ ይቐብራ ኣብ ግዜ ዓጺድ ግና ኩሉ ሰብ ዝርእዮ ሓደ ግርሁ ብምሩጽ ዕፉን ወይ ዓበይቲ ኣትክልትን ኣግራብን ክመልእ እዩ።
ሀ. ቅዱስ ዳዊት ዝሙት ፈጸመ ምስኡ ድማ ቅትለት። ንሱ ክሕባእ ሓጢኣቱ ክኽውል ፈተነ ግና ኣይተዓወተን። ንሱ መሪር ምህርቲ ሓፈሰ ከምኡ ድማ ሓደ ዓይነት መልሲ ብዝተዓጻጸፈ’ዩ ሓፊሱ። ኣምላኽ ንነብይ ናታን ልኢኹ ሰማያዊ ፍርዲ ገለጸሉ “ ንስኻ ንኦርዮ ብሴፍ ቀተልካ፡ ሴፍ ካብ ቤተካ ኣይክርሕቕን’ዩ ……… ንስኻ ብሕቡእ ስለዝገበርካዮ፣ ኣነ ግና ኣብ ቅድሚ ኩሉ እስራኤል ኣብ ቅድሚ ጸሓይ ነዚ ክገብሮ እየ”(1ይ ሳሙ 12፡9-12)
ለ. ንጉስ ኣከኣብን ሰበይቱ ኤልዛቤልን ንናቦጽ ክቐትሉ ናይ ወይኒ መሬቱ ክወርሱ ብሕቡእ ተመሳጸሩ። ኣምላኽ ግና ብሕቡእ ዝርኢ ብግልጺ ሕነ ፈደዮ። ንሱ ንነብይ ኤልያስ ናብ ንጉስ ኣከኣብ ብምልኣኽ ከም’ዚ በሎ” እግዚኣብሄር ከም’ዚ ይብል ኣሎ፣ ቀተልካን ንብረት ዘረፍካን‘ዶ? ኣብ’ቲ ኣኽላባት ደም ናቦጽ ዝለሓስሉ፤ ኣኽላባት ድማ ደምካ ክልሕሱ ኢዮም” ብኣንጻር’ዚ ብሕቡእ ጽቡቕ ምስትገብር ኣምላኽ እቲ ብሕቡእ ዝርኢ ኣብ መንግስቲ ኣምላኽ ብጋህዲ ክፈድየካ ተስፋ ኣተስፍዩ ኢዩ።(ማቴ 6) ማር 1፡35 መዝ 139፡23-24 መዝ 119፡18
“ወዲ ሰብ ብኽብሪ ኣቦኡ ምስ መላእኽቱ ኪመጽእ እዩ’ሞ፤ ሽዑ ንነፍስ ወከፍ ከከም ግብሩ ኪህቦ ኢዩ።”(ማቴ 16፡27)
ስለዚ “ሰብ ነቲ ዝዘርኦ ንእኡ ኸኣ ኪዓጽድ እዩ’ሞ፡ ኣይትሸበሩ ኣምላኽ ኣይዕሾን’ዩ።” (ገላ 6፡7) “ ንግብርኻ እፈልጦ ኣለኹ። ዓቕምኻ ሒደት ኢዩ። ንቓለይ ሓሊኻዮ ንስመይ’ውን ኣይከሓድካዮን’ሞ፤ እንሆ ሓደ እኳ ክዓጽዎ ዘይክእል ክፉት ኣፍደገ ሂበካ ኣሎኹ።”(ራእ 3፡9)
ይቅጽል ••••